NO IORG
نووترين نووچه
Authors Posts by ئازاد گوله‌یی

ئازاد گوله‌یی

ئازاد گوله‌یی
47 POSTS 0 COMMENTS

81

ئازاد گوله‌ى
ئه‌ز گه‌هشتمه‌ڤێ چه‌ندێ، به‌لێ مه‌پشتا خوه‌ ب گه‌له‌كا گه‌رم كر و مه‌ خوه‌ گه‌له‌ك مه‌زن دكر و دگۆته‌ ئێكودو، كی جورعه‌ت دكه‌ت بێژیته‌ مه‌ كوردان پێلاڤا پێ هه‌وه‌ یاخاره‌!، ب تایبه‌ت مه‌ كوردێن باشۆر، خودانێن گازێ و جهێن ته‌ئمین بۆ بێهنڤه‌دانا هێزێن هه‌ڤپه‌یمانا و شاندێن بیانی یێن سه‌ره‌دانا عیراقێ دكرن و دهاتنه‌ كوردستانێ، دا خوارنێن خۆش بخۆن و ب دلێ خوه‌ بگه‌ریێن!! مه‌ كوردان خوه‌ كره‌ عه‌رد بۆ ڤان بێوژدانا، ژ ئه‌مریكیان و ئه‌وروپایان و ئیسرائیلیان و هه‌تا عه‌ره‌با ژی و ل دووماهیێ ده‌مێ ئه‌م ژ راستا محتاجی وان بۆین، دا پشتا مه‌ بگرن دژی به‌غدا، هه‌میان پشتا خوه‌ دا مه‌ و گۆتنا (ئه‌م د گه‌ل عیراقه‌كا ئێك پارچه‌ینه‌!!)، گوهێن مه‌ سمتن هندی بۆ مه‌دوباره‌دكه‌ن، هه‌تا گه‌هشتیه‌ وێ رادێ نوكه‌ ڤێجا ئه‌م یێ دبێژینه‌ وان مه‌ عیراقه‌كا ئێك پارچه‌ و ب هێز دڤێت!! عیراقی دبێژنه‌ مه‌هوین جوداخوازن (أنفصالیون!)، تورك دبێژنه‌ كوردا تیرۆرست، ئیران دبێژیته‌ مه‌ هوین دارده‌ستێن ئه‌مریكا و ئیسرائیلن و سه‌هیونیانه‌!، سووریا دبێژنه‌ مه‌هوین خۆفرۆشن! داعش دبێژنه‌ مه‌ كافر! قاعیده‌ دبێژیته‌ مه‌مولحید!، جه‌بهه‌ئه‌لنوسره‌ دبێژنه‌ مه‌ دێ هه‌وه‌ برینین، چونكی هه‌وه‌یا خوه‌ دایه‌ ل گه‌ل رژێمێ! حزبوللاه‌مه‌بگرن دێ مه‌خون هندی سه‌رێ مه‌نه‌ڤێت چونكی دبێژنه‌ مه‌، هه‌وه‌ دڤێت ئیسرائیله‌كا دووێ ل ده‌ڤه‌رێ دروست بكه‌ن!! ئه‌ڤه‌ ژبلی هندێ كو عه‌بادی و مالكی و ئه‌لحه‌كیم و ئه‌لجبۆری و ئه‌لنجویفی و خامه‌نه‌ئی و ئه‌ردوغانی و ئه‌سه‌دی و ترامپی و ماكرۆنی و خاله‌تا مێركل و مه‌تا تێرێزا مای و گه‌له‌كێن دی ژی خرا سه‌رێ مه‌ كوردان نه‌ڤێت!! ئه‌و هه‌می به‌س نینن، ژنوو مه‌ كوردان سه‌رێ ئێكودو نه‌ڤێت!! كا دێ وه‌رن بۆ من ڤێ مه‌سه‌لێ سافی بكه‌ن؟ دێ هنده‌ك بێژن مانێ دوژمن ناهێلن كورد ببنه‌ئێك!!. وه‌یلا من و ڤێ دره‌وا مه‌زن، نه‌وللادوژمن دزانیت كو ئه‌م چ جاران نابینه‌ ئێك، له‌وما هند خوه‌ ب مه‌ڤه‌ مه‌حتل ناكه‌ت، ژ بلی هندێ هه‌كه‌ به‌رژه‌وه‌ندیه‌كا وان ل ده‌ف مه‌ كوردان بیت وه‌كو ئه‌م بكارئیناین بۆ شه‌ڕێ ل دژی داعش و پاش پویته‌ ب مه‌نه‌كر، ل سووریێ ژی تێر شه‌ڕ ب كوردان هاته‌كرن و نوكه‌ هه‌می یێن بووینه‌ ئێك دا كوردان ژ ناڤببه‌ن!!. دبێژنه‌ من تو بۆچی بۆ عه‌فرینێ ده‌رناكه‌ڤی؟ما دێ چاوا ده‌ركه‌ڤم دگه‌ل په‌كه‌كێ؟ و چمه‌ خۆنیشاندانه‌كێ و بلا ئه‌و وێنێن ئاپۆی و درووشمێ خوه‌ هه‌لگرن، به‌لێ بۆ مه‌ نابیت وێنێن سه‌رۆك بارزانی و ئالایێ كوردستانێ بلند بكه‌ین!!. دبێژینه‌ په‌كه‌كێ وه‌رن ژبلی ئالایێ كوردستانێ چ دی بلند ناكه‌ین؟ قه‌بوول ناكه‌ن! باشه‌ ما عه‌فرین ل كیڤه‌ و ئاپۆ ل كیڤه‌؟ نابه‌ برێ، ئه‌ڤ سه‌رۆكێ نه‌ته‌وه‌یی یه‌ و دبێ د هه‌موو هه‌لكه‌فتا وێنێ وی بهێته‌بلندكرن؟ باشه‌ پا دیاره‌ سه‌رۆكێ مه‌، نه‌یێ نه‌ته‌وه‌یی یه‌ ئانه‌؟ پا دیاره‌ ئاپۆی پتر ژ سه‌رۆك بارزانی خه‌باتا كری؟ هه‌رن پسیارا جیهانێ بكه‌ن كا خه‌لك كیژ سه‌ركردێ كورد پتر دنیاسیت ل سه‌رانسه‌ری جیهانێ؟ تنێ سه‌رۆك بارزانی یه‌، هه‌می د نیاسن و ل گه‌ل دروینن و دزانن كو خودان هێزه‌ و گۆتنێن وی جهێ رێزێنه‌، بۆ هه‌می كوردان و كورد پێگریێ پێ دكه‌ن، چونكی حه‌ز ژێ دكه‌ن.. ژبلی ڤێ، ئێكه‌تی خوه‌ ناده‌ته‌ ل گه‌ل چالاكیێن كوردێن باشۆر هندی خوه‌ دده‌ته‌ ل گه‌ل چالاكیێن په‌كه‌كێ ولایه‌نێن كارتوونی یێن بسه‌رڤه، تنێ بۆ هندێ دا كه‌ربێن رێخستنێن پارتی ژ خوه‌ ڤه‌كه‌ن!! ئه‌ڤه‌ هه‌ر سێ لایه‌نێن سیاسیێن مه‌زنێن كوردستانێنه‌ و هه‌می لایه‌نێن دی و ل هه‌ر چار پارچێن دی یێن كوردستانێ نه‌شێن ژبن تایێ ڤان هه‌ر سێ لایه‌نان ده‌ركه‌ڤن و هه‌ر ئێك ژ وان بۆ خوه‌ چه‌ند حزبه‌كێن بچووك یێن گرتین، یانژی وه‌كی په‌كه‌كێ بۆ خوه‌ یێن دروستكرین و سه‌رپه‌رشتیا وان دكه‌ت، لێ ب ناڤێن جودا جودا!! هوین ب خودێ ئه‌ڤه‌ كوردینی یه‌؟ ب هه‌می پیرۆزیان دلێ مه‌ ژ كوردینیێ ژی ره‌ش بوو؟ لێ پا بۆ عیناد و كا چاوا ئه‌و بۆ حزب و لایه‌نێن خوه‌ یێن سیاسی و سه‌ركردێن خوه‌ د عنصرینه‌، ئه‌ز و گه‌له‌كێن دی ژی وه‌كو پارتی یا كێم نه‌بوو خوه‌ و نه‌بۆ پارتیا خوه‌ به‌رامبه‌ر كه‌سێ نادانین، چونكی نه‌وان هندی مه‌ پارتیا خه‌بات كریه‌ و نه‌هندی مه‌ شه‌هید و قوربانی داینه‌ سه‌را كوردینیێ، له‌وما سه‌ره‌رای هه‌ر تشته‌كی دڤێت ئه‌ڤرۆ هه‌می پارتی ل سه‌رانسه‌ری جیهانێ ملێن خوه‌ بده‌نه‌ ئێك داكو بۆ هه‌میان دیار بكه‌ن كو پارتی چ جاران لاواز نابیت و ناكه‌ڤیت، چونكی خودانا خوه‌ و جه‌ماوه‌ره‌كێ مه‌زن و پێشمه‌رگه‌كێ ب هێزه‌ و سه‌رۆكه‌كی گه‌له‌كێ خۆشتڤی یه‌..

69

ب درێژاهیا وان هه‌ژده‌سالێن من ل دووری كوردستانێ ل وه‌لاته‌كێ ئورۆپی ژیایی، من گه‌له‌ك جۆرێن كوردان دیتن، هنده‌ك ب سه‌رڤه‌سه‌رڤه‌ وه‌سا بۆ خه‌لكی دده‌نه‌دیار كرن كو ئێكن، ئه‌و ب خوه‌ هه‌ردوكا سه‌رێ ئێك نه‌ڤێت! جۆره‌كێ دی یێ كوردان یێ هه‌ی دێ چیت ل گه‌ل دوژمنێ خوه‌ كه‌ته‌ ئێك دا ته‌نێ كورده‌كێ دی پێ بشكێت و زیامه‌ند بیت!! جۆره‌كێ دی یێ كوردان یێ هه‌ی حه‌ز دكه‌ن تشته‌ك بن، لێ نه‌شێن چونكی ئه‌و هێز و شیان و جه‌ماوه‌ر نینن داكو بگه‌هنه‌ وێ مرادێ. جۆره‌كێ دی یێ كوردان یێ هه‌ی ب زولم و زۆرداریێ خوه‌ ل سه‌ر ملله‌تی دسه‌پینن و یێ ل گه‌ل بیر و بۆچوون و سه‌رۆك و ئالایێ وان یێ بێ رۆژ نه‌بیت ئه‌و هه‌ر نه‌ كورده‌!! هه‌لبه‌ت وه‌كو هه‌ر جار دبێژم دێ ل ڤێره‌ ژی دوباره‌ كه‌م كو كورد نینه‌، بشێت ب ئازادی بژیت ل جهه‌كی ل ژیڕ ده‌سته‌لاتداریا كوردان هه‌كه‌ ئه‌ندامێ حزبا ده‌سته‌لاتدار نه‌بیت ل هه‌ر چار پارچێن كوردستانێ و ئه‌ڤێ چه‌ندێ هه‌ر نیقاش ل سه‌ر ناهێته‌كرن، چونكی یا به‌رچاڤه‌، كاره‌ساتا مه‌زن ل ڤێره‌ ئه‌وه‌ كو هه‌می ژی ب ناڤێ هندێ دئاخڤن كو یێ به‌ره‌ڤانیێ ژ كوردستانێ و گه‌لێ وێ دكه‌ن! كورو بابۆ كا دێ هوین حزبێن خوه‌ و دلێن خوه‌ بكه‌نه‌ ئێك دێ ملله‌ت و كوردستان ب خوه‌ بیته‌ ئێك.. لێ پا قه‌د باوه‌ر نه‌كه‌ن ئه‌م كورد ببینه‌ ئێك د خه‌ونێ دا ژی، بێژن بووو؟ به‌ری چه‌ند رۆژان دا خۆنیشادانه‌كا پشته‌ڤانیێ بۆ عه‌فرینێ هێته‌ ئه‌نجامدان ل باژێره‌كێ ئورۆپی و خه‌لك هاته‌ داخوازكرن داكو پشكداریێ تێدا بكه‌ن. لێ پا شوونا كورد هه‌می بچنه‌ جهێ ده‌ستنیشانكری و ده‌نگێ عه‌فرینێ بگه‌هیننه‌ جیهانێ، كوردێن مه‌ مانه‌ ب ده‌ڤولێڤێن ئێكودو ڤه‌ هه‌تا خۆنیشادان ژبنی فشتقی و بووینه‌ پێ تڕانكێن خه‌لكی!! ل ئورۆپا هه‌می دزانن په‌كه‌كه‌ پشكداریێ د هیچ چالاكیه‌كا پارتی دا ناكه‌ت، لێ د یێن ئێكه‌تیێ دا دكه‌ت! پارتی ژی هه‌روه‌سا، ئێكه‌تی ژی وه‌كو په‌كه‌كێ پشكداریێ د یێن پارتی سه‌رپه‌رشتیا وێ دكه‌ت و رێكدئێخیت دا ناكه‌ت خوه‌ ئه‌گه‌ر هێجه‌ت كریه‌ ئه‌و كو ترومبێل برێ ڤه‌ ژ كاركه‌فت هه‌كه‌ دهاتن داكو ئاماده‌ببن!! هه‌ر جارا مه‌ ئاهنگه‌ك یان چالاكیه‌ك ل ئورۆپا سازكری ده‌ستێ مه‌یێ ب دلێ مه‌ڤه‌ كو چ ئاریشێن مه‌زن چێنه‌بن، چونكی یێن بچووك دمسۆگه‌رن. له‌وما ئه‌م هند پویته‌ی ناده‌ینه‌ لایه‌نێ هونه‌ری و رێخستنێ هندی به‌حسێ لایه‌نێ ئه‌منی و چاوانیا پاراستنا چالاكیێ دكه‌ین.. كورد نا بنه‌ ئێك دڤێت ئه‌م ڤێ راستیێ باش بزانین و خوه‌ ژ خه‌ونان دووربێخین. چه‌رخ چه‌رخێ پێشكه‌فتنێ و ته‌كنه‌لۆجیایێ و راستیانه‌، نه‌ك یێ خاپاندنێ و دره‌وان؟ دڤێت كورد نوكه‌ كار ل سه‌ر هندێ بكه‌ن كو دوژمناتیا هه‌ڤدو بهێلن، ئه‌و ژی نه‌ ب رێیا كۆمبوون و پانێل و روونشتنێن دوقۆلی، د ناڤبه‌را ڤێ حزبێ و حزبا دی دا، نه‌خێر چونكی هه‌ر ئه‌و حزبن ئه‌ڤ دوژمناتی د ناڤبه‌را مه‌دا په‌یدا كری.. كورد دڤێت ل مالێن خوه‌ ژ ئه‌ڤرۆ وێڤه‌ زارۆیێن خوه‌ فێر بكه‌ن كو هه‌ول بده‌ن شاشیێن مه‌ دوباره‌ نه‌كه‌نه‌ڤه‌ و هه‌كه‌ بشێن خوه‌ بكه‌نه‌ ئێك خراب نینه‌ و هه‌كه‌ نه‌شیان ژی مالا وان ژی ئاڤا، چونكی ئه‌م ب خوه‌ نوكه‌ هه‌ر نه‌شێین.. گه‌له‌ك دبێژن دوژمن ناهێلن ببینه‌ ئێك!! وه‌یلا ڤێ دره‌وا مه‌زن؟ تنێ كورد ناهێلن كورد ببنه‌ ئێك، چونكی كوردی كورد نه‌ڤێت هه‌كه‌ دوژمن یێ ئاماده‌یه‌ ل گه‌ل كوردی بروونیت هه‌كه‌ زانی كو دێ ئه‌ڤ كورده‌ خوه‌ كه‌نه‌ ئێك هێز، چونكی هه‌كه‌ كورد بوونه‌ ئێك دێ بنه‌ مه‌ترسی ل سه‌ر دوژمنی، له‌وما دێ دوژمن ئێكبوونا وان ژ نه‌دل قه‌بوولكه‌ت، لێ پا ل سه‌ر ڤی ده‌ستودارێ كوردان ل هه‌ر چار پارچا، دوژمن دێ رۆژانه‌ رابیته‌ چه‌پا ژ كه‌یفا ئه‌ڤ سه‌روبه‌رێ كورد تێدا.. ژ به‌ر هندێ ئه‌ز ب خو وه‌كو كه‌سه‌ك پێشبینیا هندێ دكه‌م كو هه‌تا (١٠٠) سالێن بهێن ژی كورد نابنه‌ ئێك، ئه‌ڤه‌ ژ بلی وان كه‌سێن چ ژ حسابێ نزانن و دبێژنه‌ خه‌لكی دو زاید دو نابنه‌چار دبنه‌ ئێك!! ما ب دره‌وایه‌خالوووو؟!..

111

هه‌ر چه‌نده‌ پشتی خیانه‌تكاریا فرۆتنا كه‌ركووكێ و ئه‌و كارتێكرنا نه‌رینی یا ل ده‌روونێ مه‌كری كو بوویه‌ ئه‌گه‌ر ژ كه‌ربان دا ئه‌ز خوه‌ ژ دووڤچوونا ده‌نگوباسان دووركه‌ڤم و چوونا د ناڤ سوشیال میدیایێ دا كێم بكه‌م داكو تووشی چ ئێش و ئه‌له‌ما نه‌بم.. لێ پا وه‌سا دیاره‌ گوهدانا ده‌نگوباسان یا بوویه‌ ئێشه‌كا دۆمكێش و نه‌شێین خوه‌ ژێ خلاس بكه‌ین، چونكی جاران هنده‌ك ده‌نگوباسان گوهلێ دبین خوه‌ میێن سه‌رێ مه‌ دراوه‌ستن، هندی دلێ مرۆڤی لێ دكه‌نه‌ئێش و مرۆڤی نێزیكی جه‌ڵتێ دكه‌ن. ئێك ژ وان ده‌نگوباسێن ڤان رۆژا من خواندی و ئه‌ز زۆر پێ هه‌رشیم یێ تایبه‌ت بۆ ب رێكخراوێن جڤاكێ سڤیل ڤه‌ ل كوردستانێ ب گشتی و پارێزگه‌ها دهۆكێ ب تایبه‌تی. دبێژن ل پارێزگه‌ها دهۆكێ نه‌ه كه‌سێن ل رێكخراوێن جڤاكێ مه‌ده‌نی كار دكه‌ن سه‌را گه‌نده‌لیێ و دزیا یێن هاتینه‌گرتن!! یا ژ ڤێ ژی نه‌خۆشتر ئه‌وه‌كو ل پارێزگه‌ها دهۆكێ ب تنێ ٤٦٨ رێكخراوێن ناڤخوه‌یی و ١١٦ یێن بیانی كو كارێ وان تایبه‌ته‌ ب هاریكاریا په‌نابه‌ریه‌ و ژ ٤٦٨ رێكخراوێن دهۆكێ تنێ ١٢ خودان باره‌گانه‌، ئانكو یێن دی هه‌می بندیوارن! راستی جهێ حێبه‌تیێ یه‌! ژبلی ڤێ ژی ل كوردستانێ هه‌میێ یاكو ژمارا ئاكنجیێن وێ نه‌گه‌هیته‌ شه‌ش ملیۆن كه‌سان خودانا خوه‌ ٣٤٠٠ رێكخراوێن جڤاكێ سڤیله‌ و زۆربه‌ی زۆری وه‌لاتێن جیهانێ یێن نفۆسا وان بیست جاران هندی كوردستانێ نیڤه‌كا وێ ژمارێ نینن یێن رێكخراوان!! ئه‌ڤه‌ كاره‌ساته‌كا مه‌زنه‌ هه‌كه‌ حوكمه‌تا هه‌رێما كوردستانێ بزانیت، چونكی من باوه‌ره‌ هێشتا حوكمه‌تا مه‌ نزانیت كا دامه‌زراندنا رێكخراوه‌كێ چ پێ دڤێت و كارێ وان یێ سه‌ره‌كی د ناڤا جڤاكی دا چیه‌. هه‌لبه‌ت ل دووڤ پێزانینێن من هه‌یین حوكمه‌تا كوردستانێ (ده‌مێ ب پاره‌) هه‌یڤانه‌ گۆژمه‌ك ددا وان رێكخراوان بێی كو بزانن كا وان رێكخراوا د وێ هه‌یڤێ دا چ كر وخزمه‌تان پێشكێشی جڤاكی كری چیه‌؟ لێ مخابن حوكمه‌تا مه‌ نه‌ دزانی و نوكه‌ ژنوو یا ب خوه‌ دحه‌سیێت، له‌وما یا لێدگه‌ریت كینه‌یێن پارا وه‌ردگرن ب به‌لاش و عه‌لاش و بێی كو هیچ خزمه‌ته‌كا به‌رچاڤ پێشكێش بكه‌ن داكو وێ كونێ ژی بگرن ئه‌وا پارێن هه‌رێمێ ب هه‌روه‌ بۆ دچوو، له‌وما ڤان رۆژان ژنوو زانی كو وێ شاشیه‌كا مه‌زن یا د ڤی ده‌رباره‌ی دا كری و هه‌ر چه‌نده‌ دره‌نگ ب خوه‌ حه‌سیا كو رێكخراوێن جڤاكێ مه‌ده‌نی ل كوردستانێ ژبلی ٥٪ ژ وان دبێ مفانه‌ وزه‌ره‌را وان پتره‌ ژ مفایێ وان؟ لێ پا دیسان باشه‌ ب خوه‌ بحه‌سیێت و سیسته‌مه‌كێ نوو مینا یێ سۆیسرا بۆ دامه‌زراندن و سه‌ره‌ده‌ریێ ل گه‌ل وان رێكخراوان بكه‌ت، چونكی كارێ وان رێكخراوا زورێ ب مفا و پیرۆزه‌ ئه‌گه‌ر گه‌نده‌ل و خودان به‌رژه‌وه‌ندیێن كه‌سایه‌تی خوه‌ ژێ دووربێخن و بهێلنه‌ ب هیڤیا بسپۆر و شاره‌زایێن ئه‌ڤ كاره‌كری و ئه‌نجامدای نه‌ك ببیته‌ فالتۆن وه‌كی یا نوكه‌ ئه‌م دبینین! ل ڤێره‌ ژی ئه‌ز گازندان ژ حوكمه‌تێ ب تنێ ناكه‌م، به‌لكو گازندان مه‌زن ژ دامه‌زرێنه‌ر و رێڤه‌به‌ر و به‌رپرسێن وان رێكخراوا دكه‌م یێن ب مخابنی ڤه‌ دێ بێژمێ هه‌وه‌كار و ناڤ و مه‌ره‌مێن پیرۆزێن ئه‌ڤ جۆره‌ رێكخراوه‌ بۆ دهێنه‌دانان هه‌ڕماند و ئه‌و ژی كره‌ د قالبێ گه‌نده‌لی و دزیان دا! چونكی ملله‌ت و حوكمه‌تێن هه‌می وه‌لاتان ب چاڤ و رێزه‌كا مه‌زن به‌رێ خوه‌ دده‌نه‌ وان كه‌سێن رێكخراوێن جڤاكێ سڤیل برێڤه‌ دبه‌ن و تێدا كاردكه‌ن، لێ ل كوردستانا من و پارێزگه‌ها من تشته‌كی دی یه‌ به‌روڤاژی هه‌می جیهانێ!! خۆزی كارێ ڤان رێكخراوان ل كوردستانێ بهێته‌ رێخستن و حوكمه‌ت سیسته‌مه‌كێ نوو و پێشكه‌فتی بۆ بدانیت دا ئه‌و ژی بزانیت كا دێ رێكخراو بۆ ملله‌تی چ كه‌ن و د هه‌مان ده‌م دا رێكخراو ژی بزانن كا دێ چ خزمه‌تێ پێشكێش كه‌ن نه‌ك وه‌كی نوكه‌ كو یا بوویه‌ گێلما گاڤانی!؟

87

ئازادگوله‌ى

من نه‌دزانی دێ به‌لێ یا من و هه‌وه‌ ئه‌ڤێ ب سه‌رێ مه‌ئینیت، راستی هه‌كه‌ من نه‌ دگۆت: به‌لێ.. ما من دزانی دێ ریفراندۆم  مه‌ كه‌ته‌ كورێن گوندان! ما من دزانی دێ ئه‌ڤ ده‌وله‌تێن حیت یێن به‌ری نوكه‌ خوه‌ دكره‌ ماسی د ده‌ستێن مه‌ دا هۆسا مه‌ هێلنه‌ ب تنێ! ما هه‌كه‌ من زانیبا كو دێ ئه‌مریكا و ئه‌ورۆپا و ئیران و توركی و سیاسه‌تمه‌دارێن وێ ئه‌وێن هه‌ر گاڤا سه‌ره‌دانا به‌غدا كربا دا پشتی هینگی ئێكسه‌ر دهاتنه‌ كوردستانێ، وه‌كو هێزه‌كا مه‌زنا دچارچووڤێ نه‌خشێ عیراقێ دا و د گه‌ل سه‌رۆك بارزانی كۆمبوونا كه‌ن و بێژن كوردستان جهه‌كێ ئارام و خۆشه‌ و خوارنێن وێ هه‌می دله‌زیزن و كورد گه‌له‌ك قه‌درێ مێهڤانان دگرن!! هه‌یلا د دفنێن هه‌وه‌ دا بهێته‌خارێ، هه‌یلا ئه‌و خوارن هه‌می ببنه‌ مشك و مار و ب هه‌وه‌ ڤه‌ده‌ن یێن كو هه‌وه‌ ده‌وله‌تبوون كریه‌ د مێشكێ مه‌دا و وه‌سا بۆ مه‌دیار كر كو رۆژا ئه‌م ریفراندۆمێ ئه‌نجام بده‌ین، دێ رۆژا پاشتر هوون دانپێدانێ ب ده‌وله‌تا مه‌یا كوردی ده‌ن.. هه‌رده‌م نانێ مه‌ كوردان یێ بێ خوێ یه‌، هه‌یلا من خولیا بنێ كوچكی د روویێن هه‌وه‌ دا و ل گه‌ل هه‌وه‌ درویێن چه‌ند سیاسه‌تمه‌دارێن كورد و كورێن چه‌ند سه‌ركرده‌كان. كه‌سێ مال ل كوردستانێ خراب نه‌كر ژبلی كورێن مه‌سئولا ئه‌وێن یارگوزه‌لێ ب كوردستانێ دكه‌ن! ل كوردستانێ تو كوڕێ به‌رپرسه‌كی بی دشێی یا ته‌ دڤێت بكه‌ی و بلا ته‌چ پله‌ ژی نه‌بن نه‌ د حوكمه‌تێ و نه‌د حزبان دا!! من ئه‌ڤه‌دزانی، لێ من دكه‌ت دێ یالا بۆ كوردستانێ دێ كوڕێن به‌رپرسا ژ مه‌خه‌مخۆر و دلسۆزتر بن و دێ هه‌می كه‌ربوكین و هه‌ڤڕكیێن خوه‌ داننه‌ ره‌خه‌كی چونكی ناڤێ كوردستانێ هاته‌ د بابه‌تی دا و هه‌میان باوه‌ریا ب هندێ هه‌ی كو كه‌س ژ وان كوره‌به‌رپرسا یێ ئاماده‌نینه‌ ڤێ ده‌رفه‌تا دیرۆكی ژده‌ست بده‌ت، لێ ما من دزانی دێ كوردستان و ریفراندۆم ب ده‌ستێن كورێن به‌رپرسان هێته‌ فرۆتن و تێكدان و كه‌س نه‌شێت بێژیتێ پێلاڤا پێ ته‌یا خاره‌ و ل كوردستانێ ب دلێ خوه‌ هاتن و چوونێ دكه‌ن!! وه‌یلا ژ ئه‌ڤرۆ وێڤه‌ كوردستانێ نه‌دیت من بۆ گۆت: به‌لێ و نه‌دیت من تبلا خوه‌ مۆر كر بوو حزبه‌كا وێ هندی سه‌ركردێن وێ ئه‌ڤ توخمه‌ مرۆڤه‌ بن یێن چاره‌نڤیسێ مه‌ ب ئه‌رزانی دفرۆشنه‌ دوژمنا.ن. بلا كه‌س هزر نه‌كه‌ت كو من تنێ به‌حسێ سه‌ركردێن ده‌ڤه‌را كه‌سك و شینه‌!.. نه‌خێر ل ده‌ڤه‌را مه‌یا زه‌ر ژی ئه‌م دپڕی خه‌له‌تی و لاوازی نه‌ و دڤێت ئه‌م دانپێدانێ ب ڤێ چه‌ندێ بكه‌ین. چونكی ل ده‌ڤه‌را زه‌ر ژی هنده‌ك یێ كوردستانێ دفرۆشن و ئه‌م یێ ده‌ستان بۆ دقوتین.. هندی ده‌ڤه‌را زه‌ر جورعه‌تا هندێ نه‌بیت بێژیته‌ خه‌لكێ خوه‌ كو ئه‌م ژ ده‌ڤه‌را كه‌سك و شین باشتر نینین و مه‌ ژی تێرا خوه‌ گه‌نده‌ل و خۆفرۆشێن هه‌ین و پشتی ڤان هه‌می روودانێن نه‌چاڤه‌ری ل گه‌ل جه‌ماوه‌رێ خوه‌ یێ زه‌ر بروینیت و بێژیتێ: مه‌ ژی خه‌له‌تیێن هه‌ین و وه‌رن دا پێكڤه‌ روونین و وان خه‌له‌تیان چاره‌سه‌ر بكه‌ین و دز و گه‌ندل و یێن نه‌هێلن ئێك پرۆژه‌ بهێته‌ ده‌ڤه‌را زه‌ر، هه‌كه‌ پشكا وی تێدا 51% نه‌بیت و ببیته‌ رێگر د پێشڤه‌چوونا وێ ده‌ڤه‌رێ دا، چونكی نابیت بازرگانیه‌ك یان پرۆژه‌كێ مه‌زن بهێته‌ ئه‌نجامدان، هه‌كه‌ ئێكێ بالا ده‌ست د پرۆژه‌ی دا نه‌بیت!! ما من دزانی كو هنده‌ك یێ پیلانا دگێرن بۆ شكاندنا ریفراندۆمێ و ئه‌وان ب خوه‌ پشكداری د ئاهنگێن ریفراندۆمێ دا دكر و ده‌ستێ خوه‌ دكره‌ د ناڤ ده‌ستێ سه‌رۆك بارزانی دا؟ ما هه‌وه‌ وه‌كی من دزانی كو حوكمه‌تا مه‌یا هه‌رێمێ هندا ب ئاقل نینه‌ كو بشێت مووچێ ئێك هه‌یڤ بۆ فه‌رمانبه‌رێن خوه‌ دابین بكه‌ت؟ باشه‌ كا پارێ گازێ؟ كا پارێ سنۆران یێن د ده‌ستێن ئێكه‌تی و پارتی دا؟ هه‌ما ئه‌ز ژی عه‌بادی بام دا بێژمه‌ هه‌وه‌كا ئه‌و پاره‌؟كیڤه‌چوون؟ كێ برن؟ بۆچی به‌رپرسێن كوردستانێ ب فرۆكێن تایبه‌ت یێن ده‌م ژمێرا وان (هه‌می به‌رپرس بێی جیاوازی) ب شێست هزار دۆلاران هاتن و چوونێ دكه‌ن و فرۆكخانێن ل به‌ر هه‌ڤوه‌لاتیێ كورد ژلایێ عه‌بادی و حوكمه‌تا ویڤه‌ فرین و دادان، لێ هاتیه‌ قه‌ده‌غه‌كرن بۆ به‌رپرسان دڤه‌كرینه‌! ئه‌ڤه‌ چ دگه‌هینیت؟ وێ چه‌ندێ دگه‌هینیت كو هه‌می به‌رپرسێن كوردستانێ و عه‌بادی شریكێن ئێكێن بۆ كوشتنا ڤی ملله‌تی!! ژ به‌ر ڤان هه‌می تشتا و گه‌له‌ك تشتێن دی نوكه‌ ریفراندۆمه‌كا دی بهێته‌كرن دێ بێژم نه‌خێر و نه‌خێر و نه‌خێر.. بلا به‌رپرسێن كوردستانێ و كورێن وان و بازرگانێن وێ بێژن، به‌لێ ئه‌وێن ب ملیۆنا ژ ڤێ كاره‌ساتا مه‌فایده‌ دكه‌ن..

84

دبێژن جاره‌كێ كابرایه‌كی بزنه‌ك هه‌بوو و ژ به‌ر ده‌ستكورتیێ ڤیا وێ بزنێ ببه‌ته‌سویكێ بفرۆشیت، چار دزیكه‌را زانی و پلانه‌ك دانا كو بزنا وی ژێ بدزن، به‌ری بگه‌هیته‌ سویكێ و بفرۆشیت، ئینا چوونه‌ د رێكا وی دا و ل سه‌ر رێكێ هه‌ر ئێك ژ پیچه‌ك ژ یێ دی دوور روینشتن.. كابرایێ خودانێ بزنێ گه‌هشته‌ نك یێ ئێكێ، ئینا دزیكه‌ری گۆتێ: ئه‌ڤه‌ ته‌خێره‌ ته‌ وه‌ریس كری ه‌ستویێ ڤی سه‌ی؟ به‌رده‌ گونه‌هه‌! كابرای لێ ڤه‌گێرا و گۆتێ صه‌یێ چ بابۆ بزنه‌ و چوو. باش د بزنێ فوكری و ده‌ستێ خوه‌ كرێ.. گه‌هشته‌ دزیكه‌رێ دووێ وی ژی گۆتێ خال كه‌س وه‌ریسا ناكه‌ته‌ستویێ سه‌یان به‌رده‌ گونه‌هه‌ بۆ ته‌!! كابرا ما حێبه‌تی، سه‌یێ چ خالۆ وللا بزنه‌ و دلێ وی ب شك كه‌فت و جاره‌كا دی چوو ده‌ستێ خوه‌ ب بزنێ دا ئینا خار و د دلێ خوه‌دا گۆتی (وللا بزنه‌) به‌لێ پا وه‌كو مه‌گۆتی دلێ وی ب شك كه‌فت خلاس.. گه‌هشته‌ دزیكه‌رێ سیێ، ئه‌وی ب مجداهی لێ كره‌هه‌وار و گۆتێ مام حه‌جی ئه‌ڤه‌ چیه‌ ته‌ وه‌ریس كریه‌ ستویێ ڤی سه‌یێ خۆلیبسه‌ر؟ كابرایێ خودانێ بزنێ پتر حێبه‌تی بوو و د دلێ خوه‌دا گۆت: هوون بێژن ئه‌ز یێ خه‌له‌تبم و شوونا بزنێ بینم من وه‌ریس ئێخسته‌ ستویێ سه‌یێ مال و ل گه‌ل خوه‌ ئینابیت و ل گه‌ل هندێ ل پشت خوه‌ زڤری و سه‌حكرێ كا چ ب وه‌ریسی ڤه‌گرێدایه‌ (بابۆ و للا بزنه‌)، ئه‌ڤه‌ بۆچی دبێژنه‌ من صه‌یه‌!! پشتی مقداره‌كێ چووی گه‌هشته‌ دزیكه‌رێ چارێ و پشتی سلاڤ كریێ گۆتێ: مام ئه‌ڤه‌ دێ ڤی سه‌ی كیڤه‌ به‌ی؟ ته‌ هۆسا وه‌ریس ئێخستیه‌ ستویێ وی و ب دووڤ خوه‌را دكێشی؟ ئینا خودانێ بزنێ گۆتێ والله‌ مام خولام ئه‌زێ خه‌له‌ت بوویم دا بزنا خوه‌ ئینم، من ب خه‌له‌تی ڤه‌ سه‌ ئینا و هێدی چو وه‌ریس ژ ستوویێ بزنێ ڤه‌كر و به‌ردا و دزیكه‌ر چوون بزنا وی بۆ گرت و دزی و كابرا ژی د رێیا زڤرینێ بۆ مال هه‌ر ل گه‌ل خوه‌ دئاخفت و دگۆته‌ خوه‌ من خێره‌ شوونا بزنێ سه‌ ئینای و هه‌تا گه‌هشتیه‌ مال و گۆتیه‌ خێزانا خوه‌، خێزانا وی ژی گوتێ صه‌یێ چ ته‌بزن بربو!؟ ئینا ژنوو د مه‌سه‌لێ گه‌هشت و زانی كو ئه‌و هه‌ر چار كه‌س دزیكه‌ر و فێلباز بوون و ب رێیا فێلبازیێن خوه‌ بزنا وی ژێ دزی..
من ئه‌ڤ سه‌رهاتیه‌ نڤیسی ژ به‌ر كو نوكه‌ حالێ مه‌ ل گه‌ل راگه‌هاندنا كوردی وه‌كو حالێ خودانێ بزنێ یه‌ د ده‌ستێن ڤێ راگه‌هاندنێ دا، ئه‌م هه‌می تشتا دبینین و دزانین و گولێ دبین و ئه‌ڤا مه‌ ب وه‌ریسی ڤه‌گرێدای بزنه‌. لێ ئه‌و هه‌می دبێژنه‌ مه‌ سه‌یه‌! هه‌واره‌ بابۆ والله‌ بزنه‌ لێ راگه‌هاندنا مه‌ یا رژده‌ كو مه‌ سه‌یێ ب گرێدای ب وه‌ریسی ڤه‌ و دێ دووماهیێ وه‌ل مه‌كه‌ن كو ئه‌مژی وه‌كی خودانێ بزنێ باوه‌ر بكه‌ین كو سه‌یه‌ و دێ بزنێ ب وه‌ریس ڤه‌ بۆ ڤێ راگه‌هاندنێ هێلین و دین بین كه‌ڤینه‌ چۆلا ..

90

به‌ری هه‌ر تشته‌كی من دڤێت خاله‌كێ بۆ خوانده‌ڤانێن ڤێ رۆژناما ل ده‌ڤه‌را به‌هدینان ده‌ردكه‌ڤیت بێژم، ئه‌و ژی ئه‌وه‌ كو حه‌ساسی نه‌هێته‌ كه‌سێ ژ به‌ر مانشێتێ من، ئه‌ڤرۆ بۆ گۆشا خوه‌ دانایی، چونكی دزانم خوه‌ هه‌كه‌ به‌رپرسێن باله‌به‌رز ڤێ رۆژنامێ و ڤێ گۆشێ نه‌خوینن، دێ مه‌لاق و مه‌سینهه‌لگر، گه‌هیننێ هه‌ر وه‌كی به‌ری نوكه‌ كۆمێنته‌كا من یا فه‌یسبۆكێ گه‌هاندیه‌ لقه‌كا پارتی و وێ لقێ هه‌می خزمه‌ت و كارێن من و مه‌سره‌فێ من ژ به‌ریكا خوه‌ ل وێ پارتێ كرین و ژبلی وه‌ستیانا من و ده‌ملده‌ست، نڤیسینه‌ك هنارت و ئه‌ز سزا دام و ب توندی ژی و ژ پله‌یه‌كا بلند كرمه‌ كورێ گۆندان!! یا پارتی ڤه‌ ئه‌ز ل ئورۆپا یێ ب نانێ وێ دژیم، لێ لقا وێ نه‌زانی كو ئه‌زێ پارتی ل ئورۆپا ب خودان دكه‌م و مه‌سره‌فی ژ ده‌ڤێ عه‌یالێ خوه‌ دئینمه‌ده‌ر و دكه‌مه‌ د ده‌ڤێ وێ دا و ئه‌ڤه‌ راستیه‌ و نه‌ پارتی و نه‌سه‌ركردایه‌تیا وێ دشێت بێژیت: نه‌، چونكی من هه‌می به‌لگه‌ یێن هه‌یین ڤێ گۆتنا من پشتراست دكه‌ن.. مه‌ شۆله‌ ژ ڤی تشتی نینه‌، دا بزڤرینه‌ بابه‌تێ خوه‌، ئه‌وێ ئه‌ز تێدا هیڤی و رجا ژ مه‌لاق و مه‌سینهه‌لگران دكه‌م و دبێژمێ قوربانا چاڤێ هه‌وه‌، بابه‌تی ب هووری بخوینن پاشی هه‌كه‌ هه‌وه‌ ڤیا بگه‌هیننه‌ هه‌ر كه‌سێ هه‌وه‌ بڤێت؟
ئه‌ز دێ مانشێتێ خوه‌ دوباره‌كه‌م وبێژم كو ئه‌ڤرۆ ئه‌م وه‌كو خه‌لكێ كوردستانێ و پشتی ریفراندۆم هاتیه‌ ئه‌نجامدان و ئه‌ز ئێك ژ وان كه‌سان بووم یێن من زۆر زه‌حمه‌ت ل مالا خوه‌ و دووری چاڤێن به‌رپرسان و پارتی و مه‌لاق و مه‌سینهه‌لگرا خزمه‌ته‌كا مه‌زن بۆ وێ ریفراندۆمێ كری و دێ جاره‌كا دی ژی كه‌م ئه‌گه‌ر نوكه‌ ژی بێژن دێ كوردستان ریفراندۆمێ بۆ سه‌رخوه‌بوونێ كه‌ت وچ جاران و كه‌س نه‌شێت من ژ وێ خه‌ونا شرین هشیار بكه‌ت و من ئه‌و خه‌ون یا كریه‌ د مێشكێ زارۆیێن خوه‌ دا ژی ومن باوه‌ره‌، دێ ئه‌و ژی كه‌نه‌د سه‌رێ زارۆیێن خوه‌ دا، ئانكو بلا دوژمن و نه‌حه‌ز بێهیڤی بن كو دێ رۆژه‌كێ ژ رۆژان، ئه‌م وه‌كو ملله‌تێ كورد ژ ڤێ خه‌ونێ هشیار بین.. ریفراندۆم مافێ مه‌بوو و دێ هه‌ر مینیت مافه‌كێ مه‌ یێ ره‌وا دوژمنان بڤێت و نه‌ڤێت.. سه‌رۆك بارزانی شه‌نگستێ وێ بۆ مه‌دانا و ئه‌م و زارۆ و نه‌ڤیێن خوه‌ دێ مالێن خوه‌ ل سه‌ر وی شه‌نگسته‌ی ئاڤا كه‌ین.. ئه‌ڤا نوكه‌ دهێته‌ سه‌رێ مه‌، هه‌می ژ ئه‌گه‌رێ ئه‌نجامدانا وێ ریفراندۆمێ و خیانه‌تكاریا هنده‌ك كه‌سان بوو، كو مخابن یا ژ وان ڤه‌ ئه‌و د دروستن، لێ نه‌زانی كو وان مالا كوردان ب وێ خیانه‌تكاریا خوه‌ دا ره‌خه‌كی و ئه‌م سه‌د سالان پشتوپشت زڤراندین و گه‌هشته‌ وێ چه‌ندێ كو ئه‌ڤرۆ چاڤێ مه‌ هه‌میان یێ ل كلاسیكۆیه‌كا جودا و ب هێز (نه‌ د ناڤبه‌را ریال و به‌رشا دا؟) به‌لكو د ناڤبه‌را نێچیرڤان بارزانی و حه‌یده‌ر عه‌بادی دا و كه‌س نزانیت كا دێ ئه‌نجامێن ڤی كلاسیكۆی چ بن؟ ئه‌رێ دێ عه‌بادی بسه‌ركه‌ڤیت وه‌كو هه‌تا نوكه‌ دیار، یانژی دێ نێچیرڤان بارزانی ئه‌وێ سه‌ره‌دانێن وه‌لاتێن ئه‌ورۆپی دكه‌ت؟ و ل گه‌ل سه‌رۆك و مه‌زنه‌ به‌رپرسێن وان دروونیت بسه‌ركه‌ڤیت؟ ئه‌ڤرۆ كورد هه‌می چاڤه‌رێی ئه‌نجامێن ڤێ كلاسیكۆیا دژوارن، چونكی ب راستی چاره‌نڤێسێ مه‌یێ ب ڤێ كلاسیكۆیا یاری تێدا ژ لایه‌كی ب تنێ ڤه‌ دهێته‌كرن ئه‌و ژی تیما عه‌بادیه‌، (وه‌كو به‌رشا ده‌مێ تێكی تاكا ب ریال دكر) و هندی كاك نێچیرڤانێ دهێت كو پیچه‌كێ ژی یان ژنشكه‌كێ ڤه‌ ژی چه‌ند خوله‌كێن یاریێ ته‌په‌ د ده‌ستێن وی دابن، لێ به‌رشایا عه‌بادی ده‌لیڤێ ناده‌ت، چونكی هێشتا كاك نێچیرڤان ل گه‌ل وه‌لاتێن په‌یوه‌ندیدار نه‌ روونشتیه‌ و ئاخفتیه‌ كو ئه‌مریكا و ئیران ب تنێ ئه‌ویێن دی هه‌می ژ قه‌ستانه‌! كاك نێچیرڤان چوو ده‌ف ماكرۆنی و مێركلێ و قه‌ول بوو بچیته‌ ده‌ف تێریزا مای ژی، لێ نزا بۆ چ به‌حسێ ڤێ چه‌ندێ نینه‌؟ له‌وما ب دیتنا من هه‌كه‌ كلاسیكۆیا وی و عه‌بادی ب ڤی شێوه‌ی برێڤه‌بچیت، ژمن وه‌ره‌ هه‌تا نوكه‌ و د كێمێ ئێكێ دا ئه‌م شه‌ش سفر یێن خوساره‌ت بووین و هیڤیا من ئه‌وه‌كو د كێمێ د ووێ دا عه‌بادی و تیما خوه‌ دوازده‌ گۆلان ل سه‌ر مه‌ تۆمار نه‌كه‌ن.. هه‌ی نه‌خۆزیێن مه‌ و ڤێ كلاسیكۆیێ!؟ لێ پا هه‌ر ئۆمێدا مه‌ ئه‌وه‌ كو دێ تێدا بسه‌ركه‌ڤین و دێ شێین سێزده‌ گۆلا تۆمار كه‌ین و ئه‌ڤ چه‌نده‌ ئه‌سته‌م نینه‌ و ئه‌م دشێین ریمۆنتادایه‌كا دیرۆكی ل سه‌ر عه‌بادی تۆمار بكه‌ین، هه‌كه‌ مه‌زانی؟ تێبینی..كه‌س خوه‌ ژ مانشێتی عاجز نه‌كه‌ت. هه‌ر ژ وی وێنێ رۆژناما رووداو خرابتر نینه‌، ئه‌وێ تێدا رسمه‌كی ده‌واته‌كێ به‌لاڤكری و نێچیرڤان بارزانی ل سه‌رێ عالای بوو.. دێ بلا ئه‌م به‌هدینی ژی پیچه‌كێ خوه‌ ب جورعه‌ت بێخین خوه‌ دونیا ناقولپیت!!.

65

كه‌سێ دلێ من نه‌حه‌لاند هندی راگه‌هاندنێ و هنده‌ك مه‌لاقێن كو نه‌ڤێن هه‌تا نوكه‌ دانپێدانێ ب هندێ بده‌ن كو سه‌روبه‌رێ مه‌ل كوردستانێ یێ ئالۆزه‌ و دڤێت ئه‌م د ناڤ خوده‌ا ل چاره‌سه‌ریان بگه‌رین، نه‌ك هیڤیا ژ ڤی و یێ دى بكه‌ین یێ چ گرێدان و ڤیان بۆ كوردستانێ و ملله‌تێ وێ نینن..نوكه‌ چاڤێ راگه‌هاندنێ ته‌نێ یێ ل هندێ كا دێ كیژان سیاسه‌تمه‌داره‌كێ بیانی بێژیت دڤێت حوكمه‌تا عیراقێ مافێ كوردان بده‌تێ! هه‌یلا من خۆلیا بنێ كۆچكی د رویێن هه‌وه‌دایی، نێ كوردستانا دروست بوو و مه‌ ب خوه‌ تێكدا و مافێن مه‌ فیت و فیتلێن بوون وه‌كو ب كولانكی دبێژن، به‌لێ مه‌بۆ خوه‌ نه‌هێلا، ڤێجا ژنوی وه‌ره‌ هیڤیا ژ ڤی و یێ هه‌ بكه‌ دا عه‌بادی ئه‌فندی قانع بكه‌ن پیچه‌كێ خوه‌ ل گه‌ل مه‌ نه‌رم بكه‌ت!! نزا دێ كه‌نگی راگه‌هاندنا كوردی و سیاسه‌تمه‌دارێن مه‌ گه‌هنه‌ وێ باوه‌ریێ كو كلیلا بده‌ستڤه‌ئینانا ماف و ده‌ستكه‌فتێن مه‌ یێن مه‌ ب چ ئه‌گه‌ره‌كێ هه‌بیت ژ ده‌ستداین یێ د ناڤا كوردستانێ دا و ئه‌و كلیل یا د ده‌ستێ مه‌ك وردان دا، ئه‌ڤجا نزا دێ بۆ چین هیڤیا ژ ڤی ویێ دی كه‌ین؟!. وه‌رن دا ب راستی باخڤین.. ترامب چ ناكه‌ت وی عیراق دڤێت و دێ پشته‌ڤانیا وێ كه‌ت، چونكی به‌رژه‌وه‌ندیێن وی و ئه‌مریكا پشكا مه‌زن یێ ل گه‌ل عیراقێ نه‌ك كوردستانێ، پۆتین هه‌ر وه‌سا، ماكرۆن و مه‌تا میركل و خاله‌تا تێرێزا مای و ئه‌ردوغان و هه‌تا سه‌رۆكێ ته‌یموورا ئه‌لشرقیه‌، دبێژن ئه‌م دگه‌ل عیراقه‌كا ئێكگرتی نه..مه‌عیراقه‌كا ئێكێ گرتی یا ب هێز دڤێت مافێ كوردان تێدا یێ به‌رزه‌ نه‌بیت (پارچا دووماهیێ ته‌نێ پیچه‌كا حه‌لاوێ یه‌ د كه‌نه‌ ده‌ڤێ مه‌!!) هه‌كه‌ كه‌سێ ئه‌م نه‌ڤێین، چونكی مه‌ ب خوه‌ خوه‌ نه‌ڤێت و بۆ مه‌دیار بوو كو چ ژ وان سه‌رۆك و سه‌رۆك وه‌زیرێن جیهانێ و وه‌لاتێن وان، نه‌خه‌مه‌ كوردستان و گه‌لێ وێ عێجز بیت یان نه‌. ئه‌و به‌رژه‌وه‌ندیێن خوه‌ ناده‌نه‌ ب هزار كوردستانان و خه‌لكێ وێ، لێ مخابن ئه‌م كورد ڤێ چه‌ندێ نزانین و خوه‌ د مه‌سه‌لێ ناگه‌هینین و هێشتا ئه‌م یێ ل هیڤیێ كو ئه‌و بوو مه‌ تشته‌كی بكه‌ن، باوه‌ر بكه‌ن هه‌كه‌ هات و وان بۆ مه‌كر و عه‌بادی قانعكر كو هه‌ما چ نه‌قه‌بوول بكه‌ت، پێشوازیا شانده‌كی كوردستانێ بكه‌ت و بلا چ نه‌ده‌ته‌مه‌، دێ ئه‌و تشت زۆرێ بێ تام و قیمه‌ت بیت، لێ ئه‌گه‌ر مه‌ كوردان ل كوردستانێ خوه‌ كره‌ ئێكرێز و ئێك ده‌ست و بۆ جیهانێ دیار كر كو ئێدی نابینه‌ كو ستێرك د ده‌ستێن وان دا و مه‌ قیمه‌ت دا خوه‌ و بدووڤ چ سه‌رۆك و وه‌لاتان ناكه‌ینه‌ گری دا ده‌ستێ مه‌ بگرن، هینگی ئه‌و سه‌رۆك و ئه‌و وه‌لات دێ هزره‌كا دی بۆ مه‌كه‌ن وه‌كو هێزه‌كا مه‌زن ل ده‌ڤه‌رێ نه‌ك هه‌ر رۆژا وان ڤیا مه‌ بلڤینن دێ مه‌ لڤینن و رۆژا ڤیا مه‌ بنڤینن دێ باش مه‌ نخێڤن!! ماكرۆنی گۆت؟ ترامبی گۆت؟ بۆتینی گۆت؟ سوباهی دێ مه‌تا مێركل ژی بێژیت و پشتی وێ خاله‌تا مای ژی دێ بێژیت، لێ باوه‌ر بكه‌ن ئه‌و هه‌می ده‌ستئینانه‌كا خارێ یه‌ ل سه‌ر پرچێ مه‌ و د دلێ خوه‌ دا دبێژنه‌ مه‌ چ نینه‌ دلێ خوه‌ نه‌هێلن هه‌وه‌ بۆ خوه‌ چ نه‌كر دێ ئه‌م بۆ هه‌وه‌ چ كه‌ین؟ د سه‌ر ڤێ هه‌میێ را هێشتا ئه‌م باوه‌ر ناكه‌ین كو ئه‌ڤه‌ هه‌می ب تنێ دبێژن به‌لێ ناپێژن، نانێ خوه‌ دڤێت ئه‌م ب پێژین چونكی ئه‌و نزانن نانێ كوردی وه‌كو كوردان دڤێت بۆ مه‌ ب پێژن.. دڤێت ئه‌م ته‌نویرا خوه‌ بشارینین و بزۆتكێن مه‌زن بكه‌ینه‌ تێدا دا چریسكێن وێ وێ دوباره‌ بگه‌هنه‌ هه‌میان و بزانن كو كورد دكه‌ڤن، بریندار دبن، لێ نامرن..دێ مرین ته‌نێ هه‌كه‌ ئه‌م به‌رده‌وام بین ل سه‌ر ڤێ خاپاندنا ملله‌تی ژلایێ راگه‌هاندنا كوردی و سیاسه‌تمه‌دارێن نه‌ڤێن راستیان بۆ ملله‌تی بێژن.. گه‌لی سیاسه‌تمه‌دارا، پارت و لایه‌ن، حوكمه‌ت به‌سه‌، چاره‌سه‌ری یا ل كوردستانێ و د ده‌ستێن كوردان دا ئه‌ڤجا به‌س مه‌ل وه‌لاتان بشكێنن ب هێجه‌تێن جودا جودا؟ كه‌سێ ژ هه‌وه‌ ناگه‌هیته‌ 5% ژ كه‌سایه‌تی و هێزا سه‌رۆك بارزانی و ملله‌ت ل دۆر كه‌سێ ژ هه‌وه‌ نازڤریت وه‌كو ل دووڤ وی زڤری و حه‌زژێ كری، لێ هه‌وه‌ دیت، ژ به‌ر به‌رژه‌وه‌ندیێن خوه‌ و وه‌لاتێن خوه‌ پشتی روودانێن كه‌ركووكێ هه‌میان خوه‌ دا تایێ عه‌بادی و عیراقێ و ئه‌م كرینه‌ قوربانیێن وان به‌رژه‌وه‌ندیان!! له‌وما وه‌رن ل كوردستانێ و د گه‌ل كوردان بروونن و بئاخڤن، چونكی كلیل یا ل ڤێره‌نه‌ ژ ده‌رڤه‌.

98

پشتی چه‌ند رۆژه‌كێن دی، دێ بنه‌ ١٧ سال ئه‌ز ل باژێرێ جنێف یێ سۆیسری دژیم، هه‌ڤده‌ سال ژی عه‌مره‌كه‌، زارۆیێن من دبچووك بوون، ده‌مێ هاتینه‌ جنێف و نوكه‌ یێن بووینه‌ زه‌لام.. هه‌ڤده‌ ساله‌ به‌رده‌وام كه‌سوكار و دۆست و هه‌ڤال پسیارا ئه‌زه‌لی ژمن دكه‌ن، دهۆك و كوردستان خۆشترن یان جنێف و سۆیسرا؟ هه‌ر چه‌نده‌ دزانم كو ئه‌و ب خوه‌ به‌رسڤێ دزانن، لێ من هه‌ر گاڤ ب كورتی به‌رسڤا وان ددا و دگۆتێ ل جنێف ده‌مێ سه‌رێ خوه‌ ددانمه‌ سه‌ر بالیڤكێ ئێكسه‌ر دخه‌و دچم.. هنده‌ك تێدگه‌هشتن و هنده‌ك ژی نه‌، یێن دووێ دگوته‌ من یه‌عنی چاوا؟ من دگۆتێ ده‌مێ ئه‌ز ل دهۆكێ هنده‌ك جاران هه‌تا سه‌عه‌ت پێنچی سپێدێ ئه‌ز نه‌ دنڤستم هندی من هزر دكرن و كا دێ سوباهی چ كه‌م و چ ناكه‌م و دترسم ژ نشكه‌كێ ڤه‌ ئاریشه‌ك بۆ من په‌یدا بیت، چونكی ئه‌م ب مه‌زاجیه‌ت شۆل دكه‌ین نه‌ك سیسته‌م و رزقێ مه‌ یێ د ده‌ستێ مرۆڤان دا و چ قانوون نینن مه‌ بپارێزن و به‌ره‌ڤانیێ ژمه‌ بكه‌ن، لێ ل جنێف ئه‌و سوحبه‌ت نینه‌، ژین و ژیارا ته‌ د ده‌ستێ چ مرۆڤان دا نینه‌ یا د ده‌ستێ سیسته‌می و قانوونێ و مرۆڤایه‌تیێ دا، له‌وما ده‌مێ ل جنێف سه‌رێ خوه‌ ددانمه‌ سه‌ر بالیفكێ ئێكسه‌ر دخه‌و دچم و هزرێن هندێ ناكه‌م كا دێ سه‌رێ هه‌یڤێ مووچێ خوه‌ وه‌رگرم یان نه‌؟ چونكی ئه‌ز نوكه‌ دزانم كا دێ ل سالا ٢٠١٨ كیژان رۆژێ مووچێ خوه‌ یێ هه‌یڤانه‌ وه‌رگرم و كه‌نگی بێهنڤه‌دانێن منن و ژیانا من وخێزانا من ژ خانی و ترومبێلێ و خوارنێ و قوتابخانا و چاڤدێریا ته‌ندروستی و مووچێ هه‌یڤانه‌ ددابین كریه‌ چ شۆل بكه‌م یان شۆل نه‌كه‌م، له‌وما ته‌نا و رحه‌ت دنڤم و نه‌ من ل زفستانێ ساره‌ و نه‌ ل هاڤینێ گه‌رمه‌.. هه‌ڤده‌ ساله‌ ل جنێف من ئێك رۆژ ژی پێلاڤا خوه‌ بۆیاغ نه‌كریه‌، هه‌رچه‌نده‌ بۆیاغچی ل ڤێره‌ نینن، چونكی پێلاڤ پیس نابن، ژ به‌ر پاقژیا جاده‌ و كولانان و ل دهۆكێ ژی ئه‌ز بویاغچی مه‌عمیلێن ئێك یێن رۆژانه‌ بووین و ل دووماهیێ بووینه‌ هه‌ڤالێن ئێك ژی.. هه‌ڤده‌ ساله‌ من رۆژه‌كێ ژی ئێكێ جنێفی و سویسری نه‌دیت مایێ خوه‌ دژیانا من و زارۆیێن من دا بكه‌ت و بێژیته‌ مه‌ ئه‌ڤه‌ شه‌رمه‌ و ئه‌ڤه‌ عه‌یبه‌ و ده‌مێ ئه‌ز گه‌نج ل دهۆكێ من نه‌ دوێریا ژبه‌ر مامێ خوه‌ قه‌میسێ نیڤ هچك بكه‌مێ دگۆته‌ من ته‌ هه‌تكا مه‌ بر قه‌میسێ نیڤ هچك دكه‌یه‌به‌ر خوه‌!! هه‌ڤده‌ ساله‌ ئێك رۆژ مووچێ من گیرۆ نه‌بوویو، و ل دهۆكێ و سه‌ره‌رای هندێ من سێ كار دكرن خودانێ خانی ژ جامێرینیا خو ه‌ئه‌ز ژ وێ ژۆرا من دخانیێ وی دا بكرێ گرتی نه‌ ده‌ردئێخستم و خوه‌ ل من دگرت هه‌تا جاره‌كێ من مووچه‌ وه‌رگرتبا.. هه‌ڤده‌ سال.. د ڤان هه‌ڤده‌ سالان دا من مرۆڤێن هه‌می وه‌لاتێن جیهانێ و نه‌ته‌وا دیتن، ل دهۆكێ ژبلی كورد و عه‌ره‌بان من كه‌سێ دی نه‌ددیت و هه‌كه‌ جاره‌كێ شانده‌كی بیانێ یێن چاڤشین و پرچ زه‌ر هاتبانه‌ دهۆكێ ئه‌م درابووینه‌ چه‌پا ژ كه‌یفا دا و مه‌چاڤێن خوه‌ بلوووق دكرن كا دێ چاوا ئاخڤن و چاوا برێڤه‌چن و چاوا خوارنێ خۆن!! به‌ری وان هه‌ڤده‌ سالا ٣٠ سال ژ ژیێ من چوون و من چ ژ ڤێ جیهانا مه‌زن نه‌دیت و ژێ فێر نه‌بووم ژبلی هندێ ژ به‌رۆشكێ هه‌ره‌ سیكێ و ژسیكێ بزڤره‌ به‌رۆشكێ و هه‌ر چه‌ند هه‌یڤه‌كا جاره‌كێ مه‌ هه‌ڤلێر ددیت و ده‌مێ دچووینه‌ هه‌ڤلێرێ مه‌ وه‌سا كارێ خوه‌ دكر هه‌روه‌كو دێ چینه‌نیۆیۆرك!؟ هه‌لبه‌ت نوكه‌ گوهۆرین یێن په‌یدا بووین و دهۆك و كوردستان پیچه‌كێ یێن پێشكه‌فتین، لێ ژبیر وه‌ نه‌چیت ژی كو ئه‌و تشتێ نوكه‌ ئه‌م دبێژینێ پێشكه‌فتن ل دهۆكێ و كوردستانێ هه‌ر مودێلا وان ل جنێف و سۆیسرا نه‌مایه‌، چونكی جنێف و سۆیسرا كا چه‌ند كوردستان و دهۆك پێشكه‌فتینه‌ ئه‌و ٢٠٠ قاتی پتر یێن پێشكه‌فتین.. د ڤان هه‌ڤده‌ سالێن بۆری دا رۆژ نینه‌ ئه‌ڤ پسیاره‌ خوه‌ ل سه‌رێ من نه‌ده‌ت (ئه‌رێ بۆچی ئه‌م ل عیراقێ و كوردستانێ و دهۆكێ وه‌كو سۆیسرا و جنێف لێ ناهێین؟) هنده‌ك دێ بێژن ئاینێ مه‌ نه‌ ئێكه‌؟باشه‌ بابۆ وه‌كو سۆیسرا لێ نه‌هێن وه‌كو ئه‌ندۆنیسیا و تركیا و ئیمارات و ئه‌لبانیا لێ بهێن؟ هنده‌ك دابونه‌ریت ژبلی ئاریشێن جوگرافی ژی ناهێلن؟ ئه‌و ژی راسته‌، لێ هه‌كه‌ مه‌شیا ئه‌م شه‌نگسته‌كێ باش بدانین ئه‌و هه‌می نابنه‌ ئاسته‌نگ ل به‌ر پێشڤه‌چوون و شارستانیه‌تێ..

52

دێ چێبیت.. دێ ژ به‌رێ خۆشتر لێهێت.. سه‌برێ بكێشن، ته‌حه‌مولێ بكه‌ن! بێهنا خوه‌ فره‌هتر لێبكه‌ن.. ئه‌م یێن شۆل دكه‌ین بۆ خۆشكرنا ژیارا هه‌وه‌!! مه‌ئنیه‌ته‌، ئه‌مێ دیراسه‌ت دكه‌ین، مه‌به‌رێ بیناتێ پرۆژێ ستراتیجی دانا و دێ ل نێزیك ده‌سپێكه‌ین.. كۆمبوون دبه‌رده‌وامن پێخه‌مه‌ت پێشڤه‌برن و پێشخستنا كوردستانێ و خۆشكرنا ژیارا خه‌لكێ وێ و.. راگه‌هاندنێ ئه‌م هێڕكرین هندی بۆ مه‌ تشتێن خۆش دبێژن! بابۆ خوه‌ گه‌له‌ك نه‌وه‌ستینن. عه‌دلایا پیرا من ڤێ زڤستانێ نوكه‌ دوعایێن وێ ل سه‌ر جلنڤێشكێ به‌رمیله‌كا گازێ یه‌ شوونا بۆ خوه‌ دوعا بكه‌ت كو بچیته‌ به‌حه‌شتێ ڤی دووماهیا عه‌مری! عه‌یشا خاله‌ت چل سالان خزمه‌تا كری بۆ باژێرێ دهۆكێ نه‌ك بۆ ده‌ستهه‌لاتدارا ب رێیا كارێ خوه‌ وه‌كو فه‌راشه‌ك ل قوتابخانا و نوكه‌ چاڤێ وێ ته‌نێ یێ ل سه‌رێ هه‌یڤا و سه‌رێن هه‌یڤا ژی یا خوه‌ ل به‌ر به‌رزه‌كری!! سیاسه‌تمه‌دار ژی ماشا الله‌ تبارك الله‌ دتێرن و وه‌زعێ وان فیت و فیتلێنه‌ ب خێزان و كه‌سوكار ڤه‌، له‌وما ده‌مێ ل سه‌ر شاشێن ته‌له‌ڤزیۆنان ده‌ردكه‌ڤن كوردستانێ وه‌لێدكه‌ن دێ بێژی مرۆڤێ ل سۆیسرا دژیت!! نه‌گازه‌، نه‌كاره‌به‌، نه‌ مووچه‌یه‌، نه‌رێكن، نه‌تعییناتن، نه‌ئاڤه‌، هێزا مه‌ هه‌ی ژی نه‌ما وه‌كو به‌رێ! نه‌قوره‌ده‌ره‌ و كو شاعر دبێژن! و دێ كابرایه‌ك ل سه‌ر شاشێ ده‌ركه‌ڤیت و بێژیته‌ مه‌ دێ چێبیت!! كه‌نگی برا؟ كه‌نگی ئه‌ز خولام؟ مانێ ده‌مێ یا چێبووی هه‌وه‌ باشتر لێنه‌كر نزا دێ نوكه‌ چ گیڤكا به‌یێ!! هه‌رده‌م و گاڤ دبێژم وه‌رن دا ل گه‌ل هه‌ڤدو دراستگۆ بین. ئه‌ز ل هه‌وه‌ ناڤه‌شێرم، مه‌ وه‌كو ملله‌ت دره‌و ل هه‌وه‌كرن و هه‌وه‌ وه‌كو ده‌ستهه‌لاتدار دره‌وێن مه‌زنتر ل مه‌كرن! هه‌وه‌ دره‌وێن مه‌ باوه‌ركرن و مه‌ژی د هه‌مان ده‌م دا دره‌وێن هه‌وه‌ باوه‌ركرن.. لێ نوكه‌..نوكه‌ ئه‌م هوون چ بكه‌ین پشتی ڤان هه‌می دره‌وێن مه‌ ل ئێك كرین؟ چونكی هێشتا نه‌عه‌دلایێ گاز وه‌رگرتیه‌ و ئه‌ڤه‌ به‌فرا سپی خوه‌ نیشا كوردستانێ دا و نه‌ خاله‌تا عه‌یش مووچی خوه‌ وه‌رگرت! نوكه‌ من دڤێت بزانم كا ئه‌م وه‌كو ملله‌ت و هوون وه‌كو ده‌ستهه‌لاتدار چ دكه‌ین؟ وه‌ راستی بڤێت سه‌رێن رێیا ل به‌ر مه‌به‌رزه‌بوون؟ ئه‌ز نه‌هند مرۆڤه‌كی ره‌شبینم، لێ ده‌مێ دبینم كو تیلرسۆن چوو به‌غدا و نه‌ هاته‌ كوردستانێ، خوین ژ دلێ من ڤه‌ره‌سیا! ده‌مێ من دیتی تێریزا مای ب ره‌خ عه‌بادی ڤه‌ و ژ به‌غدا چوویه‌ سعوودیێ و ئوردونێ و نه‌هاتیه‌ كوردستانێ، من زانی یا مه‌ ژ بنی چوو.. ئه‌ڤجا نزا مه‌ چ ل به‌ره‌ نوكه‌ و ما دێ هه‌ر هیڤیان ژ به‌غدا كه‌ین دا دانوستاندنان ل گه‌ل مه‌ بكه‌ن؟ ئه‌ز نابێژمه‌ هه‌وه‌ كو ئه‌ز عه‌مێ گۆزێ مه‌ د سیاسه‌تێ دا، لێ پا چ نه‌بیت ئه‌ز ژی وه‌كو هه‌ڤوه‌لاتیه‌كی كورد دزانم كا نوكه‌ره‌وشا مه‌یا چاوایه‌. ئه‌م یێ د ره‌وشه‌كا زۆرا خراب دا و مه‌ پێدڤیا ب كاره‌كی مه‌زن هه‌ی كو كوردستان ئارام ببیت ژ هه‌می لایان ڤه‌، ئه‌ڤه‌ خه‌ونا مه‌ یه‌ وه‌كو ملله‌ت. ئه‌ڤجا ده‌ستهه‌لاتدار چاوا هزر دكه‌ن ئه‌ز ڤێ چه‌ندێ نزانم، چونكی ئه‌م و ده‌ستهه‌لادار نوكه‌ گه‌له‌ك ژ ئێك دوورین.. قوربانیێ ئێكێ یێ ڤی بارودۆخێ نوكه‌ كوردستان تێدا دبۆریت دو لایه‌ن ب تنێ نه‌.. سه‌رۆك بارزانی و ملله‌تێ كوردستانێ و ڤان هه‌ردویان زه‌ره‌ره‌كا مه‌زن دیت.. یێن دی، چ حوكمه‌ت و چ حزب و لایه‌نێن دی یێن سیاسی و بێی چو جوداهی هه‌می د مسته‌فیدن ژ ڤی بارودۆخی، چونكی كوردستان و جیهان هه‌می گه‌هشته‌ وێ قه‌ناعه‌تێ كو گرێدانه‌ك و هه‌ڤسۆزیه‌كا مه‌زنا د ناڤبه‌را ملله‌تی و سه‌رۆك بارزانی دا یا هه‌ی، ئینا هه‌می كه‌س و لایه‌نان و ژ وان پارتی ب خوه‌(بێی كو بزانیت) هه‌ول دان داكو ملله‌تی و سه‌رۆك بارزانی ل به‌ر ئێك ره‌ش بكه‌ن، لێ تشتێ كه‌سێ هه‌تا نوكه‌ نه‌زانیه‌ ئه‌وه‌ كو كوردستان ب پارتی و ئێكه‌تی و گۆران و ئێكگرتوو یێن خوه‌ڤه‌ نه‌زانی كو ئه‌ڤ ملله‌ته‌ سه‌ره‌رای هه‌می بیر و بۆچوونێن وان یێن جیاواز ب تنێ ل سه‌ر ئێك تشت ب رێدكه‌فتن ئه‌و ژی ئه‌وه‌ كو كه‌س نینه‌ بشێت وه‌كو سه‌رۆك بارزانی ڤێ كوردستانێ و ڤی ملله‌تی برێڤه‌ببه‌ت.. له‌وما ل دووماهیێ وان هه‌میان سه‌ركه‌فتنه‌ك ل سه‌ر مه‌ ئینا و یا ژ وانڤه‌ دێ ره‌وش هه‌ر هۆسا مینیت! لێ وان ژبیر كر كو نوكه‌ ژی سه‌رۆك بارزانی هه‌ر یێ مای تاكه‌ مه‌رجه‌عێ مه‌ كوردان ژ بلی هندێ كو سه‌رۆكێ پارته‌كا سه‌ره‌كیه‌ كو ب مخابنی ڤه‌ سه‌رۆكێ وێ، ژ به‌ر هه‌می كوردستانێ و ملله‌تێ وێ پارتا خوه‌ ئیهمالكر هه‌تا گه‌هشتیه‌ راده‌یه‌كێ وه‌سا كو ره‌وشا پارتا وی یا د ته‌قه‌له‌قێ دا و دڤێت بگه‌هیتێ، چونكی گه‌هشته‌ سه‌رێ دفنا ئه‌ندامێن وێ.. له‌وما وه‌كو پارتیه‌ك زۆر كه‌یفا من یا هاتی سه‌رۆك بارزانی خوه‌ ژ هه‌می ده‌ستهه‌لاتێن حكومی دوورئێخستی، چونكی مه‌ پارتیا پێدڤیا پێ هه‌ی دا پارتا مه‌ دروست بكه‌ت و پارتی چ جاران وه‌كو ئه‌ڤرۆ پێدڤی ب سه‌رۆكێ خوه‌ نه‌بوویه‌، چونكی سه‌رۆكی ئه‌م ئیهمال كربووین؟

211

ئازاد گۆله‌يى

چ وەلات و مللەت ل سەر روویێ ڤی عەردی ھندی مللەتێ عیراقێ کەربێن من ڤەناکەن؟ د رویس و برسی و دەربەدەر و نەساخ و د ھەژار و وەلاتێ ئێکێ بۆ گەندەلیێ و دزیێ و کوشتن و رەڤاندنێ، لێ دەمێ تو د گەل ئێکێ عیراقی دئاخڤی و بەحسێ رەوشا عیراقێ دکەی، دێ کابرا ئێکسەر بێژیتە تە (أحنة عيراق الحضارة و حمورابي و بابل و الجنائن المعلقة ووو..هتد) و دێ ڤێرا چیت و وەل عیراقێ کەت خوە دێ بێژی یێ بۆ من بەحسێ سۆیسرا دکەت!! ئەز ژی تەنا دێ ب ھندەک تشتان بێژم یێن نوکە ل عیراقێ و کا چەند زارۆیێن بێ دەیک و باب ھەنە و چەند ئافرەتێن بیژن و چەند قەیرەکج و چەند پەککەفتی و بریندار و ھەژار و نەساخێن بێ خەستە و دەرمان ھەنە؟ کابرا ژی دێ زڤریت و بەرسڤا ئەزەلیا ل سەر لێڤا ھەمی عیراقیان بێژیت (دێ عیراق زڤریت وەکی بەرێ و خۆشتر!!) ئەز ژی دێ بێژمێ وەکو کەنگی؟ ودێ بۆ ڤێرا چم دیرۆکا عیراقێ یا خوینێ و کوشتنێ و کۆدەتا و شەڕا بۆ بێژم دا بۆ خوە چەرخەکی ژێ بگریت و بێژمێ تە دڤێت عیراقا تە بزڤریتە کیژان چەرخی؟، چونکی تو ھەرێ دبێژی دێ زڤریت و ژ بەرێ خۆشتر؟ کا کەرم بکە بۆ من بەرێیەکا خۆش یا عیراقێ بەحس بکە؟ کابرا دێ مینیتە ئاسێ وچ بەرسڤ نامینن، چونکی ھۆسا یێ پەروەردەبووی کو عیراق چ جاران ناکەڤیت و ھەر جارا بکەڤیت دێ زوی ل سەر پێن خوە راوەستیت، چونکی وەلاتەکێ قارەمانە! خودان مللەتەکێ ب ھێزە! ئیرادا وان یا پیلایی یە! دوژمنێن وێ دمشەنە! ب درێژاھیا عیراقێ وەکو وەلات ژ مەلەکیێ و ھەتا ئەڤرۆ تنێ یێ ڤی تشتی دکەنە د مێشکێ عیراقیان دا ووەسا وەسفا وان دکەن کو چ ھێز ل ڤێ جیھانێ نەشێنە عیراقێ و عیراقیا و وان ژی ئەڤ تشتە باورکر و ئێک ژ وان عیراقیا عەبادی یە یێ کو ئەم ھەمی ھێڕ کرین ھندی ل راگەھاندنێ ڤی وەلاتی و ڤی مللەتی وەسا بۆ خەلکی ددەتە نیاسین کو ھەمی ھرقەلن و دلپاقژ و نموونەنە ل سەرانسەری جیھانێ!! راستە نوکە کەربێن ھەوە ژی وەکی یێن من ڤەدبن، چونکی ئەم و جیھان ھەمی دزانین کو ھەمی درەون وچ وەلات ب ناڤێ عیراقێ یێ کو ٥٪ ژ شەنگستێن وەلاتی تێدا نینن، لێ مللەتێ وێ و سیاسەتمەدارێن وێ دبەردەوامن ل سەر درەوێن خوە و ژ ھەمی عاقلێ وان دێ عیراقا وان ھۆسا مینیت یاکو نوکەژ ئەگەرێ خیانەتکاریا ھندەک کوردان چەند سەرکەفتنەک بدەستخوەڤە ئیناین و رەوشا وان باش بوو و یا مەکوردان یا خراب دبیت؟ ئەز ل ڤێرە دبێژمە عیراقیان و سیاسەتمەدارێن وان ل سەر وی گوھی نەنڤن کو عیراقا سەرکەفتنا ب دووڤ سەرکەفتنێ تۆمار دکەت، خوە بگرن گەلی عیراقیان، خوە بگرن ھندی مە بیرە رەوشا ھەوە ھەرا ئالۆزە و مللەتێ تە سەرێ ئێک ودو نەڤیایە و ھوون وەکو پەزی نە ھاژۆتنا ھەوە گەلەکا ب ساناھی یە ژ لایێ بیانیان ڤە، ئەڤجا گەلەک شانازیێ ب رەوشا نۆکە یا وەختی نەبەن، چونکی ھوون ژی وەکی مەکوردان نزانن چ جاران بۆ خوە ئاقلی بگرن و دەلیڤێن سەرکەفتنان بۆ خوە بکەنە شەنگستەکێ پیلایی، تشتێ ئەز گەلەک عێجزیان ژێ دخۆم، ئەوە کو ھەوە ئەم کورد ژی وەکو خوە فێری وەتەنیاتیان و درەوا و گەندەلی و دزیێ کرین! چونکی ھوون و ئەم نزانین کو وەریسێ درەوێ یێ کورتە و راگەھاندن و بەرپرسێن مە نوکە ژی وەکو راگەھاندن و بەرپرسێن ھەوەیێ درەوا ل مە وخوە دکەن!! کا چاوا خێر و خێراتێن عیراقێ ھاتن و دھێنە دزین؟ یێن مە کوردان ژی ھاتنە دزین ب دەستێن کوردان ھەتا گەھشتیە وێ رادێ ئەم گازێ فرێ دکەینە ژ دەرڤە و خەلکێ مەیێ بێ گازە و زارۆیێن مە یێن ژ سەرمان دا دلەرزن!! لەوما ئەگەر رۆژەکی ئەزێ گەشبین بم، ئەڤرۆ من چ گەشبینی نەمایە کو دێ رەوشا مە دروست بیت چونکی ئەم بو خو چ ناکەینە خەم..

website security