بریارا هنارتنا پێشمه‌رگه‌ی بۆ كۆبانێ ژ لایێ سه‌رۆكاتیا هه‌رێمی و په‌سه‌ندكرنا وێ ژ لایێ په‌رله‌مانێ كوردستانێ ڤه‌ ژبوَ نه‌كه‌تنا كۆبانێ د ده‌ستێن تیرۆرستێن داعشێ دا، ئه‌ڤ پێنگاڤا هه‌نێ گه‌له‌ك هزر و رامان ژێ دچن هه‌ر كه‌سه‌ك ل دووڤ دیتن و شاره‌زایا خوه‌ بۆخوه‌ شرۆڤه‌كێ دده‌تێ، هنارتنا پێشمه‌رگه‌ی و ئێگكرتنا وان ل گه‌ل یه‌كه‌یێن پاراستنا گه‌ل و شه‌ڕكرنا وان د ئێك چه‌په‌ر دا چ جاران ناهێته‌ ژبیركرن، چونكی چوونا وان ته‌رازیا شه‌ڕی گوهارت ژ داكه‌تنێ به‌ر ب سه‌ركه‌تنێ و هه‌تا گه‌هشتیه‌ ئازادكرنا كۆبانێ و ئه‌ڤ سه‌ركه‌فتنه‌ مه‌سجه‌كێ دده‌ته‌ دوژمنێن كوردان و ده‌وله‌تێن جیهانی و دیاردكه‌ت كو كوردستان ب هه‌ر چار پارچێن خوه‌ ڤه‌ هه‌ر ئێك وه‌لات و ئێك نه‌ته‌وه‌یه‌ و ئێك زمان و خوینه‌ و ئێك جه‌سته‌یه‌ و بوَ وان دیاردكه‌ت ده‌مه‌ك دێ هێت ئه‌و چار پارچه‌ دێ د له‌شه‌كی دا هێنه‌ نژنین و سنۆرێ هه‌ڤبه‌ش دێ ل دۆر خوه‌ ئالینن چونكی سه‌ره‌رای هه‌بوونا سنۆرێن ده‌وله‌تێ د ناڤبه‌را كوردستان باشۆر و كوردستانا باكۆر و روَژئاڤا، لێ ئه‌و سنۆر هاتنه‌ شكاندن و كورد وه‌ك ئێك جه‌سته‌ و ئێك ده‌ست د چه‌په‌ركی دا بوون و شیان ب هێزا ئێكگرتنێ سه‌ركه‌فتنێن مه‌زن دژی چه‌ته‌یێن داعشێ بده‌ست بێخن، ئه‌ڤ چه‌ندا هه‌نێ وێ هزرێ دده‌ته‌ مه‌ كو هه‌كه‌ ئه‌م ب دكۆك بین و ئێك ده‌نگ بین و به‌رژه‌وه‌ندیێن تاكه‌ كه‌سی و حزبی بده‌ینه‌ ره‌خه‌كی و به‌رژه‌وه‌ندیێن نه‌ته‌وه‌ی بدانینه‌ به‌ر سینگێ خوه‌ دێ چه‌په‌رێن ئمبراتوریا و دوژمنان ژ ناڤبه‌ین چونكی مه‌زن دبێژن (هێز عیله‌تێ دبریت) له‌وما ده‌ما ملله‌ته‌كێ چل ملیۆنی دبیته‌ ئێك هێز و ئێك سه‌نگه‌ر كی هه‌یه‌ خوه‌ ل به‌ر سینگی وی راگریت؟!، ژ لایه‌كێ دیڤه‌ هه‌كه‌ جڤاكێ ده‌وله‌تی سه‌حكه‌ته‌ مه‌ ئه‌م ئێك هێزین و د له‌شه‌كی دا كاردكه‌ین د بن فه‌رمانا ئێك سه‌ركردا سیاسی یا كوردی، بین هینگی ئه‌و نه‌چارن هاریكاریا كوردستانێ بكه‌ن دژی هه‌ر دوژمنه‌كی و كولاڤێ خوه‌ بوَ بچه‌مینن، ئه‌ڤرۆ ئه‌و رۆژ هات كو ئه‌م ناكۆكیێن خوه‌ بهێلینه‌ ژ ده‌رڤه‌ی هۆلا كوَمبوونان و ده‌ست ب پێنگاڤێن ئێگرتنێ و براینی بكه‌ین، كۆبانێ بیته‌ هێڤینێ ئێكگرتنا هێزێن كوردی ل بن ناڤێ ژ بۆ پاراستنا و سه‌ركه‌تنا توخمێ كوردی دژی تیرۆرستێن هشكباوه‌ر چونكی ئه‌ڤرۆ كورد یێ ل پێش هه‌می جیهانێ ڤه‌ شه‌ڕێ تیرۆرێ دكه‌ت ئه‌و تیرۆرستێن دهێنه‌ نیاسین ب دوژمنێ مرۆڤاتی و هه‌می ئایین و نه‌ته‌وان و چ بهایێ مرۆڤاتیێ نه‌ده‌ت، له‌وما فه‌ره‌ ئه‌م ڤێ ده‌رفه‌تێ ژ ده‌ست نه‌ده‌ین، ئازادكرنا كۆبانێ بكه‌ینه‌ پرۆگرامه‌ك و بكاربینین ل هه‌ر چار پارچان و بلا ئێكگرتن و ئێك بوون بیته‌ تۆڤ و بهێته‌ چاندن د ناڤ دلێ هه‌ر كورده‌كی دا ل سه‌رانسه‌رێ جیهانێ بێته‌ هێڤێنكرنا هزرو بیر و باوه‌رێن هێز و پارتێن كوردی، ل كۆبانێ و شنگالێ خوینا كوردێن رۆژئاڤا و باشۆر و باكۆر تێكه‌ل بوون، پێشمه‌رگه‌ی شه‌هید و بریندار ل كۆبانێ دا هه‌روه‌سا یه‌كینه‌یێن پاراستنی گه‌ل ژی شه‌هید و بریندار ل شنگالی َدان له‌وما تێكه‌لیا خوینا شه‌هید و بریندارێن مه‌ دڤێت پێنگاڤێن براینی و ئێكبوونا مه‌ خورتر لێ بهێت نه‌ك بزڤرینه‌ كه‌لتۆرێ به‌ری نهو كه‌لتوورێ به‌رژه‌وه‌ندیێن حزبی و یێن لایه‌نێن ده‌وله‌تی، هه‌كه‌ ئه‌م هزرا ئێكبوونێ ژ مێشكێ خوه‌ بینینه‌ده‌ر هینگێ كه‌سێ باوه‌ری بمه‌ نامنیت و ئه‌م نه‌هه‌ژی وێ ده‌وله‌تێ ینه‌ ئه‌وا هه‌می كورد ل نیڤا روَژێ خه‌ونا ب ده‌نگ و ره‌نگ و شێوێ و ێڤه‌ دبینین.

پشتی حه‌فتیناما (شارلی ئیبدۆ) و خوارنگه‌ها كه‌سه‌كێ (جوهی) ل پاریس پایته‌ختێ فره‌نسا تووشی دو هێرشێن تیرۆری بووین ژ لایێ چه‌ند تیرۆرستان ڤه‌ كو دو ژ وان تیرۆرستێن سه‌ره‌كی، برایێن ئێك بوون و ئێك ژ وان ب سه‌ر رێخستیا قاعیده‌ ڤه‌ بوو و یێ دی ب سه‌ر رێكخستیا داعش ڤه‌ و د ئه‌نجام دا هه‌ڤده‌ كه‌س بوونه‌ قوربانی و رێخستیا قاعیده‌ د به‌یانامه‌كێ دا به‌رپرساتیا خوه‌ دیاركر و گه‌ف كرن كو ئه‌و دێ پتر هێرشێن ب ڤی ره‌نگی ل سه‌ر ئه‌ورۆپا زێده‌كه‌ن و ئه‌ڤ روودانێن تیرۆری بوَ ده‌مێ هه‌ر سێ رۆژێن بووری ل پاریس بوو ئه‌گه‌رێ هندێ گلۆپا مه‌ترسیێ ل سه‌رانسه‌ری فره‌نسا و ده‌وله‌تێن رۆژئاڤا بهێته‌ هلكرن ژ به‌ر وان هێرشێن تیرۆری یێن نه‌ چاڤه‌رێكری چونكی ئه‌ڤه‌ ده‌ستپێكه‌كه‌ بوَ به‌رفره‌هكرنا چه‌په‌رێن شه‌ڕێ دژی تیرۆرێ ل سه‌رانسه‌ری جیهانێ و ئه‌ڤ شه‌ڕێ د ناڤبه‌را هه‌ڤپه‌یمانێن ده‌وله‌تی د ادێ پتر ب موكومی و (رژدی) هێته‌كرن چونكی ئه‌ورۆپا فێر نه‌بوویه‌ هندێ پایته‌ختێن وێ وه‌كی پایته‌ختێ عیراقێ و ئه‌فغانستانێ و یه‌مه‌نێ، لێ بهێت و هێرشێن تیرۆری ب ڤی ره‌نگی ژماره‌كا زۆر ژ كه‌سێن سڤیل بووینه‌ قوربانیێن وێ، چونكی بێگومان ئه‌ڤ هێرشێن تیرۆری ل سه‌ر وه‌لاتێن ئه‌ورۆپی دێ كارتێكرنه‌كا نێگه‌تیڤ كه‌ته‌ سه‌ر كه‌رتێ ئابوورێ و پیشه‌سازی و بازرگانی و گه‌شتوگوزارێ ژ به‌ر په‌یداكرنا ترسێ و له‌رزێ د ناڤ پێكهاتێن جڤاكی دا و ژبیر نه‌كه‌ین ئارمانجا تیرۆرێ په‌یداكرنا ترس و له‌رز و نه‌ ئارامیێ یه‌ د ناڤ هه‌می پێكهاتێم جڤاكی دا.
ل ده‌سپێكا په‌یدابوونا داعش و قاعیده‌ گه‌له‌ك ده‌وله‌تان ئه‌و رێكخستی ده‌ستێ هاریكاریێ بوَ دبر و مه‌زن دكرن ژ بوَ به‌رژه‌وه‌ندیێن خوه‌ ب رێیا دانا چه‌كی و پاره‌ی و پێدڤیێن لۆجستی و ل دووماهیێ ئه‌ڤ رێكخراوێن تیرۆرستی بوونه‌ په‌نچه‌شێر و كه‌فتینه‌ د له‌شێ جیهانێ دا و جیهان ئارام نابیت هه‌كه‌ هه‌می جڤاكێ نیڤده‌ولی پێكڤه‌ كارنه‌كن ڤێ په‌نجه‌شێرێ ب رێكه‌كا قه‌یسه‌ری و هه‌ڤپشك بوَ ژناڤبرنا وێ ژ له‌شێ جیهانێ دا، چونكی تیرۆر كه‌سێ نانیاسیت و هه‌ڤالا كه‌سێ نینه‌ و ئه‌ڤ تیرۆرسته‌ بخوه‌ ژی نزانن ئه‌و چ دكه‌ن و چناكه‌ن و مه‌ره‌م ژ كریارێن وان چی یه‌؟ ب تنێ هنده‌ك هزرێن خاڤ یێن د سه‌رێ وان دا هاتیه‌ چاندن كو دێ حۆریان ل به‌حه‌شتێ وه‌رگریت، له‌وما ئه‌ڤرۆ هه‌می ئایین و نه‌ته‌وه‌ و جڤاك و وه‌لاتیێن سڤیل بێی جوداهی یێن بووینه‌ ئارمانج و پێشبینی دهێته‌ كرن پشتی ڤان روودانێم هه‌نێ فره‌نسا و ئێكه‌تیا ئه‌ورۆپی ب تایبه‌ت و جڤاكێ نێڤده‌وله‌تی ب گشتی پتر خوه‌ خورت بكه‌ن ل سه‌ر هێرشكرنا تیرۆرێ و بنبڕكرنا وێ تایبه‌ت ل عیراقێ و ل سووریێ و هه‌می جیهانێ، چونكی سه‌رێ كۆره‌ماری (داعش) ل ویرێ یه‌، مه‌ره‌م ژێ پایته‌ختێ تیرۆرێ، ئه‌و باش دزانن سه‌ركه‌فتنا تیرۆرێ ل ڤان ده‌ڤه‌ران ده‌سپێكه‌كا نێزیكه‌ د پاشه‌رۆژێ دا، تیرۆر ل به‌رده‌رگه‌هێن مالێن مه‌ میانكی بكه‌ت، له‌وما ئه‌و دێ بزاڤێ كه‌ن ب هه‌می شێوه‌یان تیرۆرێ دووری سنۆرێن خوه‌ ژ ناڤببه‌ن و پشته‌ڤانیا لایه‌نێم شه‌ڕێ دژی وێ بكه‌ن. ئه‌ڤروَ وه‌كی سه‌رۆكێ هه‌رێمی چه‌ندین جارام دوپاتكری كو هه‌رێما كوردستانێ یا پێش هه‌می جیهانێ ڤه‌ شه‌ڕێ تیرۆرێ دكه‌ت، چونكی پێشمه‌رگه‌ ئه‌ڤرۆ ل باشۆرێ هه‌رێمی سنۆره‌كی زۆر درێژ هه‌یه‌ كو دگه‌هیته‌ هزار و پێنجی كیلۆمه‌تران ل گه‌ل تیرۆرستێن داعشێ و ئه‌ڤ شه‌ڕێ هه‌نێ نه‌یێ ب ساناهی یه‌ چونكی چه‌كێ دو ده‌وله‌تان دده‌ست داعشێ دایه‌ و پێشمه‌رگه‌ پتر پێدڤی چه‌كێ گران و پێشكه‌فتی یه‌، داكو ته‌رازیا شه‌ڕی پتر بهێته‌ گوهۆرین و ره‌هورووشالین داعشێ و تیرۆرێ ل ڤێ ده‌ڤه‌را گرنگ ژ قورم بهێته‌ ده‌ر و تۆڤێ وێ هشك بیت پتر دێ له‌زكرن هێته‌ كرن بۆ هاریكاریكرن و پرچه‌ككرنا پێشمه‌رگێ قه‌هره‌مان بوَ رزگاركرنا وان ده‌ڤه‌رێن ده‌ست داعش دا، چونكی چونكی ئه‌ڤرۆ هێزا ئێكانه‌یه‌ بشێت ل به‌رسینگێ داعشێ شه‌ری بكه‌ت، ب تنێ پێشمه‌رگه‌یه‌ و ژلایه‌كێ دیڤه‌ هێزا داعشێ د هندێ دایه‌ ئه‌و به‌رده‌وام كونترۆلێ ل سه‌ر باژێرێن مه‌زن و بیرێم پترۆلێ بكه‌ت، چونكی ب رێیا هندێ بوو وێ داهاته‌كێ باش بده‌ست دكه‌ڤیت و به‌رده‌وام بیت ل سه‌ر شه‌ڕی و ژبیر نه‌كه‌ین ئه‌ڤرۆ سه‌رێ ماری یێ تیرۆرستان ل به‌رسینگێ سه‌نگه‌رێن پێشمه‌رگه‌یه‌ ل ناڤ ئاخا عیراقێ و سووریێ و دڤێت ئه‌ڤ سه‌رێ تیرۆرێ بهێته‌ ژێكرن ب رێیا پشته‌ڤانیا نێڤده‌ولی بوَ هه‌رێما كوردستانێ.

داعش رێخراوه‌كا تیرۆرستی یا چه‌كداره‌ ب سه‌ركێشیا ئه‌بۆ به‌كر به‌غدادی ل عیراق و سووریێ و رووبه‌ره‌كێ مه‌زن ژ هه‌ردو وه‌لاتان خستیه‌ بن كونترلا خوه‌، هزرا سه‌له‌فیا جیهادی په‌یره‌و دكه‌ت، ئه‌ڤ رێكخراوه‌ ژ رێخستیا قاعیده‌ ل عیراقێ جودابوویه‌ و پشتی هینگێ روَژ بوَ روَژێ پێشكه‌فتن و به‌رفره‌هی و ب هێزبوون بخوه‌ڤه‌ دیت تایبه‌ت ل سه‌ر ده‌ستێ ئه‌بۆ به‌كر به‌غدادی و پێگه‌هێ خو ه‌ ل ناوچێن سونه‌نشین زۆر به‌رفره‌هكر وه‌ك دایینه‌كێ لێهات و وان بارودۆخێ سیاسی یێ عیراقێ و سووریێ ب ده‌رفه‌ت دیت تایبه‌ت پشتی پاشگوهاڤێتنا سونه‌یان ل سه‌ر ده‌مێ سه‌رۆكێ ئه‌نجوومه‌نێ وه‌زیران یێ عیراقێ یێ چووی، تیرۆرستێن داعش دیاردكه‌ن و دبێژن ئارمانجا مه‌ گه‌راندنا خیلافه‌تێ یه‌ و جێبه‌جێكرنا بنه‌مایێن شه‌ریعا ئیسلامێ یه‌ ل هه‌می ده‌ڤه‌رێ، لێ د بینات دا ئه‌و گه‌له‌ك ژ وێ تاسۆ حه‌مامێ دوورن، ئه‌گه‌ر سه‌حكه‌ینه‌ هزر و فه‌لسه‌فه‌ و كارو كریارێن وان دێ بینین كو ئه‌ڤه‌ رێكخراوه‌كا سیاسی نه‌ته‌وه‌ی یا توندره‌وه‌ د ناڤ كراسه‌كێ ئیسلامێ داكار دكه‌ت ژ بۆ مه‌ره‌مێن سیاسی و نه‌ته‌وه‌ی، ئانكو ئیسلام كریه‌ ئالاڤه‌ك و ده‌ستكه‌فتێن سیاسی پێ كرینه‌ ئارمانج چونكو هه‌كه‌ وه‌كی ئه‌و بێژن ئه‌م بوَ ئاینێ ئیسلامێ یێ پیروز كار دكه‌ین ئه‌وا ب ڤی شێوه‌ی ناڤێ ئیسلامێ ل جیهانێ كرێت نه‌ دكر.
هه‌ر ژده‌ستپێكی دیار بوو كو مه‌ره‌ما وان یا دووره‌ ژ چارچووڤێ ئاینی به‌لكو ب تنێ وه‌ك تیفكل هێلایه‌ و كاكلا وان توندره‌ویه‌ و سه‌رداچووینه‌ و دوورن ژ ئیسلاما راست و دروست، وان ئاین بخوه‌ كریه‌ مه‌تال و رێك خوه‌ پێ بهێز دئێخیت شه‌ری پێ دكه‌ت داكو هنده‌ك مروَڤێن خشیم و نه‌زان بچن بگه‌هنه‌ وان و د به‌رژه‌وه‌ندیا وان كاربكه‌ن و بچن خوه‌ بپه‌قینن، چونكی ئه‌و دزانن ب كارئینانا ئیسلامێ وه‌ك ئالاڤ هێزه‌كا مه‌زن ده‌ته‌ وان و مه‌ره‌مێن وان ساناهیتر لێدكه‌ت و رێیا وان كورت دكه‌ت، باشترین به‌لگه‌ ژی ئه‌رێ چما ئه‌و كه‌سێ ب ناڤێ دینێ و سه‌ركه‌فتنا ئاینی مادێن بێهوشكه‌ر بكاردئینیت و مه‌ی ڤه‌دخوون و ماره‌كرنا خۆشیێ (زواج النكاح) و تشتێ حه‌رام حه‌لال دكه‌ن و حه‌لالی حه‌رام دكه‌ن، لێ د دورهێلی دا ئه‌و سوحبه‌ت و بازار قه‌ت نینن به‌لكو ب تنێ ئه‌ڤه‌ ئالاڤه‌ و رێكه‌ داكو ئارمانجا خوه‌ پێ ده‌ست بێخن، چونكی مه‌ گه‌له‌ك به‌لگه‌ ل به‌رده‌ست هه‌نه‌ ئه‌ڤه‌ پرۆژه‌كێ ب ناڤونیشانه‌ كو مه‌ره‌ما وان د قالبه‌كێ سیاسی دا و زڤرینا ده‌ستهه‌لاتێ یه‌.
1- هه‌كه‌ داعش ژبوَ ئاینێ ئیسلامێ كار كربایه‌ و سه‌رخستنا دینی ڤێ رێكخراوێ مرۆڤێن بێ گونه‌ه سه‌ربری نه‌دكرن به‌لكو دا مرۆڤێن سته‌مكار و بێ ده‌ستهه‌لات قورتال كه‌ت و رێزێ لێ گریت و ئازاد كه‌ت.
2- هه‌كه‌ داعش رێكخراوه‌كا ئاینی بایه‌ ئه‌وێ تشتێ حه‌لال حه‌رام نه‌ دكر وحه‌رام حه‌لال نه‌دكر، وه‌كی مه‌ گوه لێ بووی گه‌له‌ك تشتێن حه‌لال حه‌رامكرینه‌ و هه‌ر سه‌پێچكاره‌ ب توندی دئێته‌ سزادان ب ده‌ستێن وان وه‌ك حه‌رامكرنا تۆفك و چه‌ره‌ز و گرتنا سه‌رتراشخانان و گه‌له‌ك تشتێن دی.
3- تیرۆرستێن داعش ب به‌لگه‌ مادێن بێهوشكه‌ر و مه‌ی ڤه‌خوارن بكاردئینیت ل به‌رۆكێن شه‌ڕی و ئه‌ڤه‌ هاته‌ سه‌لماندن پشتی پێشمه‌رگه‌هێ قه‌هره‌مان ل سه‌ر كه‌له‌خێن كوشتێن وان هه‌لبووی و باره‌گایێن وان دا دیتین.
4- پێغه‌مبه‌رێ خودێ (سلافێن خودێ لێ بن) ده‌مێ د چو شه‌ڕه‌كی شیره‌ت ل بوسلمانان دكر كو چ دارا نه‌برن و چ زارۆیان و پیره‌مێران و ژنان نه‌ كۆژن، لێ پا داعش ئێكجاری سه‌رپێچیا ڤی شیره‌تێ دكه‌ت ژ به‌ره‌كی ڤه‌ زارۆ و ژنان و پیره‌مێران دكوژیت خانیا دهه‌رفینیت یا ژ وان دئێت ته‌خسیر ناكه‌ن ئانكو هه‌می شێوێن رێكێن ژیانێ قوت دكه‌ن.
5- داعش برسی و تێنهیا كوشتنێ یه‌ و هه‌می بزاڤان دكه‌ت مه‌زنترین رێژا كوشتنێ بكه‌ت، ئه‌ڤ رێكخراوه‌ ژ ده‌ف خوه‌ فه‌توا دده‌ت بوسلمان ب كافر دانیت و كوشتنا وان حه‌لال دكه‌ت ته‌مام دژی قورئانا پیرۆز، هه‌كه‌ داعشێ چه‌كێ كیمیاوی یان بایولۆجی یان ئه‌تۆمی هه‌بایه‌ نوكه‌ ژمێژه‌ ئه‌وێ ده‌ردورێن خوه‌ هه‌می كربانه‌ ئاگر و ئاخ و خولی و و چۆل بیابان ئێدی تۆڤێ ژیانێ ل وێری نه‌ دهێلا دا، دا بێژن ره‌حمه‌ت ل هیرۆشیما و ناكازاكی و حه‌له‌بچه‌.
6- ب هزاره‌هان مزگه‌فت ل هه‌رێمی هه‌نه‌ و هه‌می ژی تژی بوسلمان دبن، ئه‌رێ چما داعش فه‌توا كوشتنا كوردان ده‌ت و مه‌ دانیت مرته‌د و دسه‌ردا چووی ،لڤێرێ دیار دبیت كو داعش یا پرۆژه‌كێ سیاسی نه‌ته‌وه‌ی عه‌ره‌بی یا هشك باوه‌ر دهاژۆت، ئانكو داعش رێكخراوه‌كا سیاسی یا تیرۆرستی یه‌.
7- وان فه‌توا دایه‌ ماره‌برین(زواج النكاح) په‌یره‌و دكه‌ن و بخوه‌ حه‌رامی حه‌لال دكه‌ن، د بنه‌ره‌ت دا ل دووڤ مه‌رجێن ئیسلامێ بوَ گرێبه‌ستا ماره‌برینێ و مه‌رجێن ساخله‌میێ (شروگ الصحه‌) دڤێت باب رازی بیت و دڤێت ماره‌برین یا ئه‌به‌دی بیت ئانكو ده‌م تێدا نه‌هاتبیته‌ ده‌سنیشانكرن، لێ تیرۆرستێن داعش قه‌ت پێگیریێ ب بنه‌مایێن ئیسلامی ناكه‌ن و چ تشتێ د به‌ژه‌وه‌ندا واندا دكه‌نه‌ فه‌توا و بخوه‌ دروست دكه‌ن، یێ ب زوری كچان ژده‌یبابان دستینن و دبه‌ن ل خوه‌ ماره‌ دكه‌ن ب ناڤێ (زواج النكاح) و گه‌له‌ك خالێن دی ژی هه‌نه‌.

كۆبانێ ئه‌و باژێرێ بریندار، ئه‌و باژێرێ به‌رخودان و تێكۆشینێ دژی چه‌تێن داعشێ دكه‌ت، ئه‌و باژێرێ بوویه‌ گۆرستانا تیرورێ، ئه‌و باژێرێ هاتیه‌ نیاسین ل هه‌می جیهانێ باژێرێ مێرخاس و عه‌گید و جاڤنه‌ترسان دژی هزرا تیرۆرێ و داعشێ و ئالایێ ره‌ش، ئه‌و باژێرێ پتره‌ ژ چل رۆژان ژ هه‌ر سێ لایه‌نان ڤه‌ ل بن دۆرپێچێ دایه‌ و به‌ره‌ڤانیێ ژ نفش و شه‌ره‌ف و ئاخا كوردان دكه‌ت، د ڤی شه‌ڕی دا گه‌له‌ك نهێنی دیار بوون و دێ دیاربن، دێ دوست و دوژمنێن مه‌ دیاربن، پشته‌ڤان و هه‌ڤالێن كوردان و نه‌حه‌زێن وان ژێك هاتنه‌ جوداكرن، رۆن و ئاشكه‌را بۆ كینه‌ د خه‌ما كۆبانێ رۆندكان درێژن و كینه‌ ل هیڤیا كه‌تنا كۆبانێ نه‌ و تلیلیان رادهێلن و شه‌هیانا دشارینن.
ژ ئه‌نجامێ ڤێ دۆرپێچێ ل سه‌ر كۆبانێ ژ لایێ چه‌ته‌یێن داعشێ ڤه‌ په‌رله‌مانێ هه‌رێما كوردستانێ بریاره‌كا مێژووی و وێره‌كانه‌ دا ب چوونا پێشمه‌رگه‌ی ب چه‌كه‌كێ گران بۆ كۆبانێ ژبۆ هاریكاریا برایێن خوه‌ شه‌رڤانێن (یه‌كینه‌كانی پاراستنی گه‌ل) دوور ژ رازیكرنا به‌غدا و دیمه‌شقێ و وه‌ك ده‌وله‌ته‌كا سه‌ربه‌خوه‌ بریار دا، ئه‌و تشتێ بوویه‌ جهێ سه‌رنجراكێشێ ل هه‌می میدیایێن جیهانی ئه‌و بوو هه‌ر ژ هه‌ولێرا پایته‌خت و به‌ر ب دهۆك و زاخۆ و كوردستانا توركیا خه‌لك رژیانه‌ سه‌ر جادان بۆ پێشوازیكرنێ ل ڤێ پانۆرامایێ ل ڤێ داستانێ ل ڤێ حنێرێ و ب گول ئالایێن كوردستانێ و ستران و تلیلی و هۆزانان و ده‌ست قوتانان و ڤه‌كرنا له‌وندیا پێشوازی ل ڤان چاڤنه‌ترسان ل ڤان پێشمه‌رگه‌ و عه‌گیدان دكر و خه‌ونا وانه‌ ئێدی كور دچه‌په‌ره‌كی دابیت و ب ده‌ڤه‌كی و ب دله‌كی كاركه‌ت و كوردستانێ رزگار بكه‌ت، وه‌كر ئێدی هه‌ر كه‌سه‌ك نه‌شیان رۆندكێن خوه‌ راگریت و راوه‌ستینیت و به‌رده‌وام پشته‌ڤانی دكر و خه‌لك زۆر ب كه‌یڤ بوو ژ ڤان دیمه‌ن و داستانان، له‌وما دێ بێژین چوونا پێشمه‌رگه‌ی بۆكوبانێ هیڤیه‌كا مه‌زنه‌ بۆ هه‌می كوردان داكو باژێركێ كۆبانێ نه‌ ئێته‌ پیسكرن ب ببێهن و شوونپێن داعشێ و ئه‌ڤ پێنگاڤه‌ گه‌له‌ك په‌نجه‌ران ل به‌ر كوردان ڤه‌دكه‌ت، چونكی ئه‌ڤ بریاره‌ پتر ئێگرتنا كوردان نێزیكی ئێك دكه‌ت و دكه‌ته‌ هێڤێنه‌ك بۆ ئێگرتنا هه‌می هێزێن كوردی، هه‌روه‌سا ئه‌ پێنگاڤه‌ هشیاریه‌كێ د هزرا نه‌ته‌وه‌یا كوردی دا بلند دكه‌ت چونكی ب چوونا پێشمه‌رگه‌ی ل ناڤ باژێركێن كوردی، تایبه‌ت ل كوردستانا تركیا و پێشوازیا خه‌لكی هزرا وان یا كوردینێ دفیریێت و بلند دكه‌ت دگه‌هینته‌ به‌ر په‌ڕێن ئه‌سمانی و شاخێن كوردان و پیێن وان دخورینیت بۆ خه‌بات و تێكۆشانێ ژ بۆ ئازادیا كوردستانا مه‌زن، خه‌ونا هه‌ر كورده‌كی یه‌ ل سه‌رانسه‌ری جیهانێ ببینیت هێزێن كوردان یێ پێكڤه‌ كوردستانێ دپارێزن و پێگڤه‌ یێ پاپۆرا كوردستانێ دهاژوون و ئه‌ڤ پێنگاڤه‌ شكاندنا پایته‌ختێن ده‌وله‌تانه‌، شكاندنا قه‌ید و سنۆرانه‌ ئه‌و سنۆرێن بێی رازیبوونا كوردان ل رێكه‌فتنا سایكس پیكۆت ل سه‌ر كوردان هاتیه‌ سه‌پاندن، دڤێت ئێدی كورد ئێك ده‌نگ بن و ده‌ستان بكه‌نه‌ تێكدا چونكی ئه‌ڤ ده‌رفه‌تا بۆ كوردان رۆخسای چ جاران ب ڤی شێوه‌ی ناهێت و پاشی دیرۆك ره‌حمێ بكه‌سێ نابه‌ت یێ كوردان بفرۆشیت.