ئابوور وه‌ك كارته‌كا فشارا به‌غدا ل دژی كوردستانێ
مله‌تێ كورد ب گشتی ل ده‌سپێكا هه‌ر پیرۆزیه‌كێ شه‌ره‌ف و كه‌رامه‌تا خوه ددانیته پێش و چو تشته‌كێ دیتر ب سه‌ر وێ ناكه‌ڤیت، جاران شه‌ره‌فا مه ململانا ئیمانا مه دكه‌ت، ئه‌ڤجا دبیت ل هه‌مبه‌ری بنه‌مایێن ده‌وله‌تبوونێ چاوا بیت؟!، هه‌روه‌كو ئابوور بوویه چه‌كه‌ك د ده‌ستێ دوژمنێن كوردستانێ دا و ب رێیا وێ گه‌فان ل خه‌لكێ كوردستانێ دكه‌ن، له‌ورا ده‌رگه‌هێن داهاتی ژێ هشككرینه و ب ئێك ئیمزا نووری مالیكی مووچه‌یێ ملیۆنان خه‌لكێ به‌له‌نگازێ كوردستانێ بڕی، چه‌ندین سالان ئێك ب ئێك خال و به‌ندێن ده‌ستووری بنپێكرن هه‌تا كار گه‌هشته وی راده‌ی له‌شكری به‌رهه‌ڤ بكه‌ن و كه‌ركووكێ داگیر بكه‌ن، ئه‌ڤه د ده‌مه‌كی دا كو هنده‌ك سه‌ربازێن شه‌تره‌نجێ د ناڤخوه دا ل گۆری نیازێن وان دخه‌بتن.
ئابووری مه‌زنترین و ب هێزترین چه‌ك بوو عێراقێ ل دژی كوردستانێ بكارئینای، هزرا وان ئه‌و بوو خه‌لكێ ڤی وه‌لاتی مله‌ته‌كێ بێ ئیراده‌یه و پشتی شه‌ش هه‌یڤان ده ل دژی وه‌لاتێ خوه رابن و خوه راده‌ستی ئیراده و داخوازێن به‌غدا كه‌ن، لێ به‌روڤاژی وێ چه‌ندێ خه‌لكه‌كی سه‌رباخی هه‌می نه‌خۆشیان خوه راگرت و به‌ره‌ڤانی ژ كه‌رامه‌تا خوه كر.
بابه‌تێ ئابووری و سه‌ربه‌خوه‌یا ئابووری كو ئه‌ندازیارێ وێ نێچیرڤان بارزانی سه‌رۆكێ حوكمه‌تا هه‌رێما كوردستانێ یه، ب تنێ گرێدای بڕینا مووچه‌ی ڤه نینه، به‌لكو ده‌ما دبینیت حوكمه‌تا به‌غدا نه یا رژده پاره‌یێ پشكا بۆدجا هه‌رێمێ د ده‌مێ ١٢ سالان دا وه‌ك خوه بنێریت و ب قستێن هه‌یڤانه بده‌ت داكو كوردستان نه‌بیته خودان یه‌ده‌كه‌كێ ئابووری، ده‌ما دبینیت د ده‌مێ ١٢ سالان دا چو ماده‌یه‌كێ دستووری جێبجێ نه‌كه‌ت، ده‌ما دبینیت بریارێ ل سه‌ر دانانا چو پرۆژه‌یه‌كێ ستراتیجی ل هه‌رێمێ ناده‌ت، ده‌مێ دبینیت هه‌رێما كوردستانێ چو مفایه‌كی نه ژ قه‌رێن عیراقێ نه ژی ژ پارێ وێ یێ یه‌ده‌ك د بانكا ناڤه‌ندی دا دبینیت و رۆژ بۆ رۆژێ به‌غدا فشاران زێده دكه‌ت و گه‌فان ب بڕینا مووچه‌ی ژ خه‌لكێ كوردستانێ دكه‌ت ئه‌گه‌ر ل دووڤ داخوازێن وان نه‌بن، بارزانی نه‌چاره هزر د رێكه‌كا دی دا بكه‌ت بۆ پاراستنا كه‌رامه‌تا خه‌لكێ خوه، ئه‌و ژی ب سه‌ربه‌خۆیانه فرۆتنا نه‌فتی و ئابووریه‌كا سه‌ربخوه‌یه، ئه‌گه‌ر بهایێ نه‌فتێ بۆ پتر ژ نیڤا بهایێ به‌رێ كێم نه ببا و نێزیكی دو ملیون ئاواران به‌رێ خوه نه‌دابا كوردستانێ و شه‌ڕێ داعش نه‌با، بێگومان دا نوكه ره‌وشا ئابووری ل دووڤ وێ سیاسه‌تێ گه‌له‌ك یا جودا بیت ژ نوكه.
سه‌رباری ڤان هه‌می كاران، سه‌ركردایه‌تیا سیاسی یا كوردستانێ ل گۆری به‌ند و مافێن نێڤده‌وڵه‌تی و ب ره‌نگه‌كێ ئاشتیانه و دوور ژ توندوتیژیێ و ب رێیا دانوستانان ل گه‌ل به‌غدا دڤێت مافێ چاره‌نڤیسێ خوه دیار بكه‌ن و وه‌كی هه‌می گه‌لێن جیهانێ ب وێ خه‌ونێ شاد ببن و ب سه‌دان ساله خه‌بات بۆ دهێته‌كرن و قوربانی بۆ دهێنه‌دان.
