ئه‌ڤرۆ

دهێته‌ چاڤه‌ڕێكرن ئه‌ڤرۆ پروسێسا هه‌لبژارتنێن یانێن وه‌رزشی بۆ ده‌ستنیشانكرنا ده‌سته‌كا نوو یا كارگێریێ‌ ل هه‌موو باژێر و قه‌زایێن سه‌ر ب پارێزگه‌هێن هه‌رێما كوردستانێ‌ هێنه‌ كرن كو 79 یانه‌ لدووڤ خشته‌كێ‌ دیاركری دێ‌ هه‌لبژارتنێن خوه‌ ئه‌نجامده‌ن ژوانا 13 یانێن دهۆكێ‌ پشكدارن.

سه‌ردار حه‌یده‌ری به‌رپه‌رسێ‌ یانێن وه‌رزشی ل رێڤه‌به‌ریا گشتی یا وه‌رزشی ل هه‌رێما كوردستانێ‌ بۆ رۆژناما ئه‌ڤرۆ گوت: بڕیاره‌ ئه‌ڤرۆ ده‌ست ب پرۆسێسا هه‌لبژارتنان لدووڤ رێنوما و مه‌رجێن سالا 2013 و2017 و یاسا وه‌رزشی یا ئیراقی به‌ندێ‌ 16 یا سالا 1986ێ‌ بهێنه‌ ئه‌نجامدان ژبۆ ژێگرتنا ده‌سته‌كا نوو یا كارگێریێن یانا بۆ چار سالێن بهێت، ژ پارێزگه‌ها دهۆكێ‌ 13 یانه‌ پشكدارن، هه‌ولێرا پایته‌خت 33 یانه‌، سلێمانیێ‌ 30 یانه‌ و ده‌ڤه‌را گه‌رمیان سێ‌ یانه‌ و ئه‌ڤ پرۆسێسه‌ هه‌تا 27ێ‌ ڤێ‌ هه‌یڤێ‌ به‌رده‌وامبیت كو رۆژانه‌ یانه‌ك هه‌تا دو یانه‌ دێ‌ هه‌لبژارتنێن خوه‌ ئه‌نجامده‌ن ب سه‌رپه‌رشتیا لژنه‌كا پسپۆر.

ژلایه‌كێ‌ دووڤه‌ ناڤهاتی دیاركر كو ژ گرنگترین رێنوما و یاسا هه‌لبژارتنان، دڤێت هه‌موو به‌ربژارێن خوه‌ كاندید كربیت بۆ كارگێریا یانێ‌ خودان باوه‌رنامه‌یێن بلندبن ژ یا ئاماده‌یی و سه‌ردا بتنێ‌ ده‌لیڤه‌ هاتیه‌ دان كو وه‌رزشڤانه‌ك خزمه‌تا وێ‌ یانێ‌ و كوردستانێ‌ و ئیراقێ‌ كربیت بێی باوه‌رنامه‌ خوه‌ به‌ربژار بكه‌ت پشتی دووڤچوونا سیڤیێ‌ وی دهێته‌كرن و ب مه‌رجه‌كی ئه‌ڤ كه‌سێن خوه‌ به‌ربژار بكه‌ن دناڤ لیستا ده‌سته‌كا گشتی دابن كو هه‌تا ژڤانێ‌ بۆ دیاركری گه‌هشتبیته‌ به‌رده‌ستێ‌ مه‌، هه‌روه‌سا ئه‌و كه‌سێن دناڤ لیستا ده‌سته‌كا گشتی دا و مافێ‌ ده‌نگانێ‌ هه‌بیت ئه‌وژی هه‌تا 15 كه‌س وه‌كو دامه‌زرێنه‌رێن یانێ‌ و ده‌هـ ژ یاریزانێن دێرین و ده‌ه كه‌س ژ ئه‌وان كه‌سێن پشته‌ڤانێن یانێ‌ و ده‌هێن دی فه‌رمانبه‌رێن وێ‌ یانێ‌،25 یاریزانێن ته‌پا پێی، 20 یاریزانێن باسكت بۆلێ‌، بۆ هه‌ر تیمه‌كا چه‌نگی 12 یاریزان بن كو ئه‌ڤان هه‌موویان ماف هه‌بیت بۆ ده‌نگدانێ‌.

لدووماهیێ‌ ناڤهاتی هیڤی خواست پرۆسێسا ده‌نگدانێ‌ ب سه‌ركه‌فتیانه‌ برێڤه‌بچیت و هه‌موو كه‌سێن پشكدار لدووڤ رێنومایا و یاسایێ‌ پابه‌ندبن و ئه‌نجامێن هه‌لبژارتنا قه‌بولبكه‌ن ژبه‌ركو یا گرنگ خزمه‌تكرنا وه‌رزشا هه‌رێما كوردستانێ‌ و پێشڤه‌برنا كارێ‌ یانێن وه‌رزشی یه‌.

بۆ زانین خشتێ‌ ئه‌نجامدانا هه‌لبژارتنێن یانێن پارێزگه‌ها دهۆكێ‌ لدووڤ ڤی سیسته‌می یه‌، سێ‌ شه‌مبیا بهێت یانێن گاره‌ و سه‌نحاریب، چارشه‌مبیێ‌ یانا ئافره‌تێن دهۆكێ‌ و یانا ئه‌سمانی یا دهۆكێ‌، رۆژا پێنچ شه‌مبی یانێن شێخان و به‌رده‌ره‌ش، ل 24ێ‌ ڤێ‌ هه‌یڤێ‌  یانا ئامێدیێ‌ و زانكۆیا پۆلیته‌كنیك، ل 26ێ‌ یانا زاخۆ و رۆژا دووڤدا ل 27ێ‌ ڤێ‌ هه‌یڤێ‌ یانا دهۆك دێ‌ هه‌لبژارتنێن خوه‌ كه‌ن، هه‌رچه‌نده‌ بڕیاربوو ئه‌ڤرۆ یانا سێمێل هه‌لبژارتنێن خوه‌ بكه‌ت لێ‌ هاته‌ پاشئێخستن بۆ 25ێ‌ ڤێ‌ هه‌یڤێ‌.

ئه‌ڤرۆ،

تیما ته‌پا پێی یا یانا زاخۆ به‌رده‌وامی دا ئه‌نجامێن خوه‌ یێن باش و سه‌ركه‌فتنا سێیێ‌ د خولا پلا نایابا ئیراقێ‌ دا ئینا پشتی شیایی ب سه‌ركه‌ڤیت ل سه‌ر مێڤانا خوه‌ یانا ئه‌مانه‌ت به‌غدا ب دو گۆلان به‌رامبه‌ر گۆله‌كێ‌، د یاریا واندا ئه‌وا دوهی ژ چارچووڤێ‌ هه‌ڤڕكیێن گه‌ڕا چارێ‌ ل یاریگه‌ها زاخۆ یا نێڤده‌وله‌تی هاتیه‌ ئه‌نجامدان.

د نیڤا ئێكێ‌ دا تیما زاخۆ هه‌ر ژ ده‌ستپێكا وێ‌ شیا دو گۆلان تۆماربكه‌ت كو ژلایێ‌ یاریزانان ئه‌مجه‌د وه‌لید خوله‌كا سێیێ‌ و محه‌مه‌د جه‌واد خوله‌كا حه‌فتێ‌ دا، ژلایێ‌ خوه‌ڤه‌ یاریزانێ‌ ئه‌مانه‌ت به‌غدا سه‌موئێل ئیكۆ گۆلا ئێكێ‌ د خوله‌كا 40ێ‌ دا تۆماركر، د نیڤا دویێ‌ دا سه‌رباری بزاڤێن هه‌ردو تیما بۆ تۆماركرنا گۆلان و راستڤه‌كرنێ‌ لێ‌ ئه‌نجامێ‌ یاریێ‌ وه‌كو خوه‌ ما ب سه‌ركه‌فتنا زاخۆ، بڤی ئه‌نجامی تیما پارێزگه‌هێ‌ خالێن خوه‌ گه‌هاندنه‌ 10 خال پێشوه‌خت پێشڤه‌ هاته‌ رێزا سێیێ‌، ئه‌وا نه‌فت وه‌سه‌ت ب 12 خالان سه‌رێ‌ لیستێ‌ دهێت و شورته‌ ب 10 خالان رێزا دویێ‌ دهێت.

ژ ئه‌نجامێن یاریێن دی، هه‌ولێر وه‌كهه‌ڤبوو ل گه‌ل نه‌جه‌ف بێی گۆل، شورته‌ 3-1 نه‌فتا به‌سرا، سیناعه‌ 1-3 نه‌فتا میسان، كه‌رخ چنه‌-1 نه‌فتا وه‌سه‌ت، كاره‌با 2-چنه‌ دیوانیه‌،قاسم 2-1 سامرا، یاریا نه‌وروز و جه‌ویه‌ هاته‌ پاشئێخستن.

ئه‌ڤرۆ،

یاریزانێن هه‌ردو یانێن دهۆك و سه‌نحاریب شیان كونترۆلێ‌ ل سه‌ر ریزێن ئێكێ‌ و دویێ‌ بۆ كێشێن خوه‌ بكه‌ن و ده‌ربازبنه‌ قۆناغا دووماهیا ژ قاره‌مانیا ئیراقێ‌ یا كاراتێ‌ بۆ هه‌ردو سیسته‌مێن كاتا و كۆمێته‌، ئه‌وا ل ئه‌ینیا بوری ب پشكداریا 28 یانێن ده‌ڤه‌را باكورێ‌ ئیراقێ‌ و هه‌رێما كوردستانێ‌ ل هه‌ولیرا پایته‌خت بۆ ئاستێ‌ تازه‌پێگه‌هتشیان و لاوان و كچان هاتینه‌ كرن، ژ پارێزگه‌هێ‌ هه‌رسێ‌ یانێن دهۆك، سه‌نحاریب و گاره‌ پشكداربوون و ئه‌نجام بڤی ره‌نگی بوون.

بۆ سیسته‌مێ‌ كاتا دهۆك ل پلا سێیێ‌ هات، بۆ سیسته‌مێ‌ كۆمێته‌، رۆیار شڤان رێزا ئێكێ‌ بۆ كێشا 70كگم تازه‌پێگه‌هشتی، ئه‌حمه‌د یوسف بۆ كێشا  -60كگم و ئاراز حسێن بۆ كێشا 68كگم رێزێن سێیێ‌ هاتن بۆ لاوان.

ئه‌نجامێ‌ یاریزانێن سه‌نحاریب، سیسته‌مێ‌ كۆمێته‌ كچان شانا فه‌رسه‌ت رێزا ئێكێ‌ 54كگم، روزان عادل یا دویێ‌ بۆ كێشا 55كگم، ئاڤیڤان به‌شیر رێزا دویێ‌ بۆ 59كگم، ئاخین سوبحی بۆ كێشا 43كگم رێزا سێیێ‌، شانا عه‌دنان رێزا سێیێ‌ بۆ كێشا 53كگم، دلین محه‌مه‌د رێزا سێیێ‌ بۆ كێشا 59كگم، بۆ كوڕان عه‌بدولره‌حمان رێزا دویێ‌ هات سیسته‌مێ‌ كومێته‌ 52كگم و سیته‌مێ‌ كاتا رێزا دویێ‌ ده‌ستڤه‌ئینا.

گه‌یلان باپیر سه‌رۆكێ‌ ئێكه‌تیا كاراتیا پارێزگه‌ها دهۆكێ‌ بۆ رۆژناما ئه‌ڤرۆ گوت: ئێك ب هێزترین قاره‌مانیێن ئه‌ڤ ساله‌ دا هاتیه‌ ئه‌نجامدان و زێده‌تری 270 یاریزان ژ پارێزگه‌هێن باكورێ‌ ئیراقێ‌ و كوردستانێ‌ پشكداربوون، یاریزانێن دهۆك و سه‌نحاریب شیان هه‌ڤڕكیه‌كا بهێز بكه‌ن و ژوان چه‌ند یاریزان ده‌ربازبوونه‌ قۆناغا دووماهیێ‌ یا قاره‌مانیا ئیراقێ‌، ئه‌نجامێن وان دلخووشكه‌ر بوون سه‌ربای ئاسته‌نگا هه‌رچه‌نده‌ یاریزانێن گاره‌ نه‌شیان هه‌ڤڕكیێ‌ بكه‌ن لێ‌ جهێ‌ ده‌ستخووشیێ‌ بوو ئاسته‌كێ‌ مه‌زن نیشان دا و گرنگ وه‌رگرتنا مفایی بوو و باوه‌ری ب شیانێن خوه‌ زێده‌تر لێكر.

ئه‌ڤرۆ، زنار زوبێر:

ب پشكداریا 16 یانا ژوانا هه‌ردو یانێن پارێزگه‌هێ‌ دهۆك و زاخۆ ل ئه‌ینیا بوری هه‌ڤڕكیێن گه‌ڕا ئێكێ‌ و ده‌ستپێكا خولا هه‌رێما كوردستانێ‌ یا ته‌پا پێی بۆ یانێن پلا نایاب یا وه‌رزێ‌ نوو هاتنه‌ ئه‌نجامدان.

ل پێنچ شه‌مبیا بوری تیما یانا زاخۆ ل یاریگه‌ها ده‌لال دو خال ژ ده‌ستدان پشتی ل گه‌ل مێڤانا خوه‌ یانا هه‌ولێر ب گۆله‌كێ‌ وه‌كهه‌ڤبووی، ژلایێ‌ خوه‌ یانا دهۆك ئه‌وا یاریا خوه‌ ل رۆژا ئه‌ینی ئه‌نجامدایی دناڤ یاریگه‌ه و جه‌ماوه‌رێ‌ خوه‌ دا تووشی خوساره‌تیێ‌ بوو هه‌مبه‌ری یانا هندرین ب دو گۆلان بێی به‌رامبه‌ر.

ژ ئه‌نجامێ‌ یاریێن دی، برایه‌تی 2-3 ده‌ربه‌ندیخان، نه‌وروز چنه‌-1 پێشمه‌رگا هه‌ولێر، هه‌لۆ چنه‌-2 شه‌قلاوه‌، سۆران 2-1 سیروانی نوو، سه‌یدسادق 3-2 چه‌مچه‌مال، شێروانه‌ 2-چنه‌ ئارارات.

ژلایه‌كێ‌ دووڤه‌ ئێكه‌تیا ته‌پا پێی یا كوردستانێ‌ بڕیار دا ل ده‌ستپێكا هه‌یڤا بهێت وه‌رزێ‌ نوو یێ‌ خولا پلا ئێكا ب پشكداریا 19 یانا هاتینه‌ بلاڤكرن لسه‌ر دو كۆما، چار یانێن پارێزگه‌هێ‌ بپشكدارن ئه‌وژی گاره‌، سێمێل، به‌رده‌ره‌ش و ئاكرێ‌، هه‌ر كۆمه‌كێ‌ تیما ئێكسه‌ر ده‌ربازبیته‌ پلا نایاب.