بژار مسەدەق

سه‌ره‌رایى وێ یه‌كێ كو ئه‌ڤه‌ ماوه‌كێ درێژه‌ د قه‌یره‌نه‌كا دارایى یا بێ دووماهیك دا دژین و ژ هه‌موو ئالیان ڤه‌ خه‌لك بێزار بوویه‌ و نها به‌ره‌لایه‌كا مه‌زن ژى كه‌فتیه‌ د بازارى دا و هه‌ر كه‌سێ هاى ژ ره‌وشا خه‌لكى نه‌مایه‌! ئێ باشه‌ ما هه‌ما خه‌لك یێ نڤستى و جاره‌كا دن فێرى قه‌یران و نه‌خۆشیان بوون و وه‌كو دبێژن دێ برێڤه‌ چیت و مه‌ گرتى مه‌ چنینه‌ و به‌لكو جاره‌كێ چێ ببیت، ئێ هه‌وه‌ خێره‌ حوكمه‌ت و سازیێن په‌یوه‌ندیدار ما پاره‌ نینن دێ هه‌ر دنڤستى بن دێ ژ خه‌و رابن نێ چ نه‌مایه‌ ب سه‌رێ ڤى خه‌لكێ هه‌ژار نه‌هاتى یان هێشتا مایه‌؟! دێ بلا هه‌وه‌ ئاگه‌ه ژ ره‌وشا خه‌لكى هه‌بیت به‌سه‌ نه‌خاسمه‌ ل پارێزگه‌ها دهۆكێ كا چاڤدێریا بازرگانى و كا ساخله‌میا دهۆكێ و كانێ لایه‌نێن په‌یوه‌ندیدار و كا حوكمه‌ت؟! ئێ قه‌یران قه‌یران ما هوین نه‌شێن هه‌ر چ نه‌بیت دووڤچوونا بازارى بكه‌ن، داكو پیچه‌ك ئه‌ڤ خه‌لكه‌ ئارام ببیت به‌س بێگومان نها هه‌موویان ره‌وش پشتگوه هاڤێتیه‌ و چ لێ بهێت بۆ وان خه‌م نینه‌ و یان دن ژى ئاریشا وه‌لاتیانه‌ و بلا بقه‌تینن!.
خوانده‌ڤانێن هێژا ئه‌ڤ جۆرێن ده‌رمانێن هوین دبینن ئێك كۆمپانینه‌ و ل ده‌رمانخانان ل دهۆكێ بهایێ وان 130 هزار دینارن و هه‌مان ده‌رمان و هه‌مان كۆمپانى ل ده‌رمانخانان هه‌ر ل باژێرێ دهۆكێ ب 60 هزار دیناران بن، به‌لكو هه‌ر دو ده‌رمانخانه‌ ژى جیرانێن ئێك بن له‌ورا دێ بێژین ده‌ست خۆش بۆ وژدانا خودانێن ده‌رمانخانان نێ ئه‌ڤ خه‌لكه‌ ژى هه‌ر مرۆڤ و كه‌س و كارێن هه‌وه‌نه‌ دێ به‌رى كه‌سه‌ك بێژیته‌ هه‌وه‌ هوین ب خوه‌ وژدانا خوه‌ بده‌نه‌ كارى و هاریكاریا ملله‌تێ خوه‌ بكه‌ن! نێ پتریا ڤان نه‌خۆشان خێزانێن شه‌هید و پێشمه‌رگێن قاره‌مانن و ئه‌گه‌ر نها ئه‌و ل سه‌نگه‌رێن پێشیێ یێن شه‌رى نه‌بان و ل گه‌رمێ و سه‌رمایێ به‌رگریێ ژ هه‌وه‌ نه‌كه‌ن پشتراست بن هوین نه‌دشیان ل بازارى ب ئازادى كارێ خوه‌ بكه‌ن دێ بلا ئه‌ڤ چه‌نده‌ ل پێش چاڤێن هه‌وه‌ بیت، یا رێڤه‌به‌ریا چاڤدێریا بازرگانى و یا رێڤه‌به‌ریا ساخله‌میا دهۆكێ دێ سه‌ره‌دانا بازارى بكه‌ن یان ژى گه‌له‌ك پلێن گه‌رمێ یێ بلند بووین و هوین نه‌شێن بهێن سه‌حكه‌نه‌ ره‌وشا بازارى، نێ به‌ره‌لایێ باژێرێ مه‌ داگیر كر و هنده‌ك بازرگانان ژى و ژدان نه‌مایه‌ دێ پیچه‌كێ سپلێتا بهێلن و ده‌ركه‌ڤن ئه‌ڤى خه‌لكى ماف یێ ل سه‌ر هه‌وه‌ هه‌ى، واته‌ ل ڤێره‌ پشتى هه‌مان ده‌رمان ب بهایێ 60 هزار دیناران هاتینه‌ كرین و ده‌رمانێن دن ژى یێن وه‌كو وان ب بهایێ 130 هزار دیناران بۆ خودانێ ده‌رمانخانان گران هاتیه‌ زڤراندن و گه‌نگه‌شه‌ د ناڤبه‌را نه‌خۆشى و خودانێ ده‌رمانخانێ دا په‌یدا بووى و ده‌رمانێن وى بۆ هاتنه‌ زڤراندن و خودانێ ده‌رمانخانێ گۆتیێ ده‌رمانان ژ ده‌رمانخانا من نه‌كره‌ و ئه‌ز هوسا دفرۆشم و هه‌ره‌ ده‌رمانخانا ئه‌رزان بكره‌ و نه‌خۆشى ژى گۆتێ ئه‌ڤه‌ چێ نابیت هوین ب ڤى ره‌نگى و ب كه‌یفا خوه‌ ره‌فتارێ ل گه‌ل نه‌خۆشان بكه‌ن ل دووماهیێ خودانێ ده‌رمانخانێ دبێژیته‌ نه‌خۆشى هه‌ره‌ بۆ خوه‌ شكایه‌تێ ل من بكه‌ن و بێژنێ ده‌رمانان گران دفرۆشێت، ئه‌م ژى ل دووماهیێ دبێژین به‌س ئه‌و ژى دزانیت كه‌سێ های ژێ نینه‌، له‌ورا ب كه‌یفا خوه‌ هه‌ر بازرگانه‌ك ره‌فتارێ ل گه‌ل ڤێ ره‌وشێ دكه‌ت، عه‌فیه‌ چاڤدێریا بازرگانى و ساخله‌میا دهۆكێ.

ل هه‌ر وه‌لاته‌كی چو حوكمه‌ت بێ پلان كار ناكه‌ت و چونكه‌ ئه‌گه‌ر پلان نه‌بیت دێ قه‌یران په‌یدابن و ئه‌گه‌ر پلانێن درێژ خایه‌ن و ل سه‌ر بنیاته‌كێ دروست هه‌بن قه‌یران ژی نابن ، وه‌سا دیاره‌ حوكمه‌تا مه‌ بێ پلان و به‌رنامه‌ كار دكه‌ت له‌ورا دقه‌یرانا دا دژین. . ل هه‌رێما كوردستانێ مه‌ چو جارا پێشبینیا وێ چه‌ندێ نه‌دكر كو دێ مه‌ حوكمه‌ته‌كا بێ پلان و به‌رنامه‌ هه‌بیت و دێ بتنێ بو ئه‌ڤرو سوبه‌ كار كه‌ت و ژ وێرێ وێ ڤه‌ خودێ كه‌ریمه‌ چونكه‌ ئه‌گه‌ر كار سه‌ربخوه‌ نه‌هاتبانه‌كرن ئه‌ڤرو ژی خه‌لكێ مه‌ نه‌ دكه‌ڤتنه‌ به‌ر قه‌یرانه‌كا دارایی یا سه‌خت و نه‌چاڤه‌رێكری دا راسته‌ شه‌رێ مه‌ ل گه‌ل تیروستێن داعش و دابه‌زینا بهایێ نه‌فتێ ئه‌كه‌ره‌ك بویه‌ ، به‌لێ مه‌ د زانی كو ماوه‌كێ درێژه‌ ب حوكمه‌ته‌كا ساڤا هاتیه‌ ناڤ كرن و مه‌ گوت به‌لكو هێدی هێدی مه‌زن ببیت به‌لێ به‌روڤا ژی ده‌ركه‌فت، پلان و به‌رنامێن درێژخایه‌ن گرنگترن ژ كارێ بو وه‌خته‌كی بتنێ دهێته‌ كرن ، خه‌ونا هه‌ر كورده‌كی بو كو پشتی قوربانی دانه‌كا مه‌زن ب درێژیا دیروكی دایی كو دێ جاره‌كێ بنه‌ خودان حوكمه‌ت و په‌رله‌مان و ل وه‌لاته‌كێ ئازاد دا ژین سوپاس بو خودێ ئه‌ڤ چه‌نده‌ هاته‌ پێش و ل دویڤ شیانێن به‌رده‌ست و ژ وه‌لاته‌كێ كاڤل كری به‌ره‌ڤ گوهرین و ئاڤه‌دانكرنێ ڤه‌ چوو ب كوم ژی پروژه‌یێن خزمه‌تكاری بو وه‌لاتیان هاتنه‌ ئه‌نجام دان و بو چه‌ندین سالان خه‌لكی هه‌ست ب ژیانه‌كا خوش و ته‌نا كر ، لێ ڤێ دوماهیێ جاره‌كا دن ئه‌م توشی قه‌یرانان بوینه‌ ڤه‌ و وه‌سا دیاره‌ كو ماوه‌كێ درێژه‌ قه‌یران یا به‌رده‌وامیێ دكه‌ت و خه‌لك ژی ل هیڤیا چاره‌سه‌ریێ نه‌ و ئه‌گه‌ر پلانه‌كا باش حوكمه‌تا مه‌ هه‌بایه‌ نها دبیت قه‌یران یا بڤی ره‌نگی نه‌دبو و به‌لكو دایا ده‌م كورت بیت و نها ب هزاران موچه‌یێن بن دیوار نه‌دبون ل وه‌لاتێ مه‌ ل سه‌ر كیستێ ڤی خه‌لكێ هه‌ژار و دیسان ئه‌گه‌ر پلان و به‌رنامه‌ بو پاشه‌ روژا ملله‌تی ل به‌رده‌ست بان ره‌وشا نها چێ نه‌دبو و ژبلی هندێ موچێ كه‌سه‌كی سێ سه‌د هزار دیناربن و یێن هنده‌كێن دن ژ دوازده‌ ملیونان دیناران تێپه‌ردبن و بێ گومان پێدڤیه‌ بیر ل ڤان هه‌موو كاران بهێته‌ كرن و رێك هه‌مبه‌ر ڤێ چه‌ندێ بهێته‌ گرتن و پێنگاڤ بو به‌رژه‌وه‌ندا گه‌ل وه‌لاتی بهێنه‌ هاڤێتن و ده‌لیڤه‌یێن كاری و خوش گوزه‌رانیێ بو خه‌لكی بهێنه‌ ڤه‌كرن و حوكمه‌ت هه‌ول بده‌ت بو ڤه‌ژاندنا كه‌رتێ ئابوری و ب چو رێكا هه‌بیت پاره‌ێ كاش بینیته‌ د كوردستانێ دا و پتر گرنگیێ ب كه‌رتێ چاندنێ بده‌ت و هاریكاری و پشته‌ڤانی یا چوتكاران بهێته‌ كرن داكو به‌رێ خه‌لكی بكه‌ڤیته‌ جوتكاریێ بو به‌رهه‌م ئینانا درامه‌ته‌كێ باش و دیسان گرنگی ب كه‌رتێ تایبه‌ت ژی بهێته‌ دان و ده‌لیڤه‌یێن كاری خوشتر لێ بكه‌ن نه‌ك به‌روڤا ژی هه‌رتشته‌ك ل سه‌ر كیستێ خه‌لكی بهێته‌ كرن و پشتی پێنج هه‌یڤان موچه‌یێن فه‌رمانبه‌ران نه‌هاتینه‌ دان ژلایێ حوكمه‌تا هه‌رێما كوردستانێ ڤه‌ وه‌ك پێنگاڤا ئێكێ چاكسازی د موچێن وان دا هاته‌ كرن راسته‌ خه‌لكێ كوردستانێ زور پێخوشه‌ چاكسازیه‌كا راست و دروست بهێته‌ كرن و دبه‌رژه‌وه‌ندا وه‌لاتیان دا بیت به‌لكو چاكسازی بلا ل پله‌بلند و بن دیوارو داهاتێ نه‌فتێ دا بهێته‌ كرن بڤی ره‌نگی دێ خزمه‌تا خه‌لكێ كوردستانێ هێته‌ كرن و قه‌یران ژی نامینن

ماموستا بایكوتا ته‌ ئاریشه‌یا چاره‌سه‌رناكه‌ت به‌لكو دێ باندوره‌كا نه‌رینی دروست دكه‌ی و دێ بڤی ره‌نگی مورالا پێشمه‌رگه‌ی كێم كه‌ی چونكه‌ ئه‌و چاڤه‌رێی وێ یه‌كێ یه‌ كو ب زانستێ خوه‌ زارویێن وی فێری زانینێ بكه‌ی ، په‌روه‌رده‌كرن كارێ ته‌یه‌ و پاراستنا ته‌ژی ئه‌ركێ پێشمه‌رگه‌یه‌. . ماوه‌كه‌ به‌حسێ وێ یه‌كێ دهێته‌كرن كو ماموستا دێ بایكوتا خواندنێ كه‌ن ژبه‌ركو ئه‌ڤه‌ چه‌ندین مه‌هه‌ موچه‌یێ وان نه‌دایێ راسته‌ سه‌دێ سه‌د ل گه‌ل هه‌وه‌ داینه‌ كو مافێ ته‌ و هه‌ر فه‌رمانبه‌ره‌كی یه‌ ده‌مێ ده‌وامێ دكه‌ن حوكمه‌ت موچه‌ی بو دابین بكه‌ت ، لێ ئه‌م هه‌موو دزانین كو نها قه‌یرانه‌كا دارایی یا مه‌زن یا ب سه‌ر مه‌داهاتی و خه‌لك هه‌موو دره‌وشه‌كا ناله‌بار دا دژین و ئه‌ڤه‌ ژی ژ ئه‌نجامێ وێ یه‌كێ یه‌ كو نها ئه‌م یێ د شه‌ره‌كێ مه‌زن دا به‌رامبه‌ر دوژمنه‌كێ درونده‌ بناڤێ تروستێن داعش و دیاره‌ ڤی چه‌په‌ی پاره‌كێ ئێجار زور لێ د هێته‌ مه‌زاختن ئه‌گه‌ر بوچی به‌ری ڤێ چه‌ندێ چو قه‌یرانێن دارایی نه‌بون و ملله‌ت یێ ئارام بو به‌لێ دیاره‌ قه‌داره‌ ملله‌تێ كورد ده‌ كو هه‌ر هه‌یام جاره‌كێ دوژمنه‌ك بومه‌ ده‌ربكه‌ڤیت لێ دسه‌ر ڤێ چه‌ندێ را ئه‌م بخوه‌ ژی نها ئێك ده‌ست نینین و هه‌ر كه‌سێ دارێ ده‌هولێ قوتا بێی بزانین ئه‌گه‌ر چنه‌ دێ گوڤه‌ندێ گرێده‌ین له‌ورا یێن مای پتر ژ یێن چویی و بلا بو چاكیێ د ئێكگرتی بین ، ماموستا گیان ئه‌گه‌ر ئه‌ز و تو ل ڤێ زڤستانێ ل به‌ر سبلێت و سوپا دناڤ كه‌س كارێن خوه‌دا ته‌نا دنڤین بلا بزانین كو ئه‌ڤه‌ ژی كورێ دایكه‌كێ یه‌ ڤێ سه‌رمایێ ل به‌روكێن شه‌ری گیانێ خوه‌ دكه‌ته‌ قوربان بو پاراستنا شه‌ره‌ف و كه‌رامه‌تا مه‌ و ماموستا هه‌كه‌ ته‌ ئه‌ڤه‌ چه‌ند مه‌ه بیت موچه‌ نه‌وه‌رگرتبیت تو دزانی وی پێشمه‌رگه‌ی ژی موچێ خوه‌ نه‌وه‌رگرتیه‌ و هه‌ر چوو نه‌بیت تو یێ دناڤ خێزانا خوه‌ دا و سه‌ره‌ده‌ریا زارویێن خوه‌ دكه‌ی به‌لێ ئه‌و چ بكه‌ت دایكا وی ل هه‌ر پێنج فه‌رزا یا لاڤا بو كورێ خوه‌ ل به‌روكێن شه‌ری دكه‌ت كو هاها خودێ نه‌كه‌ت دێ به‌رسڤه‌كا نه‌خوش بو هێت ڤێجا تو چاوا دل ده‌ی د بێژی دێ بایكوتێ ژ خواندنێ كه‌م و زارویێن پێشمه‌رگه‌ی ژ خواندنێ بێ به‌هر كه‌م هه‌كه‌ بایكوت بیت بلا پێشمه‌رگه‌ بكه‌ت نه‌ك تو ماستایێ به‌رێز پشت راست به‌ ئه‌گه‌ر ڤێ چه‌ندێ بكه‌ی ل وی ده‌می بابێ وی قوتابی ژی ل به‌روكێن شه‌ری بومن و ته‌ خوه‌ ناده‌ته‌ شه‌هید كرن ئه‌و ژی دێ هێته‌ مال و بلا ژ بیرا من و ته‌ نه‌چیت هه‌كه‌ ئه‌و ل وێرێ نه‌بیت دێ وه‌كی وێ شه‌ڤێ ل مه‌هێت كو ل ماوێ دوو ده‌مژمێرا دا دهوكا مه‌ چوول بیت و خودێ دزانیت نوكه‌ هه‌ر ئێك ژمه‌ دا ل كیڤه‌ بیت ماموستا ما تو نه‌ هه‌ر ئه‌و ماموستای یێن ل شوره‌شا ئیلون و گولانێ ب چانتكێ خوه‌ یێ نانی ڤه‌ و ل به‌ر ده‌نگێ دوپا فروكان و دناڤ شكه‌فتان دا ملله‌ت فێری زانین و زانستێ دكر پانێ وی چوو موچه‌ نه‌بون به‌لێ بتنێ هه‌ستا نه‌ته‌وه‌یی ل نك یا بهێز بوو ئه‌ڤجا ئه‌ڤرو قه‌یرانه‌كا ب سه‌ر ملله‌تی هه‌میێ دا هاتی حوكمه‌ت ژ من و ته‌ پتر دزانیت بلا ئه‌م ژی هێشتا هه‌ناسێ بكێشین دێ چاره‌بیت و مه‌ سه‌بر هه‌بویه‌ و دڤێت خوه‌ راگرین ، من هیڤیه‌ هه‌ستێ چو ماموستا بڤێ چه‌ندێ بریندار نه‌ببیت چونكه‌ مه‌ رێزه‌كا مه‌زن بو وان یاهه‌ی و هه‌ر ئه‌ون پاشه‌ روژ و ئایندا جڤاك و ملله‌تێ مه‌