ئه‌ڤرۆ ده‌مێ بریارێن ژیرانه‌یه‌. .

ده‌مه‌كێ زۆرێ درێژه‌ هه‌رێما كوردستانێ د ناڤ كۆمه‌كا قه‌یرانان دایه‌ و ژ به‌ر به‌رژه‌وه‌ندیێن حزبی و كه‌سۆكی یێن به‌رته‌نگ و ململانێیا پارتێن سیاسی ل سه‌ر بنه‌مایێن شاش و نه‌ دروست و كێشێن به‌رده‌وام د ناڤبه‌را هه‌ولێرێ و به‌غدا دا بووینه‌ ئه‌گه‌ر كو حوكمه‌ت و سه‌ركرداتیا كوردی خوه‌ ژ هنده‌ك بریاران دایه‌ پاش و ئه‌ڤ كێشه‌ و قه‌یرانه‌ ماینه‌ بێ چاره‌سه‌ری! له‌ورا دبێژین نوكه‌ ده‌مێ بریاریێن ژیرانه‌یه‌، تایبه‌ت پشتی هاتنا داعش و داگیركرنا چه‌ندین ده‌ڤه‌رێن كوردی و دیاربوونا چه‌ندین شاشی و لاوازیێن سیسته‌مێ هه‌رێمێ یێ حوكمرانیێ و سه‌رهلدانا قه‌یرانان. ژ وان بریارێن گه‌له‌ك خه‌لكێ هه‌رێمێ چاڤه‌رێ دكه‌ت ئێكلاكرنا هه‌لویستێن هه‌رێمێ یه‌ ل گه‌ل به‌غدا و ب زووترین ده‌م تایبه‌ت پشتی عه‌بادی هه‌لویستێ خوه‌ دیاركری ل سه‌ر مووچه‌ و بودجا هه‌رێمێ و گۆت ب چ شێوه‌كی من به‌لین نه‌داینه‌ و نافرێكه‌م!! یا ژ هه‌میێ گرنكتر ب هێزكرنا ئێكرێزیا كوردان و سنۆره‌ك بۆ ره‌فتارێن هنده‌ك لایه‌نێن كوردی بهێته‌ دانان و نابیت چ پارت و لایه‌نێن كوردی دوور ژ به‌رژه‌وه‌ندیێن هه‌رێمێ دانوستاندنان و سه‌ره‌دانان ل گه‌ل به‌غدا بكه‌ت!! و جاره‌كا دی كورد نه‌بنه‌ پالده‌ر و هه‌ڤال بۆ ئاڤاكرنا عیراقه‌كا وێران به‌لكو هه‌می شیانان بێخنه‌ گه‌ر كو ژ عیراقێ جودا ببن!! و چاوا به‌غدا پێگیری ب دستووری نه‌كر بۆ چ پرسێن گرێدایی كوردان فه‌ره‌ كورد چ پێگیریێ ب دستووری نه‌كه‌ن و ل چاڤه‌رێ نه‌بن كو ب رێیا دستووری كێشه‌ چاره‌بن ب تایبه‌ت مادێ 140 و ئه‌و ده‌ڤه‌رێن دكه‌ڤنه‌ د سنۆرێ ڤی ماده‌یدا كونترۆل بكه‌ت و ب چ ره‌نگه‌كی ل سه‌ر ڤان ده‌ڤه‌ران دانوستاندنێ ل گه‌ل به‌غدایێ نه‌كه‌ت!! ئه‌ڤه‌ ژ لایێ ده‌ره‌كی ڤه‌ ژ لایێ ناڤخوه‌ ڤه‌ زۆرا گرنگه‌ گوهۆرینن مه‌زن و ب له‌ز د سیسته‌مێ ئیدارێ دا بهێنه‌كرن و ب راست و دروستی كه‌رتێ تایبه‌ت رۆلێ خوه‌ ببینیت و بیته‌ هه‌ڤپشكێ راسته‌قینه‌ یێ حوكمه‌تێ داكو بارێ حوكمه‌تێ ژ هه‌می لایانڤه‌ سڤك ببیت و به‌رنامه‌كێ تێر و ته‌سه‌ل و زانستی و توند بهێته‌ دانان بۆ ریشه‌كێشكرنا گه‌نده‌لیێ د داموده‌زگه‌هێن حوكمه‌تێدا و خه‌لك بهێته‌ هشیاركرن و رازیكرن و به‌رهه‌ڤكرن بۆ قووناغا داهاتی، چونكی خه‌لكێ كوردستانێ قوربانیێن مه‌زن داینه‌ و ب هه‌می ره‌نگان هاریكار و پشته‌ڤان بووینه‌ بۆ سه‌ركردایه‌تیا كوردی و ئه‌ڤ چه‌نده‌ سه‌لماند ده‌مێ پتر ژ دو ملیۆن ئاواران قه‌ستا هه‌رێمێ كری ژ ئه‌گه‌رێ روودانێن ڤێ دووماهیێ ل عیراقێ رووداین. ئه‌ڤه‌ هه‌كه‌ ئه‌م بزانین كو رۆژهه‌لاتا ناڤێن یا د قووناغه‌كا هه‌ستیار و پرگوهۆرین دا ده‌رباز دبیت و دڤێت ب هه‌می ره‌نگان كورد خوه‌ به‌رهه‌ڤ بكه‌ن بۆ ڤان گوهۆرینان داكو بگه‌هنه‌ ئارمانجان و بۆ ڤێ چه‌ندێ دبێژین ئه‌ڤرۆ به‌ری سوباهی فه‌ره‌ بریارێن ژیرانه‌ و دروست بهێنه‌ دان بۆ ئاڤاكرن و پاراستنا هه‌رێمێ ژ هه‌می لایه‌كیڤه‌ و به‌رهه‌ڤكرنا خه‌لكی ل گه‌ل سیسته‌مێ ئیداری و حوكمرانیێ بۆ قووناغێن داهاتی كو فه‌ره‌ كورد بۆ وێ قووناغێ ڤی ده‌لیڤێ ژ خوه‌ نه‌كه‌ت و ده‌وله‌تا خوه‌ راگه‌هینن.

کۆمێنتا تە