ئهرێ چاكسازی چی یه؟
وهكو یا دیار ئهڤرۆكه ل ههریما كوردستانێ مه گهلهك گوه ل پهیڤا چاكسازی دبیت و ب تایبهتی ژ لایێ لایهنێن سیاسی و حزبی ڤه، بهلێ وهكی ئهم ههمی دزانین ئهڤرۆكه گهندهلی ب شێوهكێ بهرچاڤ ل ههرێما كوردستانێ ههیه و یا بهربهلاڤه د ههمی دامودهزگههێن میری و حزبی دا و خهلكێ مه ژی داخازا چاكسازیان دكهت ئهرێ وهكی مه گۆتی چاكسازی چی یه؟ پتریا خهلكێ مه هوسا هزر دكهن كو چاكسازی ئهوه چهند كهسانهكن، ئانكو چهند بهرپرسهكن گهندهلی كریه و مال و پارێ حكوومهتێ ب رێكێن نهقانوونی بریه و هوسا ل سهر كیستێ فهقیر و ههژاران زهنگین بووینه.
پتریا خهلكێ مه هوسا هزر دكهن ئهگهر ئهڤ كهسه، ئانكو ئهڤ بهرپرسه بێنه محاسبهكرن، ئانكو دادگههكرن ئهڤه چاكسازی یه و دێ بدوماهیك ئێت بهلێ ئهم دبێژین ئهڤه پشكهكه ژ چاكسازی یێ و پشكهكا ههری گرنگه ژ چاكسازیێ، بهلێ من باوهری نینه ئهو چاكسازیا خهلكی دڤێت بهێته كرن، چونكی ئهڤ گهندهلیه د ناڤ ههمی لایهنێن سیاسی دا ههیه و چ لایهنهكێ سیاسی یێ ئاماده نینه كادرێ خوه، ئانكو بهرپرسێ د ناڤا حزبا خوه دا بدهته دادگههێ و ئهگهر لایهنهكێ سیاسی بێژیت ژی بهلێ ئهو دبێژیت لێ ناپێژیت، بهلێ پا چاكسازی ئهڤه ب تنێ نینه چاكسازیا ههری مهزن ئهوه كو دڤێت د ناڤا دامودهزگههێن حكوومی و حزبی دا بهێته كرن، ڤێجا ههكه چاكسازیێن ئیداری ژی بهێنهكرن گهلهك باشه و بهری ههر جههكی دڤێت د ناڤا پهرلهمانێ كوردستانێ دا بهێته كرن ئهگهر ئهم ژ چاكسازیا پهرلهمانێ كوردستانێ دهست پێ بكهین و بێژین ئهرێ مه پهرلهمانهك ههیه ل دووڤ ماف و بهرژهوهندیێن خهلكێ خوه بگهریت؟ بێگومان دێ بێژین نهخێر چونكی پهرلهمانێ كوردستانێ یێ بوویه جهێ سیاسهتكرنێ و كۆتله چێكرنێ و دژایهتیكرنا ئێك و دو نهبوویه جهێ یاسادانانێ و چاڤدێریكرنێ ل حكوومهتێ! ئهرێ بۆچی پهرلهمانێ كوردستانێ ببیته جهێ سیاسهتكرنێ؟ خهلكێ مه دێ دهنگێ خوه دهته ئهندامێن پهرلهمانی داكو بچنه پهرلهمانی و نوونهراتیا وان بكهن و كارهكێ باش بۆ خهلكێ خوه بكهن، بهلێ پا ب مخابنی ڤه پهرلهمانتارێن مه زوو خهلكێ خوه ژبیر دكهن و ب تنێ بۆ بهرژهوهندیێن خوه و لایهنێ خوه یێ سیاسی كار دكهن! ههر وهكی مه گۆتی پهرلهمانتارێن مه ب تنێ نوونهرێن لایهنێ خوه یێ سیاسی دكهن و نه نوونهرێن خهلكینه، چونكی وهكی ئهم دبینین لایهنێن سیاسی د ناڤا پهرلهمانی دا وهكی كێر و پهنیری لێ هاتینه! ڤێجا ب ڤی شێوهی ئهڤه دێ چ خزمهتهكێ بۆ خهلكێ خوه پێشكێش كهن، لهورا دڤێت بهری ههر تشتهكی چاكسازی د ناڤا پهرلهمانێ كوردستانێ دا بهێته كرن و ئهگهر ئهم لاینێ بجهئینهر بێژین كو حكوومهته دێ بێژین دڤێت چاكسازی د ناڤا حكوومهتێ ژی دا بهێته كرن و ب تایبهتی د ناڤا وهزارهتان دا و دڤێت وهزارهتێن مه كارو پلانێ خوه یێن ستراتیژی ههبن نهكو ههردهما ئاریشهك پهیدا بیت قهیران د ناڤا ههرێما كوردستانێ دا سهر هلدهن، بۆ نموونه ئهگهر ئهم وهزارهتا چاندنێ بێژین چ كار و پرۆژێن ستراتیژی یێن دوومدرێژ بۆ ههرێما كوردستانێ ههنه؟ وهكی مه ههمیا دیتی چار رۆژا دهرگههێ حاجی عمران هاته گرتن هێك نهمانه ل ههرێما كوردستانێ یان ژی چار رۆژان دهرگههێ ئیبراهیم خهلیل بهێته گرتن باجان سۆرك نامینه ل ههرێما كوردستانێ!، ڤێجا حهتا كهنگی دێ حكوومهت ب ڤی رهنگی بیت و ههمی وهزارهتێن دی ژی هوسا نموونه مه گۆت وهزارهتا چاندنێ. ههكه وهزارهتێن دی گهلهك خرابترن وهكی وهزارهتا سامانێن سروشتی و وهزارهتا كارهبێ و وهزارهتا دارایی و ههمی وهزارهتێن دی ژی وهكی وانن، ههروهسا دڤێت ههمی دامودهزگههێن میری یێن سهر ب ڤان وهزارهتان ڤه ژی چاكسازی د ناڤ دا بهێته كرن، چونكی پتریا خهلكێ مه نهدرازینه ژ سیستهمێ رێڤهبهریێن میری، بۆ نموونه دهمێ كهسهكی كارهك ل رێڤهبهریهكا میری ههبیت دێ وی كهسی ل گهلهك جهان ئینن و بهن حهتا كارێ وی ب دووماهیك دئینن، بهلكو گهلهك جاران تهعاملا فهرمانبهری ژی دگهل خهلكی یا جوان نینه و هوسا هزر دكهت ئهو یێ منهتهكێ ل خهلكی دكهت دهمێ كارێ وی دكهت.
ڤێجا ئهڤه ههمی پێدڤی ب چاكسازیێ نه و دڤێت بهێنه سیستهماتیك كرن، داكو پێشكهفتن چێ ببیت و كارئاسانتر لێ بێت، لهورا دڤێت چاكسازی د ناڤا حزب و لایهنێن سیاسی ژی دا بهێته كرن و بهری ههر تشتهكی دڤێت لایهنێن سیاسی چاكسازیان د سیاسهتا خوه دا بكهن، چونكی ئهو سیاسهتا ئهو ئهڤرۆكه پهیرو دكهن نهدبهرژهوهندیا چ لایهنهكێ سیاسی دایه و نهدبهرژهوندیا خهلكی ژی دایه، بهلكو نهدبهرژهوهنیا نهتهوا كورد ژی دایه، ههروهسا دڤێت حزب و لایهنێن سیاسی ب چ رێیان دهست تێوهردانێ د كار و ئهركێ حكوومهتێ دا نهكهن، داكو حكوومهت بشێت كارێ خوه ب دروستی بكهت و ئهز دبێژم ههرێما كوردستانێ ههمی دامودهزگههێن وێ پێدڤی ب چاكسازیێ نه و ئهڤه ژی ب شهڤ و رۆژهكا نائێته كرن، بهلكو ئهڤه بیست و چار ساله یێ خراب دكهن مه بیست و چار سالێن دی ژی دڤێن حهتا ئهم ب تهمامی دروست دكهین
مانشێت: پهرلهمانتارێن مه زوو خهلكێ خوه ژبیر دكهن و ب تنێ بۆ بهرژهوهندیێن خوه و لایهنێ خوه یێ سیاسی كار دكهن
مانشێت: ئهڤه بیست و چار ساله یێ خراب دكهن مه بیست و چار سالێن دی ژی دڤێن ههتا ئهم ب تهمامی دروست دكهین
