ئه‌ڤرۆ، نه‌وزاد هلۆری:

هه‌لبژارتن پرۆسه‌یه‌كا قانوونی و دیموكراسیه‌ ل هه‌موو جیهانێ‌، عیراق و كوردستان ژی ژ وان وه‌لاتێن دیموكراسی نه‌ كو ب رێیا قانوونێ‌ هه‌ر چار سالان جاره‌كێ‌ هه‌لبژارتنان دكه‌ت، هه‌رچه‌نده‌ هه‌موو ته‌خێن جڤاكی روله‌كێ‌ كارتێكه‌ر هه‌یه‌، به‌لێ‌ رولێ‌ ئافره‌تان دو جاران پتره‌ ژ زه‌لامان.

سهام عومه‌ر، رۆژنامه‌ڤانه‌ دیاركر كو روولێ‌ ئافره‌تان د جڤاكی دا ل هه‌مبه‌ر پرسێن وه‌كو هه‌لبژارتنان دو به‌رامبه‌ری زه‌لامان دبینیت و گۆت: (هه‌كه‌ ئافره‌ت ب دروستی ب ئه‌ركێ‌ خوه‌ رابیت د بیاڤێ‌ هشیاركرنێ‌ دا و ئه‌و بخوه‌ ژی پشكداری پرۆسه‌یا هه‌لبژارتنان ببیت، دڤێت ئافره‌تێ‌ پشكداریه‌كا كارا هه‌بیت و پشته‌ڤانیا وان ئافره‌تان بكه‌ت كو نوكه‌ به‌ربژارن داكو ئه‌و بشێن ب ده‌نگێن خوه‌ بچنه‌ په‌رله‌مانی نه‌ك ب كوتا).

زه‌ری نه‌وزاد، به‌رپرسا ئه‌نجومه‌نێ‌ دهۆك یێ‌ ئافره‌تان دوپات ل وێ‌ یه‌كێ‌ كر كو ئه‌ركێ‌ ئافره‌تێ‌ پتره‌ ژ زه‌لامان د هه‌لبژارتنان دا و گۆت: (ئافره‌ت ژبلی كو گرنگه‌ پشكدار بیت و ده‌نگێ‌ خوه‌ بده‌ت وان كه‌سانێن كو ل گوره‌ی بیر و بوچون و هزرێن وێ‌ دێ‌ خزمه‌تا وێ‌ و گه‌ل و وه‌لات و نیشتمانێ‌ وێ‌ كه‌ت، هه‌ڤده‌م رولێ‌ وان د هشیاركرنا تاكێن جڤاكی دا ب گشتی و خێزانێ‌ ب تایبه‌تی ژی هه‌یه‌ كو ئه‌و ژی پشكدار بن).

زه‌ریێ‌ د به‌رده‌وامیا ئاخفتنێن خوه‌ دا گۆت: (ب سایا حوكمه‌تا هه‌رێما كوردستانێ‌ دیموكراسی هاتیه‌ پێش و ئافره‌تا كورد ماف د هه‌لبژارتن دا هه‌یه‌ و پشكدارن د دروستكرنا بریارا سیاسی دا و پوستێن جودا وه‌رگرتینه‌ و خزمه‌تا وه‌لاتێ‌ خوه‌ دكه‌ن كو ئه‌ڤێ‌ یه‌كێ‌ ژی گرنگیا خوه‌ هه‌یه‌).

ژلایه‌كێ‌ دیڤه‌ چالاكڤانه‌كا ئافره‌تان بناڤێ‌ خه‌لات جه‌مال دیار كر كو ئافره‌تا نوكه‌ خودان ده‌نگ و بریارا تایبه‌ت یا خوه‌یه‌ و گۆت: (رول و پێگه‌هێ‌ ئافره‌تێ‌ دناڤ جڤاكی دا و هشیاركرنا وان و ئه‌ندامێن خێزانێ‌ روله‌كێ‌ سه‌ره‌كی یه‌، ئافره‌ت دشێت هه‌موو وان كه‌سان هشیار بكه‌ت یێن كو هه‌تا نوكه‌ بریار نه‌دایه‌ بچنه‌ ده‌نگدانێ‌، ژبه‌ركو تاكێن جڤاكی ئه‌ندامێن خێزانانن و هه‌موو خێزان ژی لژێر ده‌ستێ‌ ئافره‌تێ‌ هاتینه‌ په‌روه‌رده‌ كرن، له‌وا ئافره‌تێ‌ ژی هه‌رده‌م بزاڤ كرینه‌ كو ببیته‌ خودان بریار و كارێ‌ تایبه‌ت بخوڤه‌ و خزمه‌تا جڤاك و خێزانا خوه‌ بكه‌ت و ببیته‌ خودان داهات).

دیدار، نه‌وزاد هلۆری:

خالد عه‌زیز عه‌لی قادرعه‌جبه‌، به‌ربژارێ‌ پارتی دیموكراتی كوردستان ب هژمار 47 ل بازنا پێنج یا نه‌ینه‌وا، ئێك ژ وان به‌ربژارایه‌ كو دده‌ما بوری دا خزمه‌ته‌كا باش بۆ خه‌لكێ‌ ده‌ڤه‌رێ‌ كری و دخوازیت پشتی ده‌رچونێ‌ بۆ په‌رله‌مانی ئه‌زموونا هه‌رێما كوردستانێ‌ بۆ ده‌ڤه‌رێ‌ ڤه‌گوهێزیت ب تایبه‌تی دوارێ‌ خزمه‌تگوزاری و ئه‌من و ئاسایشێ‌ دا.

خالد عه‌زیز عه‌لی قادر عه‌جبه‌، به‌ربژارێ‌ پارتی دیموكراتی كوردستان ب هژمار 47 ل بازنا پێنج یا نه‌ینه‌وا دیاركر كو ئه‌ڤه‌ چه‌ندین ساله‌ ئه‌و خزمه‌تا خه‌لكێ‌ ده‌ڤه‌رێ‌ دكه‌ت و گۆت ژی: (ئه‌و ده‌ڤه‌را ئه‌ز تێدا به‌ربژار بویم ده‌ڤه‌ره‌كا پشتگوه هاڤێتیه‌ ژ روویێ‌ خزمه‌تگوزاریان و چه‌ندان كێماسی هه‌نه‌، له‌وا ئه‌گه‌ر ده‌ربچم ئێك ژ وان كارێن هه‌ری گرنگ و پێشییێ‌ بۆ ده‌ڤه‌رێ‌ بهێته‌كرن دێ‌ ئه‌و بیت كو بزاڤێ‌ بكه‌م ئه‌زموونا هه‌رێما كوردستانێ‌ بۆ ده‌ڤه‌رێ‌ بهێته‌ ڤه‌گوهاستن ب تایبه‌تی د وارێ‌ دابینكرنا خزمه‌تگۆزاری و ئه‌من و ئاسایشه‌كا موكوم دا، ئه‌ڤه‌ زێده‌باری گرنگیدان ب كه‌رتێ‌ په‌روه‌رده‌ و فێركرنێ‌، ژبه‌ركو هه‌ند خزمه‌تگۆزاری نینن هه‌ند ژی وه‌كو پێدڤی ئه‌من و ئاسایشا ده‌ڤه‌رێ‌ نه‌یا پاراستیه‌ ب تایبه‌تی پشتی شه‌رێ‌ داعشێ‌ و كاڤلكاریێن وان ل موسل و ده‌ورۆبه‌ر ئه‌نجام دای).

زێده‌تر گۆت: (پارتی دیموكراتی كوردستان هه‌ر ژ ده‌ستپێكا دامه‌زراندنا خوه‌ هه‌تا نوكه‌ روله‌كێ‌ به‌رچاڤ هه‌بویه‌ د خزمه‌تكرنا خه‌لكێ‌ ده‌ڤه‌را نه‌ینه‌وا، له‌وا دڤێت كاروانێ‌ پارتی بۆ خزمه‌تكرنا ده‌ڤه‌رێ‌ یا به‌رده‌وام بیت، نوكه‌ ئه‌ڤ ده‌ڤه‌ره‌ هه‌موو عه‌ره‌بن و پێشتر ژ ئه‌گه‌رێ‌ شه‌ر و ئالوزیان ب تایبه‌تی ل سه‌ر ده‌مێ‌ داعشێ‌ هه‌موو ئاواره‌یێ‌ كوردستانێ‌ بوون و چه‌ند سالان لژێر دلوڤانی و سایا حوكمه‌تا هه‌رێما كوردستانێ‌ و پارتی دیموكراتی كوردستان ژیاینه‌ و هاتینه‌ پاراستن، هه‌ر چه‌نده‌ كورد ل وان ده‌ڤه‌ران هه‌بوون به‌لێ‌ پشتی شه‌رێ‌ داعشێ‌ به‌لاڤبوون، ئه‌و ده‌ڤه‌ر خوه‌ ب قه‌ردارێ‌ پارتی و بارزانی دبینن ل سه‌رده‌مێ‌ ئاواره‌یێ‌ دا).

به‌ربژارێ‌ پارتی دیموكراتی كوردستان ب هژمار 47 ل بازنا پێنج یا نه‌ینه‌وا دیاركر ژی كو ئه‌و زێده‌تر ل ده‌ڤه‌رێن باشوورێ‌ موسل وه‌كو گه‌یاره‌، شوره‌، حه‌مام عه‌لیل، به‌عاج، حه‌وه‌ز و چوار گه‌ره‌كێن سه‌نته‌رێ‌ موسل به‌ربژارێ‌ پارتی یه‌ و گۆت ژی: (ل ڤان ده‌ڤه‌ران چه‌ندین كێم و كاسی هه‌نه‌ ژبلی نه‌بونا خزمه‌تگۆزاریێن پێدڤی، هه‌ڤده‌م ده‌لیڤێن كاری بۆ گه‌نجان و پشته‌ڤانیكرنا وان د وارێ‌ پێگه‌هاندن و په‌روه‌رده‌كرنا وان ل سه‌ر بنه‌مایه‌كێ‌ زانستی و ساخله‌م و دروستكرنا ده‌لیڤێن كاری بو وان زۆر لاوازی هه‌یه‌، له‌وا دڤێت هنده‌ك كه‌س و ئالی هه‌بن پشته‌ڤانیا وان  بكه‌ن و شیانێن وان بده‌ن كاری بۆ خزمه‌تكرنا جڤاكی، پارتی دڤی واریدا به‌رنامه‌ و كارێن باش دێ‌ هه‌بن و ئه‌زموونه‌كا نوو یا سیاسی ل ده‌ڤه‌رێ‌ بهێته‌ په‌یره‌وكرن كو هه‌موو كه‌س ب هه‌ڤرا بژین و پێكڤه‌ ژیان و برایه‌تی یا ده‌ڤه‌رێ‌ یا هێز بیت، له‌وا دڤێت خه‌لك ژی باوه‌ریێ‌ بده‌ت پارتی و به‌ربژارێن وان).

دیدار، نیوار محه‌مه‌دسه‌لیم:

كاڤین مزووری به‌ربژێرا هه‌ژماره‌ 21 ل سه‌ر پارێزگه‌ها نه‌ینه‌وا بازنێ‌ دوممیز، فه‌یدیێ‌، تلكێف، باشیك، وانكێ‌ و شێخان د دیداره‌كێ‌ دا بۆ رۆژناما ئه‌ڤرۆ به‌حس ل كار و چالاكیێن خوه‌ دكه‌ت و به‌حس ل وێ‌ چه‌ندێ‌ دكه‌ت كو ئه‌و دێ‌ پارێزه‌را ماف و ده‌سكه‌فتنێن خه‌لكێ‌ كوردستانێ‌ بیت و دده‌ته‌ زانین كو به‌رنامێ‌ وێ‌ دێ‌ به‌رنامێ‌ پارتی بیت و دبێژیت: سه‌ركه‌فتنا پارتی ل پارێزگه‌ها مووسل دێ‌ هه‌رێمێ‌ ژ مه‌ترسیا مووشه‌كێن گرۆپێن چه‌كدار پارێزیت

ئه‌ڤرۆ: كاڤین مزووری كی یه‌؟

كاڤین مزووری: ئه‌ز كاڤین مزووری به‌ربژێرا هه‌ژماره‌ 21 ل سه‌ر پارێزگه‌ها نه‌ینه‌وا بازنێ‌ دوممیز، فه‌یدیێ‌، تلكێف، باشیك، وانكێ‌ و شێخان. هه‌لگرا باوه‌رناما به‌كالریوسێ‌ مه‌ ب ئابوورێ‌. من ل به‌نكێ‌ كار كریه‌ و رێڤه‌به‌را قوتابخانێ‌ ژی بوویمه‌. نها ژی مامۆستامه‌. كچا پێشمه‌رگه‌كێ‌ خه‌باتكارم كو دژیانا خوه‌ هه‌موویێ‌ دا مژوولی خه‌باتێ‌ بوویه‌ و شه‌ش جاران ژی بریندار بوویه‌. ل سالا 1986ێ‌ ل به‌حركێ‌ ژ دایك بوویمه‌.

ئه‌ڤرۆ: مه‌ره‌م ژ چوونا به‌غدا چیه‌؟

كاڤین مزووری: ده‌ما پرسیار ژ هه‌ر به‌ربژاره‌كێ‌ بكه‌یی، ل سه‌ر هه‌ر لیسته‌كا هه‌بیت ده‌ما دبێژنێ‌ ته‌ چو به‌رنامه‌ هه‌یه‌ یان دێ‌ چ د گه‌ل خوه‌ به‌یه‌ به‌غدا، دڤێت ته‌ماشه‌یی دو خالێن گرنگ و سه‌ره‌كی بكه‌یی یا ئێكێ‌: ژ لایێ‌ سیاسی ڤه‌ كا ئه‌و به‌ربژێر سه‌ر ب چو پارتیا سیاسی ڤه‌یه‌ و ئاراسته‌یا وێ‌ چیه‌؟ یا دویێ‌: ژ لایێ‌ كه‌ساتی ڤه‌ گرنگه‌ ته‌ پێزانین ل سه‌ر به‌گراوه‌ندێ‌ كه‌سی و مالباتا وان هه‌بن ب تایبه‌ت ژ لایێ‌ هه‌ستێن نشتیمانی و نه‌ته‌وی ڤه‌ و قوربانی دان بۆ بزاڤا رزگاریخوازا گه‌لێ‌ كورد.

به‌رنامێ‌ من بۆ به‌غدا ئه‌وه‌ ل ده‌ستپێكێ‌ ئه‌ز بشێم خزمه‌تا دوزا گه‌لێ‌ خوه‌ بكه‌م، دوهی باب و كالا ب چه‌كێ‌ خوه‌ خزمه‌ت كریه‌، ئه‌ڤرۆ ئه‌ز به‌رهه‌مێ‌ وانم، به‌لێ‌ چه‌كێ‌ منێ‌ جودایه‌ ژ وان ئه‌و ژی دێ‌ ب رێیا دانوستاندن و رازیكرنا وان بۆ پاراستنا ده‌ستكه‌فتێن گه‌لێ‌ مه‌ بیت و هه‌روه‌سا بشێم خزمه‌تا دایك و مالباتا شه‌هیدا بكه‌م ئه‌ڤێن خوه‌ گوری دارا ئازادیێ‌ كری، به‌ره‌ڤانیێ‌ ژ خه‌لكێ‌ كوردستانێ‌ بكه‌م بێ‌ جوداهی ب تایبه‌ت چینا هه‌ژار و بێ‌ ده‌سته‌لاتان، دڤێت ئه‌م خوه‌ ماندوو بكه‌ین و كار بكه‌یی رۆژ بۆ رۆژێ‌ رژدتر بین بۆ ب ده‌ست ڤه‌ ئینانا مافێن چاره‌نڤیسی یێن گه‌لێ‌ كورد.

ئه‌ڤرۆ: به‌رنامێ‌ ته‌ چیه‌ هه‌كه‌ هات و خه‌لكی باوه‌ری دا ته‌؟

كاڤین مزووری: پارتی پارێزه‌را ناسناما نه‌ته‌وه‌یی یا كوردستانێ‌ یه‌. پارتی دێ‌ ب هێز چیته‌ به‌غدا، ب هێز بوونا پارتی ل به‌غدا ب هێز بوونا هه‌رێما كوردستانێ‌ یه‌. به‌رنامێ‌ من ژی به‌رنامێ‌ پارتی دیموكراتی كوردستانه‌، پارتی به‌رنامه‌كێ‌ گه‌له‌ك باش و د به‌رژه‌وه‌ندا وه‌لاتیان دا یێ‌ هه‌یی و ئه‌م هه‌موو دێ‌ كار ل سه‌ر كه‌ین دا كو ئه‌و به‌رنامه‌ سه‌ر بگریت.

ئه‌ڤرۆ: چه‌ند یا گرنگه‌ بچینه‌ به‌غدا؟

كاڤین مزووری: ئه‌ڤ هه‌لبژارتنه‌ گه‌له‌ك د گرنگن بهێنه‌ كرن دا كو گوهۆڕین د پله‌ و پۆستان دا ل عیراقێ‌ بهێنه‌ كرن، ژ به‌ر كو عیراق به‌ر ب ره‌وشه‌كا خراب چوویه‌. عیراق د بڕیارێن خوه‌ دا نه‌یا بنه‌جهه‌، به‌رهه‌مێ‌ سه‌رۆكاتیێن عیراقێ‌ نه‌یێ‌ دیاره‌. دستوور ب دروستی ناهێته‌ بجهئینان ب تایبه‌ت ئه‌و خالێن د به‌رژه‌وه‌ندا كوردان دا.

هه‌بوونا پارتی ب هێز ل به‌غدا دێ‌ پێگه‌هێ‌ كوردان ب هێز ئێخیت ژ به‌ر كو مێژوویێ‌ ژی سه‌لماندیه‌ كو خودانا پترترین ده‌ستكه‌فتانه‌ و شانازیا خه‌لكێ‌ كوردستانێ‌ یه‌. پارتی پێگه‌هه‌كێ‌ ب هێز د عیراقێ‌ دا یێ‌ هه‌یی. پارتی كار دكه‌ت وه‌لاته‌كێ‌ ب هێز هه‌بیت و هه‌موو هه‌ست ب هه‌بوونا خوه‌ بكه‌ن. وه‌لاتیان ئابووره‌كێ‌ خوه‌شگوزه‌ران هه‌بیت.

بۆ ڤان ئارمانجان داخوازێ‌ ژ هه‌موو خه‌لكێ‌ كوردستانێ‌ دكه‌ین كو ب گه‌رم و گوری پشكداری هه‌لبژارتنان ببن و ده‌نگێ‌ خوه‌ ب ده‌نه‌ به‌ربژێرێن پارتی دیموكراتی كوردستان ژ بۆ هه‌لبژارتنێن جڤاتا نوونه‌رێن عیراقێ‌، ژ به‌ر كو پارتی پارتیا ئێكانه‌یه‌ خه‌ونا ب ده‌وله‌تا كوردی ڤه‌ دبینیت و كار ژ بۆ وێ‌ چه‌ندێ‌ دكه‌ت.

ئه‌ڤرۆ: گرنگیا ڤان هه‌لبژارتنان بۆ ده‌ڤه‌رێن كوردستانی چه‌نده‌؟

كاڤین مزووری: گرنگیا ده‌ڤه‌را نه‌ینه‌وا بۆ هه‌موو خه‌لكێ‌ كوردستانێ‌ یا گرنگه‌ چونكو گرێدایه‌ ب كێشه‌كا نه‌ته‌وی و عه‌ره‌بكرنێ‌ و ئاسایشێ‌ و ئارامیێ‌ و خزمه‌تگۆزاریان. پشتی هاتنا داعش و روودانێن 16ی ئوكتوبه‌رێ‌ گه‌له‌ك بۆشایی د ڤێ‌ ده‌ڤه‌رێ‌ دا دروست بوویه‌. ئه‌ڤرۆ ئه‌م یێن دبینین چاوان ب مووشه‌كان هێرشێ دكه‌نه‌ سه‌ر هه‌ولێر و ئه‌ڤ هێرشه‌ ل ڤان ده‌ڤه‌ران روو دده‌ن ژ لایێ‌ گرۆپێن تۆندڕه‌و دڤێت ئه‌م هه‌موو پێكڤه‌ كار بكه‌ین وه‌كو كورد ڤان جوره‌ مه‌ترسیان ل سه‌ر كوردستانێ‌ دوور بكه‌ین ب بڕیارێن دستووری.