ئه‌ڤرۆ، حه‌مۆ محه‌مه‌د:

به‌رپرسێ‌ راگه‌هاندنا سه‌رۆكاتیا باژێرڤانیا دهۆكێ‌ دیار كر، وان وه‌كو باژێرڤانیا دهۆكێ‌ بزڤێن خوه‌ كرینه‌ بو ده‌ست پێكرنا پرۆژێ‌ ئه‌نده‌رپاسا ترافیكا بناڤی كو دكه‌ڤیته‌ سه‌ر جاددا بارزان و دبێژیت: گوژمێ‌ پرۆژه‌ی گه‌له‌كه‌، له‌و مه‌ داخواز ژ وه‌زاره‌تا باژێرڤانیان كریه‌ كو رازیبوون ل سه‌ر بهێته‌ كرن و ئه‌و ژی بكه‌ڤیته‌ د خزمه‌تا وه‌لاتیان دا.

ئیسماعیل مسته‌فا، به‌رپرسێ‌ راگه‌هاندنا سه‌رۆكاتیا باژێرڤانیا دهۆكێ‌ ئاشكرا ژی كر، گوژمێ‌ پرۆژێ‌ ئه‌نده‌رپاسا ترافیكا بناڤی نێزیكی 37 ملیار دینارانه‌، جارێ‌ ئه‌و ل هیڤیێ‌ نه‌ وه‌زاره‌تا باژێرڤانیان رازیبوونێ‌ ل سه‌ر بجهئینانا پرۆژه‌ی بده‌ت و پارێ‌ پێدڤی بۆ بهێته‌ ته‌رخانكرن و گۆت: “جاددا بارزان ژ جاددێن هه‌ره‌ گرنگێن باژێرێ‌ دهۆكێ‌ یه‌، نوكه‌ ل سه‌ر وێ‌ جاددێ‌ ب تنێ‌ ترافیكا بناڤی مایه‌، هه‌كه‌ر ئه‌و پرۆژه‌ ژی بهێته‌ بجهئینان و بكه‌ڤیته‌ دخزمه‌تا وه‌لاتیان دا”.

گۆتژی: “درێژاهیا جاددا بارزان نێزیكی 11 كیلۆمه‌ترانه‌ و بجهئینانا ئه‌نده‌رپاسا ترافیكا بناڤی، چو ترافیك لێ‌ سه‌ر وێ‌ جاددێ‌ نامینن و هه‌ر شۆفێره‌كێ‌ ل وێ‌ جاددێ‌ هاتنوچوونێ‌ بكه‌ت، بێ‌ ترافیك    دێ‌ ده‌رباز دبیت”.

هه‌ولێر، قائید میرۆ:

رێڤه‌به‌رێ گشتیێ خانه‌نشینا هه‌رێما كوردستانێ ژڤانێ دووماهیێ یێ چاكسازیا خانه‌نشینان ئاشكرا كر و دبێژیت: به‌ری دووماهیا ئه‌ڤ ساله‌ هه‌موو خانه‌نشینان دێ سه‌ڕاد و بێژینگ كه‌ین، هه‌روه‌سا ئێك كه‌س ژی ژ ده‌رڤه‌ی قانوونێ نه‌هاتیه‌ خانه‌نشینكرن هه‌كه‌ 15 سالێن خزمه‌تێ نه‌بن.

حازم ئیسماعیل، رێڤه‌به‌رێ گشتیێ خانه‌نشینا هه‌رێما كوردستانێ بۆ رۆژناما ئه‌ڤرۆ دیار كر، ل هه‌ردو كه‌رتێن شارستانی و پۆلیسان ئێك فه‌رمانبه‌ر ژی نه‌هاتیه‌ خانه‌نشینكرن هه‌كه‌ ل گوره‌ی قانوونێ مافێ‌ خانه‌نشینكرنێ نه‌بیت و گۆت: “هنده‌ك جارا فایله‌ك هاتیه‌ به‌رده‌ستێ من چارده‌ سال و یازده‌ هه‌یڤ و 29 رۆژ خزمه‌تا فه‌رمانبه‌ریێ هه‌یه‌، به‌لێ ئه‌ز نه‌شێم خانه‌نشین بكه‌م، ب تنێ ئێك كه‌س ژ ده‌رڤه‌ی قانوونێ فه‌رمانبه‌ر و پۆلیس نه‌هاتیه‌ خانه‌نشینكرن هه‌كه‌ 15 سالێن خزمه‌ت نه‌بن”.

ل دۆر خانه‌نشینكرنا پێشمه‌رگه‌ی، رێڤه‌به‌رێ گشتیێ خانه‌نشینا هه‌رێمێ گۆت: “ب تنێ مووچێ پێشمه‌رگه‌ی ل سه‌ر رێڤه‌به‌ریا گشتیا خانه‌نشینێ یه‌ و ئه‌ز نزانم چاوا هاتینه‌ خانه‌نشینكرن”.

حازم ئیسماعیل ئاشكرا كر، به‌ری دووماهیا ئه‌ڤ ساله‌ پێداچوون و چاكسازی د خانه‌نشینیا هه‌رێما كوردستانێ دا دێ ب دووماهی هێت و هه‌ر كه‌س دێ گه‌هیته‌ مافێ‌ خوه‌ یێ قانوونی، هه‌تا پله‌یێن تایبه‌ت په‌رله‌مانتار و وه‌زیر و جڤاتێن پارێزگه‌هان ژی هه‌موو دێ هێنه‌ سه‌ڕاد و بێژینگ كرن و بلندترین مووچێ وان دێ ٥٠%ێ و كێمترین مووچه‌ ژی ٢٥%ێ بیت.

ئامێدیێ‌، مه‌حمود نهێلی:

ده‌ست ب چێكرن و سه‌خبێركرنا رێكا گوندێ‌ هاریكا و پرا سپنه‌ هاته‌ كرن و  گوژمێ‌ 348 ملیۆن دیناران بۆ هاتینه‌ ته‌رخانكرن.

وارشین سه‌لمان، قایمقامێ‌ قه‌زا ئامێدیێ‌ بۆ رۆژناما ئه‌ڤر دیار كر، پرۆژێ‌ چێكرنا پرا سپنه‌ و رێیا گوندێ‌ هاریكا گه‌له‌ك گرنگیا خوه‌ هه‌یه‌، ژ به‌ركو چه‌ندین ساله‌ ئاریشه‌ بۆ هاتنوچوونا خه‌لكێ‌ ڤێ‌ ده‌ڤه‌رێ‌ و چێدبوون و گۆت: “چێكرنا رێكا گوندێ‌ هاریكا ژبلی كو رێكا چه‌ند گوندان بوویه‌، ژلایێ‌ گه‌شت و گۆزاری ڤه‌ ژی دێ‌ مفا ژێ‌ هێته‌ وه‌رگرتن، هه‌روه‌سا دبیته‌  رێكا سه‌دان جۆتیارێن ده‌ڤه‌رێ‌ ژی”.

گۆتژی: “درێژاهیا جاددا گوندێ‌ هاریكا سێ‌ كیلۆمه‌ترن و فره‌هیا وێ‌ ژی هه‌شت میترن و دێ‌ ژلایێ‌ كۆمپانیه‌كا ناڤخوه‌یی ڤه‌ هێته‌ چێكرن”.

قایمقامێ‌ قه‌زا ئامێدیێ‌ ئاشكرا ژی كر، پرا سپنه‌ یا پیاده‌ به‌ری چه‌ند هه‌یڤان ژ ئه‌نجامێ‌ له‌هیان و بلند بوونا ئاڤا رووبارێ‌ سپنه‌ ژ ناڤچوو بوو و نوكه‌ ئه‌ڤ پره‌ دێ‌ دوباره‌ هێته‌ چێكرن و گۆت: “ئه‌ڤ پره‌ به‌ری نوكه‌ پیاده‌ بوویه‌، لێ‌ نوكه‌ دێ‌ ب شێوازه‌كێ‌ نوو و ب درێژاهیا 20 میتر و فره‌هیا پێنج میتران هێته‌ چێكرن كو دێ‌ گرنگیه‌كا تایبه‌ت بۆ جۆتیارێن ده‌ڤه‌رێ‌  و هاتنوچوونا وه‌لاتیان هه‌بیت”.

ئه‌ڤرۆ، له‌زگین جۆقی:

د. ئه‌فراسیاب موسا، رێڤه‌به‌رێ گشتیێ ساخله‌میا پارێزگه‌ها دهۆكێ ب هه‌ڤالینیا رێڤه‌به‌رێ ساخله‌میا زاخۆ و هژماره‌كا سه‌رۆك پشك و رێڤه‌به‌رێن نه‌خۆشخانا ل زاخۆ، سه‌ره‌دانا زانكۆیا زاخۆ و قایمقامیا زاخۆ و لقێ هه‌شتێ پارتی ل زاخۆ كرن.

د چه‌ند روونشتنێن ژێكجودا دا به‌حسێ گشتیكرنا رێڤه‌به‌ریا ساخله‌میا زاخۆ هاته‌كرن، ب تایبه‌ت پشتی بڕیارا جڤاتا وه‌زیرێن هه‌رێما كوردستانێ‌ كو زاخۆ ببیته‌ ئیداره‌كا سه‌ربخوه‌ و دیار كرن، پێدڤیه‌ هه‌موو كار و ئاسانكاری بهێنه‌كرن ساخله‌میا زاخۆ ببیته‌ رێڤه‌به‌ریا گشتی.

دیسا دانوستاندن ل دۆر ستافێ‌ ساخله‌میێ ژ نۆشدار و كارمه‌ندێن ساخله‌میێ و كارگێری ل زاخۆ و كێماسیێن وان و ره‌وشا نه‌خۆشخانه‌ و بنگه‌هێن ساخله‌میێ و چاوانیا پێشڤه‌برنا وان هاته‌كرن.

د. ئه‌فراسیاب موسا، رێڤه‌به‌رێ گشتیێ ساخله‌میا دهۆكێ دیار كر، زاخۆ ژلایێ ساخله‌میێ ڤه‌ ژ دو رێڤه‌به‌ریێن ساخله‌میێ، ئه‌و ژی (زاخۆ و باتیفا) پێك دهێت و هه‌بوونا سێ نه‌خۆشخانان و 18 بنگه‌هێن ساخله‌میێ یا ئاماده‌یه‌ ببیته‌ رێڤه‌به‌ریا گشتی و گۆت: “نوكه‌ ئه‌م یێ‌ كار بۆ دابینكرنا پێدڤیێن وان ژ ده‌رمانان و كارمه‌ندان و پێدڤیێن ساخله‌میێ دكه‌ین، دیسا ڤه‌كرنا خولێن ژێكجودا د وارێن پلاندانان و كارگێری و خوه‌پاراستنێ دا بۆ هندێ ل ده‌مه‌كێ‌ نێزیك وه‌كو رێڤه‌به‌ریا گشتی سه‌ره‌ده‌ری ل گه‌ل بهێته‌ كرن”.

ئه‌ڤرۆ، زنار تۆڤی:

به‌رپرسێ راگه‌هاندنا هاتنوچوونا پارێزگه‌ها دهۆكێ بۆ رۆژناما ئه‌ڤرۆ دیار كر، د روودانه‌كا ترافیكی دا سێ كه‌س بوونه‌ قۆربانی.

موقه‌دم ئازاد تاها، به‌رپرسێ راگه‌هاندنا هاتنوچوونا پارێزگه‌ها دهۆكێ گۆت: “دوهی 30/8/2021 و ل ده‌مژمێر 7:00 سپێدێ ل سه‌ر جادا سه‌ره‌كی یا د ناڤبه‌را هه‌ردو پارێزگه‌هێن هه‌ولێر و دهۆكێ دا، ل سنوورێ قه‌زا شێخان و ل نێزیك ناحیا باعه‌درێ روودانه‌ك روودایه‌ ژ جۆرێ لێكدان د ناڤبه‌را دو ترۆمبێلێن تایبه‌ت ژ جۆرێن كه‌یا سیراتۆ ل گه‌ل ترۆمبێله‌كا شۆفرلێت ئیكو نوكس، د ئه‌نجام دا كه‌سه‌كی گیانێ خوه‌ ژ ده‌ست دا و دو كه‌س ژی بریندار بوون و زیانێن مادی ژی گه‌هشتنه‌ هه‌ردو ترۆمبێلان”.

ناڤهاتی داخواز ژ شۆفێران كر كو پێگریێ‌ ب رێنما و هێمایێن هاتنوچوونێ‌ بكه‌ن و له‌زاتیێ‌ بكار نه‌ئینن، داكو دووری روودانێن ترافیكی بن.

ئه‌ڤرۆ:

جڤاتا زانكۆیا دهۆك كۆمبوو، تێدا بڕیارا ده‌ستپێكرنا سالا نوویا خواندنێ‌ د ناڤ كه‌مپێن زانكۆیێ‌ دیار كر.

جڤاتا زانكۆیا دهۆك ل رۆژا 29/8/2021 كۆمبوو، تێدا بڕیار دا ل رۆژا ئێكشه‌مبی 5/9/2021 سالا نوو یا خواندنێ‌ 2021 – 2022 بۆ قوتابیان د ناڤ كه‌مپێن زانكۆیێ‌ دا ده‌ست پێ‌ بكه‌ت.

دیسا ل دووڤ بڕیارا جڤاتا وه‌زاره‌تا خواندنا بلند و ڤه‌كۆلینێن زانستی، بڕیاره‌ سوبه‌هی 1/9/2021 ده‌واما فه‌رمی یا مامۆستایێن زانكۆیێ‌ ده‌ست پێ‌ بكه‌ت، هه‌ر دیسا وه‌زاره‌تا په‌روه‌ردێ‌ ژی بڕیار دایه‌ ل رۆژا 1/9/2021 ده‌واما مامۆستایان ده‌ست پێ‌ بكه‌ت.