ب مەرەما دووڤچوونا پڕۆژەیێن خزمەتگوزاری، ئەوێن ژ لایێ‌ حوكمەتا هەرێما كوردستانێ‌ ڤە دهێنە پێشكێشكرن، دوهی 27/10/2024 د. عەلی تەتەر، پارێزگارێ دهۆكێ و ب ئامادەبوونا سەردار شێخ یەحییا، دەڤەردارێ شێخان و رێڤەبەرێن پەیوەندیدار جودا سەرا پڕۆژەیێ چێكرنا جۆتسایدێ دهۆك بۆ باعەدرێ و پڕۆژەیێ چێكرنا جۆتسایدێ شێخان بۆ پەرستگەها لالشێ‌ دا و ژ نێزیك سەحكرە قووناغێن بجهئینانێ.
پڕۆژەیێ‌ جۆتسایدێ دهۆك بۆ باعەدرێ ل سەر بودجا پارێزگەها دهۆكێ ب گوژمێ 135 ملیار دیناران و ب درێژاهیا 26 كیلۆمەتران دهێتە بجهئینان و هەتا نوكە 7% هاتیە ئەنجامدان.
دیسا پڕۆژەیێ جۆتسایدێ شێخان بۆ پەرستگەها لالشێ‌ ژی ل سەر بودجا پارێزگەها دهۆكێ ب گوژمێ 26 ملیار و 480 ملیۆن دیناران و ب درێژاهیا هەشت كیلۆمەتران و 200 مەتران دهێتە بجهئینان و هەتا نوكە 10% هاتیە ئەنجامدان، ئەڤ رێكە دێ خزمەتەكا مەزن پێشكێشی خەلكێ دەڤەرێ، نەخاسمە زیارەتكاڕێن قەستا پەرستگەها لالشێ‌ دكەن؛ كەت.

هەرهین محەمەد:

ل ژێر درووشمێ‌ (هەردەم كورتەبالا پێشەنگن) و ب چاڤدێری و ئامادەبوونا د. عەلی تەتەر، پارێزگارێ‌ دهۆكێ‌ و ب پشتەڤانیا 15 كۆمپانیان، ئێكەم كەرنەڤالێ‌ كورتەبالایێن پارێزگەها دهۆكێ‌ ل رۆژێن (2،3/11/2024) ل دەمژمێر 3:00 ئێڤاری ل فاملی مۆلا دهۆكێ‌ دێ‌ هێتە گێڕان.
نەسیبا یاسین، سەرۆكا كۆمەلا كورتەبالایێن پارێزگەها دهۆكێ‌ بۆ ئەڤرۆ گۆت: «ئەو كۆمپانیێن د كەرنەڤالێ‌ دا ئامادە دبن، بەرهەمێ‌ خوە پێشكێشی كورتەبالان كرینە و دێ‌ هێتە فرۆتن و ئەو داهاتە دێ‌ بۆ كورتەبالایێن نەخوش بیت و پشكەك ژی دێ‌ بۆ ئەنجوومەنێ‌ كورتەبالایان بیت، دیسا پشتی بابەتێ‌ كەرنەڤالێ‌ هاتیە بەحسكرن و بەلاڤكرن و مە پەیوەندی ب هندەك زەنگینان كری، كەسەكی خوە لێ‌ كریە خۆدان و هەیڤانە دێ‌ مووچەكی بۆ كورتەبالایێن بێ‌ سەمیان دابین كەت»
گۆتژی: «د كەرنەڤالێ‌ دا دێ‌ كەلوپەلێن خوارن و ڤەخوارنێ‌ هێنە نمایشكرن و فرۆتن، دیسا ئێك ژ كۆمپانیێن پشتەڤان دێ‌ كورتەبالایەكی ل سەر كیستێ‌ خۆ هنێریتە عومرێ‌ و كۆمپانیەكا دی ژی دێ‌ 30 كورتەبالان بەتە گەشتەكێ‌ ل هەولێرێ‌«.

هەولێر، قائید میرۆ:

رێڤەبەرێ گشتیێ بازرگانی ل هەرێما كوردستانێ ئاشكرا كر، ئەنجامدانا پڕۆژەیێن بازرگانی د ئەڤ سالە دا زێدەبوویە و دبێژیت: ب تنێ ئەڤ سالە مۆهلەت بۆ زێدەتری 60 پڕۆژەیێن بازرگانی هاتیەدان.
نەوزاد شێخ كامل، رێڤەبەرێ گشتیێ بازرگانی بۆ رۆژناما ئەڤرۆ دیار كر، ئەڤ سالە هەتا نوكە مۆهلەت ب زێدەتری 60 پڕۆژەیێن بازرگانی هاتیەدان و پڕۆژەیێن جۆراوجۆرن د بیاڤێ بازرگانی دا، بێگومان ڤەكرنا وان هەموو پڕۆژەیان كاریگەری دێ ل سەر دەلیڤەیێن كاری و پەیدابوونا بازاڕی هەبیت، ژ بەركو هەر ئێك ژ وان پڕۆژەیان چەندین دەلیڤەیێن كاری پەیدا دكەت.
نەوزاد شێخ كامل گۆت: «نوكە ئەم زێدەتر كار بۆ ڤێ چەندێ دكەین پڕۆژەیێن بازرگانی ل دەرڤەی باژێڕێن مەزن بهێنە ڤەكرن، ل دەڤەرداری و ناوچەداریان پڕۆژەیێن بازرگانی زێدەببن، حوكمەتا هەرێما كوردستانێ ئاسانكاریان ژی بۆ ئەڤان كەسان دكەت یێن دخوازن پڕۆژەیێن بازرگانی ل دەڤەرداری و ناوچەداریان بهێنە ئەنجامدان، داكو لڤینێن بازرگانی ل دەرڤەی باژێڕێن مەزن ژی پەیدا بن».

زاخۆ، دلۆڤان هالۆ:

ئیدارەیا سەربخوە یا زاخۆ ب هەڤكاری ل گەل سەرۆكاتیا باژێڕڤانیا زاخۆ، بەرهەڤیێن بارانێن دژوار و لەهیێن زڤستانا ئەڤ سالە دكەن.
محەمەد حەسەن، بەرپڕسێ هۆبا ژینگەهێ ل سەرۆكاتیا باژێڕڤانیا زاخۆ، بۆ ڕۆژناما ئەڤرۆ دیار كر، ل دووڤ ڕاسپاردەیا گوهدار شێخۆ، سەرپەرشتێ ئیدارەیا سەربخوە یا زاخۆ و یونس محەمەد، سەرۆكێ باژێڕڤانیا زاخۆ، بەرهەڤیێن بارانێن دژوار و لەهیێن زڤستانا ئەڤ سالە دهێنە كرن، ژ بۆ ڤێ مەرەمێ دەست ب هەوەكا پاقژكرنا هشكەڕۆیێن زاخۆ هاتییە كرن.
محەمەد حەسەن، بەرپڕسێ هۆبا ژینگەهێ ل سەرۆكاتیا باژێڕڤانیا زاخۆ ئاماژە ب وێ چەندێ ژی كر، هەتا نوكە هشكەڕۆیێن گوندكی و بێدارێ و سێمالكا و نەورۆز هاتینە پاقژكرن، نوكە ژی كار ل پاقژكرنا هشكەڕۆیێ تلكەبەرێ دهێتە كرن و گۆت: «بۆ سەنتەرێ ناڤ باژێڕی ژی لیژنە و تیمێن هەڤپشك هاتینە پێكئینان ژ بۆ هەر پێشهاتەكا نەچاڤەڕێكری یا لەهییان، ژ بۆ وێ چەندێ، وەلاتیێن مە بهێنە پاراستن و زیانێن گیانی و ماددی نەگەهنێ‌«.

زاخۆ، دلۆڤان هالۆ:

ئەندازیار جەوزەت سالح، بەرپرسێ هۆبا هونەركاری ل سەرۆكاتیا باژێرڤانیا زاخۆ بۆ ڕۆژناما ئەڤرۆ دیار كر كو ل دووڤ ڕاسپاردەیا گوهدار شێخۆ، سەرپەرشتی ئیدارەیا سەربخوە یا زاخۆ، ب درێژاهیا سێ‌ كیلۆمەتران دەست ب چێكرنا جاددەیێن تاخێ نەورۆز هاتە كرن.
بەرپڕسێ هۆبا هونەركاری ل سەرۆكاتیا باژێرڤانیا زاخۆ، ئاماژە ب وێ چەندێ ژی كر كو هەر ل تاخێ نەورۆز دەست ب چێكرنا 350 مەترێن سۆلینێن ئاڤڕێژ و هێلێن نوو بۆ ئاڤێ و كارەبێ هاتە كرن و گۆت: «د ناڤ ڤی پڕۆژەیی دا چەندین زێدەگاڤی هەبوون، لێ ب ڕێكا یونس محەمەد، سەرۆكێ باژێرڤانیا زاخۆ ل گەل وەلاتیان هاتنە چارەسەركرن».