مخابنى رۆژنامه‌ڤانا وه‌ك (نێچیره‌كا) ئاسان بۆ تیرۆرێ و روودانه‌كا پرى ده‌نگ ڤه‌دان بۆ گه‌له‌گ مه‌ره‌ما و گه‌له‌ك ئالى بكاردئینن، تیرۆركرنا رۆژنامه‌ڤانا ئاسانترین كاره‌ و پڕ ده‌نگترین روودانه‌، ئه‌ڤه‌ چه‌ندین روودان ب ڤى ره‌نگى ل كوردستانێ روودان و هه‌مى روودانێن كه‌یسێ وان تیرۆركرنا رۆژانه‌ڤانا بیت باده‌كێن وان ب (دژى مه‌جهولا)دهێنه‌ ڤه‌كرن و سازسێن ئاسایشێ وه‌ك پێدڤى رۆنكرن بۆ نه‌بووینه‌ یان ب مژدارى هنده‌ك داخویانى داینه‌، لێ ژڤێ تاوانێ ئاسانتر ئه‌وه‌ مرۆڤ زوو ئالیه‌كێ پێ تاوان بار بكه‌ت، ئاشكراتر بێژم ل زونا زه‌ر هه‌ر كه‌سێ بهێته‌ تیرۆركرن، زوو خه‌لكه‌ك ئاشكرا پارتى تاوانبار دكه‌ت، ب كوشتنا رۆژنامه‌ڤانا، ئه‌م زوو ئێكودو تۆمه‌تبار دكه‌ین بێ ئه‌م بیرا تیرۆرستان ب خوه‌ بكه‌ین؟! یان بیرا وى ئالى بكه‌ین یێ ژ تیرۆركرنا رۆژنامه‌ڤانه‌كى قازانجێ بینیت، پارتى ل گۆر فه‌لسه‌فا خوه‌یا رۆن و ئاشكرا ب هه‌مى ره‌نگى دژى تیرۆرێ یه‌ وه‌ك هزر وه‌ك ئامراز وه‌ك ئارمانج، لێ بۆچى ئه‌ڤ روودانه‌ ل زونا زه‌ر په‌یدا دبن؟! بۆچى هنده‌ك كه‌یس ماینه‌ هه‌لاویستى، بۆچى داخویانیێن فه‌رمى نینن، بۆچى به‌لگێن پێدڤى به‌لاڤ نابن؟! پارتى د (70) سالێن ژیانا سیاسى دا ل عیراقێ و كوردستانێ و هیج قووناغه‌كێ د لاوازترین قووناغ دا پارتى باوه‌رى ب تیرۆرا سیاسى نینه‌، وه‌ك ئالاڤه‌كێ شه‌رى بكار نه‌ئینایه‌ سه‌خمه‌راتى هندێ دهێته‌ گۆتن هیچ به‌لگه‌یه‌كێ جهێ باوه‌ریێ ل به‌رده‌ست نینه‌ پارتى وه‌ك (حزب) و به‌رنامه‌ كاره‌كێ تیرۆرێ ئه‌نجام دابیت، ئه‌و كه‌سێ شیانێن پارتى ب زانیت د كه‌ڤن و نوو دا دێ زانیت پارتى چه‌ند شیان هه‌بووینه‌ و هه‌نه‌، لێ بیرۆكا تیرۆرا سیاسى بیروكه‌كا (حه‌رامه‌) د فه‌لسه‌فا پارتى دا، لێ ئه‌ڤه‌ وێ چه‌ندێ دیار ناكه‌ت كه‌سه‌ك (پارتى) كاره‌ك خوه‌سه‌ر ئه‌نجام نه‌دا بیت؟! پارتى تووشى شه‌رمه‌كێ یان (ئیحراجه‌كێ) نه‌كربیت، روودانێن تیرۆرا سیاسى ل سه‌رده‌مێ شۆره‌شێ قه‌ده‌غه‌ بوون. ل سه‌رده‌مێ شه‌رێ ناڤخۆیی ژى نه‌هاتینه‌ كرن وه‌ك ئالاڤه‌كێ سه‌ره‌كیێ شه‌رى، دبیت هنده‌ك روودان هه‌بن، لێ دڤه‌قه‌تیاى و بێ بها بووینه‌ ل سه‌ر ئه‌نجامێن خوه‌، پارتى وه‌ك پێدڤى دڤیا نوكه‌ هێزا كاریگه‌را خوه‌ ل سه‌ر سازیێن (ئه‌منى) ل ده‌ڤه‌را خوه‌ گرانتر بكه‌ت بۆ ئاشكراكرنا تاوانبارێن كو سه‌رجه‌مێ كوردستانێ تووشى (شه‌رم و ئیحراجێ) كرى ب تیرۆركرنا رۆژنامه‌ڤانه‌نان. رۆژنامه‌ڤان سامانه‌كێ نه‌ته‌وه‌یى نه‌ بۆ هه‌ر مله‌ته‌كى و شاهد و دیده‌ڤانێن راستیێ نه‌، باوره‌ریا مه‌ ب سازیێن (ئه‌منى) ل دهۆكێ هه‌یه‌ كو تاوانبارێن روودانا تیرۆركرنا رۆژمامه‌ڤان (وه‌داد حسێن) بده‌نه‌ دادگه‌هێ و ژینگه‌ها سیاسى بۆ كارێ میدیاگه‌ریێ ل دهۆكێ ژینگه‌هه‌كا ل بار و گونجایا كاركرنێ بیت، تۆمه‌تباركرنا ئالیه‌كى وه‌ك حزب و سازى بیچه‌كێ ژ تاوانا تیرۆرێ كێمتر تاوانه‌، ده‌ستهه‌لاتا ده‌ڤه‌رێ نه‌چاره‌ ب زووترین ده‌م ڤێ روودانێ ئاشكرا بكه‌ت و كوردستانێ ژ ڤێ (ئیحراجا) تێكه‌تى و ناڤوده‌نگیا پارتى و كوردستانێ خلاس بكه‌ن.

ژمێژه‌ سه‌رۆك بارزانى ل گه‌له‌ك هه‌لكه‌فتنا دگۆت (پارتى وى درووشمى رادكه‌ت ئه‌وێ بشێت ببه‌ته‌ سه‌رى) وه‌ك دیاره‌ بارزانى ڤێ جارێ ب مجدى درووشمه‌ك راكریه‌ كو ئومێدا پرانیا شۆره‌ش و سه‌رهلدان و یاخیبونێن كوردان بوویه‌، پرۆژێ ده‌وله‌تبوونێ بێگومان یا ئاسان نینه‌ درووشمه‌ك ب ڤى قه‌بارێ مه‌زن بگه‌هیته‌ كه‌نارێ ئارامیێ بێ قوربانى، چ قوربانسێن گیانى بن یان قوربانسێن سیاسى بن، پارتى حزبا بارزانی یه‌ و حزبا ئێكێ یه‌ ل كوردستانێ و سه‌ربۆره‌كا سیاسیا مه‌زن هه‌یه‌ د مه‌یدانا كارێ سیاسی و دبلوماسى دا، ئه‌و ب خوه‌ قوتابخانه‌كا تایبه‌تا بیركرنا (پراكماتیا) كوردیه‌، پارتى ژ هه‌ر ئالى قه‌نجتر دزانیت بۆ مه‌رم و ئارمانجێن سیاسى و ده‌ست كه‌فتێن حزبى و ناوچه‌گه‌رى ئالیێن سیاسى ل كوردستانێ (مساوه‌مێ) دگه‌ل پارتى دكه‌ن، و پارتى نه‌چاره‌ بۆ ئارمانجا مه‌زنا درووشمێ بارزانى ژماره‌كا (تنازلێن) سیاسى بۆ ركابه‌رێن خوه‌ یێن سیاسى بكه‌ت، ئه‌گه‌ر چ ئه‌و ته‌نازل كرنه‌ ناگه‌هیته‌ پاشگه‌زبوونێ ژ پرۆژێ سه‌ره‌كى، بێ په‌رلمان و ژێده‌رێ شه‌رعیه‌تا سیاسى یه‌ ل كوردستانێ هه‌مى پرۆژه‌ك به‌رگومانه‌ و ره‌نگه‌ جیهان ژى ب ئاسایى نه‌ بنیت. (به‌یانا سه‌رخوه‌بوونێ دڤیا ل په‌رلمانى) بێته‌ خواندن. بۆ ئاساییكرنا په‌رلمانى، پارتى دڤیا د ڤێ قووناغێ دا پتر نه‌رمیێ دیار بكه‌ت به‌لكو هنده‌ك (ته‌نازلێ) ژى بۆ ركابه‌رێن خوه‌ یێن سیاسی بكه‌ت ل ڤێ قووناغێ دێ بۆ پارتى باشتر بیت یان به‌لكو ئه‌ركه‌ ل سه‌ر پارتى د ڤێ قووناغێ دا بریارێن دژوار بده‌ت هه‌ر چه‌نده‌ نه‌ دبه‌رژه‌وه‌ندیا پارتى دا ژى بیت، پارتى بۆ خاترا شه‌هیدێن خوه‌ بۆ خاترا هندێ براگه‌وره‌یه‌، ئه‌ركێ وێ قورستره‌ ژ خه‌لكه‌كێ، پارتى به‌رپرسا ئێكێ یه‌ ژ یه‌كپارچا كوردستانێ و ڤه‌گه‌راندنا په‌رلمانى بۆ كارێ وان یى یاسایى، وه‌ك دیار ئالیێن سیاسى بازارى دگه‌ل پارتى دكه‌ن به‌لكو (زه‌مانات) ژى ژ پارتى دڤێن و دبیت مه‌رج ژى هه‌بن د ڤێ قووناغێ دا و ئه‌ڤه‌ راسته‌ ل سه‌ر پرسه‌كا وه‌ك سه‌رخوه‌بوونێ دڤیا نه‌با، لێ چه‌قبه‌ستنا سیاسى ل كوردستانێ شه‌رت و مه‌جێن خوه‌ داگیرساندینه‌، مه‌زناتیه‌كا مه‌زن بۆ پارتى وه‌ك گه‌له‌ك جارا قوربانى دا ل ڤێ قووناغێ بۆ مه‌ره‌مه‌كا حزبیا به‌رته‌نگ یا (قه‌لس) نه‌بیت،(70) پارتى ل مه‌یدانێ خه‌باتێ دكه‌ت بۆ رۆژه‌كا وه‌ك نوكه‌(70) پارتى د ئه‌ده‌بیاتێن خوه‌ دا كادرێن خوه‌ وه‌سا په‌وه‌رده‌ كرینه‌ كو (پارتى) ئالاڤه‌ نه‌ ئارمانجه‌، ئه‌ڤجا ده‌مێ هندێ هاتیه‌ پارتى ئالاڤبوونا خوه‌ بۆ سه‌رخوه‌بوونێ دوپات بكه‌ت، دبێژن ئالیێن سیاسى نێزیك بوونه‌ ژ رێكه‌فتنێ هیڤیدارم نه‌مابن ب هندێ ڤه‌، سه‌رۆكێ هه‌رێمى شه‌رعیه‌ یان سه‌رۆكێ پرلمانى مایه‌ یان ب دووماهیك هاتیه‌) وه‌ك جره‌كا (بیزنتى) (هێك ژ مریشكێ یه‌ یان مریشك ژ هێكێ)یه‌!.

دوو سال دبوورن ل سه‌ر هێرشا هۆڤێن چه‌رخی بۆ سه‌ر شنگالێ، دوو ساله‌ ب سه‌دان كج و ژن هێشتا بێ (ئه‌دره‌س) و سه‌رو شوونن، دوو سال بورین هێشتا راپورته‌كا زه‌لال ل دوور ره‌وشا كه‌فتانا شنگالێ به‌لاڤ نه‌بووی، دوو ساله‌ نه‌یارێن پارتی ب هه‌موو ره‌نگی (مزایه‌دێ) بخوون و كاره‌ساتا شنگالێ دكه‌ن، دوو ساله‌ ئاوارێن شنگالی د وه‌لاتێ خوه‌ دا ئاواره‌نه‌، دوو ساله‌ كوردێن ئێزدی بوونه‌ ئارمانجا ب ده‌هان رێكخراو و سازیێن خێرخاز و سازیێن (به‌رگومان) دوو ساله‌ (كێڤلێ) جودا كرنا كوردایه‌تی و ئێزدیاتیێ بلند دبیت، ئه‌وا راست بیت شنگال بخوه‌ د كولتورێ كوردی دا ژی (شنگالا شه‌وتیه‌) سه‌رهاتیا شنگالێ و هێرشا و و فه‌رمانا سه‌رهاتیه‌كا پری وێره‌كی و شانازیه‌، هه‌موو كورد قه‌رداێ كولتور و پاكیا كوردولۆژیا كوردێن ئیزدیه‌. پڕانیا ئالێن سیاسی ل دور شنگالێ ئاخفتن كریه‌ و بتنێ پارتی مایه‌ ل ڤی واری رونكرنا و به‌رسڤا پرسێن هه‌لاویستی بده‌ت، چونكه‌ هه‌م خه‌لكێ شنگالێ ژ (زونا زه‌رن) و هه‌م پارتی هێزا سه‌ره‌كیه‌ ل ده‌ڤه‌را شنگالێ نوكه‌ و ژبه‌ری نوكه‌ ژی، بێ حورمه‌ترین پروپاگندا سیاسی ئه‌وه‌ هنده‌ك ئالی ب مه‌رگه‌ساتا شنگالێ كارێ سیاسی و پارتایه‌تی دكه‌ن، پارتی ل ڤی وارێ خوسارترین پارتیه‌ كو تانوكه‌ ل ڤێ مه‌یدانێ كارێن وێ یان سڤك سه‌رپێ نه‌ یان ژی ئه‌ڤ بێده‌نگی و كارێ كری خه‌ریكه‌ د گێله‌شۆكا سیاسی دا هندا ببیت، شنگال پرسه‌كا وژدانیه‌ و كاره‌ساتا وێ ب وی قه‌باری مه‌زنه‌ هه‌موو ناخه‌ك راستی خه‌م باریه‌كا مه‌زن دبیت و هه‌تا ئێك كج و ژن د ده‌ستێ ڤان هۆڤان دا بیت هه‌موو كاره‌ك ل شنگالێ بێ بهایه‌، لێ ل بیره‌وه‌ریا شنگالێ دا پێدڤی بوو هنده‌ك رونكرن و راستی هاتبان دیار كرن، هه‌موو به‌رسڤێن پێدڤی بۆ ئه‌وێن مزایدێ ب شنگالێ دكه‌ن هاتبا دان، بۆچی شنگال كه‌فت، سه‌ده‌مێن وێ یێن بابه‌تی و جوگرافیا و دیموگرافیا وێ ده‌ڤه‌رێ و پرسێن بوین سه‌ده‌م هاتبان دیاركرن. دبیت پارتی ل ڤێ قوناغێ وژدان ته‌ناتربیت پشتی سه‌رۆك(بارزانی) سه‌ر په‌رشتیا رزگاركرنا وێ كری، لێ هێشتا زۆره‌كا پسیارا بێ به‌رسف مانه‌. زۆره‌كا كج و ژنێن مه‌ دبێ سه‌روشینن، هێشتا باده‌كا جینۆسایدێ وه‌ك پێدڤی بۆ نه‌هاتیه‌ كرن، هێشتا ژ رویێ ئیداره‌دانێ ڤه‌ وه‌ك پێدڤی بۆ نه‌هاتیه‌ كرن، هێشتا پری باژارێ شنگالێ ئه‌و هێزن ئه‌وێن مزایدێ ب خوین و نامیسا قوربانێن شنگالێ دكه‌ن. پارتی وه‌ك ئه‌مه‌كداری و ئه‌ركێ خوه‌ شنگال ب خوینا شه‌هدێن پێشمه‌گه‌ ئازاد كر لێ پرسا شنگالێ ب دوماهیك نه‌هایته‌ و دبیت وه‌خته‌ك درێژ ببووریت تا زۆر بابه‌ت ل سه‌ر شنگالێ ئاشكرا ببن، لێ شنگال هه‌ر پشكه‌ك ژ جه‌سته‌یێ وه‌لاتی كوردستانێ دێ مینیت و پارتی ب هه‌مه‌ چاكی و تێبینی ڤه‌ دێ خودانا شنگالێ بیت..

هەمى جیهانێ خانەنشین تەخەکا رێزدار و جهێ پویتەدانێ نە و هەمى سالان ل هندەک وەلاتان بودجەکا تایبەت یان سەرەدەریەکا تایبەت ژ ئالیێ حکوومەتێ ڤە بۆ دهێتەکرن. خانەنشین بێهنا (دوهى)نە پانۆراما روودان و سەرهاتیێن ژیانێ نە. مارکەکا ئورجینالا کار و پیشەیێن خوەنە، خانەنشین هەکە (عەسکرى) بن یان (مەدەنى) بن خودانێن ڤى وەلاتینە، ئەڤ وەلاتە ئەڤ ئاڤاهى و ئەڤ سیستەم و ئەڤ گەشەپێدان و وەرارا جڤاکى و ئابوورى و سیاسى و سەربازى و دبلۆماسى هەمى ب ناڤێ وان (تاپۆ)یە، شین تلێن وان ل هەمى سازى و دەزگەهێن کوردستانێ هەنە، لیستا ناڤێن خانەنشینا دبیت ل وەلاتێ مە هندەک زێدەگاڤى تێدا بن، دبیت هندەک نەهەژى خانەنشینیێ بن، و دبیت هەتا هندەک نە ل (عەمرێ) خانەنشینیێ بن. لێ مسوگەر 80% خانەنشینێن کوردستانێ هەژی رێزەکا مەزنن، ئەم وەختێ بەحسێ خانەنشینان دکەین ئەم بەحسێ ژیانا وان دکەین و چەوانیا بۆراندنا بەرمایێ وێ ژیانا ماى، ئەوێن هەمى گەنجاتیا خوە گورى کەرتێ گشتى کرى، نوکە وەک شیرحەلالیەک بۆ خانەنشینا پێدڤیە کوردستانێ ب تەمامى سەرەدەریا خوە ل گەل بگهۆریت و وەک تەخەکا مرى (مع وقف التنفیژ) بەرێ خوە نەدەتێ، ئەڤە کەسێن بناڤ سالڤە چووینە و هەلکانن و شیاناڤە، هەمى زاخ و شیانا خوە گورى ئەڤرۆیا مەکریە، ب دیتنا من پشتى (پێشمەرگەى) دڤیا خانەنشین مووچەى وەربگرن، ئەڤە زێدەکرن و (مزایدە) نینە ئەڤ ئەمەکداریە بۆ وان کەسا، دبیت هندەک نە هەژى (مەقامێ)خانەنشینیێ بن و دبیت ئالیێن سیاسى گەلەک خانەنشین کربن بۆ مەرەمێن خوە، لێ دیسا پرانیا وانا هەژى چاڤدێریێ نە و ئەم بەحسێ (رزق) و ژێدەرێ ژیانێ دکەین ئەم بەحسێ نانێ مرۆڤا دکەین ئەم بەحسێ بهایێ دەرمان و پێدڤیێن پیراتیێ دکەین، و پاشى هەمى مرۆڤن و هەمى کوردن و ب رەنگەگى یان یێ دى زیان دیتیە و هەژینە کو حکوومەتا کوردستانێ دبن ناڤى خانەنشینیێ دا وان خەلات بکەت، کورد هەمى هەژی (بیمەکا)چڤاکینە (بیمەکا) ساخلەمیێ نە، وەک دیار خانەنشینێن نوکە نەهەق نینن ژ حکوومەتا کوردستانێ دلگران بن و گەنج و کاربدەستێن نوکە ژى دڤیا بزانن ئەڤ سەرەدەریا نەماقیل چاڤەرێ وان ژى دکەت پشتى ژ زاخێ خلاس دبن و بنە خانەنشین. نەهەق نینن وەک پالێن پیشى بهێنە پێشچاڤ نوکە.

ئێكه‌مین ئینقلاب ل عیراقێ جه‌نه‌راله‌كێ كورد پێ رابوو ئه‌و ژى جه‌نه‌رال (به‌كر سدقى) بوو ل سه‌رده‌مێ پادشاى، ئانكو (بكر صدقى) ژى په‌روه‌ردا فێرگه‌ها جه‌نگا ئۆسمانیان بوو. ئه‌و ژ له‌شكرێ (ئینكشاریێ) ئۆسمانیان كو پترى ژ(چاار) سولتانێن ئۆسمانى تیرۆركرین و كه‌سێن دى د ئینقلابه‌كێ دا داناینه‌ جهێ وان، ژمێژه‌ (ئه‌نادول) ژینگه‌هه‌كا ل باره‌ بۆ ئینقلابا. ئه‌ڤ كومێدیا ب ناڤ ئینقلاب ئه‌ڤا ل (15 ئابێ) رووداى ب دیتنا من ب هیج ره‌نگه‌ ئینقلاب نه‌بوویه‌. به‌لكو سیناریویه‌كا نه‌ته‌مامكرى بۆ خولقاندنا ده‌رفه‌تا رامالینا هه‌ڤدژێن سیاسى بوو. تاقیكرنه‌كا نشتیمانى بۆ لایه‌نێن سیاسیێن توركى و سه‌ر ئه‌نجام موكمكرنا ده‌ستهه‌لاتا (ئه‌ردوغانى)یه‌. ئه‌ز نابێژم ئه‌ردوغانى ئه‌ڤ (فلمێ ئه‌كشن) ئاماده‌ كریه‌. لێ پرسیارا سه‌ره‌كى ئه‌وه‌ كى ژ ڤى فلمى مفادار بوو؟ كێ 24 (هه‌لیكوپته‌رێن) توركیا د ئێك دم دا ئێخستنه‌ خوارێ ل ده‌مه‌كى (ئه‌ركانێ هێزا ئاسمانى) ئینقلابچى بوو؟! یان ئینقلابچى (ده‌به‌نگ و گێژن) و هیچ ژ نه‌خشه‌كێشانا ئینقلابا نزانن یان ژى فلمه‌، چه‌وا ئینقلاب سه‌رۆكێ وه‌لاتى دهێلیت ساخ و ئازاد و ئینقلابێ دكه‌ن؟ سه‌رۆك وه‌زیر و وه‌زیرێ به‌ره‌ڤانیێ پیاسا بكه‌ن و ل وه‌لاتى ئینقلابچی هێرشێ بكه‌نه‌ سه‌ر (ته‌ره‌تێ) و (توركسات) و پترى (300) كه‌نالێن ئه‌ردوغانى په‌خشێ بكه‌ن؟! زۆربه‌یا رۆژنامه‌ڤانێن بیانى ل توركیا كارێ خوه‌ دكرن و زۆر پرسیار ئازراندن و بێ به‌رسڤ مانه‌. جه‌نابێ ئه‌ردوغانى ب چ باله‌فرێ گه‌هشته‌ ئه‌نقه‌رێ؟! یا كیژ وه‌لاتى بوو؟! مخابنى ره‌نگڤه‌دانا وه‌لاتیێن توركیا یا ڤالا نه‌بوو ژ دیمه‌نێن (داعشێ) وه‌ك سه‌ربرینا (جه‌ندرما) كو ب خوه‌ ل عه‌سكه‌ریا زۆره‌ملینه‌، ئانكو نه‌هیزێن تایبه‌تن یان كوماندوسن؟! گرتنا فرۆكخانا (ئه‌تاتوركى) و هێلانا (تورك سێل) یا ته‌له‌فۆنا كار بكه‌ت؟! مخابنى توركیا و وێ قووناغا پێرا گه‌هشتى ب بناڤێ ئینقلابێ تووشى ڤێ بێ رێزیا خراب بووى. سه‌ربۆرا توركیا یا ئابوورى و گه‌شه‌پێدان تووشى هه‌ژیانه‌كا مه‌زن كر. سه‌ده‌مێن ئینقلابێ ل توركیا نینن وه‌ك د به‌یانناما وان دا هاتى زۆر (هه‌زله‌ى) و نه‌ سیاسى بوو، لێ ئه‌ردوغان محتاجى (گوه بادانه‌كا) ب راستى بوو، تا ژ قه‌بارێ خوه‌ پتر ده‌رنه‌كه‌ڤیت، د یه‌كه‌م سه‌عه‌ت دا (ئاكپارتى) ئه‌مریكا گونه‌هبار كر. ل رۆسیا (جون كیرى) ئیدانا ئینقلابێ نه‌كر؟! پشتى چه‌ند سه‌عه‌تان تازه‌ ئه‌مریكا پشته‌ڤانیا شه‌رعیه‌تێ كر. لێ پشتى هه‌ر تشته‌ك زه‌لال بووى.
خوینده‌ڤانێ هێژا ئه‌ڤ فلمه‌ ناڤێ وى ئینقلاب بوو، لێ ئینقلاب نه‌بوو، بۆ به‌رسڤا پرسیارێن گه‌له‌ك پێدڤى ب جه‌خه‌كێ یه‌ تا به‌رسڤا وان بێته‌ دان. ئه‌ڤ ئینقلابه‌ وه‌ك ئینقلابا (پۆلیسان) بوو ل عیراقێ یا سه‌ر نه‌گرتى و كومێدى ل سالا 1950 و تا نوكه‌ ژى مژداره‌ ئایه‌ پۆلیس و ئینقلاب بۆ خاترا خودێ.

پارێزگارێ دهۆکێ هەر هەیام هندەک داخویانیا ددەت وەک بێژى هێشتا (ئەندام پەرلمانە) ژ نەجارى یان پاشى رۆنکرنا ددەت یان داخوازا لیبۆرینێ دکەت یان هندەکا دکەتە (عوزرا ژ قەبحەتێ مەزنتر) وەک بابەتێ (ترافیکا) یا دروست دڤیا سەیدا باشترین پەیڤا بۆ داخویانێن خوە ب هەلبژێریت و باشترە ستافەکێ نڤیسەران د وارێ ئارەستەکرنا گوتاران دا ل دۆرێن سەیداى بیت و ئەڤە نەعەیبە، سەرۆکێ ئەمریکا (کاتب ختابات) هەیە، د میدیا جڤاکى دا سەیدایێ پارێزگار دکەڤیتە بەر رەخنێ و باشترە بۆ جەنابێ پارێزگارى وەسا بیر بکەت کو بەرپرسەکێ (تەنفیزى) یە و فەرمانبەرەکێ حکوومەتێ یە و (راتبێ خوە وەردگریت ژ مالێ گشتی) ئەو ب خوە کەسەک بەرێزە، لێ چونکی کەسایەتیەکا گشتى یە دێ رەخنێ لێ گرین. بۆ پرسا کلێشى ل زاخۆ ب راستى زوو هاتە سەر خەتى و ب ئەرکێ خوە رابوویە، لێ دیسان د کۆنگرێ خوەیێ رۆژنامەڤانى دا هێرش کرە سەر رۆژنامەڤانا (نەپۆزەتیڤ) دیار کرن، ئەوا راست بیت ئەرکێ مە ئەو نینە (پۆزەوتیڤ)بین. هیج سازیەکا حکوومەتێ پارێزبەندى نینە بۆ مە وەک رۆژنامەڤان. لێ دەربارەى پرسا گلێشى ل زاخۆ تا نوکە ژى ب دروستى رون نەبوویە، دڤیا داواکارێ گشتى ل هندەک پێزانینان ب خودان دەرکەڤیت، کێ ڤیایە بیت (شریکێ) کۆمپانیێ؟! کینە (منافس).دڤیا جەنابێ پارێزگارى ل ڤان پێزانینان ب خودان دەرکەڤیت. هەتا پرۆژێ چاکسازیێ سەرکەفتى بیت دڤیا هەرتشتەک زەلال بیت بۆ رایا گشتى، (دەقێ پرۆپۆزەلى یان رێکەفتنێ) بەلاڤ بکەن دا خەلک بزانیت پرس ب چ شێوەیە؟! گلێشێ زاخۆ بۆ ماوێ 24 دەم ژمێران نەهاتە راکرن، لێ گەلەک تشت دیار کرن، بۆ من وەک رۆژنامەڤانەک سەیر بوو، ئەرێ ئەڤە گلێشێ باژێرەکى یان ملەتەکى د قەیرانا دایە؟َ! ئەرێ ئاستى تێگەهشتنا مە وەک خەلک چ بۆ مە دیار کر. ئەڤ هەمى ریکلاما بۆ ژینگەهێ دهێتەکرن بێ مفا دەرکەفت، ئەرێ یاسایێن باژێرڤانیێ چ دبێژن بۆ دکاندار و خودان شولا دەربارەى گلێشى؟! ژ من ڤە گلیشێ مە ل زاخۆ پەردە ل سەر گەلەک پرسا لادا، راستى ئەڤە نە گلێشێ باژێرەکێ فەقیر و د قەیرانا دایە، ژبەرى جەند سالان دگەل شاندەکێ میدیا یێ چووم (ئوردنێ) راستى (عمان) گەلەک پاقژ بوو من ڤیا پەسنا وێ بکەم بۆ هەڤالەکێ ئوردنى. گۆتە من ئەڤ پاقژیە نە رەوشەنبیریا مەیە، ئەم ملەتەک فەقیرین مە گلێش نینە؟!

بارزانى وه‌ك میراتگرێ جه‌رخه‌كێ بزاڤا نه‌ته‌وه‌یا كوردستانێ تاكه‌ سه‌ركرده‌یه‌ ل ڤى ده‌مى جورئه‌تا هندێ دگه‌ل مابیت بێ دودلى بانگا سه‌رخۆبوونا كوردستانێ بكه‌ت. بازانى وه‌ك دووماهیك سه‌ركرده‌ كه‌سێ كوردێ گه‌رمیه‌كا رۆحا نه‌ته‌وه‌یى. هێشتا د بیر و بیردانكا وى دا ماى. وه‌ك دیار بارزانى ل ڤى ژیێ درێژێ د مه‌یدانا سیاسیى دا بۆراندى تمام ب وێ باوه‌ریێ گه‌هشتیه‌ كو ئێدى(فیدرالى) كراسه‌كێ ته‌نگه‌ بۆ هیڤى و داخوازێن نه‌ته‌وه‌یه‌كى. گرنگه‌ هه‌رچ نه‌بیت ل ڤێ پارچا كوردستانێ كاروانێ خه‌باتا سه‌د سالى ب گه‌هیته‌ كه‌نارێ دووماهیكێ و كورد ل ڤێ پارچێ كیانه‌كى ئاڤا كه‌ن. ده‌رفه‌تا هندێ هاتیه‌ بۆ جارا ئێكێ پشتى رێكه‌فتنا (لوزانێ) كورد و كوردستانى بیر ل ئاڤابوونا وه‌لاته‌كێ سه‌ربخۆ بكه‌ن.
گوتارا بارزانى ده‌نگڤه‌دانا چه‌رخه‌كێ شۆره‌ش و راپه‌رین و سه‌رهلدانێن كوردایه‌. بۆ ئافارندنا قه‌واره‌كێ سیاسى. لێ مخابنى وه‌ك دیار بارزانى ل ڤێ مه‌یدانێ تالیێ دێ ب تنێ مینیت و هیج ئالیه‌كێ سیاسى ل كوردستانێ ب (صه‌راحه‌تا) بارزانى نه‌شیایه‌ هه‌تا وه‌ك پێدڤى پشته‌ڤانیێ ژى لێ بكه‌ت، هه‌تا پارتى تانوكه‌ وه‌ك هه‌لویسته‌كێ راگه‌هاندى خه‌مساره‌ به‌امبه‌ر په‌یاما بارزانى بۆ راگه‌هاندنا سه‌خۆبوونا كوردستانێ، مخابنى ئالیێن سیاسى مه‌رج و پرسا بۆ ڤێ پرسى دئازرینن. دڤێت كوردستان یا بێ ئاریشه‌ بیت بێ قه‌یران بیت بێ ململانا سیاسى بیت. تا ئالیێن سیاسى ژ نوو بیر بكه‌ن كا دێ پشته‌ڤانیا بارزانى كه‌ن یان نه‌؟! وه‌ك بێژى ده‌وله‌تا (معلباته‌) ئاماده‌یه‌ بۆ په‌یداكرنێ. ده‌وله‌ت دهێنه‌ ئاڤاكرن، ده‌وله‌تێن حازر و ئاماده‌ ل سیكا سیاسى نینن، عه‌شیر ل ئه‌فریقیا و ناڤ عه‌ره‌با بوونه‌ ده‌وله‌ت. بێ هیچ ژێرخانه‌كا ئابوورى یان زانستى یان مه‌عریفى (موزه‌نبق) سه‌رخۆبوونا خوه‌ ژ (برتغالێ) وه‌گرت (موزه‌نبیقێ ئێك نۆژار ب تنێ ژى نه‌بوو)؟! تشتێ نزانم ئه‌وه‌ براده‌رێن ب گومان و ب ترس د خه‌ما ده‌وله‌ته‌كا (فاشل) دانه‌، یان ل خه‌ما هندێ نه‌ ده‌وله‌ت ب (ئیمزا بارزانى) نه‌بیت؟! وه‌ك دیار هێجه‌تێن وان زۆر ساده‌نه‌ زۆر كومێدینه‌، كوردستانێ هیچ جاره‌كێ سه‌قامگێریه‌كا سیاسى و ئابوورى ب خوه‌ ڤه‌ نابینیت وه‌ك براده‌ر دبێژن ژ به‌ر كو ژیان د قه‌باره‌كێ دیموكراتى دا هه‌رگاڤ ململانێ هه‌یه‌ و هیچ جاره‌كێ ته‌ناهیا سیاسى نابیت، جونكى مه‌ ب خوه‌ ئه‌ڤ سیسته‌مه‌ هه‌لبژارتیه‌، كوردستانێ حزبا ب تنێ نینه‌، ئابوورێ ئارسته‌كرى نینه‌، سیكا ئازاده‌ و وه‌ك هه‌مى دونیایێ به‌ر نشیڤى و به‌رزیا دێ كه‌ڤیت. نزا (ده‌وله‌تا معلب) ل كیژ ماركێتا سیاسى هه‌یه‌ براده‌ر په‌یدا بكه‌ن. بارزانى دێ مێژوویه‌كێ تۆمار كه‌ت ئه‌گه‌ر ڤى پرۆژه‌ى به‌ته‌ سه‌رى و ئه‌گه‌ر بارزانى ژى ل هیڤیا هه‌میان بیت بچنه‌ پشت ئه‌و یادووره‌. براده‌ران ئیراده‌ و جورئه‌ت نینه‌.

كه‌س هندى به‌رێز (نه‌وشێران مسته‌فایى) ره‌نگه‌ سایكۆلۆژیكا پارتیان ناسناكه‌ت. و ب شاره‌زایى په‌یام و گوتارا خوه‌ ب مه‌ره‌م ئارسته‌ی جه‌ماوه‌رێ پارتى دكه‌ت، چ ئاشكرا و چ ب رێكا میدیا (سیبه‌ر)، پارتى وه‌ك خودان جه‌ماوه‌ره‌ك تاراده‌كێ پارێزگار و خه‌مخورێ هنده‌ك سه‌نجێن تایبه‌ت د ئاڤاهیێ پارتى دا هه‌نه‌ ره‌نگه‌ ئالیێن دى ژ ده‌ست دابن، هه‌مى پارتى ب چاڤه‌كێ نیمچه‌ (پیرۆزیێ) ل سمبولێن خوه‌ یێن سیاسى و مێژوویى دنێرن. ئاره‌ستا په‌یاما گۆرانێ بۆ ڤان سمبولێن پارتى پتر ره‌وشێ ئالۆز دكه‌ن. لێ پارتى ژى ب تێرا خوه‌ شیانا به‌رسڤدانێ هه‌بوو ژ به‌رى (بارزانى) ئورگانێن پارتى بێ دنگ بكه‌ت، دا به‌رسڤا وێ هێرشا گۆارنێ هێته‌ دان، سه‌ر ئه‌نجام پارتى خوساره‌ت نینه‌ ژ هه‌مى ئه‌وا هاتى گۆتن و ئه‌وا نوكه‌ میدیا سیبه‌ر دبێژیت، ئانكو ئه‌و ئالاڤێ به‌روكێ دژى پارتى و یان دژى بارزانى د ڤێ قووناغێ دا سه‌ركه‌فتى نه‌بوون و ژ ئالیێ ده‌روونی ڤه‌ خه‌لكى تاقه‌تا هندێ نینه‌ گرۆپه‌ك د گه‌رما شه‌رێ داعشێ دا بێژیت بارزانى (خرابه‌) ب ڤى ره‌نگى گومانێ ل سه‌ر خوه‌ پتر دكه‌ن. باشترین به‌رسڤا ئورگانێن پارتى بێده‌نگى بوو، بێ ده‌نگى دبلوماسیه‌ته‌كا سه‌ركه‌فتى یه‌، پارتى تازه‌ ب ڤێ دبلوماسیه‌تێ كار دكه‌ت، یا فه‌ر بوو پارتى د كه‌ڤن دا دبلوماسیه‌تا بێ ده‌نگیێ ب كارئینابا، و به‌رسڤا گه‌له‌ك (مهاتراتا) نه‌دابا، گه‌لێ كورستانێ گه‌هشتیه‌ قووناغه‌كێ ئێدى قبوول ناكه‌ت كه‌س ل شینا وى هزر بكه‌ت (خه‌لكێ خاین و گه‌نده‌ل ) بكه‌ن. و خه‌لك دووڤرا بێژن وه‌ك (كورالا) ئه‌و سه‌رده‌مه‌ بۆرى نوكه‌ پتر ژ ده‌رفه‌ته‌كێ بۆ هه‌ر تاكه‌كێ كوردستانێ رۆخسایه‌ و جورئه‌تا هندێ په‌یدا بوویه‌ پرسیارێ ل سه‌ر گۆتن و هه‌لویستان بكه‌ت (بارزانى) (موقدس) نینه‌، نه‌ د فه‌عنگا پارتى دا و نه‌ ژى ل عورفێ چڤاكى دا، به‌لێ ل هه‌مان ده‌م دا (بارزانى) ب كلتورێ خوه‌ڤه‌ وه‌ك كه‌سه‌ك پێشمه‌رگه‌، ب تێرا هندێ سۆزا خه‌لكى هه‌یه‌ ل سلیمانیێ ژبه‌رى دهۆكێ كو كه‌سه‌ك پاراستى بیت ژ هه‌لدانا تاوانا بۆ بارزانى؟! شه‌رێ ده‌روونیێ گۆرانێ و پارتى دڤیا كه‌سێن وه‌ك (بارزانى) نه‌بن قوربان و ئارمانج ، جونكه‌ سه‌ربۆر هه‌نه‌ ڤێ قوتابخانا بیركرنێ (فه‌شه‌لا) ئیناى، كه‌س هندى (جه‌نه‌رال بارزانى) نه‌كه‌ته‌ به‌ر ره‌خنێ پشتى 1975ێ لێ بهایێ وى وه‌ك سمبوله‌كا نشتیمانى و نه‌ته‌وه‌ى و جیهانى ما ل هه‌مان سه‌نگێ خوه‌، ناڤێ وى ل (ئینسكلوبیدیا)یێن زانستى دا ما (رابه‌رێ بێ ركابه‌رێ هه‌چار پارچێن كوردستانێ)، ئه‌ڤجا ئه‌ڤ رێبارزا پارتى هه‌لگرتى ل گۆر فه‌رمانا بارزانى به‌رسڤێ نه‌ده‌ن سه‌ركه‌فتیترین به‌رسڤه‌ و باشترین ده‌رسه‌ كو پارتى رێزێ ل لوژیكێ تاكێ كورد دگریت.

جاره‌ك دی پێدڤی ب گۆتنێ یه‌ كو پرانیا سازیێن مه‌ و به‌رپرسێن مه‌ نه‌راهاتینه‌ ل دۆر چه‌وانیا سه‌ره‌ده‌ریكرنێ دگه‌ل میدیایێ نه‌مازه‌ (سوسیال میدیا)یێ. ئه‌وا دونیا هه‌می تووشی شله‌ژانیه‌كا مه‌زن كری و ب ملیۆنان كه‌س رۆژانه‌ ده‌ربرینێ ژخوه‌ دكه‌ن وه‌ك ئه‌و هه‌ین یان وه‌ك وان دڤێت پۆسته‌كی دابه‌زینن.
ل كوردستانێ قانوونا كارێ رۆژنامه‌گه‌ری ژ (سوسیال میدیا)یێ ناگریت و هیج پێناسه‌ك بۆ نینه‌. سه‌رده‌مێ میدیا ئاره‌سته‌كری ب دووماهیك هاتیه‌، و راگه‌هاندنا ئایدولۆژی راستی قه‌یرانا باوه‌ریێ بوویه‌، پۆستێ وه‌لاتیه‌كی ره‌نگه‌ هندی كارێ ئاژانسه‌كێ كاریگه‌ریا خوه‌ هه‌بیت، ئه‌ز دگه‌ل هندێ نینم (نفرین و خه‌به‌ر و ناڤزراندن) (رأی بن) به‌لكو (انفعالاتن) و سه‌ره‌ده‌ری یا ساخله‌م دگه‌ل ڤان توخمه‌ كه‌سان ئه‌وه‌ بهێنه‌ پشت گوه هاڤێتن. یان ب بێ ده‌نگی ره‌فتارێ دگه‌ل سه‌ده‌مێن وێ بهێته‌كرن، هه‌ر چه‌نده‌ هیچ سازیه‌كا فه‌رمی هیچ داخویانیه‌ك نه‌دایه‌ ل سه‌ر (ده‌سته‌ركرنا پۆلیسه‌كی ل زاخۆ و سزادانا مامۆستایه‌كی ل باتیفا)، لێ پرانیا سوسیال میدیایێ وێنه‌ و بۆچوون و ئاخفتن و ده‌ربرین بوویه‌، هنده‌ك ژ دل پێڤه‌یی و هنده‌ك ژی ب هه‌ل دزانن دگه‌ل ڤێ ره‌وشێ (ئه‌جندایێن) خوه‌ ده‌رباس بكه‌ن. ب هه‌ر حال ئه‌ڤ ره‌فتاره‌ ژ هنده‌ك به‌رپرسێن حكوومه‌تا كوردستانێ جهێ دلگرانیێ نه‌، چونكی ئه‌م ل وه‌لاته‌كی دژین یێ ئازاده‌ و قانوون هه‌یه‌، هه‌ركه‌سێ هه‌ست ب بێ رێزیه‌كێ بكه‌ت ل دادگه‌هێ دشێت سكالاخوه‌ بكه‌ت. نه‌كه‌ ده‌ستهه‌لاتا خوه‌ بكار بینیت بۆ (سزادانێ) ئازادی روحا دیموكراتیه‌تێ یه‌ و پێدڤیه‌ مه‌ترسی ل سه‌ر ئازادیێ نه‌بن، كوردا به‌رگێ قه‌یرانا دارایی گرت، لێ به‌رگێ به‌رته‌نگكرنا ئازادیێ ناكه‌ن و هیچ حزبه‌كا كوردستانێ ڤێ ره‌فتارێ پشتراست ناكه‌ت. پارتی خودانا ده‌ستته‌لاتێ یه‌ ل ڤێ ده‌ڤه‌رێ ئه‌ڤه‌ چه‌ندین روودان په‌یدا بوون و بڤێت نه‌ڤێت ل سه‌ر پارتی دهێنه‌ ژمارتن و پارتی ژ ڤان ره‌نگه‌ ره‌فتارا بێ گونه‌هه‌ وه‌ك میدیاكاره‌ك دبێژم بیاڤێ ده‌ربینێ ل (زونا زه‌ر) زۆرێ فره‌هه‌ و هنده‌ك كار و ره‌فتار دبنه‌ سه‌ده‌مێ له‌كه‌داركرنا سه‌ربورا مه‌ و پاشی (پارتی). شه‌رێ (ده‌ستهه‌لاتا جێبه‌جێكرنێ ) و راگه‌هاندنێ شه‌ره‌ك كه‌ڤناره‌ و ل هه‌می جیهانێ هه‌یه‌، لێ ئه‌وا پشتراست ئه‌وه‌ میدیا هه‌رده‌م سه‌ركه‌فتی و كاریگه‌رتره‌ ژ ده‌ستهه‌لاتێ. پارتی ژ هندێ گه‌له‌ك ماقیل و بلندتره‌ هنده‌ك ره‌فتار ل سه‌ر بێنه‌ ژمارتن، لێ نه‌بوونا (تصریحه‌كێ) وار بۆ گه‌له‌ك شلوڤا ڤه‌دبیت و ئه‌ڤ ره‌فتاره‌ ئه‌وێن ل (فیسبوكێ) به‌لاڤ دبن گه‌له‌گ ژ وانا بێ رێزیه‌ ب هنده‌ك كه‌سان یان هنده‌ك سمبولێن مه‌ین نشتمانی. هه‌می دچن خالا ڤالاكرنا هنده‌ك هه‌لسوكه‌فتێن مرۆڤێ د قه‌یرانێ دا و پێدڤی ب (رده‌ الفعل) نینه‌ مسوگه‌ر، ئه‌ڤجار نه‌خێر بۆ سزادان و چاڤ سوركرنێ ل كه‌سێ. د هه‌مان ده‌م دا نه‌خێر بۆ بێ رێزی و ره‌فتارێن كرێت ده‌رحه‌ق كه‌س و ئالیێن جودا جودا، دوور ژ قانوون و دبن ناڤێ ئازادیێ دا.

باوه‌ر ناكه‌م كه‌سه‌ك ل زاخۆ ببیته‌ به‌رپرس و پاقژ و بێ (له‌وتینا ده‌ستا) ژ زاخۆ قورتال ببیت. دبێژن زاخۆ (توكه‌كا) ئه‌هریمه‌نایه‌ و كێم كه‌سان شیانا خوه‌راگرتنێ هه‌یه‌. ئاشكراتر بێژم كی ل زاخۆ ببیته‌ به‌رپرس ب ره‌نگه‌كێ یان یێ دی (تێكه‌لی گه‌نده‌لیێ) دبیت وێ ئه‌ز ب خوه‌ سه‌ده‌مێن ڤێ تایبه‌تمه‌ندیا زاخۆ نزانم. یا ئه‌ز دزانم هه‌می سه‌رۆك باژێرڤانیێن زاخۆ پشتی سه‌رهلدانێ و هه‌می قایمقامێن زاخۆ. بێگومان بێ گه‌نده‌لی نه‌بووینه‌. و پڕی بازارێ زاخۆ و به‌ر دیواران ژی سحبه‌تێن وانن. به‌رپرسیاره‌تی ل زاخۆ وه‌ك من ژ گه‌له‌ك به‌رپرسان گوه لێ بووی دبێژن پێدڤی ب هونه‌ره‌كێ تایبه‌ته‌ هه‌تا كه‌سه‌ك بشێت ل زاخۆ به‌رپرسیاره‌تیێ بكه‌ت، چونكی زاخۆ پڕی به‌رژه‌وه‌ندی یه‌. پڕی سیخۆریه‌. پڕی بازرگانیا پیس و پاقژه‌. ئه‌فجا زێده‌باری نه‌خشێ جڤاكیێ وێ یێ ئالۆزی و پڕی (نازداری). پارتی خودانا زاخۆیه‌.
د هه‌می هه‌لبژارتنا دا پارتی زاخۆ قازانج دكه‌ت، ئانكو هه‌ر كه‌سێ زاخۆ ببیته‌ به‌رپرس نوونه‌رێ پارتی یه‌، ئه‌گه‌ر گه‌نده‌ل و ب كێرنه‌هاتی بیت یان زیره‌ك و وێره‌ك بیت هه‌ر دوك بۆ پارتی دزڤرن. نه‌یارێن پارتی یێن سیاسی گه‌نده‌لیا به‌رپرسێن زاخۆ بۆ خوه‌ ب ده‌رفه‌ت دبینن بۆ له‌كه‌داركرنا پارتی و پرۆگرامێ وێ یێ خزمه‌تگوزاری، و به‌رۆڤاژی پارتی كه‌سه‌ك ژێهاتی و سه‌ركه‌فتی ل جهه‌كی بدانیت هه‌می چاكی بۆ وی كه‌سی و پاشی بۆ پارتی دزڤڕیت، من دیت پارتی كه‌سه‌ك ژێهاتی و ده‌ست پاقژ (هه‌تانوكه‌) و خودان به‌رنامه‌ و دیتنه‌ك دوور بۆ باژێرێ زاخۆ هه‌ی و سه‌رباری ڤێ قه‌یرانا نوكه‌ پڕی زاخۆ خزمه‌تێن بچووك و مه‌زنن ل گۆر شیانا به‌رێز (بژار منیب) هێژای ده‌ست خۆشی و سوپاسیێ یه‌ و كه‌سه‌ك هه‌ست ب دودلی و كێماسیێ ژی ناكه‌ت بێژیت كه‌سێ دل و ده‌ست پاقژ خزمه‌تا وه‌لاتێ خوه‌ بكه‌ت (ده‌ست خۆش). پارتی لێڤ و لێڤه‌ ژ كه‌سانێن خودان شیان و دلسۆز، هه‌می ئه‌و كه‌سێن نوونه‌رایه‌تیا پارتی د هنده‌ك پۆستا دا كری بۆ خوه‌ و بۆ پارتی زیان بوونه‌، كه‌سه‌ك وه‌ك به‌رێز (بژار منیب) دوور ژ زمان حلیاتیێ وه‌ك دیارده‌ دزانم و كه‌سێن وه‌ك وی پڕی پاشدانكا پارتی نه‌ ل پۆستێن جودا جودا دا دانیت. و دبێژین كاك بژاری سوپاس به‌رێز. به‌لێ (خوه‌ راگره‌ و خوه‌راگره‌ و خوه‌راگره‌) به‌رامبه‌ر گڤاشتن و به‌رژه‌وه‌ندێن هه‌لپه‌رستێن باژاری.