ئه‌ڤرۆ

چاڤه‌ڕێ‌ دهێته‌ كرن ئه‌ڤرۆ ژی دو یاریێن دی یێن قۆناغا 16ێ‌ ژ قاره‌مانیا كۆپا ئۆرۆپا یۆرۆ 2020 ب دروشمێ‌ تۆلڤه‌كرن و ده‌ربازبوون بۆ قۆناغا هه‌شتێ‌ ل دو وه‌لاتێن جودا بهێته‌ ئه‌نجامدان.

هۆله‌ندا- چیك

یاریگه‌ها بۆشكاش ئه‌رینا ل وه‌لاتێ‌ هنگاریا دێ‌ مێڤانداریا هه‌ردو هه‌لبژارتیێن هۆله‌ندا و چیك ده‌مژمێر حه‌فتی شه‌ڤ كه‌ت كو دهێته‌ هژمارتن ئێك ژ یاریێن تۆلڤه‌كرنێ‌ و هیڤیێن ده‌ربازبوونێ‌ بۆ قۆناغا هه‌شتێ‌ یا یۆرۆ 2020ێ‌، هه‌لبژارتیێ‌ هۆله‌ندا ئه‌وا شیایی ژ كۆما سێیێ‌ وه‌كو خودانا سه‌رێ‌ لیستێ‌ ب سێ‌ سه‌ركه‌فتنا ل گه‌ل  هه‌ر ئێك ژ نه‌مسا، ئوكراین و مه‌كه‌دونیا ده‌ربازبیته‌ ڤێ‌ قۆناغێ‌ هه‌مبه‌ری وێ‌ چیك وه‌كو تیما رێزا سێیێ‌ پلێتا ئێك ژ باشترین هه‌لبژارتیان د كۆما چارێ‌ دا ده‌ربازبوو پشتی چار خال كۆمكرین، ئه‌ڤ یاریه‌ دهێته‌ هژمارتن د مێژوویا هه‌ردو هه‌لبژارتیان دا یا 12ێ‌ كو سێ‌ سه‌ركه‌فتن بۆ هۆله‌ندا و پێنچ بۆ چیك ل گه‌ل سێ‌ وه‌كهه‌ڤییان له‌ورا ئه‌ڤ یاریه‌ دبیته‌ یا تۆلڤه‌كرنێ‌ كو دووماهی یاری ل ڤاڤارتنێن یۆرۆ 2016ێ‌ ده‌مێ‌ چیك ب سه‌ركه‌فتی ب سێ‌ گۆلان به‌رامبه‌ر دو گۆلان، هۆله‌ندا ئه‌وا ئه‌ڤه‌ 33 ساله‌ بزاڤێ‌ دكه‌ت ناسناڤێ‌ دویێ‌ یێ‌ یۆرۆیێ‌ ب ده‌ستخوه‌ڤه‌بینیت پشتی ل 1988 جارا ئێكێ‌ بوویه‌ قاره‌مان لێ‌ پشكداریا ئه‌ڤچاره‌ دا بهێز هاتینه‌ و ب كۆمه‌كا ستێرێن خودان شیان گه‌شبینن سه‌ركه‌فتنێ‌ تۆماربكه‌ت و به‌ره‌ ب هیڤیێن خوه‌ بچن ژوانا ممفیس دیبایی، جورجینیو فینالدۆم، ستیڤان دی فرێچ، فۆتر ڤیگۆرست و دێنزل دۆمفرێس، ژلایێ‌ خوه‌ڤه‌ هه‌لبژارتیێ‌ چێك ئه‌وا ب هه‌ڤپشكی وه‌كو ئێك وه‌لات ل گه‌ل سلۆڤاكیا به‌ری سه‌ربه‌خویا خوه‌  ل 1993ێ‌ رابگه‌هینت ناسناڤه‌ك ب ده‌ستخوه‌ڤه‌ ئینابوون دێ‌ ب هیڤیێن دوباره‌ سه‌ركه‌فتنێ‌ وه‌كو هه‌لبژارتیێ‌ سه‌ربه‌خوه‌ به‌ره‌ڤ ناسناڤێ‌ ئێكی بچیت لێ‌ هه‌مبه‌ری وێ‌ باش دزانیت هه‌ڤڕكا وێ‌ هۆله‌ندا تیمه‌كا چه‌كداره‌ ژ باشترین یاریزانێن ئۆرۆپایی و ئاست و ئه‌نجامێن وێ‌ ئارمانجێن مه‌زنتر لێكریه‌، ژلایێ‌ خوه‌ڤه‌ چیك خودان كۆمه‌كا باش یا یاریزانێن شاره‌زایه‌ ب سه‌ركێشیا كاپتنێ‌ وان فلادیمێر داریدا و گۆلكه‌ر پاتریك چێك ئه‌وێ‌ شیایی سێ‌ گۆلان تۆماربكه‌ت و ئێك ژ جوانترین گۆلێن قاره‌مانیێ‌ ل سه‌ر ناڤی وی بهێته‌ تۆماركرن ده‌مێ‌ ژ  نیڤا یاریگه‌هێ‌ دا  گۆل ل سه‌ر ئسكۆتله‌ندا ئینایی، ئه‌ڤ دیداره‌ یا تۆلڤه‌كرنێ‌ یه‌ بۆ هوله‌ندا لێ‌ هه‌لبژارتیێ‌ چیكێ‌ شیان دێ‌ هه‌بن به‌رده‌وامیێ‌ بده‌ته‌ ئاست و ئه‌نجامێن خوه‌ یان هۆله‌ندا دێ‌ بۆچوونا خوه‌ هه‌بیت و رژدبیت بۆ سه‌ركه‌فتنان نه‌هێلیت چو هه‌لبژارتی رێگرێی لێبگرت!.

پورتۆگال- به‌لچیكا

بۆ دیتنا یاریه‌كا دی یا پری هه‌ڤڕكی حه‌ز ژیّكه‌رێن یاریا ته‌پا پێی ب ژڤانن ل ده‌مژمێر 10ی شه‌ڤ بۆ یاریا دناڤبه‌را هه‌لبژارتیێ‌ پورتۆگال و به‌لجیكا ئه‌وا دێ‌ ل یاریگه‌ها لاكاروخا باژێرێ‌ سیڤییا یێ‌ ئسپانیا هێته‌ ئه‌نجامبدان و ژلایێ‌ دادڤانێ‌ ئه‌لمانی فیلێكس بریچ ڤه‌ هێته‌ برێڤه‌برن، دو هه‌لبژارتیێن ئه‌ڤ شه‌ڤه‌ ب كۆمه‌كا باش یا ستێرێن ئۆرۆپا و خودان شیان دێ‌ هێنه‌ دیتن ژوانا یێن پورتۆگالی بێرناردۆ سیلڤا، ریناتۆ سانشێز، دیێگۆ جوتا، رافائێل جوریرۆ و كریستیانۆ رۆنالدو ئه‌وێ‌ هه‌تا نوكه‌ گۆلكه‌رێ‌ قاره‌مانیێ‌  یه‌ ب پێنچ گۆلان و یێ‌ دیرووكی ب 14 گۆلان ل سه‌ر لیستا یاریزانێن ئۆرۆپا دهێت، ژلایێ‌ خوه‌ڤه‌ هه‌لبژارتیێ‌ به‌لچیكا دێ‌ ب سه‌ركێشیا ستێرێن خوه‌ ئیدین هازارد، رومێلۆ لۆكاكۆ خودانێ‌ سێ‌ گۆلان ل قاره‌مانیێ‌،یانیك ڤیریرا كاراسكۆ،كیڤن دی برۆین و گۆلپارێز تیبۆ كورتۆا.

هه‌لبژارتیێ‌ به‌لجیكا سه‌رباری شه‌ش پشكداریێن وێ‌ د قاره‌مانیا ئۆرۆپا دا لێ‌ نه‌شیایه‌ چو ناسناڤان ب ده‌ستخوه‌ڤه‌بینیت لێ‌ د یۆرۆیا 2020 دا وه‌كو ئێك ژ به‌ربژێرێن ناسناڤی نه‌ ژبه‌ر ئاست و هێزا وشاره‌زاهیا یاریزانێن وێ‌، لدویڤ ئامارێن هه‌ردو هه‌لبژارتیان د یاریێن هه‌ڤالینی و فه‌رمی دا 14 جالان هه‌مبه‌ری ئێك بووینه‌ چار سه‌ركه‌فتن بۆ هه‌ر تیمه‌كێ‌ و شه‌ش جاران وه‌كهه‌ڤبووینه‌،هه‌ر ژ سالا 1989 به‌لجیكا نه‌شیایه‌ سه‌ركه‌فتنێ‌ ل سه‌ر پورتۆگال بینیت سه‌رباری پشتی وێ‌ چار جاران هه‌مبه‌ری ئێك بووینه‌، له‌ورا ئه‌ڤ یاریه‌ ژی بۆ هه‌ڤڕكیێ‌ و ئاستی كێمتر نابیت ژ چو یاریێن قۆناغا 16ێ‌ یا یۆرۆیێ‌.

ئه‌ڤرۆ،

د داخویانیه‌كێدا سه‌رۆكێ‌ یانا ته‌ناهی یا وه‌رزشی دیاركر كو ئه‌و چاڤه‌ڕێ‌ ده‌ستكه‌ڤتێ‌ ئێكێ‌ یێ‌ تیما ته‌پا پێی یه‌ د خولا پلا دو یا كوردستانێ‌ دا ده‌مێ‌ یاریا خوه‌ ل پێنچ شه‌مبیا بهێت مێڤانداریا یانا شورجه‌ یا كه‌ركووكی ب كه‌ت ژ چارچووڤێ‌ هه‌ڤڕكیێن یاریا ئێكێ‌ یا قۆناغا شانزدێ‌ ل یاریگه‌ها زانكۆ بكه‌ن.

زێده‌تر جاسم شه‌عبان بۆ رۆژناما ئه‌ڤرۆ گوت: یانا ته‌ناهی ئێك ژ نوونه‌رێن پارێزگه‌ها دهۆكێ‌ وه‌كو پێنگاڤا ئێكێ‌ پشكداری چالاكیێن كوردستانێ‌ وعیراقێ‌ كریه‌ ب تایبه‌تی یاریێن ته‌پاپێی و یاریێن هێزێ‌ پێنه‌ڤێت مه‌ره‌ما سه‌ره‌كی پێشخستنا وه‌رزشا پارێزگه‌هێ‌ و پووته‌دان ب یاریزانێن ده‌ڤه‌رێ‌ نه‌، گرنگترین چالاكیا مه‌ بۆ رۆژا پێنچ شه‌مبیا بهێت ده‌مێ‌ ژ خولا كوردستانێ‌ مێڤاندایا یانا شورجه‌ بكه‌ین و یاریا دویێ‌ ل كه‌ركووكێ‌ بكه‌ین پێخه‌مه‌ت وه‌رگرتنا پلێتا ده‌ربازبوونێ‌ بۆ پلا ئێكا كوردستانێ‌ ئه‌ڤچه‌نده‌ ژی ب سانه‌هی نینه‌ ژبه‌ركو بارێ‌ مه‌ یێ‌ گرانه‌ ژبه‌ركو یاریزانێن مه‌ هه‌موو بێی مووچه‌ وه‌كو خوه‌ به‌خشن ل گه‌ل تیمێ‌ نه‌ و یاریزان پێدڤی ب مووچه‌یی هه‌یه‌ تایبه‌ت ده‌رونێ‌ وی ژی یێ‌ به‌رهه‌ڤبیت بۆ یاریێ‌ له‌ورا هیڤییا مه‌ ئه‌وه‌ ژ پارێزگارێ‌ دهۆكێ‌ د. عه‌لی ته‌ته‌ر و رێڤه‌به‌ر و جیهه‌تێن په‌یوه‌ندیدار پشته‌ڤانیێ‌ لڤێ‌ تیمێ‌ بكه‌ن ئه‌وێن هه‌موو كوڕێن پارێزگه‌هێ‌ نه‌.

ژلایه‌كێ‌ دیڤه‌ ناڤهاتی دیاركر كو یێ‌ گه‌شبینه‌ یانا ته‌ناهی ده‌ستكه‌فتێ‌ ئێكێ‌ یێ‌ مه‌زن د خولا كوردستانێ‌ دا تۆماربكه‌ت ب ده‌ربازبوون بۆ پلا ئێك و گوت: هه‌رچه‌نده‌ یاری ب سانه‌هی نابیت و تیما شورجه‌ ژ هه‌ڤڕكێن بهێزن بۆ تیما مه‌ لێ‌ من باوه‌ری ب یاریزانێن خوه‌ هه‌یه‌ دێ‌ یا پێدڤی ئه‌نجامده‌ن و ده‌ربازبوونێ‌ مسۆگه‌ركه‌ن سه‌رباری بارگرانیا دارایی یا یانێ‌.

ئه‌ڤرۆ، زنار زوبێر:

راهێنه‌رێ‌ نوو یێ‌ تیما باسكت بۆلا یانا ئافره‌تێن دهۆكێ‌ دیاركر ئه‌و دێ‌ ل ماوێ‌ بهێت كه‌ڤیته‌ كاری پێخه‌مه‌ت كومكرنا هژماره‌كا باش یا یاریزانانێن كچ ژبۆ هه‌لبژارتنا هژماره‌كا باش بۆ پاشه‌روژا باسكت بۆلا ئافره‌تێن دهۆك و ئه‌ڤ چه‌نده‌ ژی یا بساناهی نابیت.

زێده‌تر بایز مه‌رعان د دیداره‌كێ‌ دا بۆ رۆژناما ئه‌ڤرۆ گۆت: ئه‌ركێ‌ من دگه‌ل یانا ئافره‌تێن دهۆك گه‌له‌ك ب زه‌حمه‌ت بیت ژبه‌ركو قۆناغا ده‌سپێكێ‌ یه‌ بۆ دروستكرنا یاریزانێن باسكت بۆلا كچانه‌ و پێدڤی ب ده‌می یه‌ داكو بشێن تیمه‌كا نموونه‌ و باش بینته‌ سه‌ر رێكه‌یه‌كا دروست كو به‌رهه‌ڤبیت بۆ پشكداریێ‌ د قاره‌مانیان دا و ببیته‌ شه‌نگسته‌ بۆ وه‌رزشا پارێزگه‌ها دهۆكێ‌.

ناڤهاتی ئه‌و چه‌نده‌ ژی گۆت: دروستكرن و سه‌رپه‌رشتیا تیمێن كچان پێدڤی ب سه‌ره‌ده‌ریه‌كا تایبه‌ت و بزه‌حمه‌تره‌ ژ یا كوڕان و پێدڤیه‌ راهێنه‌ر زێده‌تر بهێن فره‌هبیت تاكو بشێت تیمه‌كێ‌ دروستبكه‌ت له‌ورا پلانا من بۆ سێ‌ سالێن بهێت بشێن زێده‌تر ژ تیمه‌كێ‌ دروستبكه‌ین بۆ باسكت بۆلا یانێ‌ و بێ‌ پشته‌ڤانیا كارگێریێ‌ و لایه‌نێن په‌یوه‌ندیدار ئه‌ڤ چه‌نده‌ بجه ناهێت لێ‌ گه‌شبینم ماوێ‌ بهێت دێ‌ كاره‌كێ‌ باش كه‌ین كو بیته‌ جهێ‌ سه‌رفه‌رازیا وه‌رزشا پارێزگه‌ها دهۆكێ‌ بگشتی.

هه‌ژی گۆتنێ‌ یه‌ راهێنه‌ر بایز مه‌رعان به‌ری نوكه‌ ژ سالا 2000 هه‌تا 2013 یاریزانێ‌ باسكت بۆلا یانا دهۆكێ‌ بوویه‌ و ماوه‌یه‌كێ‌ راهێنه‌راتیا باسكت بۆلا كچێن گاره‌ ژی كریه‌ دیسان راهێنه‌رێ‌ هه‌لبژارتیێ‌ باسكت بۆلا زانكویا دهۆك بوویه‌ شیایه‌ رێزا دویێ‌ د قاره‌مانیا زانكویێن عیراقێ‌ دا ده‌ستڤه‌بینت.