ئه‌ڤرۆ،

دهێته‌ چاڤه‌ڕێ‌ كرن ئه‌ڤرۆ هه‌ر سێ‌ یانێن كوردستانێ‌ یاریێن خوه‌ یێن گه‌ڕا حه‌فتێ‌ ژ خولا پلا نایابا ئیراقێ‌ یا ته‌پا پێی ب ئارمانجا سه‌ركه‌فتنێ‌ و ژ ده‌رڤه‌یی یاریگه‌ها خوه‌ ئه‌نجامبده‌ن.

تیما یانا زاخۆ دێ‌ بیته‌ مێڤانا یانا دیوانیه‌، كوڕێن خابووری ئه‌وا ب هه‌شت خالان رێزا حه‌فتێ‌ دهێت دێ‌ بزاڤێ‌ كه‌ت قه‌ره‌بوویا سێ‌ خالێن یاریا بوری بهێته‌كرن، هه‌رچه‌نده‌ خودانێن ئه‌ردی د ره‌وشه‌كا باش دانینه‌ كو بتنێ‌ سێ‌ خال هه‌ین و رێزا 19ێ‌ و به‌ری دووماهیێ‌ دهێت دێ‌ بزاڤێ‌ كه‌ت مفایی ژ ئه‌رد و جه‌ماوه‌رێ‌ خوه‌ وه‌ربگریت و ڤه‌گه‌ڕیێته‌ ناڤ هه‌ڤڕكیان دا، ژلایه‌كێ‌ دووڤه‌ یانا پایته‌ختی تیما هه‌ولێرێ‌ پشتی سه‌ركه‌فتنا بوری ل سه‌ر ته‌له‌به‌ گه‌شبینه‌ د یاریا ئه‌ڤرۆ دا ده‌مێ‌ دبیته‌ مێڤانا كاره‌با ل به‌غدا سه‌ركه‌فتنا دویێ‌ بده‌ستخوه‌ڤه‌ بینت، هه‌ولێر شه‌ش خال كومكرینه‌ و رێزا 12ێ‌ دهێت، كاره‌با رێزا هه‌شتێ‌ دهێت و هه‌شت خال هه‌نه‌، ژلایێ‌ خوه‌ڤه‌ نه‌وروز دێ‌ بیته‌ مێڤانا سامرا، یانا باژێرێ‌ سلێمانیێ‌ ب چار خالان رێزا 15ێ‌ دهێت و هه‌ڤڕكا وێ‌ سامرا ب خاله‌كێ‌ رێزا 20ێ‌ و دووماهیێ‌ دهێت.

بۆ زانین نه‌فت وه‌سه‌ت ب 18 خالان سه‌رێ‌ لیستا خولێ‌ دهێت، شورته‌ كێمتریا دو خالان رێزا دویێ‌، نه‌فتا به‌سرا ب 13 خالان رێزا سێیێ‌، جه‌ویه‌ ب هه‌مان خال كێمتریا گۆلان رێزا چارێ‌، زه‌ورا 12 خالان رێزا پێنجێ‌ و ته‌له‌به‌ ب ده‌ه خالان رێزا شه‌شێ‌ دهێن.

ئه‌ڤرۆ، زنار زوبێر:

راهێنه‌رێ‌ تیما تایكواندویا یانا ئافره‌تێن دهۆكێ‌ دیاركر د ئێكه‌م پشكداریا خوه‌ یا قاره‌مانیێن فه‌رمی دا شیان كونترولا كاسا ئیراقێ‌ بكه‌ن لسه‌ر ئاستێ‌ لاوان و تازه‌پێگه‌هشتیان و ئه‌ڤ ده‌ستكه‌فته‌ ژی ڤه‌دگه‌ریت بۆ پشته‌ڤانیا یانێ‌.

زێده‌تر ئه‌حمه‌د محه‌مه‌د د دیداره‌كا تایبه‌ت دا بۆ رۆژناما ئه‌ڤرۆ گۆت: لدووڤ ئه‌و پلانا كارگێریا یانا ئافره‌تێن دهۆك دارشتی و ئاراسته‌ی من كری ماوێ‌ زێده‌تر ژ ساله‌كێ‌ یه‌ كار ل سه‌ر یاریزانێن ژیێ‌ بچووك دكه‌ین بۆ قاره‌مانیێن تایكواندویێ‌ ب پشته‌ڤانیا كارگێریا یانێ‌ شیاین پشكداریێ‌ د قاره‌مانیا ئیراقێ‌ یا تایكواندویێ‌ دا بكه‌ین كو (55) یانا تێدا پشكداری كربوو ئه‌وا ل باژێرێ‌ به‌غدا ب دووماهی هاتی.

نافهاتی ئه‌وچه‌نده‌ ژی دیاركر یا ب ساناهی نه‌بوو ئه‌و بشێن یاریزانێن ژیێ‌ وان بچووك به‌ر ب به‌غدا ببه‌ن بۆ پشكداریێ‌ لێ‌ كارگێریا یانا ئافره‌تێن دهۆك هه‌موو ئاسانكاری كربوون دگه‌ل خێزانێن یاریزانان و قوتابخانێن وان، سه‌ره‌رای هه‌ڤركیه‌كا بهێز ئه‌و شیان ل سه‌ر ئاستێ‌ لاوان و تازه‌پێگه‌هشتیان رێزێن هه‌رسێ‌ سه‌ركه‌فتیێن ئێكێ‌ ده‌ستخوه‌ڤه‌ بینن د كێشێن جودا دا.

ل دووماهیێ‌ ئه‌حمه‌د محه‌مه‌د گۆت: ئه‌و دێ‌ ل حه‌فتیا بهێت ده‌ست ب به‌رهه‌ڤیان كه‌ن بۆ قاره‌مانیه‌كا دی یا ئیراقێ‌ كو بریاره‌ ل هه‌یڤا كانوونا دویێ‌ یا ئه‌ڤ ساله‌ ل باژێرێ‌ سلێمانیێ‌ بهێته‌ كرن و دێ‌ هه‌موو بزاڤان كه‌ن دوباره‌ كونترولا وێ‌ قاره‌مانیێ‌ ژی بكه‌ن.

ئه‌ڤرۆ،

ئه‌ڤرۆ كوڕێ‌ باژێرێ‌ سێمێلێ‌ و دادڤانێ‌ خودان شارا ده‌وله‌تی بۆ یاریا تایكۆاندویێ‌ شڤان له‌زگین دێ‌ به‌ره‌ ب وه‌لاتێ‌ پاكستانێ‌ ڤه‌ چیت ژبۆ پشكداریێ‌ برێڤه‌برنا یاریێن قاره‌مانیا نێڤده‌وله‌تی G1.Gran slam ئه‌وا بڕیاره‌ هه‌ڤڕكیێن وێ‌ ل دووماهیا ڤێ‌ حه‌فتیێ‌ بهێنه‌ ئه‌نجامدان.

د داخویانیه‌كێدا ناڤهاتی بۆ رۆژناما ئه‌ڤرۆ گوت: وه‌كو دادڤانێ‌ ئێكانه‌ سه‌ر ئاستێ‌ كوردستانێ‌ و ئیراقێ‌ ژلایێ‌ ئێكه‌تیا جیهانێ‌ ڤه‌ هاتیمه‌ ده‌ستنیشانكرن ژبۆ پشكداری ئێك ژ مه‌زنترین قاره‌مانیێن نێڤده‌وله‌تی بكه‌م ئه‌وژی قاره‌مانیا كێشوه‌ران G1.Gran slam كو دێ‌ هه‌ڤڕكیێن وێ‌ ب پشكداریا زێده‌تری 36 وه‌لاتێن جیهانێ‌ ل ئیسلا ئاباد هێنه‌ كرن.

هه‌روه‌سا شڤان له‌زگین ئه‌وچه‌نده‌ ژی دیاركر كو ئه‌ڤ قاره‌مانیه‌ ئێك ژ خه‌ونێن وی بوو و هه‌ر دادڤانه‌كێ‌ ئیراقێ‌ و كوردستانێ‌ ژی حه‌ز دكه‌م و خه‌ونا وی یه‌ پشكداریێ‌ بكه‌ت ژبه‌ركو قاره‌مانیه‌كا سه‌ر ئاستێ‌ جیهانێ‌ یه‌ و تایبه‌تمه‌نده‌، پێخووشحالم گه‌هشتیمه‌ ڤێ‌ پێنگاڤێ‌ و گه‌شبینم وه‌كو كورده‌ك و خه‌لكێ‌ پارێزگه‌هێ‌ دێ‌ باشترین شێوه‌ یارییان برێڤه‌ببه‌م و ناڤێ‌ وه‌لاتێ‌ خوه‌ بلندبكه‌م.

بۆ زانین شڤان له‌زگین ئێك ژ دادڤانێن شاره‌زا و ده‌وله‌تی ژبه‌ر شیان و رۆلێ‌ وی بوویه‌ ئه‌ندامێ‌ دادڤانێن ئیراقێ‌ و د ماوێ‌ پێنچ سالێن بوری دا پشكداری خولێن دادڤانیێ‌ یێن كورسێن جودا ل سه‌ر ئاستێ‌ جیهانێ‌ كرینه‌ تایبه‌ت ل وه‌لاتێن ئیرانێ‌، مسرێ‌، توونس و رۆسیا.

ئه‌ڤرۆ،

هه‌ر ژ رۆژا ئیمزاكرنا گرێبه‌ستا یاریزانێ‌ ئسپانی سێرجیۆ راموس ل گه‌ل یانا پاریس سانجێرمان نه‌شیایه‌ پشكداری چو یاریێن فه‌رمی یێن خولا فره‌نسا و چامپیۆنزێ‌ دا بكه‌ت ژبه‌ر به‌رده‌وامیا هنگاڤتنان.

لدووڤ رۆژناما لۆ باریزیان یا فره‌نسی كو سه‌رۆكێ‌ یانا پاریس سانجێرمان ناسر ئه‌لخه‌لیفی داخاز ژ كادرێ‌ راهێنانێ‌ كریه‌ ل یاریزانه‌كێ‌ جهێ‌ وی په‌یدابكه‌ن و دووماهیا ڤێ‌ حه‌فتیێ‌ دێ‌ ل گه‌ل رامۆسی كۆم بیت ژبۆ گه‌نگه‌شێ‌ ل سه‌ر به‌ندێن گرێبه‌ستا وی تایبه‌ت پشتی راپۆرتا رۆژنامه‌ڤانی دیاركری كو ئاریشا هنگاڤتنا وی ژڤانێن ڤه‌گه‌ڕیانێ‌ بۆ ناڤ یاریگه‌هێ‌ دیار نه‌كریه‌، لێ‌ یانا پاریسێ‌ نه‌چاره‌ هه‌یڤانه‌ مووچێ‌ وی بۆ دابینبكه‌ت ئه‌ڤچه‌نده‌ ژی بوویه‌ بارگرانی و هه‌روه‌سان سانجێرمان نه‌چاره‌ كۆژمێ‌َ 32 ملیۆن یۆرۆیا بۆ رامۆسی به‌رهه‌ڤبكه‌ت هه‌كه‌ گرێبه‌ستا وی به‌ری دووماهیا ژڤانێ‌ ده‌ستنیشانكری ب هه‌وله‌شینیت كو گرێبه‌ست هه‌تا هاڤینا 2023 یه‌.

ژلایه‌كێ‌ دووڤه‌ یانێن به‌رشه‌لۆنا، ئه‌تله‌تیكو مه‌درید، بایرن میونخ، یۆڤانتۆس، مانچسته‌ر ستی و توتنهام چاڤه‌ڕێ‌ هه‌لوه‌شاندنا گرێبه‌ستا رامۆسی نه‌ پێخه‌مه‌ت ئینانا وی بۆ ناڤ رێزێن تیما خوه‌.

ئه‌ڤرۆ،

ستێرا ئسپانی و راهێنه‌رێ‌ سه‌د یا قه‌ته‌ری چاڤی هێرناندێز دیاركر كو ڤه‌گه‌ڕیان به‌ره‌ ب به‌رشه‌لۆنا نێزك بوویه‌ و بتنێ‌ چه‌ند پێنگاڤه‌كێن كێم ماینه‌ بۆ ئیمزاكرنا گرێبه‌ستا خوه‌ یا دیرووكی.

زێده‌تر ئه‌وێ‌ بۆ رۆژناما مۆندۆ دیپۆرتیڤۆ یا ئسپانی گوت: یانا سه‌د یا رازی یه‌ و ئه‌ز ئاگه‌هداركریمه‌ كو هه‌رده‌مێ‌ بڤێت بچیت سه‌رباری گرێبه‌ست هه‌تا دو سالێن دی ماینه‌، بتنێ‌ یانا قه‌ته‌ری چاڤه‌ڕێ‌ نڤێسارا فه‌رمی یا داخازیێ‌ نه‌ ژبۆ ده‌ست به‌ردانێ‌ و ئه‌ڤچه‌نده‌ ژی مافێ‌ وانا یه‌.

ژلایه‌كێ‌ دیڤه‌ رۆژنامێن قه‌ته‌ری ئه‌وچه‌نده‌ ژی دۆپاتكریه‌ كو دبیت چاڤی چوونا خوه‌ ژ یانا سه‌د رابگه‌هینت پشتی یاریا وان یا ڤێ‌ حه‌فتیێ‌ ل گه‌ل یانا دحێل ژ خولا قه‌ته‌ری و یانا به‌رشه‌لۆنا ل سه‌ر هه‌موو مه‌رجێن یانا سه‌د رازی بوویه‌.