ئه‌ڤرۆ:
وه‌زیرێ ساخله‌میا هه‌رێما كوردستانێ داخوازێ ژ وه‌لاتیان دكه‌ت ڤاكسینێ بكاربینن و دبێژیت: باشترین پێنگاڤ بۆ خوه‌پاراستن ژ كۆرۆنایێ دانانا ڤاكسینێ یه، د نوكه دا 650 هزار ڤاكسین ل به‌رده‌ستن بۆ دانانێ.
دكتۆر سامان به‌رزنجی، وه‌زیرێ ساخله‌میا حوكمه‌تا هه‌رێما كوردستانێ بۆ ئاژانسا خانی دیار كر، باشترین چاره‌سه‌ری بۆ خوه‌پاراستن ژ ڤایرۆسێ كۆرۆنایێ بكارئینانا ڤاكسینێ یه و پێدڤیه هه‌موو وه‌لاتی ڤاكسینێ بدانن، چونكو دێ وان ژ كۆرۆنایێ پارێزیت و گۆت: “هه‌تا نوكه ل سه‌رانسه‌ری هه‌رێما كوردستانێ 800 هزار كه‌سان قۆرچا ئێكێ وه‌رگرتیه و 491 هزار كه‌سان ژی هه‌ردو قۆرچێن ڤاكسینێ وه‌رگرتینه، ڕێژا كه‌سێن ڤاكسین وه‌رگرتی گه‌هشتیه 24%ێ، حكومه‌تا هه‌رێمێ یا كار دكه‌ت هه‌تا دووماهیا ئه‌ڤ ساله ڕێژا وه‌رگرتنا ڤاكسینێ بگه‌هینیته 40%ێ”.
دكتۆر سامان به‌رزنجی دیار ژی كر، هه‌موو جۆرێن ڤاكسینان ل به‌رده‌ست هه‌نه و وه‌لاتی دشێن بێی سرا و ناڤ تۆماركرن ڤاكسینێ وه‌ربگرن.
وه‌زیرێ ساخله‌میا گۆت: “جوداهی د ناڤبه‌را ڤاكسینان دا نینه و هه‌موو جۆرێن ڤاكسینان كاریگه‌ری هه‌نه، نوكه ل ئیراقێ پێنج ملیۆن ڤاكسین ل د ناڤ عمباران دا هه‌نه و ل هه‌رێما كوردستانێ ژی 650 هزار ڤاكسین هه‌نه بۆ بكارئینانێ، هه‌روه‌سا نوكه چه‌ندین تیم هاتینه پێكئینان ل جهێن گشتی دگه‌ڕن بۆ دانانا ڤاكسینێ”.
نيشاندان