د درێژاهییا دیروكێ دا مه‌ هه‌رده‌م گوه ل رستا براینییا كورد وعه‌ره‌بان بویه‌ و پتریا بانگه‌وازیێن لایه‌نێن سیاسی و ئایینی و نه‌ته‌وه‌یی كار ل سه‌ر ڤێ پرسێ دكر لێ لایه‌نێن عه‌ره‌بی ل عیراقێ ب شێوازه‌كی بێ منه‌تانه‌ و بێ وه‌فاداری و خیانه‌تكاری سه‌یری پرسا ناڤبری دكر و ملله‌تێ كورد بویه‌ قوربانی حه‌ز و به‌رژه‌وه‌ندیێن لایه‌نێن عه‌ره‌بان و هه‌ر كورد كرنه‌ به‌رانێن فیداركاریێ و بێ هه‌ر تشته‌ك دمان. د گه‌ل بورینا بویه‌رێن بله‌ز ل ده‌ڤه‌را روژهه‌لاتا ناڤه‌راست و وه‌لاتێن هه‌رێمی و بدرێژاهییا دیروكێ ژ ده‌مێن كه‌ڤن و دێرین و هه‌تا روخیانا رژێما دكتاتورێ چه‌رخێ بیستێ بویه‌ر بله‌ز هاتن و چون و كورد بونه‌ یاریكه‌ره‌كێ سه‌ره‌كی ل ده‌ڤه‌رێ و ل سه‌ر ئاستێ روژهه‌لاتا ناڤه‌راست و بتایبه‌ت ل عیراقێ براینییا كورد و عه‌ره‌بان ل سه‌ر هه‌می ئاستان هاته‌ پشت گوه هاڤێتن و كورد نێزیكی ژێكڤه‌بون و جوداكرنێ بون ل عیراقێ و كورد بونه‌ خودان بریار و حكومه‌ت و په‌رله‌مان و پێشمه‌رگه‌ و بتایبه‌ت پشتی هاتنا هێرشێن داعشا تیرورست بو سه‌ر كوردستانێ پتر براینییا كورد و عه‌ره‌بان به‌ره‌ڤ ئاقاره‌كێ نه‌دیار ڤه‌چویه‌. ل ڤی سه‌رده‌می بلا سه‌ركردایه‌تییا كوردی و ل سه‌ر هه‌می ئاستان ل دور ڤێ پرسا ترسناك و مه‌ترسیدار راوه‌ستیت و كار بكه‌ن كو برانییا كورد و كوردان دروست بكه‌ن و نێزیكی هه‌ڤدوو بكه‌ن و بكه‌ته‌ پشته‌ڤان و هه‌ڤهه‌ڤالێن هه‌ڤ و بتایبه‌ت بارودوخ زورێ نازك و هه‌ستیاره‌، زور ره‌وش ب سه‌رێ سه‌ركردایه‌تی و ملله‌تێ كورد و شوره‌شێن كوردی هاتینه‌ لێ ب بوچونا من ئه‌ڤ ره‌وشا نوكه‌ ل كوردستانێ هه‌یی ژ هه‌می ره‌وشان مه‌ترسیدارتره‌ بو ئاییندێ ملله‌تێ كورد چونكه‌ ژێك دویربونه‌ك مه‌زن و پێشچاڤ كه‌فتیه‌ دناڤبه‌را پتریا هێز و لایه‌ن و پارتێن كوردی دا و ئه‌ڤ دویربونا لایه‌نان دبیته‌ ئه‌گه‌رێ ژێك دویربونا ته‌ڤایا ملله‌تێ كورد، براینیا كورد و كوردان كه‌فتیه‌ دمه‌ترسیێ دا و دێ ئه‌ڤ دویربونه‌ بیته‌ ئه‌گه‌رێ سه‌ره‌كی بو پاشڤه‌مانا دوزا ره‌وایا گه‌لێ كورد ل هه‌می پارچێن كوردستانێ. فه‌ره‌ هنده‌ك ژ ستێشنێن قوناغێن دیروكا كوردان دیار بكه‌ین كو زور ململانه‌ و ژهه‌ڤدو دویركرن ل ناڤبه‌را لایه‌ن و پارتێن كوردستانی دروست بوینه‌ و دئه‌نجام دا شه‌ر و هێرش ژی ل سه‌ر هه‌ڤدو دكرن و كورد بو چه‌ندین قوناغێن دی پاشڤه‌برینه‌ و به‌لانسا كوردان ل ناڤخو و ل ده‌رڤه‌ كێم كریه‌ و ب ڤان ژێكنه‌گرتن و شه‌ران دوژمنێن كوردان سه‌ما دكر و ئاهه‌نگ ساز دكر و چه‌پله‌ لێدان و پتر به‌رێ كوردان ددا هه‌ڤد و وناكوكی ل ناڤبه‌را وانان دروست دكرن، پشتی ره‌وشا په‌یوه‌ندیێن ناڤخویی یێن پارت و لایه‌نان گه‌هشتیه‌ وی راده‌یی كو بو مه‌ترسیه‌ك ل سه‌ر بزاڤا رزگاریخوازا كوردی ل ته‌ڤایا كوردستانێ و رازیبون وباوه‌ریه‌كا سه‌رتاسه‌ری بو هه‌میان په‌یدابوی كو چاره‌نڤێسێ وانان ئێكه‌ وب هیمه‌تا سه‌ركرده‌یێن كوردپه‌روه‌ر و دلسوز و بتایبه‌ت (ادریس بارزانی) به‌ره‌یێ كوردستانی ل (7/5/1988) هاته‌دامه‌زراندن. دامه‌زراندنا ڤی به‌ره‌یی بویه‌ تیره‌ك ژه‌هركی ب دلێ دوژمنان كه‌فت و ئومێده‌ك گه‌ش بو ته‌ڤایا كوردان دروست كر. نوكه‌ ل ڤی سه‌رده‌می ئه‌ركه‌كێ نشتیمانی و لاتپارێزی دلسوزانه‌یه‌ كو جڤاته‌ك یان لیژنه‌یه‌ك یان به‌ره‌یه‌ك بهێته‌ دروست كرن ل ناڤبه‌را سه‌رجه‌م لایه‌نێن كوردی نه‌ بتنێ ل كوردستانا باشور به‌لكو ل ته‌ڤایا پارچێن كوردستانێ داكو كورد ژی مینا ته‌ڤایا ملله‌تێن جیهانێ ببنه‌ خودان ده‌وله‌ت و سه‌رخوه‌بونا خو وه‌رگرن، بلا براینیا كورد وعه‌ره‌بان پشت گوه بهاڤێژین و ژبیر بكه‌ین و بتنێ براینیا كورد و كوردان دروست ببیت و بهێز بكه‌ڤیت داكو ئێكگرتنه‌كا سه‌رتاسه‌ری یا كوردان دروست ببیت و به‌ره‌ڤ بده‌ست خستنا مافێن ره‌وایێن ملله‌تێ كورد و بتایبه‌ت ل ڤی سه‌رده‌می كو هه‌می لایه‌ن نه‌شیاینه‌ بگه‌هنه‌ رێكه‌فتنه‌كێ بو پرسێن سه‌روكاتی و حوكمرانیێ. و ئه‌ڤ ئه‌گه‌ره‌ بونه‌ پالده‌ر بو تێكدان و ئالوزبونا ره‌شا ئه‌وله‌هیێ ل هه‌رێمێ و بتایبه‌ت ل ده‌ڤه‌را سلێمانیێ كو دبته‌ مه‌ترسی بو شه‌رێ ناڤخویی یان جوداكرنا سلێمانیێ ژ كوردستانێ كو ئه‌ڤه‌ داخازا دوژمنێن كوردانه‌ و شیاینه‌ تا راده‌یه‌كی هنده‌ك چه‌ته‌ وسیخورێن خو بكه‌نه‌ دناڤا جهێ بریارێ دا ل هه‌رێمێ و بتایبه‌ت ل ده‌ڤه‌رێن سنوری یێن ئیرانا تێكده‌ر.

ئیدیه‌مێ یاریێن سیاسی ل ده‌ست پێكا په‌یدابونا ژیانێ هه‌بوویه‌ و هێدی دگه‌ل بورینا قوناغان گه‌شه‌ و وه‌رار كریه‌. زور شێواز و ره‌نگێن یاریێن سیاسی هه‌بوینه‌: ل سه‌ر ئاستێ نیڤده‌وله‌تی و هه‌رێمایه‌تی و ناڤخویی و پارت و گوروپ و كومه‌لان ژی ئه‌ڤ ئیدیه‌مه‌ هه‌نه‌. یاریێن سیاسی چ ده‌مێن دیاركری نینن چونكه‌ ده‌مێ به‌رژه‌وه‌ندیێن تایبه‌ت زالبون ل سه‌ر دورهێل وكه‌تواری ل وی ده‌می یاریێن سیاسی سه‌رێ خو هه‌لدده‌ن و لایه‌ن و وه‌لات دبنه‌ قوربانیێن په‌یماننامێن نێڤده‌وله‌تی. ل ده‌مێ لاپه‌رێن فه‌رهه‌نگا دیروكێ ڤه‌دده‌ین و پشكا كوردان دئینینه‌ به‌رچاڤ و رێزا دخوینین دێ دیار بیت كو بتنێ ل ناڤ هه‌می یاریێن سیاسیێن جیهانی یێن ولاتێن زلهێز و زه‌به‌لاح و ل ناڤبه‌را وه‌لاتێن عه‌ره‌بی و هه‌رێمی هاتینه‌ كرن بتنێ ملله‌تێ كورد بوینه‌ قوربانێن ڤان گێم و یاریان.
پرسا یاریێن سیاسی پرسیار و هزركرنا بخوڤه‌ دگریت ئه‌رێ ملله‌تێ كورد یێ دلساخه‌ یان باوه‌ریێ ب یێ به‌رامبه‌ر دئینیت یان یێ نه‌زانه‌ یان یێ بێ شیانه‌ یان ژی نه‌ یێ ئێك گرتی یه‌ یان یێ گرێدایی ئولی یه‌ و ئه‌ڤه‌ هه‌می به‌لكو هه‌بن لجه‌م ملله‌تێ كورد لێ یا درست ملله‌تێ كورد ل دێرین زه‌مان خودان ده‌ستهه‌لات بویه‌ و ئه‌زمونا حوكمرانیێ هه‌بویه‌ و چه‌ندین میرگه‌ه و میرنشین و ده‌وله‌تێن مه‌زن هه‌بوینه‌ و ب باشترین پروسه‌یا حوكمرانیێ ده‌ستهه‌لاتێ خو گێرایه‌ و سه‌ركه‌فتنێن مه‌زن بده‌ست ڤه‌ ئیناینه‌ و ئابوره‌كێ بهیچز و پێشه‌سازیه‌كا پێشكه‌فتی هه‌بویه‌ لێ ئیمپریالیزما جیهانی و نه‌ئێكگرتن و نه‌ئێكچه‌په‌ریێ ئه‌م گه‌هاندینه‌ قوناغا نوكه‌ تێدا دبورین، جاران كورد كه‌فتینه‌ به‌ر پیلان و هێرشێن دوژمنان د سێگوشه‌یا نه‌ته‌وێن عه‌ره‌ب و ترك و فارسا و ل ناڤبه‌را مه‌زهه‌بێن سنی و شیعی دا و خودایی كوردستان زه‌نگین كرییه‌ ب دوخێن بهادار كو ل پتریا وه‌لاتێن جیهانی نینن.
هه‌ر ژ كه‌ڤندا پیلانێن نه‌مان و ژێكڤه‌كرنا كوردا هاتینه‌ دانان ژلایێ وه‌لاتێن زلهێز و عه‌ره‌بی و هه‌رێمی ڤه‌ و هێرشێن له‌شكه‌ری و ئاسمانی و په‌یاده‌ و لێدانا ئابورێ بهێزێ كوردا و تێكدانا دیموگرافیا كوردستانێ، قوناغا نوكه‌ دوباره‌ مێژوو نوی بوو ڤه‌ و یاریێن سیاسی ل به‌رامبه‌ر كوردان دیار بوون و مه‌ترسی ل سه‌ر كوردان هه‌یه‌ و ده‌ستێن دوژمن و بیانیان كه‌فتینه‌ دناڤا ملله‌تێ كورد و حكومه‌تا هه‌رێما كوردستانێ دا و مه‌ترسیێن مه‌زن ل سه‌ر ره‌وشا ئابوری و دارایی و سیاسی و كومه‌لایه‌تی هه‌یه‌ و به‌رژه‌وه‌ندیێن تایبه‌تێن وه‌لاتێن هه‌رێمی و زلهێز و دوباره‌ وه‌ریسكێ كوردان كه‌فتیه‌ د ده‌ستێن ئیمپراتوریه‌تا ئوسمانی و فارسی و ب سه‌رپه‌رشتی یا وه‌لاتێن مه‌زنێن جیهانێ و دوباره‌ بویه‌ شه‌رێ ڤه‌شارتی یێ ئوسمانی و صه‌فه‌وی یا ل سه‌ر كوردستانێ كو ئه‌و سیناریو یا دزڤریت ڤه‌ و ژئیرانێ قاسم سلیچمانی و ژتركیا ئه‌ردوگان و ژعیراقێ هادی العامری و مالكی و هه‌ر لایه‌ك ژی ب بهانه‌یا په‌كه‌كێ یان پژاك و هه‌ده‌پێ و په‌یه‌دێ و دیموكراتا ئیرانێ و تركمان و فیلق القدس.
هه‌لویستێ توركیا به‌رامبه‌ر داعشێ چ بویه‌ و پشتی بنهێنی گرێ به‌سته‌ك دگه‌ل ئه‌مریكا ئه‌نجام دای ئێكسه‌ر تركیا هه‌لویست گوهارت و هێرش كرنه‌ سه‌ر داعش و سوریێ ودویر نینه‌ تركیا مه‌ بفروشیت و ئه‌ڤ یاریا سیاسی ڤه‌دگریت و ئه‌مریكا و روسیا ژی ڤه‌دگریت. ئیران یا جهێ پێ خو خوش دكه‌ت وكونترولا عیراقێ بكه‌ت چونكه‌ كونترولا ده‌ڤه‌رێن شیعی د ده‌ستێ وانان دایه‌ لێ كوردستان مایه‌ وهنده‌ك ده‌ڤه‌رێن كوردستانێ ژی كونترول كرینه‌ لێ بارزانی ئاسته‌نگه‌ له‌وما بریار دایه‌ بارزانی نه‌بیته‌ ده‌ستهه‌لاتدار و به‌ركێ ل بن پێن وی بكێشن و ئه‌گه‌ر بهێلن بێ ده‌ستهه‌لات بمینیت و پله‌یه‌كا ته‌شریفی بیت بێ چه‌نگ و نینوك.
مایتێكرنێن ئیرانێ د كورستانێ دا گه‌هشتینه‌ وی راده‌یی كو گه‌فان دكه‌ن پرسا سه‌روكاتیێ ب داوی بینن مینا وانان دڤێت ئه‌گه‌ر نه‌ دێ لاپه‌رێن وانان هێنه‌ ئاشكه‌را كرن له‌وما هێش ب داوی نه‌هاتیه‌. ل سوریێ كوردستانا روژئاڤا هێش ل بن چاڤدێری یا رژێما شێرێ بێ زه‌نگل دایه‌ و ل سه‌ر ڤێ چه‌ندێ را ژی كوردستان هاته‌ ڤالا كرن و وه‌رگرتنا كوچبه‌رێن سوری و عیراقی نه‌ یا ئاسانه‌ و نه‌ پرسه‌كا مروڤاتی به‌لكو پیلانه‌كه‌ ژلایێ دوژمنێن ملله‌تێ كورد ڤه‌ ژ بو كێمكرنا كوردان و زێده‌كرنا نه‌ته‌وێن دی ل سه‌ر وی خاكێ كو سه‌دان سالایه‌ ب ده‌هان شوره‌ش و به‌رخودان و ب هزاره‌ها شه‌هید و ب ملیونان قوربانی ل سه‌ر هاتینه‌ دان و نوكه‌ ب ئاسانی كوردستان بهێته‌ ڤالا كرن یان بێخنه‌ دبن كونترولا دوژمنان ڤه‌.

زانایه‌كێ بیانی بناڤێ (ڤیكتور گوزان) دبێژیت (ئازادیا راست ئه‌و نینه‌ یا كو هه‌ر تشته‌كێ مروڤی بڤێت ئه‌نجام بده‌ت به‌لكو ئازادی یا راست ودرست ئه‌وه‌ كو مروڤ ژ سنورێت خو نه‌ ده‌ركه‌ڤیت)، من دڤێت ئاماژێ بكه‌م كو پارتی دیموكراتی كوردستان دیروكه‌كا دویر ودرێژا پر سه‌روه‌ری و سه‌ركه‌فتن و قوربانی دان و ده‌ستكه‌فت هه‌یه‌. هه‌ر ژ دامه‌زراندنێ پارتی ب باوه‌ریه‌كا موكوم و پیلایی و ب نیه‌ته‌كا زه‌لال و ئاشكه‌را و ب گیانه‌كێ خوگوریكرنا كورد وكوردستانێ خزمه‌تكریه‌. خه‌باتا پارتی پێش چاڤه‌ و ناهێته‌ به‌رزه‌كرن و پتریا جاران پارتی ده‌ست ژ به‌رژه‌وه‌ندیێن خو به‌ردایه‌ و بتنێ به‌رژه‌وه‌ندیێن بلندێن ملله‌تێ كورد وكوردستانێ ل به‌رچاڤ وه‌رگرتینه‌و پاراستینه‌. ل ده‌مێ شوره‌شێن كوردی و ب تایبه‌ت شوره‌شێن ئیلون وگولانێ زور هه‌لویستێن چاك و جوامێرانه‌ وه‌رگرتینه‌ به‌رامبه‌ر لایه‌نێن سیاسی یێن د گوره‌پانا سیاسی یا كوردستانێ دا و هاریكاریا پاره‌یی و وره‌یی و هێزێ و چه‌كی و راگه‌هاندنێ بو وان كرینه‌ و ده‌ستێ كوردپه‌روه‌ریێ و كوردینیێ بو درێژ كریه‌ و ئه‌خلاقێ پارتی ژی هه‌ر ئه‌ڤه‌ بویه‌.
چه‌ند هه‌لویستێن پارتی به‌رامبه‌ر لایه‌نێن دی ده‌مه‌ خویاكرن یێ ئێكێ ل سالێن هه‌شتێیان پارتا كریكارێن كوردستانێ هاتنه‌ د ناڤ خاكا مه‌دا و چه‌ند كه‌سێن كێم بون و پارتی ب هه‌می لایه‌كی ڤه‌ هاریكاریا وانان كر و خانی بو چێكرن و چه‌ك دایێ و پێشمه‌رگێن وانان فێری كارێ پارتیزانی و خوراگریێ دكرن و به‌لاڤوكێن وانان ژی ب رونیویا خو چاپ دكرن و ب رێكخستیێن پارتی یێن كوردستانا تركیا دا به‌لاڤ دكرن و بناڤێ وانان. پاشان تركیا هێرش كره‌ سه‌ر باره‌گایێ لقی1 ل كوماته‌ و (48)ده‌مژمێرا پێشمه‌رگێن پارتی به‌رسینگێ هێرشا له‌شكه‌رێ تركا گرت و ئه‌وان خو ڤه‌شارت و گوت ئه‌ڤه‌ ژ مه‌را پر باشه‌. پاشان هه‌لویستێ پارتا كرێكاران به‌رامبه‌ر پارتی چ بوو. هه‌لویسه‌كێ دی كو پارتی ده‌ستێ هاریكاریێ بو ئێكه‌تیا نیشتیمانیا كوردستانێ (ینك) درێژكریه‌ و نه‌هێلایه‌ بكه‌ڤیت و ل ده‌مێن به‌رته‌نگ و نازك دا ئه‌گه‌ر پارتی نه‌بایه‌ دا (ینك) بێ سه‌روبه‌ر بیت و ژده‌ستهه‌لاتێ هێته‌ دورخستن و چ هێز و شیان نه‌دمان لێ لهه‌می كه‌فتنێن وانان پارتی ده‌ستێ وانان گرت و هاریكاریا وانان كرن و تاكو خو ل سه‌ر پێن خو گرتی و پاشان ناڤ ل خو د دا و گوت دێ ب یه‌ك لیسته‌ هێینه‌ خوارێ و هه‌لویستێن وانان دیار بوون و د هه‌لبژارتنێن پارێزه‌ران دا یێن ل (31/10/2013) هاتینه‌ ئه‌نجام دان (ینك) خو دا د گه‌ل یه‌كگرتوو. هه‌لویسته‌كێ دی ته‌ڤایا ملله‌تێ كورد هایداره‌ ل سه‌ر هاریكاریا پارتی بو كورد و پارتێن كوردستانا روژئاڤا و هه‌لویست و داخویانیێن جه‌نابێ سه‌روك بارزانی و پارتی ل دور وانان و ب تایبه‌ت پارتێن كوردستانا روژئاڤا لێ مه‌ د مه‌دیایێن دوست و دوژمنان دا دیتن ئه‌و داخویانیێن (صالح مسلم) دژی پارتی و بارزانی. پارتی ده‌ستێ پارت و لایه‌نێن عیراقی گرتیه‌ و هه‌لویستێ وان هاتیه‌ گهورین، لڤێره‌ پرسیاره‌ك دهێته‌ پێش بوچی پتریا لایه‌نان دوژمناتیا پارتی دكه‌ن به‌رسڤ زور هه‌نه‌ ئه‌و ژی یان پارتی یا شاشه‌ یان ژی یا سیاسه‌ته‌كا دروست په‌یره‌و دكه‌ت و پتر یا دوێ تێته‌ به‌رچاڤ كو ئاراسته‌یا سیاسه‌ت و به‌رنامێ پارتی به‌ره‌ڤ وێ چه‌ندێ دچیت پتر گرێدای جودابون وسه‌رخه‌بونا كوردستانێ یه‌ له‌وما وه‌لاتێن هه‌رێمی و جیهانی ئه‌ڤ ئاراسته‌یه‌ نه‌ د به‌رژه‌وه‌ندا ده‌ڤه‌رێ دا یه‌ و دژی به‌رژه‌وه‌ندیبَن وانایه‌.
ره‌وشا نوكه‌ ل كوردستانێ په‌یدا بوی یا پرسا سه‌روكاتیێ جهێ ره‌خنێ یه‌ بو هه‌می لایه‌نان و براستی نه‌ده‌مێ وێ چه‌ندێ یه‌ و هه‌می پارت و لایه‌ن گونه‌هبارن به‌رامبه‌ر ره‌وشا نوكه‌ په‌یدا بووی و بێ ئومێدیه‌ك بو سه‌رجه‌م كوردان ل كوردستانێ دروست كریه‌ و دلخوشیه‌ك و ئومێده‌كا گه‌ش بو دوژمنان دروست كریه‌ و نوكه‌ به‌لانس و بهایێ كوردان دچاڤێن كومه‌لگه‌هێ ناڤخخویی و ده‌ره‌كی دا كێم بویه‌ و دوزا كوردا پاشڤه‌ چویه‌ و ئه‌گه‌ر ئه‌م خودان ده‌وله‌ت باینه‌ هه‌ر چ رویدابا بلا رویدابا لێ ئه‌م لناڤ گه‌میه‌كێ داینه‌ ول نیڤا ده‌ریایێ داینه‌ و هه‌ر ده‌مێ كون بو یان خار بو دێ نقوم بیت. راستی بهێنه‌ دیاركرن و هه‌ر كێماسی و شاشیه‌كا دبینم ل سه‌ر دنڤێسم و ره‌خنا ژی دكه‌م ژ بو به‌رژه‌وه‌ندا ملله‌تێ كورد و دچه‌ندین بابه‌تان دا من ره‌خنه‌ ل پارتی ژی كریه‌ بلا كه‌س هزر نه‌كه‌ن ئه‌ز به‌رگریێ ژ پارتی دكه‌م لێ من دڤێت راستیان دیار بكه‌م كو پارتی ژی كومه‌كا مه‌زنا كێماسیا هه‌یه‌ و كه‌سانێن نه‌ ژ هه‌ژی كرینه‌ د جهێن بلند و حه‌ساس دا و یێن خزمه‌ت و قوربانی داین و یێن شاره‌زا و یێن چاره‌نڤێسێ خو ب پارتی ڤه‌ گرێدای هاتینه‌ ژ بیر كرن و پشت گوه هاڤێتن و دڤێت پارتی ل خو بزڤریت و به‌رێ خو بده‌ته‌ قاعیده‌یی و خه‌لكێ سڤیل و بێ گونه‌ه چونكه‌ خه‌لكێ مه‌ زور قوربانی داینه‌ و بلا ب ئارامی وسه‌ربلندی و خوشی ژیانا خو ببه‌ن سه‌ر.

پێشه‌وا قازی محه‌مه‌د دبێژیت (هه‌ستێ نشتیمان په‌روه‌ریێ و ئازادیێ ددلێ هه‌ر كورده‌كی دا جهێ خو یێ كری وده‌ستا ژێ به‌رناده‌ین تا گه‌هشتن به‌ره‌ڤ ئارمانجان) بێ گومان ملله‌تێ كورد هه‌سته‌كێ نه‌ته‌وه‌یی یێ بهێز یێ هه‌ی و دناخێ وانان دا هاتیه‌ چاندن وكێماسی و دابه‌زین بو دوژمنان نه‌كریه‌ وملله‌تێ كورد یێ نشتیمانپه‌روه‌ره‌ و لبه‌ر سینگێ مه‌زنترین وهوڤترین هێزا جیهانێ راوه‌ستا و دابه‌زین ژ بهوسته‌كا خاكا پیروزا كوردستانێ نه‌ كر و ب مێرچاكی و سه‌ربلندی و پری باوه‌ری به‌رگری ژ كوردستانێ كر تا كو گه‌هشتیه‌ قوناغا ئه‌نفالان.
گه‌له‌ك كاره‌سات و گرفتاری و زورداری وگونه‌هباری بـ سه‌رێ گه‌لێ كورد و كوردستانیان هاتینه‌ ژلایێ زوردار و داگیركه‌رێن كوردستانێ ڤه‌، و ژوان گونه‌هباریێن مه‌زن و بناڤ و ده‌نگ یێن دژی ملله‌تێ كورد هاتینه‌ ئه‌نجام دان ئه‌وژی كیمیابارنكرنا ده‌ڤه‌رێن كوردستانێ و بتایبه‌ت هه‌له‌بچه‌ وده‌ڤه‌رێن بادینان و بالیسان وده‌ڤه‌رێن سوران ل هه‌ڤلێر و سلێمانی و كه‌ركوك وتاوانێن (جینوساید) و كریارێن هه‌وێن ئه‌نفالێن ره‌شتاری كو ل ناڤه‌ندێن جیهانێ ده‌نگڤه‌دای كو شه‌رمزارترین و روی ره‌شترین وهه‌تكبه‌ریترین تاوان بون كو دوژمنان دژی كورد و كوردستانیان ئه‌نجام داین كو پتر ژ (182) هزار كوردا شه‌هید كرن و بێ سه‌روشوین كرنا وه‌لاتیێن بێ گونه‌ه ژ مه‌سیحی و ئه‌رمه‌نی و ئێزدی وسابئه‌ وشه‌به‌ك و فه‌یلی وكاكه‌یی وشیعه‌ وسنی وتركمان وسورانی و بادینی و هتد.
دژمنان هه‌رده‌م جوداهی نه‌كریه‌ ل ناڤبه‌را خه‌لكێ كوردستانێ و تاوان و كومكوژی وئه‌نفال و زیندان كرن و گورێن ب كوم ده‌رهه‌قێ كورد و تركومان و ئاشوری و كریستیانان ئه‌نجام داینه‌. وه‌ك ئه‌نجامه‌ك بو وان كار وكریارێن پیس وچه‌په‌لێن رژێمێن گه‌نی یێن كو ده‌ستهه‌لات ل عیراقێ كری وبتایبه‌ت رژێما گوربه‌گورا به‌عسی یا چه‌په‌ل ملله‌تێ كورد كه‌فتنه‌ دناڤ گێله‌شوكا ئه‌نفالان دا و ب هزاره‌ها كوردێن ب شه‌ره‌ف و كورد په‌روه‌ر كه‌فتنه‌ ناڤ تورا جاش و مسته‌شار و كرێ گرتی و سوپا و ئه‌من و له‌شكه‌رێ عیراقێ دا و ل ئوردیگایێن بخورتی چێكرین و لناڤ ستری وتوز ولناڤ ده‌شتێن بێ ئاڤ و گه‌رم و لناڤ دوپشك و مارو كرم و كێزان دا و زێده‌باری گه‌ف و ئازاردان و گرتنا چه‌نده‌ك و تاوانبارێن به‌عسی یا دا وهه‌روه‌سا ب ده‌هان كوشتن و بێ سه‌روشوین كرن دكه‌له وئاڤاهیێن ئه‌منێ وزیندانێن تاری دا.
هه‌ر دیسا ب هزاران نه‌كه‌فتنه‌ دده‌ستێن رژێمێ دا به‌ره‌ڤ سنورێن وه‌لاتێن جیران ڤه‌ چون و ل ئیران و توركیا و وه‌لاتێن بیانی و ل كه‌مپ وچادرگه‌هێن مێردین و موش و دیاربه‌كر ئاكنجی بوون و ئه‌و ژیانا سه‌خت و دژوار بره‌ سه‌ر یا كو برایێن وان یێن دی بریه‌ سه‌ر. جهێ سه‌رسورمان ومه‌نده‌هوشیێ یه‌ كو ده‌زگایێن راگه‌هاندنا جیهانی ژ روژنامه‌ وگوڤار و سایتان و كه‌نالێن ناڤخویی و ئاسمانی و وه‌لاتێن خو ب كراسێ بوسلمانه‌تیێ داپوشی و وه‌لاتێن بناڤێ دیموكراسیه‌ت و ئازادیێ و ئازادیا ده‌ربرینێ دپه‌یڤن و رێكخراو و سه‌نته‌ر و لایه‌ن و پارتێن بناڤێ یاسایێ كار دكه‌ن نه‌ژدویر و نێزیك باسێ هه‌وێن ئه‌نفالان و نه‌هامه‌تێن كوردا نه‌كرن و ئه‌گه‌ر هنده‌ك ژڤان جها كربایه‌ ژی ب كێمی بتنێ باس كرن و چ لایه‌نان هه‌لویست نه‌بون و هنده‌ك لایه‌نان ژی ب ئاشكه‌رایی په‌سنا ڤان هه‌وێن ئه‌نفالان یێن هوڤانه‌ كرن و دگوت مافێ سه‌دامی یه‌ عیراقێ ژ تیرورستا ڤالا بكه‌ت و مه‌ره‌م ژ تیرورستا ملله‌تێ كورد بوو.
لڤێره‌ دڤێت ئه‌م هه‌می پێكڤه‌ كار بكه‌ین ژ بو ئاڤاكرنا وه‌لاتێ خو كوردستانێ و هه‌می ژێكنه‌گرتن و ئارێشه‌ و پرسێن ناڤخویی بده‌ینه‌ لایه‌كی و ره‌فتارێن دوژمنان دگه‌ل مه‌ كرین ل پێش چاڤێن مه‌ بن و خو ژبیرڤه‌ نه‌به‌ین و بلا هه‌رده‌م دیمه‌نێن ئه‌نفال و ده‌ربه‌ده‌ری و ئاواره‌یێ ل پێش چاڤێن مه‌ بن مینا فلمه‌كی و ببنه‌ دكیومێنتار و بو نفش و به‌ره‌بابێن داهاتی. ده‌ستێن خو بكه‌ینه‌ دده‌ستێن هه‌ڤدو دا، دا كو كوردستانێ ئاڤا بكه‌ین و بگه‌هینه‌ كنارێ ئارام ب سه‌رفه‌رازی.

فه‌یله‌سوفێ سوێسری (جان جاك روسو) د په‌یڤه‌كا خودا دبێژیت (هنده‌ك كه‌سان و مروڤێن كێم یێن شه‌ریف و پاقژ وده‌ست پاك بده‌نه‌ من ئه‌ز دێ شێم سوپایه‌كێ مه‌زن یێ گه‌نده‌لچی ودزیكه‌ر و نوكه‌ران ژ بن به‌م و ناهێلم ) ئه‌ڤ په‌یڤا زێرین راسته‌ و دجهێ خودایه‌ چونكه‌ د پروسه‌یێن به‌راهیكێ دا لسه‌ر ده‌مێن به‌رخوه‌دان وشوره‌شێن كوردی دا چه‌ند كه‌سانێن كێم شوره‌ش برێڤه‌ دبرن و ئیدارا شوره‌شان دكرن و هه‌می ساخله‌تێن باشیێ و چاكیێ و سه‌ركردایه‌تیێ و دادپه‌روه‌ریێ و جوامێریێ لجه‌م هه‌بون و شووره‌ش ب باشترین شێواز برێڤه‌ دچوو سه‌ره‌رایی وان كێماسیێن لوی سه‌رده‌می هه‌ین. نوكه‌ ره‌وش و پرسێن دی هاتینه‌ گهورین نوكه‌ بویه‌ سه‌رده‌مێ جیهانگیری وزانستی وپێشكه‌فتن و پێشڤه‌چونێ و ملله‌ت هشیار بوینه‌ و خه‌لك بچاڤ كه‌فتیه‌ و گوهێن وانان ڤه‌بوینه‌ و ب زمان كه‌فتینه‌. سیسته‌مێن ل روژهه‌لاتا ناڤه‌راست نیمچه‌ گرتی نه‌ ولێك تێك گه‌هشتن نینه‌ وبیهنا دكتاتوریه‌تێ ژێ دهێت وبتایبه‌ت ل عیراقێ كو چه‌ندین ده‌ستهه‌لاتدار بهێنه‌ گهورین هه‌ر ده‌ستهه‌لاتێ تاكره‌وی ودكتاتوری دهێته‌ په‌یره‌و كرن. پشتی روخیانا رژێما به‌عسا دكتاتورو وه‌رگرتنا ده‌ستهه‌لاتی ل عیراقێ ژلایێ ئه‌وێن بناڤێ ئوپوزسیون هه‌ر ئه‌و سیاسه‌ت هاته‌ په‌یره‌وكرن به‌رامبه‌ر ملله‌تێن عیراقێ و بتایبه‌ت ملله‌تێ كورد، هه‌ر ژ باچه‌چی عه‌لاوی و جعفری و مالكی و پاشان عه‌بادی ژی. یا خویایه‌ كو عیراق بویه‌ ئێك ژ ویلایه‌تێن ئیرانێ و ئه‌ڤێن ده‌ستهه‌لاتێ لێ دكه‌ن بتنێ فه‌رمانبه‌رێن ئیرانی نه‌ و بتنێ بریارێن وان جه بجه دكه‌ن ئه‌ڤ بریارێن ل هه‌یڤا (8/2015) ده‌رچوین بناڤێ چاكسازیێ بتنێ كوده‌تایه‌ك لسه‌ر عیراقیێن سنی وپاشان دژی كوردا و ب پله‌ ئێك ئه‌ڤ بریاره‌ ژ بو دویرئێخستنا كوردایه‌ ژده‌ستهه‌لاتا مه‌ركه‌زی چونكه‌ زور پێزانین د سایت وپه‌یجێن جودا دا به‌لاڤ بوینه‌ كو سه‌روكێ عیراقێ فوئاد مه‌عسومی هایداری یا وی ژڤان بریاران هه‌یه‌ لێ رێككه‌فتنه‌كا نهێنی ل ناڤبه‌را وی وعه‌بادی هه‌یه‌ هه‌ر ل بن چاڤدێریا ئیرانێ كو مالكی بهێلن ل جهێ وی ل دویڤ داخوازا مه‌رجه‌عیه‌تا شیعی و هه‌ر دڤان كاودانا دا تشت تێك هه‌ل دبن و پێكڤه‌ دهێنه‌ گرێدان كو مه‌عسومی ژی داخویانیه‌ك دایه‌ كو نابیت عیراق بهێته‌ پارچه‌ كرن و هه‌ر ل ده‌ست پێكا ڤان بریاران یێن بناڤێ چاكسازیێ عه‌بادی ب ئاشكه‌رایی گوت ئه‌ز ل بن فه‌رمانێن مه‌رجه‌عیه‌تێ مه‌. ئه‌گه‌ر هویرك هویرك سه‌یرا ره‌وشا ده‌ستهه‌لاتێ عیراقێ بكه‌ین و ڤه‌دیتنه‌ك و لێنیرینه‌كێ دروست بكه‌ین ئه‌و داهاتێ زه‌به‌لاحێ عیراقێ كو هه‌یڤانه‌ ب ترلیونان دولارا داهاتێ عیراقێ یه‌ و چ خزمه‌تێن پێش چاڤ بو وه‌لاتیێن عیراقی ناهێنه‌ پێشكێش كرن و وه‌لاتیێن عیراقێ دمه‌ینه‌ت و ده‌رده‌سه‌ری و برس و تێن و بێ كاره‌بیێ دنالن و زێده‌باری خرابیا ره‌وشا ئه‌منی. ل دووڤ زانیاریان كو بنه‌مال و مه‌رجه‌ع و پارت و لایه‌نێن سیاسی ل عیراقا شیعی پروژه‌ و داهاتێ په‌ترولێ ل سه‌ر هه‌ڤدوو پارڤه‌كرینه‌ و لسه‌ر ناڤێ كه‌سان تێنه‌ بناڤ كرن و داهاتێ وی پروژه‌یی ژی بو كه‌سانه‌، ب برینا بودجه‌یی و ب دروستكرنا ئاسته‌نگان و ب دانانا پیلانان نه‌شیانه‌ كوردان وهه‌رێما كوردستانێ بتنێ پیلان دانایه‌ ژ بو خرابكرنا ره‌وشا سیاسی و تێكبرنا ناڤمالا كوردی داكو ژێكڤه‌ ببن وببنه‌ پاریه‌كێ ب ساناهی بو دوژمنان و پشتگریكرن ل هنده‌ك لایه‌نان ودژایه‌تی كرن ل هنده‌ك لایه‌نێن دی و بڤێ چه‌ندی ره‌وشا مه‌ به‌ره‌ڤ ئالوزیێ ڤه‌ بریه‌ وئه‌گه‌رێن مایتێكرنێن ده‌وله‌تێن هه‌رێمی ژی ڤه‌رێژا ڤان ژێك نه‌گرتنانه‌. كارێ چاكسازیان زور باشه‌ و جهێ ده‌ستخوشیێ نه‌ ژهه‌ر لایه‌كی ڤه‌ لێ بێهنا خیانه‌ت و تولڤه‌كرن و ڤاڤارتنان ژێ دهێتن و دێ بڤێ رێكێ كوردان ژ ده‌ستهه‌لاتی دوركه‌ن و ئه‌گه‌ر بهێلم ژی دێ وان كوردان هێلن یێن كو ل به‌ر بلویلا وانان سه‌مایێ دكه‌ن و فه‌رمانێن مه‌رجه‌عیه‌تێ و ماموستایێن خو بجه دئینن. ب بوچونا من ده‌ما به‌حسا ده‌وله‌تبون وجودابونێ دهێته‌ كرن یان پیچه‌ك ره‌وشا كوردان به‌ره‌ڤ ئارامیێ ڤه‌ دچیت ئێكسه‌ر پیلانه‌ك دهێته‌ دارێشتن و ئارێشه‌كی بو هه‌رێما كوردستانێ و ملله‌تێ كورد دروست دكه‌ن، ئه‌ڤجا ئه‌ڤا عه‌بادی كری وه‌سا دیاربویه‌ كو تولڤه‌كرن و دویركرنا كوردا و گه‌له‌ك لایه‌ن و كه‌سانێن دی نه‌ ژده‌ستهه‌لاتی. ل داویێ بلا كورد ده‌ستێن خو بكه‌نه‌ د ناڤ ده‌ستێن هه‌ڤدا و كوردستانێ ژ دوژمنان پارێزن بلا كه‌یفا دوژمنان ب پروسا مه‌ یا جوان نه‌هێت و به‌ره‌ف ده‌ستكه‌فت ئارمانجێن مه‌زنتر.

ره‌وش به‌ر ب وێ چه‌ندێ ڤه‌ دچیت كو رۆژهه‌لاتا ناڤه‌راست یا ژێكڤه‌ دبیت و سایكس پیكۆیه‌كا دی دروست ببیت و چه‌ندین وه‌لاتێن دی ببنه‌ ئه‌ندامێن نوو د جڤاكێ نێڤده‌وله‌تی دا. ل ده‌مێن پێداچوونان ل لاپه‌رێن دیرۆكێ بكه‌ین و فه‌رهه‌نگا مێژویا جیهانێ ببینین دێ زۆر تشتێن سه‌یر و نه‌ دادپه‌روه‌رانه‌ بۆ مه‌ دیار بن و ئه‌و لایه‌ن و جهێن بووینه‌ قوربانی به‌رژه‌وه‌ندیێن تایبه‌ت هێنه‌ پێشچاڤ و زۆر جاران ژی نه‌خشه‌ و ستراتیجیه‌ت هاتیه‌ گوهۆرین ژ بۆ جێبه‌جێكرنا به‌رژه‌وه‌ندیێن هنده‌ك لایه‌نان. بۆ نموونه‌ (د. جێرمی سۆلت) د پرتووكا خوه‌ دا یا ب ناڤێ (تفتیت الشرق الاوسگ)دبێژیت, ل وه‌لاتێ ل ناڤبه‌را هه‌ردو ریباران دا ده‌وله‌ته‌كا نوو هاتیه‌چێكرن و ل ده‌مێ ل چه‌رخێ (16) به‌غدا هاتیه‌ ستاندن ل وی ده‌می ده‌ڤه‌ر یا دابه‌شكری بوو وه‌كو پارێزگه‌هێن ئوسمانی ئانكو (ویلایه‌ت) و ئه‌ردێ بوویه‌ عیراق زۆر كۆمێن مرۆڤان ژ هۆز وملله‌ت و نه‌ته‌وه‌ و ئایینان لێ دژیان و ئه‌ڤ پێكڤه‌ هاتنه‌ گرێدانه‌ ژبه‌ر گازێ بوو ئه‌گه‌ر نه‌ چ رامان ومانه‌ نه‌بوون بۆ گرێدانا ڤان ده‌ڤه‌ر و مرۆڤان. بیرێن گازێ ب سه‌ركه‌فتیانه‌ ل ده‌ڤه‌رێن كه‌ركووك ل سالا (1927) هاتنه‌ كۆلان و گاز هاته‌ ده‌رخستن و ڤه‌گوهاستن ب بۆرییان بۆ فه‌له‌ستین و سووریێ و به‌رهه‌مئینانا گازێ به‌رفره‌ه بوو هه‌تاكو به‌سرا و مووسل ژی ڤه‌گرتی و پتر حه‌ز و ڤیانا دوژمنان ل سه‌ر ده‌ڤه‌رێن كوردان زێده‌ بوو و ئه‌و مرۆڤێن ل سه‌ر ڤی یه‌ده‌كێ مه‌زنێ گازێ ل ناڤبه‌را هه‌ردو رووباران دژیان ئه‌و تێكه‌له‌یه‌كێ ئایینی و نه‌ته‌وه‌یی و هۆزاتی بوون و ژ بوسلمانێن سونی و كورد و عه‌ره‌ب و توركمان و كریستیان و هه‌می ئایینێن جودا و كێمه‌ نه‌ته‌وه‌ و هۆز بوون. هه‌روه‌سا ئێزیدی و جوهی و هنده‌ك ژ كوردێن شیعی و مه‌زهه‌بێن جودا بوون. هه‌ر ژ كه‌ڤندا دا مووسل و كه‌ركووك و ده‌ڤه‌رێن دی یێن كوردانه‌ لێ ژێ هاتینه‌ ستاندن. سه‌باره‌ت كوردان مووسل و كه‌ركووك و ده‌ڤه‌رێن دی ب مولكێ خوه‌ دزانن و ب تایبه‌ت كه‌ركووك پشكه‌كا نه‌ژێكڤه‌كری یه‌ ژ وه‌لاتێ مێژویێ كوردان ئه‌وێ كو رۆژه‌كێ ژ رۆژان هه‌ر دێ هێته‌ ب سه‌ر ده‌وله‌تا كوردسانێ یا سه‌رتاسه‌ری و سه‌ربه‌خوه‌ ڤه‌. ئانكو وه‌كو ل سه‌ری مه‌ ئاماژه‌ پێ كری و ل دووڤ بۆیه‌رێن ده‌ڤه‌رێ و ب تایبه‌ت ل رۆژهه‌لاتا ناڤه‌راست بۆیه‌ر پتر گه‌رم بووینه‌ و نوكه‌ گه‌رمتر لێ هاتینه‌ و ئه‌و ژێده‌رێن كو به‌حسا چێكرنا چه‌ندین ده‌وله‌تان كری ل رۆژهه‌لاتا ناڤین نوكه‌ نیشانێن وێ چه‌ندێ دیار دبن و ل دووڤ وی نه‌خشه‌یێ ل سالێن بۆری ژ په‌نتاگۆنا ئه‌مریكی ده‌ركه‌فتی كو تێدا عیراق ببیته‌ سێ زۆن ئه‌و ژی زۆنا كوردی و شیعی و سنی و پشتی په‌یدابوونا شه‌ڕێن گران ل ده‌ڤه‌را سونی و كوردان ل عیراقێ ئه‌ڤه‌ وێ چه‌ندێ دسه‌لمینیت كو ده‌م نێزیكه‌ ژ بۆ ژێكڤه‌بوونێ. هه‌روه‌سا داخویانیێن مه‌زنه‌ به‌رپرسێن وه‌لاتێن مه‌زن مینا ئه‌مریكا و بولگاریا و ئه‌لمانیا و فره‌نسا و توركیا ل سه‌ر دامه‌زراندنا ده‌وله‌تا كوردی كو ل (22/5/2015) سه‌رۆكێ تركیا ب ئاشكه‌رایی بۆ میدیایا جیهانی گۆت ئه‌م نه‌ دژی دامه‌زراندنا ده‌وله‌تا كوردینه‌ نه‌مازه‌ پشتی بزاڤێن بارزانی یێن بێ راوه‌ستیان ژبۆ راگه‌هاندنا سه‌رخوه‌بوونێ و وێ پێشوازیا ل جه‌نابێ وی دئێته‌كرن وه‌كو سه‌رۆك ده‌وله‌ت نه‌ سه‌رۆكێ هه‌رێمه‌كێ و بلندكرنا ئالایێ پیرۆزێ كوردستانێ. دیسا ل یه‌مه‌نێ و په‌یدابوون و گرتنا ده‌ستهه‌لاتێ ژ لایێ حوسییان ڤه‌ و هێرشێن سعوودیێ ئه‌ڤه‌ ژی گرۆڤه‌كێ ب هێزه‌ بۆ ژێكڤه‌بوونێ، دیسا ل ده‌ڤه‌رێن سووریێ، تركیا، ئیرانێ، لیبیا و لبنانێ بۆیه‌ر غاردانێ دكه‌ن و ب له‌زتر لێ هاتینه‌ و به‌ر ب ژێكڤه‌بوونێن رۆژهه‌لاتا ناڤینن, هه‌ر دیسا ل هه‌می ده‌ڤه‌ر و جهان ژێك نه‌گرتنێن مه‌زهه‌بی و ئاینی و نه‌ته‌وه‌یی و ده‌ڤه‌ری سه‌رێ خوه‌ هه‌لدایه‌. دیسا سونی و شیعی و سابئه‌وعه‌له‌وی و جه‌ركه‌س و درۆز و كریستیان و ئیزدی و بسلمان و هتد. ب هه‌ڤدو ڤه‌ ماینه‌ و هه‌می داخوازا مافێن خوه‌ یێن نه‌ته‌وه‌یی و ئایینی و مه‌زهه‌بی دكه‌ن. چاوا مه‌ به‌حسكر كو مووسل كه‌فته‌ ب سه‌ر عیراقێ ڤه‌ و بوویه‌ تشته‌كێ ئاسایی نوكه‌ ئاسانتره‌ كو ڤان ده‌ڤه‌ران ژێكڤه‌بكه‌ن و سه‌رخوه‌بوونێ بده‌نی ل دووڤ رێكه‌فتنامه‌كا نێڤده‌وله‌تی, هه‌می ملله‌ت و نه‌ته‌وه‌ و ئایین و مه‌زهه‌ب ب مافێن خوه‌ شاد ببن، ژ لایه‌كێ دی ڤه‌ به‌رژه‌وه‌ندیێن وه‌لاتێن زلهێز ژی ل رۆژهه‌لاتا ناڤین دێ بده‌ستڤه‌ئێن، چونكو جڤاكێ نێڤده‌وله‌تی و وه‌لاتێن زلهێز گرنگیا رۆژهه‌لاتا ناڤین دزانن و ئه‌و هه‌می مفا و سامان و ئایندێ د ڤێ ده‌ڤه‌رێ دا هه‌یی ژ هه‌می ئالیان ڤه‌. ل داویێ دخوازین ئومێد و خه‌ونا ملله‌تێ كورد بهێته‌ بجهكرن و ئه‌و سته‌ما ب درێژاهیا سالان ل كوردان هاتیه‌ كرن و بێ به‌هریا وانان ژ كێمترین مافێن وان كو ببنه‌ وه‌لاتیێن ده‌وله‌ته‌كا سه‌ربه‌خوه‌ و هه‌ست ب وه‌لاتیبوونێ بكه‌ن و كورد ژی ببنه‌ خودان ده‌وله‌ته‌كا سه‌ربه‌خوه‌ خودان ئالایه‌ك تایبه‌ت كو ل ناڤه‌ندێن جیهانێ بهیته‌ بلندكرن و دانپێدان پێ بهێته‌كرن.

بزاڤێن ئیرانێ یێن به‌رده‌وام ژ بۆ چێكرنا هیلالێ خوه‌ یێ شیعی و به‌رفه‌رهكرنا ده‌ستهه‌لاتا خوه‌ ل ده‌ڤه‌رێ ل سه‌ر بنه‌مایێن مه‌زهه‌بی ب تایبه‌ت ل ده‌ڤه‌را رۆژهه‌لاتا ناڤه‌راست، ل ده‌مێ دیمه‌نێن وه‌لاتێ یه‌مه‌نی دبینی دێ سه‌رسورمان مینی، چونكو بزاڤه‌كا سه‌یر و یا مه‌زن هه‌یه‌ ژ لایێ حوسێن یه‌مه‌نێ ڤه‌ و ئه‌ڤ بزاڤا سه‌یر و مه‌زن هاته‌ گوهۆرین ژ بزاڤه‌كا تیۆری و هزری بۆ بزاڤه‌كا له‌شكری و چه‌كدار و شه‌ركه‌ڕ و ل به‌ر سینگێ ده‌ستهه‌لات و سه‌ركرداتیا یه‌مه‌نێ رابوو و زێده‌گاڤی ل سه‌ر ده‌ستهه‌لاتێ كرن و ده‌زگه‌ه و پارچه‌كا مه‌زن ژ وه‌لاتێ یه‌مه‌نێ داگیركرن و ده‌ستهه‌لاتا خوه‌ ل وان ده‌زگه‌ه و ده‌ڤه‌ران گێرا و ئه‌ڤه‌ ل ناڤبه‌را شه‌ڤه‌ك و رۆژه‌كێ دا په‌یدا نه‌بوویه‌ن لێ ئه‌ڤ كاره‌ ب پێنگاڤ و قووناغێن درێژ و پێشده‌م هاتینه‌ ئه‌نجامدان و كار ل سه‌ر هاتیه‌ كرن د ده‌مێ پتر ژ (30) سالان و بتایبه‌ت ل ده‌مێ سه‌ركه‌فتنا شۆره‌شا ئیرانێ ب سه‌ركێشیا خومه‌ینی و خودانێن عه‌ماما چونكو ژ گرنگترین ئارمانجێن وانان هنارتنا تیۆر و هزرێن شیعی بۆ ده‌رڤه‌یی ئیرانێ و ب تایبه‌ت ل وه‌لاتێن رێژا شیعا هه‌یی و ل ناڤ وان وه‌لاتان یه‌مه‌نێ ژی رێژه‌كا باش یا شیعان لێ هه‌یه‌. ئیرانێ ب هه‌می شیانێن خوه‌ كار كر ژبۆ شیعه‌كرنا وه‌لاتێن ده‌ڤه‌رێ و یێن هه‌رێمی و وه‌لاتێن ئیسلامی و شیان هه‌تا راده‌یه‌كێ به‌رچاڤ تێكدانا پێكڤه‌مانا ئایدیۆلۆجی یا گه‌ل و شیعێن یه‌مه‌نێ بكه‌ن شیعه‌یێن یه‌مه‌نێ (زه‌یدیه‌) و هێدی هێدی وانان كار كر و حۆسی كرنه‌ ئه‌نیه‌كا ب هێز یا له‌شكری دا كو ب تنێ بۆ به‌رژه‌وه‌ندیێن ئیرانێ كار بكه‌ت و ل سه‌ر ڤی بنه‌مایێ ئیرانێ ژ هه‌می ئالیان ڤه‌ هاریكاریا حوسیان ل یه‌مه‌نێ پتر كر و ژ هه‌می ئالینان ڤه‌ ئالیێ سیاسی و دراڤی و له‌شكری و لۆجستی وهتد. هاریكاریا ب هێز یا ئیرانێ بۆ حوسییان یا پێشچاڤ بوویه‌ نه‌یا ڤه‌شارتی یه‌، هه‌روه‌سا دلسۆزی و وه‌فاداریا حوسیان ژی بۆ ئیرانێ یا ئاشكه‌را و پێشچاڤ بوو، ئه‌و بوو حوسیان ب فه‌رمانێن ئیرانێ كار دكر وخالا وێ چه‌ندێ دیار دكه‌ت كوحوسیان داخواز ژ حوكمه‌تا یه‌مه‌نێ كرن كو هنده‌ك به‌رژه‌وه‌ندیێن ئیرانێ ل یه‌مه‌نێ جه بجه بكه‌ن به‌رامبه‌ر هنده‌ك دۆزێن دی كو حوسی خوه‌ ل سه‌ر بێ ده‌نگ بكه‌ن، هه‌روه‌سا حوسیان داخواز ژحوكمه‌تا یه‌مه‌نێ كر كو وان كه‌ساتیێن ئیرانی به‌رده‌ن یێن گرتی ل جه‌م وه‌زاره‌تا به‌رگریا یه‌مه‌نێ و ئه‌گه‌ر نه‌ گه‌فێن مه‌زن ل حوكمه‌تا خوه‌ كرن. ئه‌ڤ هاریكاریا مه‌زن یا ئیرانێ بۆ حوسیێن یه‌مه‌نێ ب تنێ ژبه‌ر وێ چه‌ندێ یه‌ كو ئیران دزانیت رۆلێ گرنگێ حوسیان ژبۆ گه‌فكرنا ئاسایشا وه‌لاتێن خه‌لیجی و ب تایبه‌ت سعوودیێ و ئه‌ڤ رۆله‌ یێ سه‌ره‌كی یه‌ ل جه‌م سه‌ركردێن ئیرانێ ژ بۆ هه‌لكرنا ئاگری ل وه‌لاتێن عه‌ره‌بی و خه‌لیجی و هاندانا شیعێن وان وه‌لاتان ژ بۆ نه‌هێلانا حوكمرانیا سونیان و گوهۆرینا وان حوكمرانان ب شیعی یا و ئیران شیایه‌ هه‌تا نوكه‌ ده‌ستهه‌لاتێ خوه‌ ب هێز بێخیت ل سووری و عیراق و لبنان و یه‌مه‌ن و نوكه‌ یا كاردكه‌ت ب هه‌می رێیان ژبۆ به‌رفه‌رهكرنا ده‌ستهه‌لاتا خوه‌ بۆ به‌حرین و سعوودیه‌ ژی وب دیتنا وانان ئه‌گه‌ر شیان كونترۆلێ سعودیێ ژی بێخیته‌ د ده‌ستێن خوه‌دا ئه‌ڤه‌ شیان وه‌لاتێن خه‌لیجی هه‌میان كونترۆل بكه‌ن، ل به‌رامبه‌ر ڤێ چه‌ندێ سعوودیه‌ ژی هه‌ستیاریا ره‌وشا نوكه‌ دزانیت له‌وما رابوون ب هێرشكرنا حوسیان ل یه‌مه‌نێ ل (26/3/2015) و چێكرنا هێزه‌كا له‌شكری یا عه‌ره‌بی یا ئێك گرتی ژبۆ نه‌هێلانا ناڤێ حوسیان ل یه‌مه‌نێ. ئیران ل سه‌ر دو به‌ره‌یان كاردكه‌ت ئه‌و ژی به‌ره‌یێ شیعێن ل سعوودی و به‌ره‌یێ دوویێ ل سه‌ر وان شیعێن یه‌مه‌نی یێن ل سه‌ر هێلا سنۆری ل ناڤبه‌را سعوودیێ و یه‌مه‌نێ و ژبه‌ر ڤێ چه‌ندێ ئیران هاریكاری و پشته‌ڤانیا حوسیێن یه‌مه‌نێ دكه‌ت، چونكو سعوودیه‌ هاریكاریا ملله‌تێ سووری دكه‌ت ل دژی خوینمێژ به‌شار ئه‌سه‌دی، داكو ئیران بۆ سعوودیێ دیار بكه‌ت كو گڤاشتنێن خوه‌ ل سه‌ر رژێما ئه‌سه‌دی سست بكه‌ت و ئه‌گه‌ر نه‌ ئه‌ڤه‌ حوسیێن یه‌مه‌نێ گه‌فه‌ ل سه‌ر هه‌وه‌. ل داویێ دبێژم ئیران یا ل سه‌ر چه‌ندین ئه‌نیا شه‌ڕی دكه‌ت و حه‌ز و بلند بینیێن ئیرانێ زۆر زێده‌بووینه‌ و یا ده‌ڤه‌را به‌ره‌یێن شه‌ڕێ خوه‌ زێده‌ دكه‌ت و هه‌ولدده‌ت به‌ر ب ومتی ڤه‌ بچیت، لێ هه‌می ده‌ما با وه‌كی حه‌زێن كه‌سۆكی ناهێت و زۆر جاران ژی مرۆڤ بخوه‌ دكه‌ڤیته‌ د وێ بیرێ دا یا مرۆڤی بۆ هنده‌ك كه‌سان كو لایی و ب بۆچوونا من دێ ئیران ژی كه‌ڤیته‌ د نه‌هاله‌كا كوی ردا چونكو یا مایی تێكرنا د هه‌می واران دا دكه‌ت.

چه‌ندین سال بوورین ده‌ستهه‌لاتدارێن عیراقێ سیاسه‌ته‌كا شاش به‌رامبه‌ر ملله‌تێ كورد په‌یره‌و دكه‌ن و ب هه‌می ره‌نگێن جودا وه‌سا هزر بۆ وانان په‌یدا بوویه‌ كو ب چ ره‌نگان نه‌شیانه‌ مه‌، رابوون كاركرن كو پرسێن مه‌زهه‌بی و تائیفی تێكه‌لی ملله‌تێ كورد كرن و ژێك دووربوونه‌ك خسته‌ ل ناڤبه‌را پارت و لایه‌نێن كوردستانی و پرسا شیعیه‌ت و سنیه‌تێ و شیان لایه‌نه‌كێ كوردستانی یێ به‌رنیاس بكه‌نه‌ دبن چه‌نگێ خوه‌ڤه‌ و ده‌ڤه‌رێن كوردستانی مینا جه‌له‌ولا و سه‌عدیه‌ بێخنه‌ بن كونترۆلا میلیشاتێن شیعی و ل شوونا ژ بن حه‌شدا شعبی یا سنی و داعشێن تیرۆرست ده‌رخستی كه‌فته‌ ژێر كونترۆل و ده‌ستهه‌لاتا شیعێن توندره‌و كو هه‌تا نوكه‌ ژی ناهێلن پێشمه‌رگه‌ و خه‌لكێ ده‌ڤه‌رێ ژی بچنه‌ ناڤ وان ده‌ڤه‌ران.
ئه‌رێ هه‌كه‌ ئه‌ڤه‌ پیلان نه‌بیت ما بۆچی به‌رێ حه‌شدا شعبی یا شیعی و سنی ناده‌نه‌ ده‌ڤه‌رێن عه‌ره‌بنشین و شیعه‌ و سنه‌نشین ئه‌رێ ما هه‌تاكه‌نگی دێ كورد و ب تایبه‌ت هنده‌ك لایه‌ن و پارت نوكه‌ری و دووڤه‌لانكیێ بۆ دوژمنان كه‌ن ئه‌رێ بۆچی وان ده‌ڤه‌ر و ئه‌ردێ ملله‌تێ كورد ب درێژاهیا مێژویێ و ب ده‌هان شۆره‌ش و به‌رخودانان و ب خوینا هزاره‌ها شه‌هیدان دێ ب ساناهی و بێ شه‌ڕ راده‌ستی دوژمنان كه‌ین و ب تایبه‌ت دوژمنێن توندره‌و و توخمپه‌رێس. ئه‌رێ دێ هه‌تا كه‌نگی هزركه‌ین كو دێ ره‌وشا كوردان ل عیراقێ باش بیت و ب ئارامی و خۆشی بژین چونكو ل سه‌رده‌مێن كه‌ڤن سونیان ده‌ستهه‌لات دكر سته‌م ل ملله‌تێ كورد دكر و نوكه‌ شیعه‌ حوكمرانن هه‌ر پتر یێ سته‌مێ ل ملله‌تێ مه‌ دكه‌ن. ئه‌رێ ما حوكمه‌تا مالكی پاشی یا عه‌بادی كو رۆژانه‌ دو ملیۆن و نیڤ به‌رمیلێن گازێ دفرۆشن و ژبلی داهاتێن دی ل عیراقێ نه‌شێن سوپایه‌كێ ب هێز و ئێكگرتی دروست بكه‌ن یان ژی ئێمناهیێ ل عیراقێ به‌رپا بكه‌ن به‌لێ دشێن لێ ناكه‌ن چونكو نه‌خودانێن بریارێ نه‌ بریار ل ده‌رڤه‌ بۆ دهێن و ل عیراقێ ب تنێ جه بجهكرنا بریارانه‌. نوكه‌ ل به‌رمه‌ یا ئاشكه‌رایه‌ ئه‌ڤا ل عیراقێ دهێته‌ كرن ب تنێ پیلانه‌كه‌ دژی كوردان و مه‌ره‌م ب تنێ نه‌هێلان و ژناڤبرنا كوردایه‌ و ئه‌گه‌ر نه‌ ملله‌تێ كورد و سه‌ركرداتیا كوردستانێ یێن دبێژن وه‌رنه‌ دستووری و دستوور و قانوون چ دبێژن ئه‌م ب وێ چه‌ندێ درازی نه‌. ل داویێ دبێژمه‌ پارت و لایه‌نێن كوردستانێ كو ده‌ستێن خوه‌ بكه‌نه‌ د ناڤ ده‌ستێن هه‌ڤ دا و سه‌نگه‌رێن خوه‌ بكه‌نه‌ ئێك سه‌نگه‌ر و په‌یامێن خوه‌ بكه‌نه‌ ئێك په‌یام و ده‌ستان ژ ژێكنه‌گرتنێن خوه‌ به‌رده‌ن و بلا هه‌ر ل هزرا هه‌وه‌ بیت دوژمنێن مه‌ هه‌ر ئێكه‌ چ سه‌فه‌وی بیت یا عوسمانی و پێكڤه‌ كار بكه‌ن داكو ئه‌ڤا مه‌ هه‌یی بۆ مه‌ بمینیت و كورد بگه‌هنه‌ ماف و ئارمانجێن خوه‌.

ل زۆر داموده‌زگایێن میدیایێ و ل ئۆرگانێن پارتێن سیاسی و ئیسلامی ئه‌م داخوه‌یانیێن هنده‌ك ژ به‌رپرس و شاره‌زایا، هه‌روه‌سا خه‌لكه‌كی دبینین و داخویانیان دده‌ن و دبێژن كو سالا(2014) سه‌خترین و نه‌خۆشترین سال بوو بۆ ملله‌تێ كورد كو تێدا و هه‌ر ل ده‌سپێكا سالێ بودجا هه‌رێمێ هاته‌ برین و مووچێن فه‌رمانبه‌ر و كارمه‌ند و هه‌ژاران ژی هاتنه‌ بڕین و پروۆه‌ هاتنه‌ راوه‌ستاندن و كار مانه‌ نیڤه‌رۆ و روه‌شا هه‌رێما كوردستانێ یا ئابووری هاته‌ شێلیكرن و چاڤێن مالكی و هه‌ڤكار و پالده‌رێن وی و چه‌ند هێز و وه‌لاتێن هه‌رێمی ب هه‌رێما كوردستانێ نه‌ رابوون ب وێ پێشكه‌فتن و سه‌ركه‌فتن و ده‌ستكه‌فتان یێن كو ملله‌تێ كورد بده‌ستخوه‌ڤه‌ ئیناین, وان وه‌سا هزردكر كو ملله‌تێ كورد دێ خوه‌ راده‌ستی مالكی و ئه‌وێ ئه‌و پێ دخوریت كه‌ت و دێ راده‌ستی ئیرادا چه‌ند كه‌سه‌ك و نه‌حه‌زه‌كا بن یێن كو ئه‌و پێشنیاز بۆ مالكی كری و ب راستی چ قانوون و شریعه‌ت و ماف نینن كو پاریێ ده‌ڤێ هه‌زار و به‌له‌نگاز وبێ گونه‌ه و سڤیلا ببڕن پێخه‌مه‌ت به‌رژه‌وه‌ندیێن چه‌ند لایه‌نه‌كێن كیم و یا دیار بوو بێهنا خیانه‌ت و نه‌دادپه‌روه‌ریێ ژ دوور ڤه‌ دهات. بێهنا وان دوژمن و هۆڤان ب ڤێ چه‌ندێ ژی نه‌هات و شكه‌ستن ل به‌رامبه‌ر ڤێ پیلانێ ئینان، هه‌ر ئه‌و ده‌ستوداربوون و ب رێكه‌فتنه‌كا نهێنی و كاره‌كێ بازرگانی و تۆلڤه‌كرنه‌كێ به‌رێ ترسناكترین و هۆڤترین رێكخراوا تیرۆرستی ل جیهانێ دایه‌ كوردستانێ و ب هێزترین و به‌رفره‌هترین و مه‌زنترین هێز هێرش كرنه‌ سه‌ر كوردستانێ و ئه‌ردێ كوردان داگیركرن مینا بابكالكێن خوه‌ دوباره‌ ئه‌ردێ پیرۆزێ كوردستانێ داگیركرن و ب سه‌دان خه‌لكێ كورد یێ بوسلمان و ئێزدی و كریستیان و شیعی و سونی كوشتن و مالێن وان تالان كرن و هه‌ر چه‌ندی بێژین كێمه‌ ژ وێ زولم و سته‌ما ل خه‌لكێ مه‌ هاتیه‌ كرن. لێ ب باوه‌ریا پیلایی یا خه‌لكێ مه‌ و ب هێزا مه‌زنا پێشمه‌رگێن قه‌هره‌مان ئه‌ڤ پیلانا وانان ژی هاته‌ شكاندن و روو ره‌ش و شه‌رمزاربوون و دوباره‌ ئه‌و راته‌قاندن، ئه‌و ئه‌ردێ داگیركری هاته‌ زڤراندن ب تنێ رێژه‌كا كێم مایه‌. ل ڤێره‌ من دڤێت ئاماژێ ب مانشێتێ بابه‌تێ خوه‌ بده‌م كو دبیت ل ده‌مێ دهێته‌ خواندن، سه‌یر بیت لێ مه‌ره‌ما من ئه‌وه‌ كو زۆر كێماسی مه‌ هه‌نه‌ و ئه‌م وه‌كو ملله‌تێ كورد و حوكمه‌تا هه‌رێما كوردستانێ و هه‌می لایه‌ن و پارتێن كوردستانێ كو هێشتا دوژمنێن مه‌ دزۆرن و هه‌ر یێ پیلانان بۆ مه‌ ددانن و بلا ئه‌م ده‌ستێن خوه‌ بكه‌ینه‌ د ناڤ ده‌ستێن هه‌ڤ دا و بلا ئه‌م سیاسه‌ته‌ك و سیسته‌مه‌كێ دی په‌یره‌و بكه‌ین یێ نوو ژ خه‌رجكرن و ئیداره‌كرن و دامه‌زراندنێ و دانان و ئه‌نجامدانا پرۆژان و كه‌سانێن ماندوو بووی ژبیر نه‌كه‌ین و ئابووره‌كێ بهێز دانین و كارگه‌ه و كۆمپانیان بدامه‌زرینین و یێن خودان شیان و هه‌ژی دانینه‌ جهێن ژ هه‌ژی و یێن خودانێن به‌رژه‌وه‌ندیێن تایبه‌ت دووربێخین و داموده‌زگه‌هێن خوه‌ ب هێز بێخین و هاریكاریا خودان شیانان بكه‌ین و خزمه‌تا ملله‌تێ خوه‌ بكه‌ین دووربین ژمرۆڤكانێ و گرۆپ و گرۆپانێ و مالێ گشتی ب دادپه‌روه‌رانه‌ بهێته‌ دابه‌شكرن و ب كێمێ رازی بین و نه‌مینینه‌ ب پله‌ و ڤله‌ و كه‌لهه‌ و كۆمپانی و پرۆژێن تایبه‌ت ڤه‌ و خه‌لك بهێته‌ ژبیركرن. هێزه‌كا پێشمه‌رگه‌یی یا سه‌رتاسه‌ری بهێته‌ دروستكرن و ئه‌ڤا هه‌یی بهێته‌ لێكدان و هێزه‌كا یاسایی و راست و دروست بهێته‌ دامه‌زراندن و باوه‌ری بۆ خه‌لكێ مه‌ دروست ببیت. هه‌ر وه‌لاته‌ك و ملله‌ته‌كێ مایه‌ ب پله‌ و مال و قه‌سران ڤه‌ دوم نه‌كریه‌. له‌وما دبێژم سالا(2014) ساله‌كا پیرۆز بوو بۆ كوردان و ب تایبه‌ت ل هه‌رێما كوردستانێ داكو پێداچوونه‌كێ د سیاسه‌ت و به‌رنامێ خوه‌ بكه‌ین و پێداچوونه‌كێ ل ره‌خو روویێن خوه‌ بكه‌ین و پێداچوونه‌كێ د سیسته‌مێ خوه‌ دا بكه‌ین دا كو بشیێن پتر خزمه‌تا ملله‌تێ كورد بكه‌ین و بگه‌هیته‌ كنارێن ئێمن