ئەڤرۆ نيوز، نەوزاد ھلۆری:‏
پرۆژێ ئاڤا ستراتیجیا دەڤەرا بارزان کو زێدەتری 51 گوندان پێکڤە گرێددەت و ئاڤێ ژ گەلیێ ‏بالندا و رووبارێ شین بۆ ھەموو سنۆرێ دەڤەرا بارزان دبەت، ماوەیێ سێ سالایە کار تێدا دھێتە ‏کرن و ھەتا نھا 60% ھاتیە بجھئینان، پرانیا گوندێن دەڤەرێ ژی بۆ دەستکەفتنا ئاڤا ڤەخوارنێ ئاڤا ‏رووباران بکاردئینن و ئەڤێ یەکێ ژی کارتێکرن ل ساخلەمیا وەلاتیان کریە. رێڤەبەرێ ئاڤا بارزان ‏ددەتە دیارکرن کو ھەتا پرۆژێ ستراتیجیێ ئاڤا بارزان ب دووماھی نەھێت ئەو نەشێن چو چارەیان ‏ببینن.‏

سەمیع سەدیق ئێکە ژ وەلاتیێن گوندێ بالندا دیارکر کو گوندێ وان پتری ٨٠٠ کەسان تێدا ئاکنجی ‏نە و ھەتا نھا ئاڤا پیسا رووباری بکاردئینن و گۆت: “پرۆژەکێ ئاڤێ ل سالێن نوتان ژ بوو گوندێ مە ‏ھاتیە چێکرن و ئاڤا وێ ژ رووبارێ شین ل گەلیێ بالندا دھێتن و ئاڤا رووبارێ شین ژی ژ بەر ‏ھەبوونا گوھۆڕینێن کەش و ھەوایی ژ لایێ ساخلەمیێ ڤە نە یا دروستە و دیسا چەندین جھێن ‏خودانکرنا پەزی و جھێ راوەستاندنا چێلان و پیساتیێ چەندین مال و خوارنگەھان و سەیرانیان ‏ژی دچیتە سەر رووباری کو ئەڤ یەک ژی دبیتە سەدەما پیستبوونا ئاڤا مە یا ڤەخوارنێ، دخوازین ‏کو حوکمەتا ھەرێما کوردستانێ چارەسەریا ئاڤا مە بکەت”.

ئەندازیارەکی ژ کۆمپانیا ئارگەیا تورکی کو کۆمپانیا بجھئینەرا پرۆژێ ئاڤا بارزانە و نەڤیا ناڤێ ‏خوە بێژیت بۆ ئەڤرۆ گۆت: “ب رەنگەکێ گشتی نھا کار ل سەر چێکرنا پرۆژێ ئاڤا بارزان یا ‏بەردەوامە و کارێن پرۆژەی ب دووماھی ھاتینە و نھا کار ل سەر چێکرنا تۆڕا ناڤخوەیی دکەین، ‏ئەگەرێ گیرۆبوونا وێ ژی دزڤریت بۆ قەیرانا دارایی ژ بەر کو کار ب سستی ب رێڤەدچوون، ھەکە ‏چو کێشێن تەکینکی و کێشێن گرێدایی قەیرانا دارایی نەھێنە پێش، دێ سالا بھێت ب دووماھیی ‏ھێت”.‏

ژ لایێ خوە ڤە ئەندازیار زیاب میقداد رێڤەبەرێ ئاڤا بارزان دیارکر کو وەلاتیێن دەڤەرا بارزان ‏مافدارن ل سەر نەبوونا ئاڤا پاقژ و بۆ ئەڤرۆ گۆت: “ھندەک ژ گوندێن دەڤەرا بارزان بۆ ‏دەستکەفتنا ئاڤا ڤەخوارنێ پەنایێ بۆ ئاڤا رووباران دبەن ھەر بۆ نموونە وەلاتیێن گوندێ بالندا و ‏کومەلگەھا وەلات ژێری و گوندێ سەڤرە و بازێ و ھەتا دگەھیتە نێزیکێ بارزان ئاڤا رووباران ‏بکاردئینن، بەلێ نھا پرۆژەکێ ستراتیجیێ مەزن ژ لایێ حوکمەتا ھەرێما کوردستانێ ژ بوو ھەموو ‏دەڤەرا بارزان دھێتە چێکرن و 51 گوندێن بالندا ھەتا شیڤەدزێ ب خوە ڤە دگریت، دێ مفایی ژ ‏ئەوێ تۆڕا ئاڤێ وەرگرن، ب تەمامبوونا ئەویی پرۆژەیی چو ئاریشەیێن ئاڤێ ل دەڤەرێ نامینن”.‏

زێدەتر گۆت: “نھا ب رەنگەک بەردەوام کار ل سەر پرۆژێ ستراتیجیێ ئاڤا بارزان دھێتەکرن، بەلێ ژ ‏بەر قەیرانا دارایی کارێن وان ب خاڤی ب رێڤە دچن”.‏

ئەڤرۆ نيوز:‏
دوھی باران بارینێ سەرانسەری ھەرێما کوردستانێ ڤەگرت و رێڤەبەریا گشتیا سەقاناسی و ‏ئەردھەژێ ل ھەرێما کوردستانێ ھوشداریا دامەزراوێن خزمەتکاری دکەت کو سێشەمبی و ‏چارشەمبیێ باران بارین دێ زێدە بیت و پێدڤیە ئامادەکاریان بکەن.‏
فازل ئیبراھیم، رێڤەبەرێ گشتیێ سەقاناسی و ئەردھەژێ ل ھەرێما کوردستانێ، دوھی رۆژا ‏ئێکشەمبی د داخۆیانیەکا رۆژنامەڤانی دا راگەھاند کو باران بارین دێ ل رۆژێن سێشەمبی و ‏چارشەمبی دژوار بیت و پلێن گەرمێ ژی دێ ھێنە خوار”.‏
دەربارەی ئەگەرێ دروستبوونا لەھیان، فازل ئیبراھیم ئاشکەرا کر کو ژ ئەگەرێ وێ چەندێ کو بارانا ‏ئێکێ یە دێ ھەموو ھەرێمێ ڤەگریت پشتی ئەردھەژا 12ی ڤێ ھەیڤێ، “ژ بەر ھندێ داخوازێ ژ ‏ھەموو دامودەزگەھێن خزمەتکاری دکەین کو ئامادەکاریێن خوە بکەن دا کو خەلک تووشی زیانان ‏نەبن”.‏
ب گۆرەی راپۆرتەکا پشکا پێشبینیان ل رێڤەبەریا گشتیا سەقاناسی و ئەردھەژێ ل ھەرێما ‏کوردستانێ بڕیارە ژ ئەگەرێ ھاتنا فشارێن بلندێن رۆژھەلاتێ ئیرانێ و فشارێن نزمێن دەریا ‏ناڤەراست ڤێ حەفتیێ ب رەنگەکێ بەردەوام باران ب بارن و ھەتا دوشەمبیا حەفتیا بھێت د ‏بەردەوام بن و ل ھندەک دەڤەرێن چیایی ژی ئەگەرێ بەفر بارینێ ژی یێ ھەیی.‏

ئه‌ڤرۆ نيوز، نه‌وزاد هلۆرى:

د بەردەوامیا کار و پرۆژێن خوە دا ل چەند رۆژێن بوری سەروکاتیا باژێرڤانیا شێلادزێ چەندین جاددە و کولانێن نوو ل سەنتەرێ باژێرێ شێلادزێ ڤەکرن و قێر و کونکرێت و تێکەل کرینە ، بڤێ یەکێ ژی رێژایەا چێکرنا جاددەیێن شێلادزێ بویە 80%.
دڤی واریدا ” ھەزار بێدەیی” سەرۆکێ باژێرڤانیا شێلادزێ بو ئەڤرۆ گۆت: ( سەرەرای کو قەیرانە و کارتێکرن ل کار و پروژەیێن ناحیا شێلادزێ ھاتەکرن ، بەلێ ژ بەر پێدڤی یا دەڤەرێ و وەلاتیان لسەر بودجا گەشەپێدانا پارێزگەھا دھۆکێ کومەکا جاددەیێن نوو یێن نافخوەیێ شێلادزێ ھاتنە ڤەکرن و چێکرن و ھندەک ژی ھاتینە کونکرێت و قێر و تێکەلکرن و ئەم لسەر کارێن خوە ژی بەردەوامین )
زێدەتر گۆت: ( ل چەند رۆژێن بوری ل سنوورێ سەروکاتیا باژێرڤانیا شێلادزێ 12 ھزار و 502 مەترێن جاددەیێن نافخوە ھاتینە قێرکرن ، و 14 ھزار و 806 مەتر ژی ھاتینە تێکەل و زفتکرن ، و دیسان 150 مەتر ژی ھاتینە کونکرێت کرن و ل گەل درۆستکرنا 65 مەترێن ئاڤرێژان وەکو قەسیس ، بڤێ یەکێ ژی رێژەیا چێکرنا جاددێن نافخوەیێن شێلادزی َگەھشتە 80%)
سەرۆکێ باژێرڤانیا شێلادزێ دیارکر ژی کو ئەو نھا لسەر چێکرنا چەند پرۆژەیەکێن دن بەردەوامن ب تایبەتی بو تاخێ شەھیدان و گۆت ژی: ( کار و پروژێن مە دێ د بەردەوام بن ھەتاکو ھەموو جاددەیێن شێلادزێ بھێنە چێکرن و دەمەک نێزیک دێ ھەموو کولانێن تاخێ شەھیدان ھێنە کونکرێتکرن )