دلۆڤان ئاكرەیی

سەرەرای كو كابینەیا نەهێ یا حوكمەتا هەرێما كوردستانێ ب سەرۆكایەتیا مەسرۆر بارزانی ل ژێر فشار و قەیران و دۆرپێچێن ئابۆری و سیاسی دا بوو، بەلێ پرۆژەیێن زۆر باش و ستراتیژی هاتنە جێبجێكرن و هەرێما كوردستانێ باش بەرەڤ گەشەكرن و ڤەژداندنێ د بیاڤێن جودا دا و سەقامگیریەكا زێدەتر یا خزمەتگوزاری ب خۆڤە دیت و جودا ژ ڤێ د ڤێ قۆناغێ دا ب پێكئینانا حوكمەتا نوو ژ لایێ پارتی و ئێكەتیڤە دێ باندۆرەكا زێدەتر ب سەر هەڤپەیمانییا كورد ل گەل لایەنێن ئیراقی بۆ هەلبژارتنێن جڤاتا نوونەرێن ئیراقێ هەبیت و دێ ناڤمالییا كوردان بۆ هەلبژارتنێن بهێت رێكئخیت.
ب ئاڤا بوونا كابینەیا دەهێ یا حوكمەتا هەرێمێ دێ ئەڤ حوكمەتە بیتە ئەگەرێ پەیدابوونا نەخشەیێ سیاسییێ حوكمرانییێ ل ناڤبەرا دو هێزێن سەرەكی یێن پێكهینەرێن حوكمەتێ،
ئەڤا دهێتە خواندن هەر ئێك ژێ پارتی و ئێكەتی بۆ پێكئینانا كابینەیا هاتی یا حوكمەتێ ب رژدی دەست ب گۆتۆبێژان كرینە و خەلكێ كوردستانێ ژی چاڤەرێ لێكتێگەهشتنێ و رێككەفتنەكا گشتگیر و سەرانسەری و ب هێز دكەن و ب پێكئینانا حوكمەتەكا خزمەتگۆزار یا سەرانسەری دێ ڤەژاندن و ئارامی تەڤ باژێر و باژەرۆك و گۆندان ل هەرێما كوردستانێ ڤەگریت و دێ بیتە پالپشتیەكا تەمام بۆ دووماهیئینانا تەڤ پرۆژەیان و دێ بیتە ئامرازەك بۆ ئێكخستنا زێدەتر یا هێزا پێشمەرگەیێ كوردستانێ ل ژێر چەترا وەزارەتا پێشمەرگەیدا كو ئەڤە ژی دێ ستوونەكا دی بۆ سەقامگیریەكا زێدەتر بۆ هەرێما كوردستانێ ل سەر ئاستێ ناڤخۆ و دەرڤەدا پەیدا كەت و ب ئێكگرتنا پارتی و ئێكەتی دێ تەبایێ وەكو ئەزموونا سالێن 2005 – 2014 هێتە هەبوونێ كو د وێ قۆاغێ دا زۆر دەستكەفتێن دیرۆكی بۆ گەلێ كوردستانێ ل چارچووڤێ دەولەتا ئیراقا فیدرالدا ب دەستڤەهاتن، لەوما ب ئاڤابوونا هەڤپەیمانیەكا ب هێز ل كوردستانێ بۆ هەلبژارتنێن چاڤەرێكری یێن ئیراقێ ل دیماهیا ئەڤ سالە دێ باندۆرەكا مەزن ل سەر هەڤپەیمانێن لایەنێن سیاسی ل ناڤا هەرێمێ و ئیراقێ دا هەبیت و دێ بیتە ئالاڤەك بۆ ب هێزكرنا ناڤمالییا كوردان و دێ بیتە ئامرازەكێ ب هێز كۆ د ڤێ رەوشێ دا لایەنێن سەركەفتی یێن باشوور و ناڤەراستا ئیراقێ زێدەتر بەر ب داخازی و جێبجێكرنا مافێن نەتەوەیی و نیشتیمانی یێن كوردستانییان ڤە بهێن، لەو گرنگە بەرەیێ كوردستانی و فراكسیۆنا (هەڤپەیمانییا نیشتیمانییا كوردستانێ) ئاڤا بكەن و وەك ئێك تیم ل بەغدا سازشێ ل سەر مافێن نەتەوەیی و نیشتیمانییێن خەلكێ كوردستانێ نەكەن چونكو ب ئێكگرتنا تەڤ ئالییێن سیاسی یێن دەستهەلاتدار و ئوپۆزسیۆن و سەربەخۆ یێن هەرێما كوردستانێ ل بەغدا دێ دەستكەفتێن دیرۆكی ژێ پەیدا بن و بەرۆڤاژی دێ زیانێن مەزن هەبن ل سەر كوردستانییان ب تایبەت ل دەڤەرێن كوردستانی یێن دەرڤەی ئیدارەیا هەرێما كوردستانێ ژبلی نەهنارتنا ماف و شایستەیێن خەلكێ كوردستانێ و مووچەخورێن هەرێمێ، لەوما دڤێ رەوشێدا ئێكگرتنا تەڤ ئالییان ب فەر و گرنگ دهێتە دیتن، نەخاسمە كو د ڤێ قۆناغێ دا دەڤەر د پێشهات و گوهۆرینان دا دەرباز دبیت
و جودا ژێ خەلكێ كوردستانێ رۆژهەلاتا ناڤەراست و رۆژئاڤا ل گەل ئێكگرتنا كورداندانە و میناك كۆ ل روژێن بۆری ل دۆر دۆسەیا هەلەبجە تەڤ ئالییێن كورد د ئێكگرتی بوون و ئەنجامێ وێ حەلەبجە بۆ ب پارێزگەها 19 یا ئیراقێ، یا كۆ دهێتە دیتن د دوهی و ئەڤرۆ و سوبەهێ دا كێشەیا كوردان ل ئیراقا فیدرالدا نەتەوەیە و هەردو پێكهاتێن دی یێن عەرەبی ب شیعە و سوننەڤە وەك نەتەوە رەفتارێ ل گەل كوردان دا دكەن نەك وەك ئایین و مەزهەب لەو بلەز پێك ئینانا كابینەیا دەهێ و ئێكخستنا ناڤ مالا كوردستانییان دێ كارتێكرنەكا زۆر ب سەر كێشە و دوسەیێن هەلاویستی د ناڤبەرا هەولێر و بەغدادا هەبیت و پرس دێ ئاسانتر بەر ب چارەسەریێ چن و ب ئێك دەنگی و ئێك هەلوەستییا كوردان دێ ئێك چەپەری بۆ كۆمڤەكرنا دەنگێن دەڤەرێن مادەیا 140 یا قانونی دروست بیت كۆوئەو دەنگ ب هەروە نەچن و جۆدا ل وێ چەندێ د بەرامبەر لایەنێن سەركەرڤتی یێن ئیراقێ دا بۆ پێكئینانا حوكمەتا پشتی هەلبژارتنێن جڤاتا نوونەرێن ئیراقێ ب ئاسانتر ل دۆر ماف و داخوازییێن كوردستانێ گۆتۆبێژ ل گەل پێكهێنەرێن حوكمەتا نوو یا ئیراقێ بكەن.

دلۆڤان ئاكرەیی

د نوكەدا رەوشا رۆژهەلاتا ناڤەراست ژبەر نە دادپەروەریێ د تەڤ بیاڤێن جودا دا د ئێشا جودا بوون و ژانێن دایكبوونا هند وەلاتێن دی دایە ژبەر پێگری نەكرن ب بڕیار و ڕێككار و سیاسەتا وەلاتێن زلهێز نەخاسمە ئەمریكا كو ب رژدی ل سەر دۆسەیا گرۆپێن سەر ب وەلاتێن هەڤدژێن سیاسەتا وێ گاڤان دهاڤێژن مینا حەشدا شەعبی ل ئیراقێ و حزبوللا ل لوبنان و حەماس ل فەلەستین و حوسی ل یەمەنێ و هێزا پاسداران ل ئێرانێ كو پرانییا ڤان گرۆپ و رێكخراوان ژلایێ دەستهەلاتدارێن تەهرانێ ڤە دهێنە كۆنترۆل كرن و رێڤەبرن و پشتەڤانیكرن، هەر چەندە زۆر جاران ب ئاشكرایی ڤ وەلاتێن كو ئەڤ گرۆپە حەواندین هایداركرینە و هێرشێن ئەسمانی ژی بۆ سەر وان ئەنجامداینە بۆ مەبەستا كونترۆلكرن و هەلوەشاندنا وان بەلێ رەنگە یا ئاسان نەبیت ل ڤان وەلاتان كو بریارێن ئێكلاكەر بۆ پرسگرێكان بهێنە دان چونكو ل تەهرانێ سیاسەتا وان دهێتە دانین و ئەو بتنێ پەیرەو دكەن و ئەڤ گاڤ و ئایدۆلۆژێیا ڤان رێكخراوان بوویە ئەگەرێ دلگرانییا ئەمریكا ژ بەر بزاڤێن وان یێن چەكداری ل دژی ڤی وەلاتی لەوما ب رێكێن جودا كار بۆ پەكخستن و ژناڤبرنا ڤان رێكخراو و گرۆپێن دەرڤەی یاسایێ ددەت، بۆ میناك ماوەیەكە ب تایبەت پشتی هاتنا سەر دەستهەلاتی ژلایێ دۆنالد ترەمپ ڤە ب راستەوخۆ و نە راستەوخۆ دەستهەلاتدارێن ئیراقێ هاتینە هایداركرن بۆ هەلۆەشاندنا وان هێزێن دەرڤەی یاسایێ ل ئیراقێ وەكو حەشدا شەعبی، بەلێ د بەرامبەر دا بزاڤەك هەیە كو ل رێكا یاسایێ ڤی گرۆپی ب هێز بكەن و ب رێكا دەنگدانێ ل جڤاتا نووینەران باوەریێ بۆ بزڤرینن د بەرامبەر ب پارێزگەهبوونا هەلەبجە دەنگێن كوردان ب دەست بێخن و بكەنە پرۆژە یاسا و ب ڤی یاسای ژی دێ دەستەیا حەشدا شەعبی بیتە هەڤ تایێ وەزارەتا بەرگرییا ئیراقێ و دبیتە سەدەم بۆ پەیدا بوونا بەهانەیان بۆ كەفتنا ئیراقێ د ناڤ شەڕ و ئالۆزییێن رۆژهەلاتا ناڤەراست دا و رەنگە ل سەر ئاستێ رامیاری دا ئیراق ببیتە چەقێ ڤی شەڕی و دەملدەست داخوازا پاشخستنا هەلبژارتنێن جڤاتا نوونەرێن ئیراقێ بهێتەكرن و حوكمەتەكا هەوارهاتنێ بهێتە هەبوونێ بۆ رویبروبوونا رەوشێ، ب پشتراستی ڤە ئەڤ ئاماژەیێن هەنێ د سروشتی نینن، بەلكو ل ماوەیێ بۆری بەرەیێ مقاوەمە و ملیشیاتێن ئیراقێ و سووریا و حوسییان ل دەریا ناڤەراست و كەنداڤێ عەرەبی زیانێن مەزن ل بەرژەوەندییێن ئەمریكا گەهاندینە ژبلی هێرشێن بەردەوامێن وان ب سەر بنگە و بارەگەهێن ئەمریكا و هەڤپەیمانێن وێ و ئیسرائیلێ، یا دهێتە خواندن كو ئەڤ هەمی هێرشێن بۆری ب سەر وان هاتینەكرن ب هەر وە تێپەر نەبن و ئەمڕیكا و ئیسرائیل سزایێن توند یێن هێرشكاران بدەن و ب ڤی ئاوایی رۆژهەلاتا ناڤەراست بۆ ماوەیەكی بكەڤیتە د رەوشەكا سەخت دا و گوهۆرینێن ب خۆڤە ببینیت و ئەگەرێ سەرەكی ژی هەبوونا ملیشیا و گرۆپێن سەر ب وەلاتێن دەرەكی ڤەنە كو بووینە هەڕەشە بۆ هێرشان بۆ سەر ئیراقێ و ب رێكا راستڤەكرنا یاسایا حەشدا شەعبی دێ ئیراق كەڤیتە د ناڤا گوهۆرینێن مەزنێن دەڤەرێ.
و د وی دەمیدا ئەمریكا دێ گەهیتە وێ باوەریێ كو ئیراقێ چێ نییەت و مەبەست نینە بۆ هەلوەشاندنا گرۆپێن دەرڤەی یاسایێ یێن كو ژلایێ وەلاتەكێ دەرەكی ڤە دهێنە برێڤەبرن، لەوما گرنگە كۆ بزاڤا كوردایەتییێ كو د ڤێ قووناغێ دا د تاقیكرنەیەكا دیرۆكی دایە مافێن نیشتیمانی و نەتەوەێی یێ گەلێ مە بكەتە كارنامەیا هەمی هێزێن رامیاری و مفای ژ هەر دەرفەتەكێ ببینن كو رەنگە ئیراقێ ژی مینا هند دەڤەرێن دی ڤەگریتن و ئەنجامێ وێ وەلاتەكێ سەربەخۆ بۆ كوردستانییان ژێ دایك ببیت.

دلۆڤان ئاكرەیی

پرانییا بریار و رێككارێن كو ئەمریكا دگریتە بەر راستەوخۆ و نە راستەوخۆ باندۆرێن نەرێنی ل سەر سیاسەت و ئابوور و بیاڤێن جودا یێن ئیراقێ هەیە ب ئاوایەكی كو ئەڤ وەلاتە پشتبەستنا خۆ یا تەمام ب بازارێن دەرەكی و كەل و پەلێن هاتی ژ دەرڤە دبەستیت و دگەل هەر پێشهات و گوهۆرانكاریەكێ ئابوورێ وێ لاواز خاڤ دبیت و شیانن پایەدارییێ ژێ دەست ددەتن و بەرەڤ هەلۆەشیانێ و هەڕفینێ دچیت.
د نوكەدا و د ڤی سەروبەرێ پڕ ئالۆز و پڕ گێلەشۆكا كو دەڤەر ڤەگرتی رەنگە یا ئاسان و ساكار نەبیت كو پێشبینی بۆ پاشەرۆژەكا ئاسایی و ڤەژاندنەكا بریقەدار بۆ دەڤەرێ ب گشتی و ئیراقێ ب تایبەتی بهێتە كرن، چونكو بریارێن دۆنالد ترەمپ سەرۆكێ ئەمریكا سەبارەت ب زێدەكرنا باجا گۆمرگی دێ وەك ئوقیانۆسەكا پڕ پێلێن ب هێز بیت بۆ ئێراقێ كو دئێتە تەخمینكرن كو ژێ چەرخەكی زێدەتر بیت كو بەر سینگێ وێ نەهاتبیتە گرتن، د خواندنا من دا پێناسەیا گۆمرگی ب سروشتێ خۆ ئامرازەكێ سیاسی و ئابوورییە د ناڤبەرا دو وەلاتان دا و دهێتە سەپاندن ل سەر بنەمایێ بەرژەوەندیا هەڤپشك، بۆ میناك دپەیوەندییا ئابووریا ل ناڤبەرا ئیراق و سووریا یان ئیراق و ئوردونێ دا دهێتە دیتن، و ل دویڤ سروشتێ لێكگوهارتنا بازرگانییێ و پێدڤییێن راستەقینە یێن هەر دو ولاتان دا باج دهێتە دیار كرن ل سەر كەرەستە و كەلوپەلان، بەلێ یا كو ئەمریكا ل هەڤبەری ئیراقێ كری بریارێن ئێكلایانە و بێ رێكەڤتنێن بەری دەمی و ل بەرچاڤ وەرگرتنا رەوش و بەرژەوەندی و پێدڤییانە و ب ڤان بریار و زێدەكرنا باجان دێ ئەمریكا راستەوخۆ زیانێ ب ئابوورێ ئیراقێ گەهینیت ژ بەركو ئابوورێ ئیراقێ ب شێوەیەكێ ب هێز ب ئابوورێ جیهانێ و ب تایبەتی ئابوورێ ئەمریكا ل روویێ هاتنا كەل و پەل و نرخ و تەكنەلۆژیایێ ڤە هاتیە گرێدان و ب بلندبوونا رێژا باجان ل سەر كەل و پەڵان دێ كارتێكرن ل سەر بازاران كەتن و دێ بارگرانیەكا زێدەتر ئێخیتە سەر ملێن ولاتییان و دێ بیتە هەرەشەیەكا ب هێز ورژد ب سەر سەقامگیریا بازاراندا ، یا كۆ دڤێ قووناغێ دا دهێتە نێڕین واشینتۆن جەنگەكێ بازرگانی ل دژی پەكین راگەهاندییە و رەنگە پێلێن وێ بەرفرەهتر ببن و ببیتە دۆسەیا ئابووری و جیۆپۆلەتیكییەكا دی كۆ باندۆر ل سەر وەلاتێن دی هەبیت كو چێ پەیوەندییا وان یا راستە راست ب ڤێ پرسێ ڤە نینە بۆ میناك ئیراق كو پشتبەستنا ڤی ولاتی ٩٠٪ ل سەر هنارتنا پترولێیە كو ئیراق پشكەك ژێ ڤێ پترۆلێ بۆ بازارێن ئەمریكا دهنێریت رەنگە تا رادەیەكی د ڤێ قووناغێ دا كارتێكرن ل كەرتێ تێهنێ نەبیت، بەلێ دێ بلەز كارتێكرن ل سەر بازارێن ئامیرە و ئالاڤ و ئوتومبێل و هند كەرستە و كەل و پەڵان كەتن نەخاسمە یێن گرێداێی ب رۆژانە و سەرەدەریكرنا وە لاتییان پێڤە، یا دهێتە خواندن ئەوە كو ئەڤ بریار و رێككارێن هەنێ وەرچەرخانەیەك بیت ل رەفتارێن ئەمریكا ل گەل ئیراقێ كو رەنگە مەبەستا سەرەكی سڕكرن و سنوورداركرنا سەرەدەریكرنا ئیرانێ ل گەل ئیراقێ بیتن دا هەڤسەنگیەكێ د ناڤبەرا بازارێن تەهران و بەغدا دا دروست بكەت و كێمتر دۆلارێ ئەمریكی ل سنوورێن ئیراقێ بۆ ئیرانێ ب بەهانەیا كرینا كەلوپەلان بۆ ڤی ولاتی بهێتە هنارتن و ببیتە ئەگەر كو ب ئاسانی دەستێ ئیرانێ نەگەهیتە دۆلاری و ببیتە سەدەمێ بلندبوونا نرخێ دۆلاری و كەلوپەلان و ببیتە فشارێن ئابووری بۆ ملكەچبوونا تەهرانێ ب خواست و بریارێن واشینتۆن و دەست بەردان ل پیتاندن و ب دەست خستنا چەكێ ناڤۆكی.

دلـۆڤـان ئـاكـرەیی

جودا ژێ هەر سال ئیسال نەورۆزا كوردستانییان ل هەر قولاچكەكا ڤێ جیهانێ و هەر چار پارچەیێن كوردستانێ بتایبەتی و نەمازە ل وەلاتێن قەفقاس ژی هەڤرەنگی فۆلكانن ئاگرگرتی ب هزر و ئایدۆلوژییا كوردپەروەریێ هاتە دیتن و وەلاتییان ب جۆش و خرۆش و ب هەستێن نەتەوەیی و ب ئاگرێین ڤە تەڤلی هێز و تێهنا ئاگرێ نەورۆزێ بۆ ئازادی و رزگاریێ بوون ب ئاوایەكی كو ئەڤ گەشبوونا هەنێ د پیڤەرێن جۆری دایە و نەخاسمە و ب تایبەتی ئالایێ كوردستانێ و گۆتارا رێبەرێ كوردایەتیێ سەرۆك بارزانی ل تەڤ كەرنەڤالێن مەزنن كوردستانێ و ئامەد و ئەورۆپا كو هێمایێن هەری بلند و گەشبوون بۆ ڤەژاندنا تەڤگەرا كوردایەتییێ، یادكرنا ڤێ هەلكەڤتێ هەڤدەمە ل گەل گوهۆرینێن چاڤەرێكری یێن رۆژهەلاتا ناڤین كو د ڤێ قووناغێ دا ئەڤ رەوش هەلگرێ گۆتارا گوهۆرینێن هەری مەزنێن سیاسی و مزگینییانە بۆ تەڤ گەلێ كورد ل هەر قۆلاچكەكا ڤێ جیهانێ هەر چەندە كو ل هند ئاهەنگێن نەورۆزا ئازادیێ دا دەستێن نە باوەردار بزاڤ بۆ چێكرنا ئاژاوە و تێكدانا ئاهەنگێن جودا كرن بەلێ دەنگ و رەنگێ راستەقینەیێ پشكداربوویان رێك بۆ هەولێن وان نەدان كو بگەهنە خواستا خۆ و د وان ئاهەنگان دا ڕێبازا دلسۆزی بۆ وەلات و كوردستانیبوونێ بسەركەڤت لەو د ڤێ قووناغا نازك و گرنگ دا پێدڤییە مفایەك بێ سنوور ل ڤێ دەلیڤێ بهێتە وەرگرتن و تەڤ ئالی باوەریەكا ب هێز و موكوم ب ڤێ دەلیڤێ بهینن و ب هەڤڕا كار و گاڤان بۆ چێكرنا باندۆرەكا ب هێز بهەلینن بۆ پێشڤەبڕنا دۆزا رەوایا كوردان ل جیهانێ و دەڤەرێ، ب ئاوایەكی كو بتنێ ب سەركەڤتن و پێشدابرنا چاندنا هزرێن كوردایەتییێ دێ دەرگەهێ پێشكەڤتنا جڤاكی و ئازادی و رزگاریا سیاسی و ئابووری ل هەڤبەری گەلێ مە هێتە ڤەكرن.

دلۆڤان ئاكرەیی

ب درێژاهیا دیرۆكێ حوكمەتێن ئێك ل دویڤ ئێك یێن ئیراقێ ب رێكا كوشتن و ژناڤبرن و لادانێ سەركردەیێن وان هاتینە هەبوونێ و ب دارێ زۆری و زۆرداریێ و ستەم لێكرنێ دەستهەلات كریە و هەر ب رێكا ستەمكارەكێ دی حكومەتەكا دی دروست بوویە بێ كۆ مفا ل سەربوورێن سەركردە و حكومەت و ئەنجامێن وان وەرگرن و گاڤێن ستراتیژی بۆ حكومەتەكا خزمەتكار ل سەر بنیاتێ ئاڤەدانی و ئارامی و خوشگوزەرانییێ ب هاڤێژن بەلكۆ هەرتەم ب چەك و ئایدۆلۆژییا سەردەمێ نەزانینێ دەستهەلات و حوكم كریە و هەردەم سیاسەتا عەرەب كرن و تێكدان و سوتن و كۆشتن و گرتن ژێ بنەمایێن بڕگەیێن ئەجندەیا كار كرنا وان بوویە نەخاسمە ل هەڤبەر گەلێ كوردستانێ و نەتەوەیا كۆرد ب تایبەت، ب دلخوشیڤە پشتی سەرهەلدانا پیرۆزا خەلكێ كوردستانێ د ئادارا پڕ ل روژێن تەحل و شریندا گەلێ كوردستانێ ژێ زولم و زووریا داگیركاری و عەرەب پەرەستییێ رزگار بوو و ڤەژاندنەكا نوو ل دەڤەرێن داگیركری و تێكداێی هاتە هەبوونێ و بێهنا ئازادی و سەربەستییێ پەرێن خۆ ب سەر دەڤەرێن كۆردستانێدا كێشان، هەر چەندە فشارێن ئابووری و رامیاری ل سەر هەرێمێ هەبوون ب رێكا دەستهەلاتا بەعس لێ كۆلنەدانا سەركردایەتیا كۆردستانێ و ب پشتەڤانیا مۆكۆم یا گەلێ وێ كۆ باوەریەكا ل ئاست بلند ب سەركردایەتییا خۆ هەبوو نە هێلان كۆ پیلانێن بەعسیان بگەهنە ئارمانجێ، پشتی رۆخیانا رژێما بەعس و ب دار ڤەكرن و كوشتنا سەركردەیێن وێ دهاتە پێشبینیكرن كۆ بێهنا ئازادییا ئێك جاری ل سەرانسەری ئیراقێ بەلاڤ ببیت و جودا ژێ گەلێ كۆردستانێ نەتەوەیێن ئیراقێ ژی دووبارە ڤەژینەڤە بەلێ ب مخابنی هێزێن نەتەوەی و ئایینی یێن دەستهەلاتدار پشتی نەمانا رژێما بەعس هەلگرێن هەمان تێروانیێن و دیتن و بووچونێن خۆ سەپێن بووینە بەلكۆ هێش زێدەتر د وێرانترن و چێ ژوان ل یێن دی جاوازتر نینە و بتنێ ب ناڤ نیشانان د جودانە، وان ب كار و گاڤ و سیاسەتا خۆ یا شكەستخواری خەونا سەربەستی و ئاڤەدانی و ئارامی و خوشگوزەرانییا گەلێ خۆ مینا حكومەتێن چووی یێن ئیراقێ ل سەر ڤی مللەتی كرە كابۆسەكا كوشندە و بوونە ئەگەرێ ئیفلیج بوونا گەلێن ئیراقێ، دراستیدا وان سەلماند كۆ هەژی حكومرانییێ نینە و نابن لەوما تێتە پێشبینیكرن كۆ ئادارەكا دی و سەرهەلدانەكا دی دناڤ دیرۆكا ئیراقێ و حوكمرانییا وێ رووبدەت و سیستەمێ سیاسییێ وێ بكەڤیتە بەر گوهرانكارییێن دەڤەرێ ئەگەر نە دێ ئیراق بیتە سەكۆیێ ناكۆكییێن خوینا وی و زەڤیا گەندەلییا بێ دیماهی.

دلـۆڤـان ئـاكرەیی

هندەك لایەنێن عەرەب ب هەردو مەزهەبێن خۆ یێن سونە و شیعی ڤە، ب دیالیكتێن جودا ب رێكا دامەزراندنا هندەك گرۆپ و رێكخراو و فیۆدالیزم و دیوانخانەیان ب چاڤساخییا هندەك لایەن و گرۆپێن كورد ل ناڤا هەرێمێ، ب هەمی شیانێن خۆ كار بۆ لاوازكرنا پێگەهێ كوردستانێ ل سەر ئاستێ ناڤخۆیا ئیراقێ و دەڤەرێ و جیهانێ كریە، میناك مینا یوسف كیلابی كو ل پەرلەمانێ ئیراقێ سەرپرشتییا گرۆپەكێ گوهۆڕینا رێورەوان بۆ مەبەستا نەهنارتنا پشكا هەرێمێ و دانانا مینان ل هەمبەر مووچە و بودجەیا خەلكێ كوردستانێ و ڕاگرتنا نەفتا هەرێما كوردستانێ كریە ب پێشوازێیا گەرما هندەك كەس و لایەن و گرۆپان ل بن چادرێ ل كیلابی كو هزر دكر كو ماندێللا یان مەهاتما غاندی سەرەدانا وان كریە ب هاتنا وی نەك چارەسەرییا پرسگرێكان ئامانجا وی نەبوویە، بەلكۆ بۆ پشتەڤانیكرنێ بوویە بۆ دەستێن تێكدەر و بیر و تێروانینێن شۆفینی یێن ل دژی گەل و حوكمەتا خۆ، لڤینان دكەن و یێن چاڤ ب سەركەڤتنن هەرێمێ رانابن، كو نوكە پرۆتوكولێن نایاب ل گەل بەغدا ب سەرۆكایەتیا سەرۆكێن حوكمەتا هەرێمێ و ئیراقێ بۆ مسۆگەر كرنا مووچەیێن تەڤ هەیڤێن ئەڤ سالە هاتینەكرن، (هەژماری من) كو پرۆژەیەكێ تەمام یاسایی و هەڤچەرخ و سەركەڤتییە و ژلایێ حكومەتا هەرێما كوردستانێ ڤە هاتیە دروستكرن و ژلایێ دادگەها فیدرال یا ئیراقێ دان ب یاسایبوونا وێ و وان هەژمارە بانكێن د ناڤا ڤی پرۆژەی دا هەنە كریە و ئەڤە ژی گرۆڤەیەكێ مەزنە كو ئەڤ پرۆژە پروژەیەكێ یاسایییە، بەلێ دژایەتیكرنا وێ ب رێكا خونیشاندان و مانگرتنان، بتنێ نیازان دەردێخیت كو چەند لایەن و كەس نە ل گەل سەربەخۆبوونا ئابوورێ هەرێمێ و پێشكەڤتنا سەردەمی یا وێنە ئەگەر نە هینانا بانكێن دەرڤەی پرۆژەیێ (هەژماری من) بۆ سلێمانیێ و دەڤەرێن وێ چ جیاوازی هەیە ل گەل سەرجەم بانكێن دی یێن د ناڤ ڤی پرۆژەی دا ب خەرجنەكرنا پشكا هەرێمێ ل مووچە و بوودجەی چێ بانكان ماف و ئەرك و شیانێن دابەشكرنا مووچە و شایستەیێن هەرێمێ نینە، هەتا پشكا هەرێمێ ب فەرمی دهێتە مەزاختن ژلایێ بەغدا ڤە و ل دەمێ خەرجكرنا وێ هەمی بانك د ئێك دەم و ژڤان دا دەست ب خەرجكرنا مووچەیێ مووچەخوران دكەن ئەڤ گاڤە ئاماژەیە كو هندەك لایەن و گرۆپ و كەس نە ل گەل سەربەخۆبوونا كارێن حكومەتێنە، دویر ژێ دەستێن حزبی و مایتێكرنا دەستێن دەرەكی و دویر كەڤتن ل رۆتین و گەندەلییێ ب ڤێ گاڤێ وە یان پشك ل ڤی پرۆژەی، دڤێت یان فشارێن رامیارینە بۆ مەبەستێن رامیاری بۆ دەستخستنا وەرگرتنا ژمارەیەكا زێدەتر ل پۆستان د كابینەیا دەهێ یا حوكمەتا هەرێمێ دا یان حەسویدی پێبرنە و چاڤ پێ نەرابوونا سەركەڤتنا كابینەیێن حوكمەتێنە ب سەرۆكایەتییا مەسرۆر بارزانی.
ئەگەر نە، بۆچی یوسف كیلابی و هەڤ ئاوازێن وی هەتا نوكە ل بەغدا دژی نە هنارتنا مووچە و شایستەیێن كوردستانییان رانەوەستیاینە و بێ هەلوەست بووینە؟
بەلێ ب مخابنی ڤە ل هەرێمێ هندەك مرۆڤێن سادە و ب هزرێن ساكار هەنە كو ب ئاسانی ب سەردا دچن، ئەڤ ولاتێ جیران ب ئاراستەیەكی دبێژیتە بەغدا مووچە و ماف و شایستەیێن خەلكێ هەرێمێ نەدەن و وان ئازار بدەن و ل ئاراستەیەكا دی دبێژیتە كرێگرتی و نۆكەر و خولامێن خۆ ل جادەیان كۆم ڤەبن و تف ل دار و بەرێن كوردان بكەن و مینا كابرایێ ستەم و دڕندەییا بەعسیان ل رۆندكێن زەلالێن چاڤێن زارۆكێن شەهید و ئەنفالكری و زیندانییێن سیاسی ب پیرۆزتر و بەهاتر دبینیت.

دلـۆڤـان ئـاكـرەیی

د سەردەمێ بەرێ دا ل هەرێما كوردستانێ كەسێن ب كارێ سیخوڕیێ ڕادبوون ژێ تەمەن و گیانێ خۆ دبوورین بۆ ئارمانجا زێدەتر خزمەتكرنا گەل و نیشتیمانێ خۆ و ل سەخترین خۆل و راهێنانان دا دەربازدبوون كۆ چاوا رێگربن ل چێبوونا هەر پێشهات و كارەساتەكێ كۆ ب نەپەنی ژلایێ دەستهەلاتدارێن ئیراقێ ڤە بریار بوو هاتباكرن ل دژی كوردستانێ و دەما دهاتنە ئاشكرا كرن وەریس و سێدارە ماچ دكرن كو د خزمەتا ولاتێ خۆ بووینە قوربانی و شیاینە پیلانن دوژمنن مللەتێ خۆ ئاشكرا بكەن و نەهێلایە دوژمن و دژبەرێن وێ بگەهنە مەبەستێ، بەلێ د نوكە دا سیخوریكرن گەلەك جاوازترە ل سەردەمێ بۆری ب رێكا ئالاڤێ گەهاندن و پەیوەندیكرنێ كو مەزنترین ئامرازێ سیخوریییە ب رێكا فوتۆیەكێ یان ڤیدیۆیەكێ یان دەنگەكی كۆ بێخیتە بەر دەستێ خەلكێ دی و بتایبەت میدیا یا نەیار ئەڤە ژی دكەڤیتە د چارچووڤێ سیخوڕیكرنێ دا ، ب ئاوایەكی كو كارێ پەرلەمانتاران ل گەل رۆژنامەڤانیێ جوداهی هەیە نابیت كەس پەڕلەمانتر بیت و خۆ ب نوونەرێ خەلكی بزانیت و مفای بگەهینتە میدیایێن زمانحاڵێ مۆشەك و درۆنانن یێن ب فەرمی و ب ئاشكرایی دژایەتییا خەلكێ كوردستانێ و كیانێ هەرێمێ دكەن و ب رێكا هنارتنا ڤیدیۆیێن جهێن هەستیاڕیێن هەرێمێ ڕۆلێ پەیامنێرێ كەنالێن وان وەرگریت و ل ژێر چەتڕا پارێزبەندیێ پەرلەمانتار سیخوریێ ب سەر جادە و كۆلان و گەڕەك و سازییێن هەرێمێ بكەت، ئەڤە كارەساتە و پێدڤی ب چارەسەریا ریشەێی یە چاوا دبیت پەرلەمانتارەكێ مینا عەلی حەمە سالح ب رۆژا رۆهن ڤیدیۆیێن هێزێن ئەمنی و سازییێن میری بگریت و بنێریت بۆ میدیایێن كو كارێ وان دژایەتییا هەرێمێ یە، لەوما ئەگەر پارێزبەندی ب سەر وی نەهێتە راكرن و سكالا و لێپرسین و سزا لسەر وی نەهێنە حێبجێكرن، دویر نیینە كو گەلەك كەسێن دی د پلە و پۆستێن جودا دا ژی مفای ژ ڤێ دەرفەتێ وەربگرن و هەمان سیناریۆ و هەمان كار د بیاڤێن جودا دا بكەن كو رەنگە كار بگەهیتە دانا زانیاریان ل سەر هێزێن ئەمنی و دەستنیشانكرنا چەپەر و سەنگەر و میحوەرێن پێشمەرگەی و ئالاڤێن بەر دەست مینا چەك و تەقەمەنی و دەستنیشانكرنا هاتنوچوونا بەرپرس و رێڤەبەران بۆ نەیاران بۆ مەبەستا وەرگرتنا زانیارێیان بۆ هەر مەبەستەكا شۆم، لەوما ئەڤ پرسە یا ئاسایی و ئاسان نینە كو زوو دەرباز ببیت كاڕەساتە و پێدڤییە بكەڕ و مامۆستایێن ڤان كاران ل ژێر هەر ناڤەكێ دكەن چ پەرلەمانتار و چالاكڤان و رۆژنامەڤان بیت بهێنە سزادان و سنوورەك ب ڤان جۆرە كاران ب رێكا یاسایێ بهێتەدانان.

دلـۆڤـان ئـاكـرەیی

ب دەهان سال بۆرین و كێشەیا د ناڤبەرا هەردو ئالییان نەهاتە چارەسەركرن و ب درێژاهیا دەم و سالان دەستێن دەرەكی كەڤتن د ناڤا كاروبارێن ناڤخۆ و دەرڤە یێن هەردو ولاتان دا ژمارەیەكا زۆرا وەلاتییێن هەردو لایەنان بوونە قوربانی و سەركردەیێن هەردویان ب درێژاهیا تەمەنێ خۆ و دەستهەلاتێن خۆ بزاڤ و پلان و پیلان دانان بۆ بەرژەوەندیا گەل و وەلاتێن خۆ، ب هزاران ئاڤاهی هەڕفاندن و ب دەهان گرۆپ هاتن چێكرن و ژناڤبرن و سڕكرن، ب دەهان جاران شەڕ و پەڤچوون و ئاگربەست و رێكەڤتن هاتن ئیمزا كرن و ئەجیندا و كارنامەیێن ناڤخۆی و دەرەكی ژ بال رێكخراوان ڤە هاتن رێڤەبڕن و درووشم و سالۆخەت هاتن بلندكرن و هەوا پشتەڤانی و هەڤكاریكرن بۆ هەر دولایەنان ژلایێ وەلاتێن دۆست ڤە هاتن كرن دەستپێشخەڕی و پرۆتۆكول هاتنەكرن، لێ ب بۆرینا دەمێن كورت جاردی ئاگرێ شەری ب رێكا گرۆپ و رێكخراوێن ب سەر وەلاتێن سێیێ ڤە و چارێ ڤە كو دهێنە رێڤەبرن گەش دبوو و دوبارە شەڕ و كوشتن و بڕین و گرتن و وێرانی و ئاوارەێی دەست پێ دكر، كێشەیا قودسا پیرۆز و غەززەی ئوڕشەلیما دیرۆكی هەر ما پڕسگرێكەكا هەلاویستی و بێ چارەسەر د ناڤبەرا ئورشەلیم و قودسێ ب ئاوایەكی كو ولەاتێ سێیێ ل دژی وەلاتێ چارێ بریار ب چۆلكرن و ڤەگوهاستنا وەلاتییێن وێ دایە بۆ وەلات و دەڤەرێن دی ب بەهانەیا ناڤبژیوانییێ و هزر ل چێكرن و ئاڤاكرنا ویلایەتەكا دی ل دەڤەرێ د ناڤبەرا هەردو ئالیان دا هەیە یاكو بالكێش ئەوە ب دەهان سالە ل ئیراقێ د ناڤبەرا كورد و ئەرەبان ل سەر كێشەیێن هەلاویستی و بتایبەت كەڕكووكا دلێ كوردستانێ هەمان هەڤ كێشە هەیە و د ناڤبەرا شیعە و سونەیان دا، هەمان پڕسگرێك ل سەر باژێر و ئایدولۆژی و دیمۆگرافیان هەنە، خواندنا من بۆ بابەتی ئەوە كو ئەرێ‌ دێ ئیراق د پلانا هاتی یا دۆنالد ترامپ دا هەبیت؟
لدو یڤ داخۆیانی و گۆتارێن ترامپ دێ ژێ غەززە زێدەتر دەرباز بیت و رەنگە ل قۆناغا هاتی د پلانا وی دا بیت ئیراقێ ڤەگریت و ئەمریكا د چارچووڤێ حساباتێن ستراتیژییێن خۆ دا وێ بهێلیت، نەمازە ژبەر باندۆرا تەهرانێ ب سەر بەغدایێ‌ ڤە، بەلێ د نوكە دا ژبەر دۆسەیا ناڤخۆ و قەیرانێن ل گەل چین و ئیرانێ دێ سەرەدەریكرن ل گەل وێ پاشئێخیت و ب سەركەڤتنا پلانا ئەمریكا ل غەززە دێ ئیراق ل قۆناغا هاتی دا كەڤیتە د ناڤ بازنێ ئامانجێن ئەمریكا دا، لەوما دئێتە پێشبینیكرن كو د ماوەیێ بهێت دا، ئیراق ب هویری و ب نێزیكڤە چاڤدێریا پێشهات و گوهۆرینێن دۆسەیا فەلەستینێ بكەت، چونكو هەر گوهررینەك د هەڤسەنگییا هێزێ دا دێ باندۆر و كاریگەری لسەر سەقامگیریا هەمی دەڤەرێ و ئێراقێ هەبیت و بتایبەت ترامپ خودان ئایدولۆژیەكا دەمكی یە و بڕیار و سیاسەتا وی بلەز گوهۆرینێ‌ ب خۆ ڤە دبینیت و رەنگە بتنێ ل غەززە نەراوەستیت و ئیراق و وەلاتێن دی یێن دەڤەرێ ڤەگریت و رۆژهەلاتا ناڤەڕاست بێخیتە د قۆناغەكا نوو یا گرژیێن ژیۆپۆلیتیكی دا.

دیرۆكا بنپێكرن و پێشیلكرنا بڕگەیێن دەستووری و رێكەڤتنان ژ بال ئێڕاقێ ڤە ل گەل گەلێ كوردستانێ مێژوویەكا كەڤنار و شۆم هەیە و ب رێكا دەستهەلات و حوكمەتێن ئێك لدویڤ ئێك و هێزێن سیاسی یێن خۆ پیلانێن بەردەوام بۆ سنوورداركرن و لاوازكرنێ‌ دارێژتینە و د چارچووڤەیا خەلك و حوكمەتا كوردستانێ دا كو دەستهەلاتا خۆ ب سەر هەرێمێ بسەپینن ب رێكێن بەهانەیێن بێبنەما و ب هاریكاریا ولاتێن دەڤەرێ.
ل سالێن بۆری هەرێما كوردستانێ و گەلێ كورد تەڤ بزاڤ و هەولدان بۆ دیموكراسیكرن و فیدرالیكرنا ئێراقێ و وەك نەتەوەیەكا ڕەسەن كار بۆ بنیاتنانا ئێراقا نوو كر و ب خەمخۆری ڤە گاڤ بۆ خزمەتكرن و دەستەبەركرنا مافێن هەمی پێكهات و ئایین و زاراڤ و دەڤۆكێن جودا بۆ گەهشتن ب مافێن وان یێن راستەقینە و قورتالبوون ل دۆرپێچ و بۆیەر و پێشهاتان هاڤێتینە، بەلێ ب مخابنی ڤە دلپاقژییا كوردان ب گیانەكێ شۆڤینی و گوماناوی ژلایێ ئێراقێ ڤە هاتیە بەرسڤدان بۆ میناك گەلەك رێكەڤتنن سیاسی و ئابووری د بیاڤێن جودا ل گەل ئێراقێ سەبارەت ب پرسێن نەفت و بودجە و مووچە هاتینەكرن، بەلێ بەغدا هەرتەم پێشیلا ماف و خالێن رێكەڤتن و بڕگە و ئیمزا و یاسا و دەستوورێ خۆ ژی دكەت و ئامادە نینە لدویڤ یاسایێ كێشە و پرسگرێكێن هەلاویستی چارەسەر بكەت و ب تێگەهشتنا خۆسەپین و ئێكلایانە حوكمرانیێ و بریاران ددەت.
یا كو ئێراقێ د ڤان چەند سالێن بوورین دا كار لسەر كری پیلان و سیاسەتەكا دارێژتییە كو ئەجندایا وێ ژبال ولاتێن ئەقلیمی یێن دەڤەرێ هاتیە بەرهەڤكرن بۆ ڕێگرتن و لاوازكرنا پێگەهێ كیانێ هەرێمێ و حوكمەتا وێ كۆ ڤەژاندن و پێشكەڤتنێ و ئارامییا ئاست بلند و رۆلێ وێ د ناڤخۆ و دەرڤەدا لاواز كەت كۆ د راستی دا ب بەردەوامی و دبن سێبەر و سیاسەتا حەكیمانەیا سەرۆك بارزانی و ب هەول و بزاڤێن بێ ڤەقەتیان یێن سەرۆكێ هەرێمێ و سەروك وەزیران پێگەهێ هەرێمێ هەر رۆژ ئاست بلندتر دبیت ب ئاوایەكی كۆ ب چاڤێ هەرێمێ ل وێ ناهێتە نێرین بەلكۆ مینا ولاتەكێ سەربخۆ وەلاتێن جودا سەرەدەریێ ل گەل دكەن و هەر چەندە كو ئێراق كێشە و ناكۆكیێن ل گەل هەرێمێ تنێ ب بابەتێ مووچەی ڤە گرێددەت كو د راستی دا ئێراق پێشیلا بنەمایێن فیدرالی و شەراكەتا راستەقینە و بنەمایێن دیموكراسی و سەرخۆبوون و جوداكرنا دەستهەلاتی و جێبجێنەكرنا مادەیا ١٤٠ یا دەستوورێ ئێراقێ كریە و ب بەردەوامی پێشیلا رێكەڤتنان بۆ ڤەگەریانا دەڤەرێن كوردستانی و كاری بۆ بڕینا پشكا هەرێمێ ل بودجەیا فیدرالی دكەت و پابەند نەبوویە ب سۆز و گۆتنان دگەل هەولێر و هەرتەم پێشیلا ماف و ئازادییان دكەت و دادگەها فیدرالی د بەرژەوەندییا دەنگێن شیعەگەرییا پرانی و هێزێن چەكدار بەروڤاژی دەستووری د بەرژەوەندییا خۆدا بكارئینایە و پێگیر نەبوویە ب هەڤپشكی و فیدرالی و دیموكراسی و هەڤ قەبوولكرنێ د ئێراقێ دا بەلكو هەرگاڤ پێشیلا ڤان هەمی بیاڤ و بابەتان كریە.

دلۆڤان ئاكره‌یی
ل سالێن بۆری پارتیا دیموكراتا كوردستانێ چه‌ندین جاران بانگ هه‌لدێران و هند هه‌ول و بزاڤ ب رێكا په‌یوه‌ندین نیشتیمانی و دیپلۆماسی بۆ رێكخستنا ناڤ مالییا كوردستانیان كرن، به‌ره‌یه‌كێ ئێكگرتی و جڤاته‌كا ل ئاست سه‌ركردایه‌تی بهێته‌ ئاڤاكرن ل ناڤبه‌را ته‌ڤایا لایه‌نێن سیاسیین د قادا خه‌باتێ كو ل هه‌ر چار پارچه‌ین كوردستانێ كه‌سێن ئێكێ یێن پارتێن سیاسی نوونه‌ر بن د جڤاتێ دا و ئه‌ڤ جڤاتا هه‌نێ بریارده‌ر و رێنیشاده‌ر و چاڤدێر و هاریكاربیت بۆ رێكگرتنا هاتنا پێشا هه‌ر پێشهات و بۆیه‌ره‌كا نه‌خواستی و ب هه‌بوونا ڤێ جڤاتێ ژی دێ ناڤمالیا كوردستانیان خورت بیت، ب مخابنی ڤه‌ ژماره‌یه‌ك ژڤان لایه‌نێن نێزیكی چه‌كدارێن په‌كه‌كێ ئاسته‌نگ و ته‌گه‌ره‌ بۆ ئاڤابوونا ڤێ جڤاتێ دروستدكرن و یێن كۆو نێزیكی ڤێ بۆچوونێ ژی بوون ژناڤ رێزێن خۆ لاددان و ده‌ردئخستن لێ دنها دا و پشتی روخیانا ٥٣ سالیا رژێما به‌عسا سووریا فه‌رمانده‌یێ هه‌سه‌دێ ل ئه‌نجامێ سیاسه‌تێن خۆ یێن شاش كو ل ژێر سیاسه‌تا په‌كه‌كێ كاركریه‌ رۆژاڤا ئێخستییه‌ د مه‌ترسییێ دا داخوازا ئێكرێزیێ و ئێك هه‌لوه‌ستیێ ژ حوكمه‌تا هه‌رێمێ و هه‌رێما كوردستانێ و لایه‌نێن سیاسی دكه‌ت چه‌ندین سال بۆ هه‌می لایه‌نێن سیاسی داخوازا ئێكرێزی و ئێك هه‌لوه‌ستیێ دكرن، به‌لێ ب ئه‌مرێ په‌كه‌كێ و ده‌ردورێن وێ مافێ ژیانێ ژی ل رۆژاڤایێ كوردستانێ سه‌خت ببوو، د ڤێره‌دا من دڤێت بێژم ئه‌رێ گه‌لێ كوردستانێ و لایه‌نن سیاسی دێ چه‌وا سه‌ره‌ده‌ریێ و ب هانا وه‌ هێن پشتی كۆ وه‌ رێك ب ئالایێ كوردستانێ نه‌ددا ل رۆژاڤایێ كوردستانێ بهێته‌ هه‌لگرتن وبلند كرن و وه‌ رێك ب چێ ده‌نگ و ره‌نگان نه‌ددان ین كۆ دیڤه‌لانكێن وه‌ نه‌بن كۆ ژبلی په‌كه‌كێ ل رۆژئاڤا بمینن.
جودا ژێ قه‌ده‌غه‌یا ئالایێ كوردستانێ باره‌گه‌هێن هێزێن كوردستانی ژی وه‌ دسوتن و به‌رپرس و چالاكڤانێن سیاسی ل ده‌ڤه‌رێن وه‌ دهاتنه‌ تیرۆركرن یان ژی دهاتنه‌ ده‌رئێخستن و و رێك نه‌ددا جاره‌كا دی ڤه‌گه‌رنه‌ڤ رۆژئاڤایێ كوردستانێ و ناڤێ رۆژئاڤایێ كوردستانێ ژی گوهری بۆ رۆژاڤایێ باكوورێ روژهه‌لاتێ سووریا.
‎‎د نها دا ب زروری دبینن ژبه‌ر كۆ ل وه‌ قه‌ومی و روویدایه‌
ئه‌رێ چه‌ند سال نه‌بوون بانگ و هه‌وار ل كوردستانێ د هاتنه‌ دان كۆ هه‌می هێز ئێك ب گرن دا كو خه‌لكێ كوردستانێ پشت و په‌نایێ وه‌ بیت، له‌و گرنگه‌ د ڤی كاودانی داخازا لێبورینێ ل گه‌لێ كوردستانێ و هێزێن سیاسی بكه‌ن و دان پێدانێ ب شاشیین خودا بنن و ب واز هینان ل سیاسه‌تا تاك ره‌وی و ڤه‌گه‌ریان ب بیركرنه‌ڤه‌یا نیشتیمانی و خۆ رزگاركرن ل ژێر سێبه‌ر و ئه‌ژموونا په‌كه‌كێ ده‌رفه‌ت بۆ رزگار بوون ل ڤێ قوناغێدا بهێلن و گرنگه‌ د ڤێ قوناغێدا ل جهێ هوین داخازا به‌رپرسیاری ره‌فتاركرنا خه‌لكی بكه‌ن هوین ب به‌رپرسیاری و هویری و دلفره‌هی و لێبورینڤه‌ ئاماده‌ی ئێك رێزییا نیشتیمانی بن دا كۆ هه‌رێما كوردستانێ و حكومه‌ت و لایه‌نن سیاسی ین وێ ب كارن جاره‌كا دی ب هانا پاراستنا رۆژاڤا بهێن و سه‌روك مسعود بارزانی ژی ب سیاسه‌تا حه‌كیمانه‌یا خۆ ئه‌و مه‌ترسیین هه‌ین ل سه‌ر رۆژاڤایێ كوردستانێ ڤه‌ره‌ڤینیتن و ده‌ستكه‌ڤتێن مه‌زن بۆ كوردستانیان ژێ به‌رهه‌م بهێت.