ئه‌ڤرۆ، نه‌وزاد هلۆری:

10 سالان به‌ری نوكه‌ حوكمه‌تا هه‌رێما كوردستانێ‌ ب رێیا قه‌رێن بچووك خزمه‌تا گه‌نجان و جوتیار و خودان پێشه‌یان دكر، هه‌ر چه‌نده‌ بریار ئه‌و بوو هه‌ر ب هه‌مان پاره‌ی چه‌ندان كه‌سانێن دی ببن خودان كار و پێشه‌ ب هه‌مان قه‌ر، به‌لێ‌ چه‌ندان ساله‌ هاتینه‌ راگرتن، ئه‌ڤ یه‌ك بوویه‌ ئه‌گه‌ر گه‌نجێن مه‌ زیانداربن و پشكه‌ك ژ وان ژ بێ‌ كاریێ‌ قه‌ستا ده‌رڤه‌ بكه‌ن.

گوهدار عه‌بدوللا، رێڤه‌به‌رێ‌ قه‌رێن بچووك ل دهۆكێ‌ بۆ ئه‌ڤرۆ دیار كر، پرۆژێ‌ قه‌رێن بچووك دزڤریت بۆ سالا 2011ێ‌ ده‌ما پاره‌كێ‌ باش د ده‌ستێن حوكمه‌تا هه‌رێما كوردستانێ‌ دا و بۆ رۆژناما ئه‌ڤرۆ گۆت: (ل وی ده‌می نیه‌تا حوكمه‌تێ‌ ژبلی كو گه‌نجان بده‌ت كاری و بكه‌ت خودان كار و پێشه‌، د هه‌مان ده‌م دا نیه‌ت ئه‌و بو كو خه‌لكی ژ موچه‌ی و دامه‌زراندنێ‌ و چونا ده‌رڤه‌ و كارێن خراپ بهێنه‌ وه‌رگێران، ل پارێزگه‌ها دهۆكێ‌ ژی كاروبارێن پێدڤی بۆ دانا قه‌رێن بچووك هاتنه‌ پێكئینان و ب گوره‌ی مه‌رج و رێنما قه‌ردانه‌ گه‌نجان).

زێده‌تر گۆت: (هه‌ر سالێ‌ 25 ملیار دینار بۆ دانا قه‌رێن بچووك هاتنه‌ ته‌رخانكرن، دانا قه‌را دناڤبه‌را دوو ملیون دینار بۆ 15 ملیون دیناران دانه‌ گه‌نجان داكو كاروپێشه‌یێن خوه‌ ب رێڤه‌ ببه‌ن، ئه‌و پاره‌ ب دوو قستان ددانه‌ وان، لژنه‌كا تایبه‌ت دا سه‌ره‌دانا پرۆژێ‌ وی كه‌ت و ته‌خمینێ‌ بۆ كه‌ت، پاشان ئه‌و پاره‌  ددانه‌ وان).

ناڤبری دیاركر ژی كو دوو هزار و 348 كه‌سان ل پارێزگه‌ها دهۆكێ‌ مفا ژ وان پرۆژان وه‌رگرتیه‌ كو ژ وان 152 ئافره‌ت بوون و گۆت : (30% ژ وان پرۆژێن ب قه‌ر داینه‌ وان هاتینه‌ راگرتن و ئه‌گه‌ر ژی دزڤریت بۆ قه‌یرانا دارایی و شه‌رێ‌ داعش و په‌ژیكا كۆرۆنایێ‌ و چه‌ندان ئه‌گه‌رێن دی، پرۆژه‌ پێكدهاتن ژ پرۆژێن چاندنێ‌، پێشه‌، بازرگانی، بازارگه‌ری و چه‌ندان جورێن دی، ل سالێن كو شه‌رێ‌ داعشێ‌ هه‌ی مه‌ وه‌رگرتنا پاران راگرت ونكی خه‌لكی پاره‌ نه‌بوون، نوكه‌ ئه‌م جاره‌كا دی پاره‌ی وه‌ردگرین به‌لێ‌ قه‌ران ناده‌ین، یا دروست ژی دڤیا ئه‌و پاره‌ هاتبا وه‌رگرتن و پاره‌ هاتبا دان بۆ گه‌نجان).

ل بارا نه‌ زڤراندنا پاران ژی گوت: (ئه‌گه‌ر پاره‌ ده‌ما خوه‌ دا نه‌هێته‌ زڤراندن دێ‌ زێده‌ی چیته‌ سه‌ر و ئه‌گه‌ر زێده‌تر گیروبوو دێ‌ ژ كه‌فیلێن وان هێته‌ وه‌رگرتن، نوكه‌ پاره‌ ل نێزیكێ‌ 300 كه‌فیلان دهێته‌ وه‌رگرتن سه‌را هندێ‌ كو ئه‌و پاره‌ی ناده‌ن و چه‌ند ژ وان چوینه‌ دادگه‌هێ‌ و ئاریشه‌ دناڤبه‌را وان و كه‌فیلان دروست بویه‌، ژبه‌ركو هنده‌ك ژ وان ب هه‌ڤالینی و خزمایه‌تی و جیرانی بوینه‌ كه‌فیل و هنده‌ك ژ خودانێن قه‌را چوینه‌ ژ ده‌رڤه‌  و كه‌فیل دده‌ت دیاركرن كو ئه‌وی ئاگه‌هی ل ڤێ‌ یه‌كێ‌ نه‌بویه‌).

رێڤه‌به‌رێ‌  قه‌رێن بچووك ل دهۆكێ‌ د درێژاهیا ئاخفتنێن خودا دیار كر ژی كو پێشتر بریار هه‌بوو ئه‌ڤ ساله‌ جاره‌كا دی ده‌ست ب دانا قه‌رێن بچووك بهێته‌كرن، به‌لێ‌ په‌ژیكا كۆرۆنایێ‌ بویه‌ ئه‌گه‌ر كو پرۆژه‌ بهێته‌ راوستاندن و گۆت ژی: (هه‌تا نوكه‌ چو بریار نینن دووباره‌ ده‌ست پێ‌ بكه‌ن، پرانیا وان پرۆژێن هاتینه‌ چێكرن دكه‌ڤنه‌ باژێرێ‌ دهۆكێ‌، به‌لێ‌ ل گوند و كومه‌لگه‌هان ژی هاتینه‌ چێكرن ئانكو ل هه‌موو ده‌ڤه‌ران هاتینه‌ چێكرن، ئه‌گه‌ر جاره‌كا دی پرۆژه‌ ه‌ست پێ‌ بكه‌ت ڤه‌ دێ‌ بێكاری كێم بیت و گه‌نج ناچنه‌ ژ ده‌رڤه‌ و بزاڤ دێ‌ كه‌ڤیته‌ بازاری، ئه‌م دخوازیت ئه‌و كه‌سانێن قه‌ر وه‌رگرتی قه‌رێن خوه‌ بزڤرینن داكو كه‌سانێن دی مفاداربن).

—————————–

ئه‌ڤرۆ، ئه‌میر ئه‌ترووشی:

سه‌رۆكێ‌ ده‌سته‌یا وه‌به‌رهێنانێ‌ ل هه‌رێما كوردستانێ‌ راگه‌هاند، د كابینا نوو یا حۆكمه‌تا هه‌رێما كوردستانێ‌ دا وه‌به‌رهێنانێ‌ گه‌شه‌یه‌كا مه‌زن كریه‌ و ئاستێ‌ وه‌به‌رهێنانێ‌ هه‌شت ملیار دۆلار ده‌ربازكرینه‌ و ب كۆژمێ‌ زێده‌تری 19 ملیار دۆلاران ژی پرۆژه‌یێن په‌سه‌ندكری یێن وه‌ربه‌رهێنانێ‌ ل هه‌رێما كوردستانێ‌ هه‌نه‌.

د. محه‌مه‌د شوكری، سه‌رۆكێ‌ ده‌سته‌یا وه‌به‌رهێنانێ‌ ل هه‌رێما كوردستانێ‌ بۆ رۆژنامه‌یا ئه‌ڤرۆ دیار كر، ل هه‌رێما كوردستانێ‌ وه‌به‌رهێنانا ناڤخۆیی نێزیكی 85% بخۆڤه‌ دگریت و 6% كه‌رتێ‌ گشتی یه‌ و سه‌دێ‌ نه‌ه ژی وه‌به‌رهێنانا هه‌ڤپشكه‌ دناڤبه‌را هه‌رێمێ‌ و كه‌رتێ‌ تایبه‌ت دا و گۆت: ب تنێ‌ د ماوێ‌ دوو سالێن بۆری دا ده‌سته‌یا وه‌به‌رهێنانێ‌ ل هه‌رێما كوردستانێ‌ شیایه‌ 139 پرۆژه‌یێن وه‌به‌رهێنانێ‌ ییێن مه‌زن ل هه‌رێما كوردستانێ‌ ئه‌نجام بده‌ن.

ناڤبری زێده‌تر دبێژیت: قه‌بارێ‌ وه‌به‌رهێنانێ‌ ل هه‌رێما كوردستانێ‌ گه‌هشتیه‌ هه‌شت ملیار و 500 ملیۆن دۆلاران و ب كۆژمێ‌ 19 ملیار دۆلارێن دی ژی پرۆژه‌یێن په‌سه‌ندكری هه‌نه‌ و ب ڤی شێوه‌ پرۆژه‌یێن وه‌به‌رهێنانێ‌ ل هه‌رێما كوردستانێ‌ دێ‌ گه‌هنه‌ 940 پرۆژه‌یان و ب قه‌بارێ‌ 72 هزار دۆنه‌مێن ئه‌ردی وه‌به‌رهێنانێ‌ دهێنه‌ كرن.

ئه‌و یه‌ك ژی ئاشكرا كر، مه‌ پلان بۆ وێ‌ یه‌كێ‌ دانایه‌ ده‌مێ‌ وه‌به‌رهێنه‌ره‌ك پرۆژه‌یه‌كی پێشكێشی رێڤه‌به‌ریه‌كا حۆكمه‌تێ‌ دكه‌ت، پێدڤیه‌ مامه‌له‌ و به‌رسڤدان ژ 30 رۆژان ده‌رباز نه‌بیت و گۆت: پتریا ئه‌ڤ پرۆژه‌یێن وه‌به‌رهێنانێ‌ ل هه‌رێمێ‌ د به‌رده‌وامن و سه‌ره‌رای قه‌یرانا دارایی و په‌تایا كۆرۆنایێ‌ ژی هه‌ر كارتێدا دهێته‌ كرن.