تێگه‌هه‌ك بۆ رێكه‌فتنا ئێكه‌تى و گۆڕان
ب بۆچونا من ئێكه‌تى نشتیمانى هاته ب كارئینان وه‌ك ئالیه‌تا بجهئینانا پلانا پێگهۆرا گۆڕان ئه‌وا دژى پارتى هاتیه دارێژتن ! بۆچى؟ بێگومان ده‌مێ به‌ره‌یه‌ك دژى لایه‌نه‌كى بهێته دانان ژبۆ هندێ ژ سه‌نگ و ده‌ستهه‌لاتا وى بهێته كێمكرن دێ په‌نا بۆ دارێژتنا پلانه‌كێ هێته برن و ئه‌و پلان دێ د بن چاڤدێریێ دا بیت حه‌تا دگه‌هیته ئارمانجێن خوه و به‌رامبه‌ر ڤێ پلانێ دێ پلانا پێگهۆر هه‌بیت ئه‌گه‌ر هات و هنده‌ك به‌ربه‌ست كه‌فتنه د رێكا پلانا سه‌ره‌كى دا یان ژى پلانا سه‌ره‌كى بۆ وان یێن چاڤدێریێ لێ دكه‌ن دیار بوو كو نه‌شێت ئارمانجێن خوه بجه بینیت، ئێكسه‌ر دێ په‌نایێ به‌نه به‌ر پلانا پێگهۆر، پلانا پێگهۆر ژى هه‌مان ئارمانج هه‌نه، لێ میكانزما كاركرنێ و بجهئینانا پلانێ جودایه.
یا رۆن و ئاشكرایه كو ئه‌گه‌رێ جودابوونا نه‌وشێروانى ژ ئێكه‌تیا نشتیمانى ژبه‌ر رێكه‌فتنا ستراتیجى بۆ د ناڤبه‌را پارتى و ئێكه‌تیێ دا، نه‌وشێروان خوازیارێ هه‌لوه‌شاندنا وێ رێكه‌فتنێ بوو یا د ناڤبه‌را هه‌ر دو لایه‌نێن سیاسیى دا كو مه‌ره‌مێن وى بجهـ بێن.
پشتى بریارا جودابوونێ دایى و تاقما خوه ب ناڤێ گۆڕان راگه‌هاندى. تا سه‌ر هه‌ستیا سڤكاتى ب خه‌بات و قوربانیدان و به‌رپرسێن ئێكه‌تیا نشتیمانى هاته كرن، هه‌ر وه‌سا ب بێ به‌رچاڤ وه‌رگرتنا هیچ بهایه‌كێ ئه‌خلاقى كار ل سه‌ر بێ بهاكرنا شۆره‌شێن كوردى و سڤكرنا پارتى دیموكراتى كوردستان هاته كرن ژ لایێ نه‌وشێروانى و تاقما وى ڤه، به‌لێ نه‌شیا وه‌ك پێدڤى پلانا خوه بمه‌شینیت و ژ ئارمانجێن خوه نێزیك ببیت، هه‌م ده‌مێ ئۆپۆزسیۆن و ده‌مێ هاتیه د ناڤ حكوومه‌تێ دا. ژبه‌ر ڤێ یه‌كێ نه‌وشێروانى ده‌ست ب پلانا خوه یا پێگهۆر كر كو مخابن لایه‌نه‌كێ وه‌كى یه‌نه‌كێ كو خودان سه‌ربۆره‌كا دوور و درێژا سیاسى بوویه ئالیه‌تا بجهئینانا پلانا پێگهۆرا نه‌وشێروانى و تاقما وى. به‌لێ ئه‌ڤ پلانا پێگهۆر هه‌ر ژ سالا 2009ێ یا چوویه د ناڤ ته‌نه‌كا گلێشى دا. چونكه ده‌مێ نه‌وشێروانى گۆڕان راگه‌هاندى خه‌لكه‌كێ زۆر یێ ئێكه‌تیێ چوونه پال تاقما وى هه‌ر وه‌سا ئه‌و خه‌لكێ تۆره ژ لایه‌نێن دى ژى یێن سیاسى په‌یوه‌ندى ب رێزێن گۆڕان كر و تا وێ رادێ ركابه‌ریا ئێكه‌تیێ كر كو ببیته پارتا دویێ د ده‌ستهه‌لاتا هه‌رێمێ دا. ژ به‌ر هندێ نه‌وشێروانى هزر كر كو ئێدى پێدڤى ب پلانا پێگهۆر نه‌ما هه‌ر زوو هه‌مى پره‌نسیپێن ئه‌خلاقى و نه‌ته‌وه‌یى و هه‌ڤالینى د ناڤبه‌را خوه و ئێكه‌تیێ دا نه‌هێلان. به‌لێ پشتى خه‌لك ب دره‌وێن وى و پلانا وى یا دوژمنكارانه حه‌سیاین. رابوو دووباره ل پلانا خوه یا توزگرتى ڤه‌گه‌ریاڤه و ژ ته‌نه‌كا گلێشى ئینا ده‌ر و ئێكه‌تى دووباره پێ خاپاند. به‌لێ ب بۆچوونا من ئه‌ڤ رێكه‌فتنه ب تنێ حوبره ل سه‌ر وه‌ره‌قێ و چ جارا ناچیته د وارێ بجهئینانێ دا.
