كێ باكورێ كوردستانێ كاڤل و وێران كرPKKێ یان توركان؟!
شۆرهش و خهبات ل ههر پارچهكا كوردستانێ، مافهكێ سروشتی و رهوایێ گهلێ كورده. شۆرهش و بهرخوهدان ژ بۆنا ئازادی و سهرفرازیا گهله، ژ بۆ خوهشكرنا ژیانا ههمی مللهتی و گههشتنا ئارمانجانه، دا كو بهر ب كنارێن دووماهیێ یێن تهناهیێ ڤه ببهت. ههكه ئهو شۆرهش د بهرژهوهندیا مللهتی و پارستنا سهر و مال و سامان و ژیانا وی دا نهبیت! شۆرهش بهروڤاژی دژی مللهتیه، چونكو دێ زیان و نهخوهشی و دهربهدهری و مالوێرانیێ گههینتێ، كو د راستی دا دڤێت ئارمانج و بهرێخودانا وێ ئهو نهبیت.
دیمهنێ ڤێ دووماهیێ یێن باژێرێ گهڤهڕێ و بهری وی یێن گهلهك دهڤهرێن دی یێن باكورێ كوردستانێ، ئاگری دئێخته دل و جانێ ههر كهسهكی، كو توركان چ ئینایه سهرێ وان دهڤهران ژ مالوێرانی، كاڤلكرن، دهربهدهری و.. هتد. ل ڤێرێ چهند پرسهك وهكو كوردهك خوه د مهژیێ مرۆڤی دا دهلاڤێن، ئهرێ ل باكورێ كوردستانێ ئهڤه ئارمانجا شۆرهشا كوردیه؟! ئهرێ ئهڤهنه ئهو سۆز و پهیمان یێن PKK سهرێ چهندین سالانه ددهته خهلكی؟ ئهرێ ئهڤه ئهو پلانن یێن رێبهرێن شۆرهشێ – ئهوێن ژ درووشمێ خوه یێ چهندین سالان كوردستانا مهزن لێڤهبووین و ماینه ب خوهسهریا دیمۆكراتیك ڤه، كو كهس نزانیت چی یه، ههكه ئهو ب خوه نهبن- كو ل شوونا توركێن زالم و زۆردار كوردستانێ ژ ناڤببن و كاڤل بكهن؟! ئهرێ شهرێ ل ناڤ مال و باژێران چ مفا گههانده خهلكی و دۆزا گهلێ مه ل باكورێ كوردستانێ؟ ئهڤه و چهندین پرسێن دی كو بێنهكرن، یا ژ ههمیا گرنگتر ئهوه، كی ئهگهربوو ئهڤ چهنده ل ناڤ باژێران بێته ئهنجامدان، PKK یان حوكمهتا تورك؟!
ههكه بزڤڕین چهندهكێ ب كورتی بهحسێ شۆرهشێن كوردی ل باشوورێ كوردستانێ بكهین، كو ئێك تمامكهرا یا دی بوویه، و ڤهقهتیان نهكهتیه بزاڤا رزگاریخوازا گهلێ مه. ب درێژیا پتر ژ نیڤ چهرخی بارزانیێ نهمر سهركێشێ شۆرهشا كوردی بوویه، بزاڤ و خهباتێن بێ راوهستیان كرینه، بهری هینگێ ژی شۆرهشێن بارزان و یا شێخ مهحموود، چوجا ڤان شۆرهشان شهر و كوشتن نهئیناینه د ناڤ باژێران دا، كو ژ ئهگهرێ مال و مولكێ كاڤل و وێران ببت. دیسا ل شۆرهشێن ئیلۆن و گولانا پێشكهڤتنخواز ژی، كو گهلهك جاران پێشمهگه و شۆرهش د گوپیتا سهركهفتنێ دابووینه و دربێن مهزن ل رژێما بهعس ددان و د شیان دا بوویه باژێرێن مهزن ژی بگرن و رزگار بكهن، لێ ئهڤ چهنده نهدكرن، دا زیان نهگههته خهلكێ سڤیل و دهرفهت بۆ دوژمنی پهیدا نهبیت، ب بهانهیا ههبوونا پێشمهرگهی ل ناڤ باژێران و شهری بێخته د باژێری دا و كوشتارێن مهزن ئهنجام بدهت و مالێن خهلكی خراب بكهت و دزی و تالان و جهردهیێ بكهت!
ئهڤه ژی خالهكا ئیجابیه د ناڤ بهرپهرێن پتریا شۆرهشێن كوردی دا ل باشوورێ كوردستانێ، گهرهكه ل باكور مفا بۆ خوه ژێ وهرگرتبایه، نهبهرۆڤاژی كربا! كو شهر خسته د ناڤ مال و باژێران دا، و ئهنجام ژی ئهم یێن ل سهر شاشێن TV رۆژانه دبینن، كا چ ب سهرێ خهلكێ ههژار و پهریشان و بێ خودان دا هاتیه.
ئهڤ شهرێن دووماهیێ یێن PKKێ ل باژێران كرین، ب تنێ زیان گههاندیه وهلاتیان و باژێرێن كوردان، ئهوان ئهو كر یا حوكمهتا توركیا دڤیا! كو هێجهت و بهانهك ههبیت، باژێرێن كوردان پێ خراب بكهت، ههر وهكی بهری هینگێ ب سهدان گوندێن كوردان كاڤل و وێرانكرین، ب بهانهیا ههبوونا PKKێ ل وان دهڤهران، لێ ل باژێران نهدكاری وێ یهكێ بكهت، چونكو چو بهانه و ئهگهر د دهست دا نهبوون. بهلێ PKKێ ب سهرهشكی و نهرێزانیا خوه و ههروهسا گوهدانا سهرانێن وێ بۆ كهسێن دهرهكی، رهوش ب ئاقارهكی نهدیارڤه بر و رێ دا حوكمهتا زالما توركیا و سهرۆكێ وێ ئهردۆگان، ئهوێ نهخوهشیا سولتانیێ گرتی، و خهونان ب ڤهگێڕانا دهستههلاتا ئمپراتۆریا ئۆسمانی ڤهدبینت، كو هێریشان بینه سهر باژێرێن كوردان و كاڤل و وێران بكهن.
ههر چاوا بیت، ل گۆر دیتنا من PKK ئهگهرێ سهرهكی یێ ڤی شهرێ ل ناڤ باژێرانه. چاوا؟ ئهوێ دكاری پشتی تێكچوونا پرۆسا ئاشتیێ و نهمانا ئاگربهستێ، جارهكا دی شهری بزڤرینته چیا، ب رهنگهكی وهسا كو چو زهرهر و زیان نهگههشتبانه خهلكێ سڤیل.
ههردهم دوژمن و نهیارێن مه كوردان د بیاڤێ تهكتیك و سیاسی دا، ژ مه دشارهزا و زیرهكترن، ژ بهر كو هندی سهربورێن هاتینه سهر مللهتێ كورد، مه بۆ خوه چو مفا ژێ وهرنهگرتیه، ژ مهدحا پێڤهتر!! ئهم گهلهك د وارێ یاریێن سیاسی دا دخشیم و نهزانن، حوكمهتا تورك ب زانیبوون شهر ب PKKێ دا كرن! لێ ئهڤ جاره چاوا شهر دهست پێ بكهت؟ ههر وهكو وێ دڤێت، ئانكو ل ناڤ باژێران بیت، دا كێمتر زیان ب حوكمهتێ بكهڤیت و زیاندارێ مهزن مللهتێ كورد بیت! ب ڤی ئاوایی شهری دهست پێ كر، چهندین باژێر وێران بوون، ب هزاران وهلاتی كۆچبهر و دهربهدهر بوون و مولك و مالێن خوه بجه هێلان، ب دههان خهلكێ سڤیل و بێ گونهه هاتنه كوشتن.
ل دووماهیێ دبێژم دبیت ئهڤ ئۆپهراسیۆنێن كاڤلكرنا باكورێ كوردستانێ ژ مێژه د سهر و خهیالێن دهستههلاتا توركیا دا ههبن و ئێك ژ پلانێن وێ یێن گرنگ بن! لێ ئهوێ ئهو دهرفهت و رێ و بهانه نهددیتن كو ڤێ مهرهما خوه پێ بجه بینیت، دیسا رێبهرێن PKKێ ل قهندیلی و ل ناڤخوهیی ژی نهشیان مفای ژ پێڤاژۆیا ئاشتیێ ب (باشی و خرابی) یێن وێڤه وهربگرن, لهورا هۆسا ئهنجام بوونه كاڤلكرنا چهندین باژێرێن كوردان و یێ زیانڤێكهتی ههر ما گهل و وهلات.
