سندس سالح سلێڤانەیی:
مەدیاكار(رێژین ئەحمەد) د دیدارەكێ دا بۆ رۆژناما ئەڤرۆ گۆت: هەلبژارتنا من بۆ كارێ راگەهاندنێ ل دووف حەزا من بوو، دەوروبەر ژی گەلەك د هاریكار بوون، ژینگەهەكا باش هاتە پێش كو ئەز بچمە دڤی كاری دا، خواندنا من ژی پشكەكا وێ گرێدای راگەهاندنێ بوو، بەری بچمە زانكۆیێ كو ئەز دەرچۆیا كولیژا یاسایێ/ پشكا پەیوەندیێن نێڤ دەولەتی مە، من ل راگەهاندنێ كاردكر، بەلێ ل پشت شاشێ بوو، ل 2012 وەرە ل راگەهاندنێ كاردكەم، من شەنسەكێ مەزن هەبوو كو ل گەلەك كەنالێن هەرە باشێن كوردستانێ كاربكەم، كەنالێ ئێكێ من لێ كاركری وەك نڤیسەرا دەنگوباسان ل وار تیڤی بوو كو ل 2012 من دەستپێكر و هەتا 2017 ئەز یا بەردەوام بووم، پشتی وی دەمی من دەست ژكاركێشانا خوە راگەهاند و ئەز چوومە كەنالێ كوردستان 24 و هەتا 2020 ل وێرێ ژی مام پاشان من دەست ژكاركێشانا خوە ل وێرێ ژی راگەهاند و جارەكا دی زڤڕیمە ڤە كەنالێ وار و هەتا نوكە یا بەردەوامم.
هەروەسا گۆت: دڤێ رێیا درێژدا من گەلەك كارێن باش كرینە و ئەزخوە دبینم پەیامنێرەكا سەركەفتی و پێشكێشكارەكا مەیدانی و من سەرەدانا هژمارەكا وەلاتان كریە و كونفرانسێن نێڤ دەولەتی ب رێڤەبرینە و هەموو ئەندامێن مالباتێ پشتەڤانێن بهێزبوون كو یا بەردەوامبم، و هەكە ل دەمێ مە ئەڤ ئالاڤێن راگەهاندنێ ئەوێن نوكە هەین و ئەم بكاردئینین هەكە ل وی دەمی هەبان ئەم دا گەلەك سەركەفتی تربین، لێ نوكە ئەم یێ ل سەر دەمەكی هەموو تشت ب ساناهی ب دەستكەڤن، ژوانا ب دەستكەفتنا پێزانیان و ڤەكرنا خولان و …. هتد، لەورا نوكە پتر كچ دهێنە دناڤ بۆارێ راگەهاندنێ دا، چنكو دەلیڤە یا پێ دان كو بهێت خوە تێدا ببینیت، ئەز نابینم كارەكێ خرابە، لێ نە هەر كەسەكێ مایكەك هەلگرت پەیامنێرەكێ زیرەكە، ئەز ئاستێ وان باش دبینم لێ پێدڤیە پترخوە زیرەك بكەن و بخوینن دا خوە ل گەل پێشكەفتنا نوكە خوە بگونجینین و پتر پێزانیان ل خوە زێدەبكەین.
نيشاندان