ئه‌ڤرۆ،

تیما ته‌پا پێی یا یانا دهۆكێ‌ دو خالێن گرنگ ژ ده‌ست دان پشتی ب گۆله‌كێ‌ ل گه‌ل مێڤانا خوه‌ یانا سلیخ وه‌كهه‌ڤ بووی، د یاریا واندا ئه‌وا دوهی ژ چارچووڤێ‌ هه‌ڤڕكیێن گه‌ڕا 19ێ‌ و كۆما ئێكێ‌ یانێن خولا پلا ئێكا ئیراقێ‌ ل یاریگه‌ها سه‌ره‌كی یا یانا دهۆكێ‌ هاتیه‌كرن.

د نیڤا ئێكێ‌ دا تیما یانا دهۆك ئه‌و ئاستێ‌ چاڤه‌ڕێ‌ كرن نیشان نه‌دا سه‌رباری هه‌بوونا چه‌ند هێرشێن جودا د ماوێ‌ ڤێ‌ نیڤێ‌ دا، هه‌مبه‌ری وێ‌ یانا مێڤان شیا د پلانا خوه‌ دا یا سه‌ركه‌فتی بیت ژبۆ ڕێگرتنا هه‌موو بزاڤێن دهۆكێ‌ و ئه‌وا بێ‌ گۆل ب دووماهی ئینایی.

د نیڤا دویێ‌ دا هه‌ر ژ ده‌ستپێكا یاریێ‌ یاریزانێن دهۆكێ‌ ده‌ست ب گڤاشتنان كرن ژبۆ تۆماركرنا گۆله‌كا بله‌ز و ئاستێ‌ وێ‌ باشتر لێهات، ژلایێ‌ خوه‌ڤه‌ یاریزانێن سلیخ ل گه‌ل گرتنا هێلا به‌ره‌ڤانیێ‌ بزاڤێن هێرشێن هه‌ڤدژ دكرن، هه‌رچه‌نده‌ ژماره‌كا هێرشێن مه‌ترسی ل سه‌ر گۆلا مێڤان ژلایێ‌ یاریزانێن دهۆكێ‌ وه‌لید سه‌لمان، ئه‌حمه‌د سه‌بری، محه‌مه‌د سه‌عید، سیابه‌ند عه‌گید و مورتجا عادل، لێ‌ ژ هێرشه‌كا نه‌ چاڤه‌ڕێ‌ كری و هه‌ڤدژ كاپتنێ‌ یانا سلیخ عه‌لی محه‌مه‌د شیا گۆلا ئێكێ‌ د خوله‌كا 29ێ‌ بۆ تیما خوه‌ تۆماربكه‌ت، پشتی ڤێ‌ گۆلێ‌ یاریزانێن دهۆكێ‌ گڤاشتنه‌كا مه‌زن ل سه‌ر گۆلا سلیخ كرن و راهێنه‌رێ‌ وێ‌ محه‌مه‌د یوسف چه‌ند گوهۆرین ئه‌نجامدان و شیان گۆلا وه‌كهه‌ڤیێ‌ د خوله‌كا 90ێ‌ دا تۆماربكه‌ن ژلایێ‌ هێرشبه‌رێ‌ خوه‌ مورتجا عادلێ‌ ئه‌وێ‌ مفا ژ ته‌په‌كا ڤه‌گه‌ڕیایی یا لێدانا فاولێ‌ وه‌ربگریت و گۆلا به‌رده‌وامیا هیڤییا بۆ تیما خوه‌ تۆماربكه‌ت.

لدور ڤێ‌ یاریێ‌ ئه‌حمه‌د سه‌بری یاریزانێ‌ دهۆكێ‌ بۆ رۆژناما ئه‌ڤرۆ گۆت: هه‌ر یاریه‌كا ئه‌م دكه‌ین بۆ سه‌ركه‌فتنێ‌ یه‌ و ڤێ‌ یاریێ‌ مه‌ هه‌موو بزاڤ كرن و هه‌موو پلانێن هێرشبرنێ‌ ل سه‌ر گۆلا سلیخ برن لێ‌ نه‌بوونا چه‌نسی و له‌ز د شۆتكرنێ‌ بۆ هنده‌ك هێرشان دا مه‌ ده‌لیڤێن گۆلكرنێ‌ و سه‌ركه‌فتن ژ ده‌ستدا، هیڤیێن مه‌ د مه‌زن و مه‌ ژ ده‌ست نه‌داینه‌ و رژدین ب گه‌هینه‌ ئارمانجا خوه‌ ئه‌وژی پلێتا ده‌ربازبوونێ‌ بۆ پلا نایاب.

ژ یاریێن دی یێن ڤێ‌ كۆمێ‌، حدوود ل گه‌ل دیفاع ئه‌لمه‌ده‌نی ب گۆله‌كێ‌ تووشی خوساره‌تیێ‌ بوو، عه‌فه‌ك 7-2 سوق ئه‌لشیوخ، مرور چنه‌- چنه‌ میسان، رومادی 1-1 كۆڤه‌، بڤان ئه‌نجامان تیما یانا دهۆك ب 33 خالان و كێمتر یاریه‌كێ‌ جهێ‌ خوه‌ ل رێزا دویێ‌ پاراست، حدوود ما ل سه‌رێ‌ لیستێ‌ ب 38 خالان، عه‌فه‌ك ب 31 خالان پێشڤه‌ هاته‌ رێزا سێیێ‌،رومادی 29 خالان چوو رێزا چارێ‌.

ئه‌ڤرۆ،

تیما پایسكلڤانێن یانا دهۆك و نوونه‌را پارێزگه‌هێ‌ سه‌ر ئاستێ‌ لاوان شیان قۆناغا ئێكێ‌ یا قاره‌مانیا ئیراقێ‌ ب سه‌رفه‌رازی و سه‌ركه‌فتیانه‌ ده‌رباز بكه‌ن، پشتی شیان بۆ به‌ریكانا شێوازێ‌ هه‌ڤڕكیا كت سه‌ر ئاستێ‌ هه‌موو یانا رێزا دویێ‌ بهێن، د هه‌ڤڕكیێن وان دا ئه‌وا ل ئه‌ینیا بۆری ب پشكداریا 15 یانا باژێرێ‌ به‌غدا مێڤانداریا وێ‌ كری.

لدور ڤێ‌ یه‌كێ‌ د داخویانیه‌كێدا هوشیار فه‌ریق سه‌رپه‌رشتێ‌ تیما یانا دهۆك بۆ رۆژناما ئه‌ڤرۆ گوت: ل سه‌ر ئاستێ‌ لاوان پایسكلڤانێن یانا دهۆكێ‌ شیان رێزا ئێكێ‌ بهێن پشتی بۆ درێژاهیا 56 كم هه‌ڤڕكیێ‌ ل سه‌ر رێزا ئێكێ‌ بكه‌ن و نێزیكی ناسناڤی ژی بوون لێ‌ ئه‌و ئاسته‌نگێن كه‌فتینه‌ د ڕێیا یاریزانێن مه‌ دا بوو ڕێگر ژوانا دو یاریزانێن مه‌ تووشی هنگاڤتنێ‌ بوون دیسان د ماوێ‌ به‌ریكانێ‌ دا پایسكلێن دو یاریزانێن مه‌ تووشی ئاریشێن ته‌كنیكی بوون كو بۆ رێگر هه‌ڤڕكیا رێزا ئێكێ‌ ژ ده‌ست بده‌ن، لێ‌ رژدبوون هه‌تا دووماهیێ‌ بێ‌ هیڤی نه‌ بوون.

ژلایه‌كێ‌ دووڤه‌ ناڤهاتی دیاركر د ڤێ‌ قاره‌مانیێ‌ دا دو به‌ریكانه‌ هه‌بوون یا دویێ‌ یا شێوازێ‌ كت دژی ده‌مژمێرێ‌ هاته‌ پاشخستن بۆ قۆناغا دویێ‌ ژبه‌ر خۆلبارینێ‌ ئه‌وا ل باژێرێ‌ به‌غدا به‌لاڤبووی كو رێژه‌كا مه‌زن یا تۆزێ‌ باری و ئه‌رد نه‌ دهاته‌ دیتن و گوت: بۆ قۆناغا دویێ‌ دێ‌ به‌رهه‌ڤیێن مه‌ باشتر بن و ژبلی رێزا ئێكێ‌ چو ئارمانجێن دی مه‌ نابن و ده‌م یێ‌ درێژه‌ بۆ شێوازه‌كێ‌ باشتر بهێنه‌ دناڤ خولێ‌ دا.

بۆ زانین قۆناغا ئێكێ‌ یا قاره‌مانیا ئیراقێ‌ ب پشكداریا 46 یانێن هه‌رێما كوردستانێ‌ و باكۆر و ناڤه‌راستا ئیراقێ‌ بۆ ئاستێن پێشكه‌فتی، لاوان، تازه‌پێگه‌هشتی و كچان ل باژێرێ‌ به‌غدا هاتبوو ئه‌نجامدان.