شێخان، بارزان مزووری:

سەربەست لەزگین، بەرپرسێ مەكتەبا رێكخستنا پارتی ل پارێزگەها دهۆكێ‌ بۆ رۆژناما ئەڤرۆ دیار كر كو وان ب گرنگ دیت ل گەل ئەندام و لایەنگرێن خۆ یێن دەڤەرا شێخان كۆم ببین و بەحس ل دووماهی پێشڤەچوون و رەوشا نوكە بكەن.
سەربەست گۆت: «دەڤەرا شێخان بۆ مە وەكو پارتی گەلەك یا گرنگە، ژ بەركو نمونەیا پێكڤەژیانا ئایینی و نەتەوەیی یە، ئەم گەلەك سەربلندین پارتی هەموو دەما یا داكوكی كاربوو، كو مافێن هەموو پێكهاتێن كوردستانێ بهێنە پاراستن و چو جوداهی د ناڤبەرا وان دا نەهێتە كرن».
گۆتژی: «ئەڤرۆ خالەكا بهێز یا هەرێما كوردستانێ و حكومەتا هەرێمێ ئەڤ پێكڤەژیانا ئایینی و نەتەوەیی یە، كو ژ روویێ سیاسی ژی ڤە كاریگەریەكا مەزن هەم ل دەرڤەی كوردستانێ و ناڤخۆ ژی یا هەی».

هەرهین محەمەد:

رێڤەبەرێ‌ چاندنا دەڤەرداریا شێخان دیاركر، بڕیارە ل ئەڤێ‌ حەفتیێ‌ ناڤێ وان جۆتیارێن ئەڤ سالە گەنم چاندی بهێتە تۆماركرن، ئەو كەسێ‌ ناڤێ‌ خوە تۆمار نەكەت، ژ رادەستكرنا گەنمی بۆ سایلۆیا شێخان دێ‌ بێ‌ بەهربیت.
ئەندازیار نەجمەدین عەبدوللا، رێڤەبەرێ‌ چاندنا شێخان بۆ ئەڤرۆ گۆت: «ل سالا بۆری رێژەیا گەنمی ل سنوورێ‌ دەڤەرداریا شێخان گەلەكا باشبوو، لێ‌ ب تنێ‌ ب رێژەیا 26% گەنم هاتە وەرگرتن و ئەو گەنمێ‌ مایی د دەستێ‌ جۆتیاران داما».
گۆتژی: «هاتنا بارانان گەلەك یا گرنگە بۆ گەنمی، ب تایبەتی ل دەڤەرداریا شێخان رێژەكا مەزن یا گەنمی دهێتە چاندن، ئەو جۆتیارێن ئەڤ سالە گەنم چاندی خودان بیرێت ئاڤێ‌ نە و چو كارتێكرن لێ‌ نەبوویە، نوكە گەنمێ‌ خوە ب ئاڤا بیران ئاڤ ددەن».

دهوك، لەزگین جوقی:

ل سەر بودجا پارێزگەها دهۆكێ كەلها نزاركێ دێ هێتە نووژەنكرن و بیتە مۆزەخانەیەكا نیشتمانی، كو دەربڕینێ ژ ئێش و ئازارێن وەلاتیێن پارێزگەهێ بكەت، یێن د سالا 1988دا كەفتینە بەر هەوێن ئەنفالێن ڕەش.
د. عەلی تەتەر، پارێزگارێ دهۆكێ دیاركر، دڤێت كەلها نزاركێ ل سەر تەرزێ وێ یێ كەڤن و ب رێكوپێكی بهێتە نووژەنكرن و دەستكاری تێدا نەهێتە كرن.
پارێزگەها دهۆكێ راگەهاند، د قووناغا ئێكێ دا پەرژان و دیوارێن كۆنكریتی و جاددە و جهەكێ تایبەت بۆ ساخكرنا بیروەریا ئەنفالان دێ هێتە چێكرن، د قووناغا دویێ‌ دا چەند هۆل و جهێن ناڤ كەلهێ دێ وەكو مۆزەخانە هێنە چێكرن، گوژمێ گشتی یێ هەردو قووناغان نێزیكی دو ملیار دینارانە.

رەمەزان زەكەریا:

بڕیارە ئەڤ سالە دو پڕۆژەیێن گرنگ ل دەڤەرداریا ئاكرێ بهێنە تەمامكرن، كو دێ هەموو خەلكێ دەڤەرێ ژ وان پڕۆژەیان مفادار بیت.
د. دلاوەر بۆزۆ، دەڤەردارێ ئاكرێ د كۆنگرەكێ رۆژنامەڤانی دا راگەهاند: بڕیارە ئەڤ سالە ل سنوورێ دەڤەرداریا ئاكرێ دو پڕۆژەیێن گرنگ بهێنە دروستكرن و تەمامكرن، ژ وان ژی پڕۆژەكێ مەزن یێ چاندنا دارزەیتوونانە ل گەل ڤەكرنا كارگەهەكا زەیتوونان.
دەڤەردارێ ئاكرێ ل دۆر پڕۆژەیێ ئاڤا ئاكرێ ژی گۆت: «بۆ پڕۆژەیێ ستراتیژی یێ ئاڤا ئاكرێ سوپاسییا مەسرور بارزانی، سەرۆكێ حكومەتا هەرێما كوردستانێ و نڤیسینگەها وی و پارێزگارێ دهۆكێ دكەین، كو هەموو ل سەر خەت بوون، هەتا نوكە كارەكێ گەلەك باش هاتیە ئەنجامدان و ئەڤ پڕۆژە بەر ب قووناغێن دووماهیێ دچیت و بڕیارە هەتا نەهـ مەهێن دی تەمام ببیت و بكەڤیتە د خزمەتا وەلاتیان دا».

رەمەزان زەكەریا:

رێڤەبەریا بەرگریا شارستانی ل ئاكرێ د كۆنگرەكێ رۆژنامەڤانی دا ئارمارێن سالا بۆری یێن ئاگربەربوونێ بۆ دەزگەهێن راگەهاندنێ ئاشكراكرن و دیار كر، د سالا بۆری دا چار وەلاتی خەندقینە و نەه ژی هاتینە رزگاركرن.
عـەقـیـدێ مـاف ئیبراهیم فـەریـق، رێڤەبەریا بەرگریا شارستانی ل ئاكرێ ئامارێن سالا 2024 ئاشكرا كرن و گۆت: «ب گشتی هزار و 435 روودان هاتینە تۆماركرن، سێ كەسان د وان روودانان دا گیانێ خۆ ژ دەست دایە، ل گەل كاركەندەكێ بەرگریا شارستانی».
ناڤبری گۆتژی: «د سالا بۆریدا چار وەلاتی خەندقین و نەه ژی ژ مرنێ‌ هاتینە رزگاركرن، دیسا دو هزار و 986 ڤەدیتن ل سەر جهێن بازرگانی و حكومی هاتینە كرن».