زاویته، نه‌وزاد هلۆری:
د ئه‌ڤ ساله دا سكرێ زاویته ل دهۆكێ ب تمامی هشك بوویه، زێده‌باری زیان گه‌هاندن ب چاندن و داروبارێن ده‌وروبه‌ر، هه‌ڤده‌م هزاران ماسی ژی تێدا مرن، جهێن شوله‌ژێ و شاره‌زایێن جیولوجی ژی بوچونێن جودا هه‌نه.
حه‌جی ئیبراهیم، ئێك ژ وه‌لاتیێن ده‌ڤه‌رێ یه و رۆژانه ل ده‌ورۆبه‌رێن سكری كار دكه‌ت ل سه‌ر بابه‌تی گۆت: (ده‌ما چه‌ند سالایه سكرێ زاویته هاتیه چێكرن و خه‌لكه‌كێ زۆر مفا ژ ئاڤا وێ وه‌ردگرت، به‌لێ جهێ داخێ یه ئه‌ڤه چه‌ند رۆژه‌كه ب تامی هشك بوی و زیانێن زۆر گه‌هاندینه ره‌ز و بیستان و ئه‌و چاندنا ل ده‌وروبه‌رێن به‌نداڤێ هاتینه چاندن، زێده‌باری كو هزاران ماسی تێدا مرنه و داروبارێن ده‌ورۆبه‌ر كارتێكرن ل سه‌ر هاتیه‌كرن، دیسان سه‌ر و سیمایێ ده‌ڤه‌رێ كرێت بویه ژ به‌ركو ئێك بوو ل جهێن گه‌شتیاری و چه‌ندان كه‌پر و خارنگه‌هێن ده‌مكی ل ده‌ورۆبه‌ر هاتینه چێكرن، ئه‌ز ژی ئێك بووم ژ وان كه‌سێن ل ده‌ورۆبه‌رێن سكری بازاره‌كێ بچوك بخوه دانای و ده‌ما گشتیاران قه‌ستا سكری دكر تشت ژ مه دكرین).
ره‌مه‌زان حه‌مزه، شاره‌زایێ جیولوجی ل دهۆكێ دیاركر كو دوو ئه‌گه‌ران كارتێكرن ل هشكبوونا سكرێ زاویته كریه و گۆت: (مخابن پشتی چه‌ند ساله‌كێن كێم ژ چێكرنا به‌نداڤا زاویته هشك ببیت، هه‌ر چه‌نده هشكه سالی و كێم بارینا بارانان كارتێكرن ل سه‌ر هشكبوونا وێ كریه، به‌لێ ئه‌گه‌را سه‌ره‌كی یا هشكبوونا سكرێ زاویته دزڤریت بۆ وێ یه‌كێ كو جهێ وێ گونجای نیه و ب تایبه‌تی كو ل نێزیكێ جاددا سه‌ره‌كی یه و ئاخا وێ ب كێر ناهێت).
هێژا عه‌بدولواحد، رێڤه‌به‌رێ ئاڤدێریێ ل دهۆكێ دیار كر، ئه‌گه‌رێ سه‌ره‌كی یێ هشكبوونا سكرێ زاویته بۆ هشكه‌سالیێ و كێم بارینا بارانان دزڤریت و گۆت: (سكرێ زاویته شیانێن كومكرنا نێزیكێ 50 هزار مه‌ترێن سێجا یێن ئاڤێ هه‌یه و نێزیكێ 150 دونه‌مێن عه‌ردێ چاندنێ پێ دهێته ئاڤدان و 100% پشتبه‌ستنێ ب ئاڤا بارانێ دكه‌ت).
زێده‌تر گۆت: (ئه‌ڤه ئێكه‌م جاره ئاڤا سكرێ زاویته ب تمامی هشك دبیت، ژبلی ڤێ یه‌كێ هه‌ر به‌نداڤه‌كا ل سنوورێ پارێزگه‌ها دهۆكێ هاتیه چێكرن و پشتبه‌ستنێ ب ئاڤا بارانێ بكه‌ت نێزیكێ 80% ئاڤا وان هشكبویه).
به‌نداڤا زاویته ل سالا 2009ێ ژلایێ حوكمه‌تا هه‌رێما كوردستانێ ل زاویته ب دوراتیا 10كم ل دهۆكێ هاتیه چێكرن و بلنداهیا وێ 12 مه‌تره.
نيشاندان