گۆتنێن بێدهنگ (یهكبوونا كوردان و سیاسهت)
ژبۆ رۆژئاڤا گهلهك جاران من د نڤیسێن خوه دا بهحس كریه كو پێویسته كورد ل سووریێ خوهدیێ مافێن خوه بن. یانی وهك كو هون ژی دزانن د دهما پاراستنا كۆبانێ دا رهوش خراب بوو و ههر وهها چاڤێ ههموو جیهانێ ل كوردان بوو. ئێ كو گۆتن “كۆبانێ هاها كهت و هاها كهت “ ل ههمبهرێ وهلاتێن ههڤپهیمان بوون دوستێن كۆبانێ و گۆتن “ئهم سلاڤێن خوه ژ كۆبانێ ره دشینن”
مخابن ئیرۆ دووباره رهوشا گوههریه و ههموو جیرانێن كوردا دوژمناتیا كوردان دكن. د ئاژانسێن توركیا دا زماندرێژیهك مهزن ل سهر یهپگه و پهیهده ههیه. ب راستی ب قاسێ كو ل سهر یهپگه زماندرێژیێ دكن ئهوقاس ل سهر داعشێ زماندرێژیێ ناكن! ئهڤ ژی د ده خویاكرن كو سیاسهتا توركیا ب كیژان رهنگێ یه. د ههر ئاخافتنێ دا سهرۆككۆمار ئهردۆگان دبێژت: كو پهیهده تهرۆرسته. ل ههمبهرێ وێ ئهمریكا ژی دبێژت كورد دوستێن مه نه و ههر وهها پهیهده و یهپگه ژی ههڤكارێن مه نه. لێ مخابن ژ بۆ نا سهرخوهبوونا رۆژئاڤا ههم ئهمریكا ههم ژی یهكێتیا ئهوروَپا مخابن دروو دلهیزن. یانی ههتا نها ب فهرمی تو كهس نهگۆتیه كو كورد د بریارێن خوه دا رزگارن و خوهدیێ ئاخا خوه نه. ئهڤ ژی وهك گومانهك مهزن د هشێ مرۆڤ دا دمینت.
كورد بهریا جهرابلووسێ هێریشێ رهقایێ دكن. بهلێ راسته ئهڤ بریارا كوردا نینه لێ پێویسته كو كورد ژی پاشهرۆژا خوه بفكرن. یانی بهریا جهرابلووس ههگهر رهقا تێك بچت وێ دهمێ وهلاتیێن ههڤپهیمان دكارن بێژن كو بلا كورد سهرخوهبوونا خوه ئیعلان نهكن. یانی د بن كۆنترۆلا ئهسهد ئان ژی یهكی وهك وی دا بمینن.
ئهز دخوازم كو د ڤێ نڤیسێ دا بالداریا وه بكشینم ل سهر مافێن كورد و كوردستانێ. بهلێ راسته ئهم هاتنه پهرچهكرن و ژ ههڤ جوودا بووینه. د سهدسالا 21همین دا ئێدی تو كهس بهحسا وهلات ژی ناكهت. لێ ل ههمبهرێ جیهانێ چما ب تهنێ كورد خوهدیێ ئاخا خوه نینن? بنێرن كو د دهمهك نێزیك دا وێ سایكس پیكۆ ب داوی ببت و ههر دهولهتهك بزاڤێ ل گۆر بهرژهوهندیێن خوه دكهتن. د سهری دا ژی دهستههلاتدارێن ئاخا كوردستانێ، چاڤێن خوه زیق كرنه و ناهێلێن كو كورد ژ بۆ پاشهرۆژا خوه بفكرن. ل باشوور، باكوور و رۆژئاڤا شهرهك دژوار بهردهوام دكهت و رێكخستنێن سیاسی د ڤان شهرێن گهمار دا مخابن ژ بۆ پاشهرۆژا كوردا و بهرژهوهندیێن كوردا نافكرن. نه كو ئهو دژی كورد و كوردستانێنه لێ مخابن د دهما شهر دا ههر تشت تێك دچت و تشتێ ههری گرنگ ب تهنێ د بت شهر.
ژ بۆ كۆنگرهیا نهتهویا كوردستان ل ههر چار پارچان ههر كهس هشیاره لێ مخابن سیاسهتا چار پارچن نه ل گۆر خوهستهكێن گهل دمهشت. د ههر هێزێهك سیاسی دا كێماسیێن مهزن ههنه. مافێن پارتێن وان ئێن سیاسی بهریا مافێن كورد و كوردستانێ تێن. ژ بهر وێ ژی ئێدی پێویسته كو ل ئاخا كوردان سیاسهت وهره گوههراندن. ب راستی ل گۆر فكرێ من ژبۆ كوردان د ڤی دهمی دا پارتیێن سیاسی نه پێویستن؛ یا ههری پێویست یهكبوونیا كوردایه. ل باشوور، باكوور و رۆژئاڤا و ههر وهها ل رۆژهلاتێ ژی ئێدی دهم دهما یهكبوونا كوردایه. ژ بیر مهكن كو ب سهد سالانه گهلێ كورد چاڤ ل رێ یه.
