ئه‌ڤرۆ،

دادڤانێ‌ شارا ده‌وله‌تی شڤان له‌زگین و كوڕێ‌ باژێرێ‌ سێمێلێ‌ ژلایێ‌ ئێكه‌تیا تایكواندۆیا جیهانی ڤه‌ هاتیه‌ داخوازكرن ژبۆ بڕێڤه‌برنا سێ‌ قاره‌مانیێن نێڤده‌وله‌تی و ئاسیایی ئه‌وا چاڤه‌ڕێ‌ یه‌ هه‌ڤڕكیێن وان ده‌ستپێكا ئادارا بهێت ل گزیرتا كیش یا وه‌لاتێ‌ ئیرانێ‌ بهێنه‌ ئه‌نجامدان.

لدور ڤێ‌ یه‌كێ‌ و زێده‌تر زانیاریان دادڤانێ‌ ناڤهاتی د داخویانیه‌كا تایبه‌ت دا بۆ رۆژناما ئه‌ڤرۆ گوت: ب نڤێسارا فه‌رمی ژلایێ‌ ئێكه‌تیا تایكواندۆیا جیهانی ڤه‌ هاتیمه‌ داخوازكرن بۆ بڕێڤه‌برنا چه‌ند یارییان ژ هه‌ر سێ‌ قاره‌مانیێن نێڤده‌وله‌تی و ئاسیایی ئه‌وا بڕیاره‌ هه‌ڤڕكیێن وان ل پێنجێ‌ هه‌تا ده‌هێ‌ ئادارا بهێت ل گزیرتا كیش یا وه‌لاتێ‌ ئیرانێ‌ بهێنه‌ ئه‌نجامدان ئه‌وژی، 4 president‌s club ل سه‌ر ئاستێ‌ یانا، هه‌روه‌سا fajr open  و Asian clubs championships ، له‌ورا وه‌كو دادڤانێ‌ ئێكانه‌ ل سه‌ر ئاستێ‌ ئیراقێ‌ و كوردستانێ‌ هاتیمه‌ ژێگرتن ژلایێ‌ ئێكه‌تیا نێڤده‌وله‌تی پشتی دووڤچوونا سیڤیێ‌ من كرین تایبه‌ت دووماهی پشكداریا من یا قاره‌مانیا پاكستانێ‌ ئه‌وا ل سالا بوری ب باشترین شێوه‌ من بڕێڤه‌برین و باوه‌رناما پله‌یا ئێك ژ باشترینان هاتیمه‌ خه‌لاتكرن

ژلایه‌كێ‌ دووڤه‌ شڤان له‌زگین ئه‌وچه‌نده‌ ژی دیاركر پشكداریا دادڤانێن جیهانی بۆ ڤان قاره‌مانیا ب سانه‌هی نینه‌ ژبه‌ركو ئێكه‌تیا نێڤده‌وله‌تی سیسته‌مه‌كێ‌ تایبه‌ت هه‌یه‌ ژلایێ‌ پله‌ و باوه‌رنامێن ده‌وله‌تی و پشكداری و ئه‌زمۆنێن سه‌ركه‌فتی كو لدووڤ رێنوما و یاسایێ‌ و دیسان ئه‌كتیڤ كرنا كارێ‌ خوه‌ و گوت: پێنه‌ڤێت ئارمانجێن من دمه‌زنن و پشكداری د ڤان چالاكیان دا ئێك ژوان ئارمانجایه‌ كو ده‌رگه‌هه‌ بۆ  چوونا ئۆلۆمپیادا جیهانی دا، له‌ورا ئه‌ز نا راوه‌ستیم و دێ‌ به‌رده‌وام خوه‌ پێشخیم بۆ گه‌هشتنا ئه‌وان ئارمانجا، پێنه‌ڤێت ئه‌گه‌ر پشته‌ڤانی ژی نه‌ بیت گه‌هشتن ژی بزه‌حمه‌ته‌ له‌ورا سۆپاسیا سكرتێرێ‌ یانا سێمێلێ‌ دلشاد شه‌هوانی دكه‌م یێ‌ كو به‌رده‌وام پشته‌ڤانه‌ و هیڤییا من ئه‌وه‌ جهێن په‌یوه‌ندیدار وه‌كو پارێزگار و به‌رپرسێن وه‌رزشی ژی پشته‌ڤانیێ‌ بكه‌ن ژبه‌ركو تاكه‌ كوڕدم ب گه‌همه‌ ڤی ئاستی.

ئه‌ڤرۆ، عه‌لی حاجی:

د داخویانیه‌كێ‌ دا سه‌رپه‌رستێ‌ تیما باسكێت بۆلا یانا زاخۆ دیاركر ئه‌و ئه‌نجامێن لاواز یێن تیما وان د خولا پلا نایابا ئیراقێ‌ دا هاتینه‌ تۆماركرن نه‌ د پێشبینیكری بوون و به‌روڤاژی پلانا مه‌ بوون بۆ قۆناغا دویێ‌.

عه‌بدولستار عه‌لی بۆ رۆژناما ئه‌ڤرۆ گوت: ئه‌و ئاستێ‌ تیمێ‌ د هه‌ردو یاریێن بوری دا و ئه‌نجامێن خوساره‌تیێ‌ كو د لاواز بوون نه‌ دپێشبینیكری بوون ژبه‌ركو ئاستێ‌ تیمێ‌ گه‌له‌ك باشتر لێهاتیه‌ تایبه‌ت د قۆناغا دویێ‌ دا سه‌رباری مه‌ یاریزان حسێن جاوی ل سه‌ر تیمێ‌ زێده‌كربوو بۆ مفا وه‌رگرتنا شیانێن وی ئه‌وێ‌ لدووڤ ناڤێ‌ خوه‌ نه‌بووی كو ئه‌و ئاریشا مه‌ هه‌یی نه‌شیایه‌ چاره‌سه‌ربكه‌ت، له‌ورا ئه‌م پێدڤی ب یاریزانان هه‌نه‌ ژبۆ به‌رده‌وامیا هه‌ڤڕكیێ‌ بۆ رێزێن پێشیا خولێ‌ و مه‌ پشت به‌ستن ل سه‌ر كۆمه‌كا باش یا یاریزانێن باژێرێ‌ خوه‌ كرینه‌ كو د تاقیكرنێن نوو دا نه‌ و شیاینه‌ ببنه‌ جهێ‌ باوه‌ریی سه‌رباری پێدڤیا وان ب وه‌رگرتنا شاره‌زاهیێ‌ و ئه‌م یێن د هه‌ڤڕكیێ‌ دا.

ژلایه‌كێ‌ دووڤه‌ ناڤهاتی گوت: وه‌رزێ‌ ئه‌ڤ ساله‌ تیما باسكێت بۆلا زاخۆ بوویه‌ هێزا ترسێ‌ هه‌مبه‌ری یانێن مه‌زن د خولا ئیراقێ‌ دا و لایه‌نه‌كێ‌ دی یێ‌ هێزا زاخۆ جه‌ماوه‌رێ‌ بوویه‌ كو هه‌ر یاریه‌كا دناڤ ئه‌ردێ‌ مه‌ هاتیه‌ كرن جه‌ماوه‌ر بوویه‌ یاریزانێ‌ نهێنی یێ‌ و سه‌ركه‌فتنێ‌ له‌ورا هیڤییا مه‌ ئه‌وه‌ جه‌ماوه‌ر به‌رده‌وامبیت ل سه‌ر پشته‌ڤانیێ‌.

ئه‌ڤرۆ،نه‌وزاد هلۆری:

د داخویانیه‌كێدا سه‌رۆكێ‌ رێكخراوا كۆبۆ ل كوردستانێ‌ بۆ رۆژناما ئه‌ڤرۆ دیاركر بۆ جارا ئێكێ‌ یه‌ ل هه‌رێما كوردستانێ‌ قاره‌مانیا كۆبۆ یا تایبه‌ت ب سیسته‌مێ‌ یاریا كۆنفویێ‌ ل پاریزگه‌ها دهۆكێ‌ هێته‌ ئه‌نجامدان ئه‌وا دێ‌ ل دووماهیا ڤێ‌ هه‌یڤێ‌ ب پشكداریا یاریزانێن هه‌رێمێ‌ و ده‌رڤه‌ بیت.

زێده‌تر خالد حه‌سه‌ن گۆت: قاره‌مانی دێ‌ ب پشكداریا 20 یاریزانان ژ كوردستانێ‌، ئیراقێ‌، توركیا و ئیرانێ‌ و چه‌ند وه‌لاتێن دی و ده‌ه یاریزانێن كورد كو حه‌فت ژ دهۆكێ‌ و زاخۆ نه‌، هه‌ر بۆ ڤان به‌رهه‌ڤیان دوهی نیشاندنا ب شێوازێ‌ فه‌یس ب فه‌یس ئانكۆ هه‌ڤڕكێن ئێك دناڤبه‌را قاره‌مانێ‌ پارێزگه‌ها دهۆكێ‌ موسته‌فا ره‌شید و یێ‌ ئیراقێ‌ فه‌هه‌د هاته‌ كرن، هه‌رچه‌نده‌ قاره‌مانیه‌كا ڤه‌گه‌ریه‌ لێ‌ گه‌له‌ك یا گرنگه‌ و ل گه‌له‌ك جهێن دی یێن وه‌لاتێن جیهانێ‌ دهێته‌ ئه‌نجامدان و ده‌ستنیشان كرنا باژێرێ‌ دهۆكێ‌ ژلایێ‌ رێكخراوا كۆبۆ ژبه‌ركو باژێره‌كێ‌ گرنگه‌ و ژێرخانه‌كا باش یا وه‌رزشی هه‌یه‌ و خه‌لكه‌كێ‌ زوور هه‌یه‌ پشته‌ڤانیا ڤێ‌ یاریێ‌ دكه‌ن.

بۆ زانین ئه‌ڤ قاره‌مانیا ژلایێ‌ فیدراسیۆنا كۆبۆ یا جیهانی و هه‌ڤكاری ل گه‌ل یا كوردستانێ‌ و ئیكه‌تیا لاوێن دیمۆكراتا كوردستانێ‌ و په‌یمانگه‌ها ڤیان یا وه‌رزشی هاتیه‌ رێكخستن.

ئه‌ڤرۆ،

لدووڤ راپۆرتێن رۆژنامه‌ڤانی ل وه‌لاتێ‌ فره‌نسا چوونا ستێرا ته‌پا پێی و یاریزانێ‌ یانا پاریس سانجێرمان یا فره‌نسی لیونێل مێسی بۆ ناڤ رێزێن یانا به‌رشه‌لۆنا یا ئسپانی دا ئازراندینه‌.

رۆژناما  El Confidencial یا فره‌نسی دیاركر ستێرا ئه‌رجه‌نتینی و پارێس سانجێرمان یێ‌ كه‌یفخووش نینه‌ و بوو هه‌ڤالێن خوه‌ یێن یانێ‌ دا دیاركرن ئه‌و هزر ل به‌رشه‌لۆنایێ‌ دكه‌ت و دوور نینه‌ دووباره‌ ڤه‌گه‌ڕیت، هه‌روه‌سا ئێك ژ به‌لگه‌یێن ڤێ‌ چه‌ندێ‌ كو دناڤ مالا مێسی دا چو یاریگه‌هێن ته‌پا پێی، مه‌له‌ڤانگه‌ه و باخچه‌یێ‌ مه‌زن نینه‌ به‌روڤاژی باژێرێ‌ به‌رشه‌لۆنا كو نێزیكی 20 كم دوور بوو ژ یاریگه‌هێ‌ و لسه‌ر ده‌ریایی و هه‌مبه‌ری چیایی بوو كو ستێرا ئه‌رجه‌نتینی ژێ‌ به‌هر بوویه‌، سه‌رباری یانا فره‌نسی شۆفێره‌ك و مامۆستایه‌كێ‌ تایبه‌تمه‌ند بۆ خێزانا وی به‌رهه‌ڤكرینه‌ لێ‌ ئه‌و ئازادی و خووشی و تێكه‌لیا وی ل به‌رشه‌لۆنا هه‌یی نه‌ شیایه‌ ل پاریسێ‌ قه‌ره‌بوو بكه‌ت.

هه‌مان رۆژنامێ‌ ل سه‌ر زارێ‌ هه‌ڤالێ‌ وی ئه‌نخێل دی ماریایی دیاركریه‌ مێسی دێ‌ بزاڤێ‌ كه‌ت بۆ وه‌رزێ‌ بهێت ڤه‌گه‌ڕیته‌ ئسپانیا ئه‌ڤچه‌نده‌ به‌رپرسێن به‌رشه‌لۆنا كه‌یفخووش كرینه‌ و هه‌رزو هاتینه‌ ده‌نگ و به‌رهه‌ڤن پێشوازیا وی بكه‌ن لێ‌ دڤێت ئه‌وان مه‌رجێن هاتینه‌ دانان جهبینن ژبۆ ڤه‌گه‌ڕیانا وی.