سەرۆکێ پارتا بزاڤا نەتەوەپەرست دوهی د کۆمبوونا پارتا خوە دا راگەهاند ئەو دێ ل تورکیا کار بۆ ئاشتیێ و براتیێ کەن و دڤێت پارتا دەم ژی نەبیتە پشکەک ژ پیلانێن وەلاتێن دەرڤە ل دژی تورکیا، دڤێت ئەم ل تورکیا پرسێن هەی پێکڤە چارەسەر بکەین.

دەولەت باخچەلی سەرۆکێ پارتا بزاڤا نەتەوەپەرست یا تورکیا دوهی د کۆمبوونا پارتا خوە دا ل پەرلەمانێ تورکیا دیار کر، پیلانێن مەزن ل دژی تورکیا هەنە، ئیسرائیل ب هەڤکاریا وەلاتێن زلهێز یێن جیهانێ دڤێت ئالۆزیێن نوو ل دەڤەرێ دروست بکەت، براستی ژی دەڤەرا مە وەکو ئاگری لێ هاتیە و د رەوشەکا وەسا دا دڤێت ئەم وەکو دەولەت و گەلێ تورکیا پێکڤە پرسێن هەی چارەسەر بکەین و گۆت: (من بەری نها ژی دیار کریە، دڤێت ئەم پێکڤە کار بۆ ئاشتیێ و چارەسەرکرنا پرسێن نها ل تورکیا بکەین، یێن بخوازن ل گەل مە بۆ ئاشتیێ و براتیێ کار بکەن بلا کەرەم کەن و ئەم ژی دێ پشتەڤانیێ ل وان کەین، لێ نابیت ب رێیا توندوتیژیێ هندەک تشت ل سەر مە بهێنە سەپاندن، چونکی ئەو یەک ب چو رەنگەکێ ناهێتە قەبوول کرن).
ناڤهاتی د پشکەکا دی یا ئاخڤتنا خوە دا بەحسێ سەرۆکێ پەکەکێ عەبدوللا ئۆجەلانی کر کو نها ل زیندانێ دایە و گۆت: (دەمێ ئۆجەلان هاتە گرتن وی دەمی دیار کر ئەو بەرهەڤە خزمەتا تورکیا بکەت، دێ بلا نها کارێ خوە بکەت، بلا رێکخستنا تیرۆرستی ژناڤ ببەت، وی دەمی دێ هەموو پرسێن هەی هێنە چارەسەر کرن، چونکی هەتا چەک د دەستێ تیرۆرستان دا بیت ئاشتی و براتی ژی دێ گەلەک یا ب زەحمەت بیت).
سەرۆکێ پارتا بزاڤا نەتەوەپەرست ئەو یەک ژی دیار کر، پیلانێن مەزن ل دژی تورکیا هەنە، هندەک هێز دخوازن ل تورکیا ژی ئالۆزیان دروست بکەن، ژ بەر ڤێ یەکێ ژی وەکو دەولەت و گەلێ تورکیا دڤێت ئەم رێ نەدەین هێزێن دەرڤە ئاریشان بۆ مە دروست بکەن، ئەم دشێین هەموو پرسێن هەی پێکڤە چارەسەر کرن، دەرگەهێ دانوستاندنان ڤەکرینە و بلا چەک د رۆژەڤا تورکیا دا نەبیت.
چاڤدێرێن سیاسی ژی دیار دکەن، ئەردۆغان ب رێیا دەولەت باخچەلی دخوازیت دەست ب قۆناغەکا نوو یا چارەسەرکرنا پرسا کوردی بکەت و نها ل گەل عەبدوللا ئۆجەلان سەرۆکێ زیندانکری یێ پەکەکێ ژی دانوستاندن دهێنە کرن، لێ پارتا کۆماری وەکو مەزنترین پارتا ئۆپۆزسیۆنێ هەتا نها هەلوەستێ خوە ل دۆر قۆناغەکا وەسا دیار نەکریە، چونکی پارتا کۆماری دڤێت بابەتێ چارەسەرکرنا پرسا کوردی ب رێیا پەرلەمانی بهێتە کرن و ژ بەر ڤێ یەکێ ژی پارتا کۆماری داخواز کریە هەر پێنگاڤەکا بۆ ئاشتیێ بلا ب رێیا پەرلەمانی بیت و پەرلەمانێ تورکیا ببیتە ژێدەرێ چارەسەریێ.

جۆزیپ بۆریل بەرپرسێ سیاسەتا دەرڤە یا ئێکەتیا ئۆرۆپا راگەهاند، رەوشا نها یا رۆژهەلاتا ناڤین گەلەک ئالۆزە و مەترسیا هندێ ژی هەیە کو شەڕ بەرفرەهتر لێ بهێت، وەکو ئێکەتیا ئۆرۆپا وان بەری نها گەلەک جاران داخواز ژ ئسرائیلێ، حەماسێ و حزبوللاهێ کرینە کو شەڕی بدەنە راگرتن و کار بۆ دانوستاندنان بکەن، لێ مخابن هەتا نها ژی شەڕ ب دژواری بەردەوام دکەت و رۆژانە ژی وەلاتیێن سڤیل دبنە قوربانی.
ناڤهاتی ئەو یەک ژی دیار کر، هەکە رەوش وەکو نها بەردەوام بیت دێ شەڕ بەرفرەهتر لێ هێت و دبیت هندەک وەلاتێن دی یێن رۆژهەلاتا ناڤین ژی تووشێ شەڕەکێ وەسا ببن، بێگومان ئەو یەک دێ رەوشا هەی خرابتر لێ کەت و وی دەمی کار بۆ راگرتنا شەڕی ژی دێ گەلەک یا ب زەحمەت بیت، ژ بەر ڤێ یەکێ هێشتا ژی دەلیڤە هەیە و دڤێت هەموو ئالی هەست ب بەرپرسیار خوە بکەن و کار بۆ راگرتنا شەڕێ نها بکەن.

ئیسماعیل بەقایی پەیڤدارێ وەزارەتا دەرڤە یا ئیرانێ راگەهاند سزایێن نوو یێن ئێکەتیا ئۆرۆپا ل دژی ئیرانێ ب چو رەنگەکێ ناهێنە قەبوول کرن، هندەک ژ بەرپرسێن ئێکەتیا ئۆرۆپا بەحسێ ڤێ یەکێ کرینە کو ئیرانێ موشەکێن بالیستیک داینە رۆسیا، چو راستی بۆ ڤێ یەکێ نینن لێ ژ بۆ پاراستنا بەرژەوەندیێن خوە ل دەڤەرێ وەکو ئیران ئەم دێ پەیوەندیێن خوە ل گەل رۆسیا بهێزتر لێ کەین.
ناڤهاتی ئەو یەک ژی دیار کر، ئیران کار بۆ ئارامیێ ل دەڤەرێ دکەت و د هەمان دەمی دا مە نەڤێت شەڕێ چو وەلاتەکێ ژی بکەین، لێ هەکە ئسرائیلێ بڤێت ئێرشی ئیرانێ بکەت ئەو دێ ب توندی بەرسڤا ئسرائیلێ دەن و بەرسڤا ڤێجارێ یا ئیرانێ دێ گەلەک توند بیت، چونکی ئسرائیلێ دڤێت ئالۆزیان بۆ ئیرانێ دروست بکەت و ئیرانێ خوە بۆ هەر ئەگەرەکێ بەرهەڤ کریە.