شێخان، بارزان مزووری:
سه‌رپه‌رشتێ دروستكرنا به‌نداڤا خه‌نس بۆ رۆژناما ئه‌ڤرۆ دیار كر ل سه‌ر فه‌رمانا سه‌رۆكێ حوكمه‌تا هه‌رێما كوردستانێ ب گوژمێ نه‌ه ملیار دیناران دوباره كار ل سه‌ر تمامكرنا پرۆژێ به‌نداڤا خه‌نس هاته‌كرن.
ئه‌ندازیار عه‌بدولقادر محه‌مه‌د، سه‌رپه‌رشتێ دروستكرنا به‌نداڤا خه‌نس خویا كر، ئه‌ڤه ده‌مێ حه‌فت سالانه ئه‌ڤ پرۆژه ژ به‌ر قه‌یرانا دارایی یا ب سه‌ر هه‌رێمێ دا هاتی؛ هاتبوو راوه‌ستاندن و گۆت: “ل سه‌ر فه‌رمانا مه‌سرور بارزانی، سه‌رۆكێ حوكمه‌تا هه‌رێما كوردستانێ دوباره كار ل سه‌ر دێ هێته كرن و تمامكرن، دیسا رێڤه‌به‌ریا سكرێ دهۆكێ سه‌رپه‌رشتیا تمامكرنا پرۆژه‌ی دكه‌ت”.
ناڤهاتی ئاشكرا ژی كر، ئه‌ڤ پرۆژه ل سالا 2010 ده‌ست پێ هاتبوو كرن، به‌لێ ل 2014 ژ به‌ر قه‌یرانا دارایی یا ب سه‌ر هه‌رێما كوردستانێ دا هاتی، پرۆژه وه‌كو گه‌له‌ك پرۆژێن دی هاتبوو راوه‌ستاندن، لێ ب خوشحالی ڤه بڕیارا تمامكرنا پرۆژه‌ی هاتیه‌دان، دیسا پشتی راوه‌ستیانا كاری ل سه‌ر پرۆژه‌ی و هه‌تا نوكه چار جاران كه‌فتیه به‌ر له‌هیان و 26 هزار موكه‌عه‌بێن دیوارێ به‌نداڤێ دگه‌ل خوه بربوون و زیانێن مه‌زن ب وی پرۆژه‌ی كه‌فت بوون و گۆت: “ئه‌م وه‌لاتیان ئاگه‌هدار دكه‌ین كو به‌ری بارانبارینێ كار ل سه‌ر پرۆژه‌ی دێ ب دووماهی هێت”.
نيشاندان