فه‌رهاد ئه‌ترووشى: داخوازێ ژ سەرمایەدارێن دهوکێ دکەت کو پشتەڤانیا فلمە ڤیستەڤالا دهوکێ بکەن
ئه‌ڤرۆ نیۆز،زنار تۆڤى:
ل رۆژا دوشه‌مبى 22/5/2017 ل ده‌مژمێر 5:30 خۆله‌كێ ئێڤارى كونگره‌كێ رۆژنامه‌ڤانى سه‌باره‌ت پێنجه‌مین فلمه ڤیسته‌ڤالا دهوك یا نێڤده‌وله‌تى ل سه‌نته‌رێ ڤیسته‌ڤالێ ل پانۆراما ئازادى هاته به‌ستن و ل ده‌ستپێكێ ئه‌یۆب ره‌مه‌زان رێڤه‌به‌رێ گشتى یێ ره‌وشه‌نبیرى و هونه‌رى ل پارێزگه‌ها دهوكێ و سه‌رۆكێ خۆلا چاره‌مین یا فلمه ڤیسته‌ڤالا دهوك یا نێڤده‌وله‌تى دیاركر:هه‌كه راسته‌وخۆ پشته‌ڤانى ل فلمه ڤیسته‌ڤالا دهوك یا نێڤده‌وله‌تى نه‌هێته‌كرن،دێ گه‌له‌كا ب زه‌حمه‌ت بیت به‌رده‌وامى ب ڤێ ڤیسته‌ڤالێ بهێته‌دان.
هه‌روه‌سا مه گه‌له‌ك وه‌ستیان و زه‌حمه‌ت دیتینه هه‌تاكو ئه‌م شیاین به‌ردوامیێ بده‌ینه ڤێ ڤیسته‌ڤالێ، هه‌كه چاره‌نڤیسێ ڤیسته‌ڤالێ د ده‌ستێ جهه‌كێ بلند دابیت و د ده‌ستێ دهوكێ دا نه‌بیت و بریار ژى د ده‌ستێ دهوكێ دا نه‌بیت هه‌موو ده‌ما ئه‌ڤ ڤیسته‌ڤاله دێ یا له‌نگ بیت، دیسا ل ده‌مێ سه‌رۆكاتیا حوكمه‌تێ دا ل ده‌مێن بورى ئه‌م دشیاین بوودجه‌كێ بۆ په‌یدا بكه‌ین،لێ هه‌كه سه‌رۆكاتیا حوكمه‌تێ ژى بهێته گوهۆرین،دێ گه‌ف ل سه‌ر ڤیسته‌ڤالێ په‌یدابن.
ئه‌و ژى گۆت:مه داخواز ژ پارێزگه‌ها دهوكێ كریه كو دڤێت ئه‌ڤ ڤیسته‌ڤاله ل ناڤا دهوكێ دا بهێته‌كرن،بۆ ڤێ قۆناغێ ژى مه ڤیایه پارێزگه‌هێ دهوكێ وه‌كو ده‌ستهه‌لاتا یا ئێكێ یا ئیدارى بیت د ڤیسته‌ڤالێ دا،داكو پالپشتیه‌كا ماددى و مه‌عنه‌وى ب ده‌ته ڤیسته‌ڤالێ و ئه‌ڤ چه‌نده دێ به‌رده‌وامیێ ده‌ته ڤیسته‌ڤالێ و مه ئه‌ڤ چه‌نده ژێ داخواز كریه،چونكى ئه‌ڤه بویه‌ره‌كا كه‌لتۆرى یا گه‌له‌ك گرنگه و نابیت بهێته راوه‌ستاندن، هه‌روه‌سا بۆ خۆلا پێنجێ و خۆلێن داهاتى پارێزگارێ دهوكێ دێ بیته سه‌رۆكێ پێنجه‌مین فلمه ڤیسته‌ڤالا دهوك یا نێڤده‌وله‌تى،ئه‌م ژى وه‌ك رێڤه‌به‌ریا ره‌وشه‌نبیرى دێ خزمه‌تكار و هه‌ڤكار بین ل گه‌ل وان،چونكى ئه‌ڤ ڤیسته‌ڤاله ده‌رگه‌هه‌كێ گرنگه بۆ ناساندنا باژێرێ مه و هه‌روه‌سا هه‌رێما كوردستانێ ژى ژ هه‌موو لایانڤه.
فه‌رهاد ئه‌مین ئه‌ترووشى پارێزگارێ دهوكێ و سه‌رۆكێ پێنجه‌مین فلمه ڤیسته‌ڤالا دهوك یا نێڤده‌وله‌تى ده‌ست خۆشى ل وان كه‌سان كر یێن كو ل خۆلێن به‌رى نوكه ئه‌ڤ ڤیسته‌ڤاله ب خۆبه‌خشانه و ماندیبوونه‌كا مه‌زن برێڤه دبر،وان هه‌موو یان پێكڤه كاركریه ژ پێخه‌مه‌ت سه‌ركه‌فتنا ڤێ ڤیسته‌ڤالێ.
هه‌روه‌سا ڤیسته‌ڤالا دهوكێ بوویه‌ره‌كا گرنگه و ناڤێ دهوكێ یێ ل سه‌ر،دیسا دڤێت خه‌لكێ دهوكێ پشته‌ڤانیێ ل ڤێ ڤیسته‌ڤالێ بكه‌ت،بتایبه‌تى دڤێت راگه‌هانكار و ده‌زگه‌هێن راگه‌هاندنێ رۆله‌كێ باش بگێرن دڤى وارى دا،دیسا داخواز ژ سه‌رمایه‌دارێن دهوكێ ژى كر كو پشته‌ڤانیا ڤێ ڤیسته‌ڤالێ بكه‌ن، چونكى پشكه‌ك ژ ناسناما هه‌ر ملله‌ته‌كى كه‌لتۆره و پشكه‌ك ژ وى كه‌لتۆرى ژى هونه‌ره،له‌ورا ئه‌م وه‌ك پارێزگه‌ها دهوكێ و حوكمه‌تا هه‌رێمى ژى ب هه‌موو شیانێن خوه ڤه دێ پشته‌ڤانیێ ل ڤێ ڤیسته‌ڤالێ كه‌ین.
ئه‌و ژى دیاركر: من پێخۆشه د داهاتى دا گه‌نجه‌كێ خۆدان شیان ڤێ ڤیسته‌ڤالێ برێڤه ببه‌ت، دێ هه‌ولده‌ین كو ئه‌ڤ ڤیسته‌ڤاله ببیته سازیه‌كا سه‌ربه‌خۆ كو گه‌له‌ك فشارا حوكمه‌تێ ل سه‌ر نه‌بیت، ئه‌ڤ ساله دێ هه‌ولده‌ین كو پتر دهوك بهێنه ناساندن بۆ خه‌لكێ و هه‌روه‌سا پشكه‌ك ژ ناسناما دهوكێ دێ ئه‌ڤ ڤیسته‌ڤاله بیت.
شه‌مال سه‌برى رێڤه‌به‌رێ هونه‌رى یێ ڤیسته‌ڤالێ گۆت: ده‌رگه‌هێ وه‌رگرتنا فلمان ژ 9/5/ هه‌تا كو 9/7 یێ هاتیه ڤه‌كرن و هه‌روه‌سا ڤیسته‌ڤال دێ ل 9 ئیلۆنێ هه‌تاكو 16 یا به‌رده‌وامبیت، ژۆریه‌كا تایبه‌ت ئه‌ڤ ساله دێ بۆ هه‌لسه‌نگاندنا فلمێن دكیۆمێنتارى هێته ڤه‌كرن، هه‌روه‌سا ئه‌ڤ ساله خه‌لاتێن ڤیسته‌ڤالێ ژى دێ ب شێوه‌یه‌كێ نوو هێنه دابه‌شكرن، كو دێ ژ به‌لگێن زێرى و زیڤى بیت، كو به‌لگێ زێرى یێ به‌لگێ ترى دێ بۆ باشترین فلمان بیت و به‌لگێ زیڤى ژى دێ بۆ خه‌لاتێن تایبه‌ت بیت، دیسا ب تنێ وه‌لاتێ كوریا باشۆر وه‌كو مێهڤان دێ پشكداریێ د ڤیسته‌ڤالێ دا كه‌ت.
