شێخان، بارزان مزووری:

قایمقامێ‌ قه‌زا شێخان بۆ رۆژناما ئه‌ڤرۆ دیار كر، ئه‌و دگه‌ل هه‌ردو رێكخراوێن بیانی بناڤێن “ACTED _UNDP” كۆمبووینه‌ بۆ ئینانا ده‌لیڤێن كاری بۆ كه‌سانێن بێ‌ كار ل قه‌زا شێخان.

سه‌ردار یه‌حیا عه‌بدولعه‌زیز، قایمقامێ‌ قه‌زا شێخان ئاشكرا كر، هه‌ردو رێكخراوێن ناڤهاتی هژماره‌كا پرۆژان د بیاڤێن چاندن و په‌روه‌ردێ‌ دا پێشنیار كربوون، نوكه‌ بڕیارا دروستكرنا وان پرۆژان هاتیه‌ و گۆت: “هزار و 900 كه‌سێن بێكار بۆ ده‌مێ‌ 40 رۆژان دێ‌ ب گوژمه‌كێ‌ پاره‌ی یێ‌ باش ده‌نه‌ كاری”.

ناڤهاتی خویا ژی كر، د ناڤ باژێرێ‌ شێخان دا بازاره‌كێ‌ سه‌رده‌م ژلایێ‌ وه‌زاره‌تا كار و كاروبارێن جڤاكی یا عیراقێ‌ ب هه‌ڤكاری دگه‌ل حكومه‌تا هه‌رێما كوردستانێ‌ هاتیه‌ دروست كرن و ژ 150 دوكانان پێك دهێت، ئه‌و دوكان ب رێكا لژنه‌كا تایبه‌ت دهێنه‌ به‌لاڤكرن و ژلایێ‌ وان هه‌ردو رێكخراوان؛ هاریكاریا وان دهێته‌ كرن بۆ كڕینا كه‌لوپه‌لێن د ناڤ دوكانان دا وه‌كو پشته‌ڤانیه‌ بۆ وان بێ‌ كاران.

ئه‌ڤرۆ، حه‌مۆ محه‌مه‌د:

رێڤه‌به‌رێ‌ هه‌فته‌ بازار ل دۆمیز بۆ رۆژناما ئه‌ڤرۆ دیار كر، سوبه‌هی رۆژا دوشه‌مبی 16/8/2021 ل بن درووشمێ‌ (ئه‌رزانی ئارمانجا مه‌یه‌) هه‌فته‌ بازار دێ‌ هێته‌ ڤه‌كرن كو هه‌موو كه‌ره‌ستێن پێدڤی یێن خوارن، ڤه‌خوارن، پاقژكه‌ر، جوانكاری و… هتد ب خوه‌ڤه‌ دگریت و دبێژیت: ئارمانجا مه‌ ئه‌وه‌؛ كه‌ره‌ستان ب كوالێتیه‌كا باش و ب ئه‌رزانترین بها بۆ وه‌لاتیان به‌رده‌ست بكه‌ین.

ئیبراهیم خه‌لیل، رێڤه‌به‌رێ‌ هه‌فته‌ بازار ل دۆمیز ئاشكرا كر، مه‌ره‌ما وان ژ ڤه‌كرنا ڤی بازاری ل سنوورێ‌ پارێزگه‌ها دهۆكێ‌ ئه‌وه‌ كو بشێن ب بهایه‌كێ‌ ئه‌رزانتر ژ بازاری كه‌ره‌ستان ب فرۆشنه‌ وه‌لاتیان و هاریكاریا خێزانێن هه‌ژار و كێم ده‌رامه‌ت بكه‌ن و گۆت: “ئه‌م كه‌ره‌ستێن خوه‌ ب كێمترین مفا دفرۆشینه‌ كریاران، ژ به‌ركو كارێ‌ مه‌ پتر یێ‌ مرۆڤایه‌تیه‌ ژ هندێ‌ كو ب تنێ‌ مفا و پاره‌كێ‌ زێده‌تر بگه‌هیته‌ مه‌”.

ئیبراهیمی خویا ژی كر، وان ل به‌ره‌ د پاشه‌رۆژه‌كا نێزیك دا ل سه‌نته‌رێ‌ پارێزگه‌ها دهۆكێ‌ و ده‌ڤه‌رێن دی یێن سه‌ر ب پارێزگه‌هێ‌ ڤه‌ لقێن هه‌فته‌ بازار ڤه‌كه‌ن.

هه‌ولێر، قائید میرۆ:

به‌رپرسه‌كێ وه‌زاره‌تا كاره‌بێ‌ ئاشكرا كر، پلان بۆ زێده‌كرنا به‌رهه‌مێ كاره‌بێ هه‌نه‌ و ئاشكرا كر، د شیانێن وه‌زاره‌تێ دا نینه‌ به‌رهه‌مێ وێستگه‌ها كواشێ زێده‌ بكه‌ت، چونكو پێڤدڤی ب هاریكاریا وه‌زاره‌تا سامانێن سرۆشتی هه‌یه‌ بۆ دابینكرنا غازا سرۆشتی.

كامل قه‌زاز، بریكارێ وه‌زاره‌تا كاره‌بێ بۆ رۆژناما ئه‌ڤرۆ دیار كر، بزاڤێن حوكمه‌تا هه‌رێما كوردستانێ بۆ زێده‌كرنا به‌رهه‌مێ كاره‌بێ د به‌رده‌وامن و بۆ ڤێ مه‌ره‌مێ پلان هاتیه‌ دانان ده‌ستپێكێ ب رێیا سیسته‌مێ زیره‌ك زێده‌گاڤیێن سه‌ر كاره‌بێ بهێنه‌ لابرن، چونكو ل گوره‌ی ئامارێن وه‌زاره‌تێ 40%ێ  كاره‌با نشتیمانی ب هه‌روه‌ دچیت و زێده‌گاڤی ل سه‌ر تۆڕێن كاره‌بێ هاتینه‌ كرن و گۆت: “ئه‌و كاره‌با ژلایێ حوكمه‌تا هه‌رێما كوردستانێ دهێته‌ به‌لاڤكرن 40%ێ ژی ئه‌گه‌رێ‌ زێده‌گاڤیێن ل سه‌ر تۆرێن كاره‌بێ هاتینه‌ كرن، كاره‌ب دهێته‌ دزین و ناگه‌هیته‌ وه‌لاتیان”.

كامل قه‌زاز ئاماژه‌ ب وێ‌ چه‌ندێ‌ كر، هنده‌ك پلان هاتینه‌ دانان ژبلی پیڤه‌رێ زیره‌ك به‌رده‌وام كار بۆ زێده‌كرنا به‌رهه‌می دهێته‌ كرن، بۆ نموونه‌: پشتی ده‌ست ب كاربوونا كابینا نه‌هێ هزار و 300 میگاواتێن كاره‌بێ‌ هاتینه‌ زێده‌كرن و گۆت: “هنده‌ك پێنگاڤێن دی ژی هه‌نه‌ بۆ زێده‌كرنا به‌رهه‌می، به‌لێ بۆ پشته‌ڤانیكرنا پرۆژێن كاره‌بێ مه‌ پێدڤی ب هاریكاریا وه‌زاره‌تا سامانێن سرۆشتی هه‌یه‌، مینا دابینكرنا غازا سرۆشتی بۆ وێستگه‌ها به‌رهه‌مئینانا كاره‌با كواشێ، كو دێ بیته‌ ئه‌گه‌رێ زێده‌كرنا به‌رهه‌مێ كاره‌بێ”.

ئه‌ڤرۆ، ره‌مه‌زان هه‌رنی:

ل سه‌ر بڕیار و راسپارده‌یا مه‌سرور بارزانی، سه‌رۆك وه‌زیرێن هه‌رێما كوردستانێ وه‌زاره‌تا سامانێن سروشتی به‌رهه‌ڤیان دكه‌ت كو ئه‌ڤ ساله‌ گازا سپی ل سه‌لا وه‌لاتیان به‌لاڤ بكه‌ت و ئه‌ندامه‌كێ لژنا وزه‌ و سامانێن سروشتی ل په‌رله‌مانێ كوردستانێ دبێژیت: ئه‌و گازه‌ حوكمه‌تا هه‌رێمێ‌ دابینكریه‌ و دڤێت به‌غدا ژی پشكا هه‌رێمێ‌ بهنێریت.

د. رێبوار بابكه‌یی، ئه‌ندامێ لژنا وزه‌ و سامانێن سروشتی ل په‌رله‌مانێ كوردستانێ بۆ رۆژناما ئه‌ڤرۆ گۆت: “نوكه‌ وه‌زاره‌تا سامانێن سروشتی یا به‌رهه‌ڤیان دكه‌ت كو ب زووترین ده‌م گازا سپی ل سه‌ر مالان به‌لاڤ بكه‌ت، ئه‌و ژی ئه‌و گازه‌ یا حكومه‌تا هه‌رێمێ‌ دابین دكه‌ت، نه‌ك ئه‌و گازه‌ یا ژ به‌غدا بۆ هه‌رێما كوردستانێ دهێته‌ ره‌وانه‌كرن”.

گوتژی: “ئه‌و گازا بریاره‌ ئه‌ڤساله‌ لسه‌ر وه‌لاتیان بهێته‌ به‌لاڤكرن ل كوردستانێ بۆ بهایێ‌ به‌رمیلێ‌ بۆ ناڤ سه‌نته‌رێ باژێران 45 هزار دینارن و بۆ ده‌رڤه‌ی باژێران ژی 46 هزارن، ل ده‌ستپێكێ ژی ل ده‌ڤه‌رێن چیایی دێ گاز هێته‌ به‌لاڤكرن”.

بابكه‌یی ئاشكرا كر، گازا سپی ب بهایێ حكومی دێ‌ هێته‌ به‌لاڤكرن جوداهی دگه‌ل بهایێ بازرگانی هه‌یه‌ و گۆت: “پێدڤیه‌ به‌غدا ژی پشكا گازا وه‌لاتیێن هه‌رێما كوردستانێ بهنێریت بۆ وێ چه‌ندێ هه‌موو ده‌ڤه‌رێن كوردستانێ ژ وه‌رگرتنا پشكا خوه‌ یا گازێ مفادار بن”.

ئامێدیێ‌ ، مه‌حمود نهێلی:

ژ به‌ر شێلیبوونا ئاستێ‌ ئاڤا رووبارێ‌ زێ‌، پرۆژێ‌ ستراتیژی یێ‌ ئاڤا ئامێدیێ‌ سالانه‌ تووشی ئاریشه‌یان دبیت و گه‌له‌ك جاران بۆ ماوه‌یه‌كی درێژ یان ژی كورت نه‌شێت ئاڤێ‌ بۆ وه‌لاتیان دابین بكه‌ت و ده‌ڤه‌ر ب گشتی تووشی قه‌یرانا ئاڤێ‌ دبیت، ئه‌ڤ یه‌كه‌ ژی بوویه‌ جهێ‌ گازندا وه‌لاتیان. رێڤه‌به‌رێ‌ ئاڤا ئامێدیێ‌ ژی دیار كر، ئه‌ڤ رێژا شێلیبوونێ‌ چ جار نه‌گه‌هشتیه‌ ڤی راده‌ی و ئه‌گه‌رێن وێ‌ ژی بۆ بارانێن ڤی ده‌مێ‌ سالێ‌ و هشكه‌سالیێ‌ و كێمبوونا ئاڤا كانیا و جویێن كوردستانێ‌ و كاكرنێ‌ ل سه‌ر رێ و رێبارێن باكورێ‌ كوردستانێ‌ ڤه‌گه‌راندن و گۆت: بۆ چاره‌سه‌ركرنا ڤێ‌ ئاریشه‌یێ‌ ب ره‌نگه‌كی ده‌مكی ئه‌م شیانه‌ پرۆژێن كه‌ڤنێن وان جان بده‌ینه‌ كاری یێن پرۆژێن وان ژ كار نه‌كه‌فتین و هه‌ر دو رۆژان جاره‌كی ئاڤێ‌ بۆ ولاتیان دابین بكه‌ین.

رزگار سدقی ئاكنجیێ‌ سه‌نته‌رێ‌ ناحیا دێره‌لۆكێ‌ بۆ رۆژناما ئه‌ڤرۆ دیار كر، به‌ری پرۆژێ‌ ستراتیژی ل دێره‌لۆكێ‌ ب دانن وان چ ئاریشه‌ل گه‌ل ئاڤێ‌ نه‌بوون و رۆژانه‌ بۆ ماوه‌یه‌كی ئاڤ بۆ دهاته‌ به‌ردان و گۆت: پشتی پرۆژه‌ ده‌ست ب كارێ‌ خوه‌ كری ئه‌و هه‌ر چه‌ند هه‌یڤان جاره‌كێ‌ یان چه‌ندین جاران تووشی قه‌یرانا ئاڤێ‌ دبن و نه‌چار دبن ئاڤێ‌ بكرن و ئاشكرا كر، خه‌لكێ‌ دێره‌لۆكێ‌ بوویه‌ قوربانی پرۆژێ‌ ئاڤا ئامێدیێ‌.

وه‌لاتیه‌كی دی یێ‌ ناحیا دێره‌لۆك دبیژیت: راستی مه‌ چ خێر ژ ڤی پرۆژه‌ی نه‌دیتینه‌ ژبلی زیانێ‌. وه‌لاتی حه‌سه‌ن عه‌بدوالله ئاكنجیێ‌ تاخێ‌ داستان ل دێره‌لۆك بو رۆژناما ئه‌ڤرۆ دیار كر، ئاڤا وان نه‌یا پرۆژێ‌ ستراتیژی یه‌ و ئاڤ بۆ وان ل گه‌لیێ‌ شێرانه‌ دهێت و هه‌ر یا پرۆژێ‌ كه‌ڤنه‌ و رۆژانه‌ بۆ چه‌ندین ده‌مژمێران ئاڤ بۆ دهێته‌ به‌ردان و چ جار بێ‌ ئاڤ نه‌بووینه‌ و گۆت: هه‌ر ده‌مه‌كی ئاڤا رووباری شێلی دبیت ئاڤا مه‌ یا گه‌لیێ‌ شێرانه‌ دده‌نه‌ پرۆژه‌ی ل شوونا ئاڤا رووباری ب ڤێ‌ یه‌كێ‌ ئه‌م مه‌حتل دبین و گه‌له‌ك جاران ئه‌م ئاڤێ‌ دكرین ژ به‌ر وێ‌ یه‌كی ئه‌ز هه‌وه‌ پشتراست دكه‌م كو ڤی پرۆژه‌ی ژبلی زیانێ‌ چ دی نه‌گه‌هاندیه‌ مه‌ وه‌ك تاخێ‌ داستان ل دێره‌لۆكێ‌.

سائیر ئامێدیێ‌ ئاكنجیێ‌ سه‌نته‌رێ‌ قه‌زا ئامێدیێ‌ بۆ رۆژناما ئه‌ڤرۆ دیار كر، ئه‌ڤ پرۆژه‌یه‌ ب ره‌نگه‌كی باش نه‌هاتیه‌ چێكرن كو بشێت ب سه‌ركه‌فتیانه‌ ئاڤێ‌ بو وه‌لاتیان دابین بكه‌ت و گۆت: ل ده‌سپێكا چێكرنا ڤی پرۆژه‌ی دهاته‌ گۆتن كو پرۆژێ‌ ستراتیژی یێ‌ ئاڤێ‌ دشێت 24 ده‌مژمێران بو ماوێ‌ 25 سالان ئاڤێ‌ بو خه‌لكێ‌ ده‌ڤه‌رێ‌ دبین بكه‌ت بێ‌ كو چو ئاریشه‌ بۆ دروست ببن.

ئاشكرا كر، نوكه‌ هند جاران دو سێ‌ رۆژان جاره‌كێ‌ ئاڤ بۆ دهێته‌ به‌ردان ئه‌و ژی ب تنێ‌ نیڤ ده‌مژمێرێ‌ یان ژی گه‌له‌ك جاران ب تنێ‌ 15 خوله‌كان وی ده‌می ئه‌و نه‌چار دبن ئه‌و نه‌چار دبن ئاڤێ‌ بكرن. ناڤهاتی داخازا چاره‌سه‌ریه‌كی بۆ ڤێ‌ ئاریشێ‌ دكه‌ت كو ئه‌ڤ چاره‌سه‌ریا باش و دومدرێژ بیت نه‌ك ده‌مكی.

وه‌لاتیه‌كی گوندێ‌ گوهه‌رز ب ناڤێ‌ شڤان بو رۆژناما ئه‌ڤرۆ دیار كر، ئه‌ڤه‌ بۆ ماوێ‌ 15 رۆژایه‌ ئاڤ بو وان نه‌هاتیه‌ به‌ردان و وان دڤان رۆژان شه‌ش تانكه‌رێن ئاڤێ‌ كرینه‌.

ژلایێ‌ خوه‌ ئه‌ندازیار به‌شار حه‌جی به‌رپرسێ‌ فه‌رمانگه‌ها ئاڤا ئامێدیێ‌ بۆ رۆژناما ئه‌ڤرۆ دیار كر، راسته‌ نوكه‌ ئاریشا ئاڤێ‌ ل ده‌ڤه‌رێ‌ دروست بوویه‌ و ئه‌گه‌رێن وێ‌ ژی بۆ شێلیبوونا ئاستێ‌ ئاڤا رووبارێ‌ زێ‌ ڤه‌گه‌راند.

ئه‌ندازیار به‌شار، رێڤه‌به‌رێ‌ فه‌رمانگه‌ها ئاڤا ئامێدیێ‌ بۆ ئه‌ڤرۆ گۆت: ده‌مێ‌ هه‌ر پرۆژه‌یه‌ك دهێته‌ دانان و لێكولین ل سه‌ر دهێته‌كرن و نمونه‌یێن ئاڤێ‌ دهێنه‌ وه‌رگرتن و ل ڤی پرۆژه‌ی ژی ل دووڤ وێ‌ نمونا هاتیه‌ وه‌گرتن  هاتیه‌ رێكخستن ل سه‌ر پلا شێلیبوونێ‌ ل بن هزارێ‌ دا و ئه‌ڤ پرۆژه‌یه‌ك دشێت كار بكه‌ت و ئاڤێ‌ بۆ ولاتیان دابین بكه‌ت تا دگه‌هیته‌ 999 و هه‌ر ده‌مه‌كێ‌ ئه‌ڤ رێژا شێلیبوون و پیسبوونێ‌ گه‌هشته‌ هزارێ‌، پرۆژه‌ ژ كار رادوه‌ستیت و ئاشكرا كر، پرۆژێن گه‌له‌ك جهان ب ڤی ره‌نگی نه‌ و ئه‌م دشێن بێژین پرانیا پرۆژێن كوردستانێ‌ ب ڤه‌ ره‌نگی و ل سه‌ر هزارێ‌ هاتینه‌ رێكخستن.

ناڤهاتی خویاكر، ئه‌ڤ رێژا شێلیبوونێ‌ چ جار نه‌گه‌هشتیه‌ ڤی راده‌ی و ئه‌گه‌رێن وێ‌ ژی بۆ بارانێن ڤی ده‌مێ‌ سالێ‌ و هشكه‌ سالیێ‌ و كێمبوونا ئاڤا كانیا و جویێن كوردستانێ‌ و كاكرنێ‌ ل سه‌ر رێ و رێبارێن باكورێ‌ كوردستانێ‌ ڤه‌گه‌راندن .

ناڤهاتی دیار ژی كر، بۆ چاره‌سه‌ركرنا ڤێ‌ ئاریشه‌یێ‌ ب ره‌نگه‌كی ده‌مكی ئه‌م شیانه‌ پرۆژێن كه‌ڤنێن وان جان بده‌ینه‌ كاری یێن پرۆژێن وان ژ كار نه‌كه‌فتین و هه‌ر دو رۆژان جاره‌كی ئاڤێ‌ بۆ ولاتیان دابین بكه‌ین.

پرۆژێ‌ ستراتیژی یێ‌ ئاڤا ئامێدیێ‌ ئێك بوویه‌ ژ پرۆژێن هه‌ره‌ گرنگ ل سنورێ‌ ناحیا دێره‌لۆك هاتیه‌ دانان كو ژلایێ‌ ئازاد به‌رواری جێگرێ‌ سه‌رۆكێ‌ حكومه‌تا هه‌رێما كوردستانێ‌ ل سالا 2010 به‌رێ‌ بنیاتی بو هات بوو دانان. و ل وی ده‌می دهاته‌ گۆتن كو ب 24 ده‌مژمێران دێ‌ ئاڤ بو ولاتیێن سنورێ‌ قه‌زا ئامێدیێ‌ هه‌ر ل سه‌رسنكێ‌ تا دگه‌هیته‌ سیریێ‌ دابین كه‌ت و پشتی ده‌ربازبوونا 11 سالان ژ دانانا ڤی پرۆژه‌ی دیار بوویه‌ كو هند كێماسی تێدا مایینه‌ ژ وان ژی شیانێن پارزاندنا ئاڤا شێلی یا  سه‌ر رێَژا هزارێ‌ دا نینن و ئه‌ڤ یه‌كه‌ ژی بوویه‌ ئه‌گه‌رێ‌ هندێ‌ كو خه‌لكێ‌ ده‌ڤه‌رێ‌ سالانه‌ چه‌ندین جاران تووشی قه‌یرانا ئاڤێ‌ ببن.

—————–