ھەیڤا بھێت پارێ ھاڤێتنا گلێشی ژ وەلاتیان دێ ھێتە وەرگرتن
ئه‌ڤرۆ نيوزۆ:
بڕیارە ھەیڤا ئادارا بھێت پارێَ ھاڤێتنا گلێشی ژ وەلاتیان بھێتە وەرگرتن و بەرپرسەکێ وەزارەتا باژێڕڤانیێ ژی دیار کر کو ھەر باژێڕڤانیەک یا ئازادە چاوا پارێ ھاڤێتنا گلێشی کۆم بکەت، بەلێ پتریا وان ل گەل ڤێ چەندێ بوون پارێ ھاڤێتنا گلێشی ل گەل کریا موەلیدێ بھێتە وەرگرتن.
عەبدولحەمید مەجید، رێڤەبەرێ گشتی یێ پلاندانانێ ل وەزارەتا باژێڕڤانی و گەشت و گۆزارێ ل حوکمەتا ھەرێما کوردستانێ بۆ رۆژناما ئەڤرۆ ئاشکرا کر، ھەموو باژێڕڤانیێن ھەرێما کوردستانێ ل دۆر چاوانیا وەگرتنا پارێ ھاڤێتنا گلێشی ل گەل وەزارەتێ کۆمبووینە و گۆت: “وەزارەتێ باژێڕڤانی سەرپشک کرینە کا دێ چاوا پارەی ژ وەلاتیان وەرگرن، چونکو بڕیاربوو ل دەستپێکا ئەڤ سالە بڕیارا وەرگرتنا پارێ ھاڤێتنا گلێشی بکەڤیتە د بیاڤێ ب جھئینانێ دا، بەلێ ژ بەر نەبوونا سیستەمەکی ب جھئینانا وێ بڕیارێ گیرۆبوویە، لێ بڕیارە ھەیڤا ئادارا بھێت دەست ب وەرگرتنا پارێ ھاڤێتنا گلێشی بھێتەکرن، ئەڤە ژی ل گۆرەی فەرمانا سەرۆکایەتیا جڤاتا وەزیران، ھەموو باژێڕڤانی ژی ب نڤیسارا فەرمی ھاتینە ئاگەھدارکرن”.
عەبدولحەمید مەجید ئاماژە ب وێ چەندێ ژی کر، وان وەکو وەزارەت داخواز ژ ھەموو باژێڕڤانیان کربوو کو ھەر ئێک پێشنیارەکێ بەرھەڤ بکەت و د کۆمبوونێ دا بۆچوونا خوە دیار بکەت کا چەند پارە و چاوا ژ وەلاتیان بھێتە وەرگرتن و گۆت: “ل گۆرەی دووماھی بڕیار سێ ھەتا پێنج ھزار دیناران ژ ھەر مالەکێ دێ ھێنە وەرگرتن، لێ ھێشتا چاوانیا وەرگرتنا پارەی یا دیارنینە، بەلێ ھەر باژێڕڤانیەک یا ئازادە چاوا پارێ ھاڤێتنا گلێشی کۆم بکەت”.
گۆتژی: “پتریا بۆچوونان د گەل وێ چەندێ دانە کو پارێ ھاڤێتنا گلێشی ل گەل کریا موەلیدێ ژ وەلاتیان بھێتە وەرگرتن، داکو بھێتە کۆنترۆلکرن، ھەکە باژێڕڤانیەکێ ھزرەکا دی ژی ھەبیت دشێت بجە بینیت”.