زنار تۆڤی:
حكمه‌ت محه‌مه‌د، بڕیارده‌رێ لژنا ناڤخوه ل په‌رله‌مانێ كوردستانێ بۆ رۆژناما ئه‌ڤرۆ دیار كر، ئه‌ڤرۆ شانده‌كێ هه‌ڤپشك یێ په‌رله‌مانێ كوردستانێ و په‌رله‌مانێ عیراقێ دێ سه‌ره‌دانا پارێزگه‌ها دهۆكێ كه‌ت، داكو ژ نێزیكڤه پێشێلكاریێن په‌كه‌كێ ببینیت.
حكمه‌ت محه‌مه‌د، بڕیارده‌رێ لژنا ناڤخوه ل په‌رله‌مانێ كوردستانێ گۆت: “سوبه‌هی په‌رله‌مانتارێن كوردستانێ و عیراقێ ل پارێزگه‌ها دهۆكێ دێ كۆمبوونه‌كێ ل سه‌ر وان ئالۆزیێن ل ده‌ڤه‌رێن سنووری یێن ل زاخۆ و ده‌ڤه‌را ئامێدیێ دروست بووین، ئه‌نجامده‌ن، كو بووینه ئه‌گه‌رێ شه‌هیدكرنا پێنج پێشمه‌رگه‌یان و برینداركرنا هژماره‌كا دی، دیسا ئه‌وا روودای، ژ ئه‌نجامێ هێرشه‌كا په‌كه‌كێ بوویه بۆ سه‌ر هێزێن پێشمه‌رگه‌ی، هه‌روه‌سا په‌كه‌كێ چه‌ندین جاران ئه‌ڤ ره‌فتاره ل گه‌ل پێشمه‌رگه‌ی كرینه، په‌كه‌كێ دڤێت شه‌ڕی ل گه‌ل پێشمه‌رگه‌ی بكه‌ت”.
گۆتژی: “ژ به‌ر ره‌فتارێن په‌كه‌كێ ل ده‌ڤه‌را زاخۆ، سۆپایێ توركیا ب كووراتیا 30 كیلۆمه‌تران هاتیه پێش و ل هه‌ردو ده‌ڤه‌رێن زاخۆ و ئامێدیێ گه‌له‌ك ره‌ز و زه‌ڤیێن خه‌لكێ مه سۆتینه”.
حكمه‌تی ئاشكرا ژی كر، شاندێ په‌رله‌مانێ كوردستانێ و عیراقێ دێ چنه وان جهێن زیان گه‌هشتینێ، داكو بزانن چه‌ند زیان گه‌هشتیه وان ده‌ڤه‌ران و سۆپایێ توركیا هه‌تا كیڤه هاتیه د ناڤا ئاخا هه‌رێمێ دا، بۆ ڤێ مه‌ره‌مێ ژی دێ راپۆرته‌كا تێروته‌سه‌ل ده‌رباره‌ی وان پێشێلكاریان ئاراسته‌ی سه‌رۆكاتیا په‌رله‌مانێ كوردستانێ و سه‌رۆكاتیا په‌رله‌مانێ عیراقێ هێته كرن.
ناڤهاتی گۆت: “ژ ئه‌گه‌رێ هه‌ڤڕكیا په‌كه‌كێ و سۆپایێ توركیا هه‌تا نوكه پتری 320 گوندان هاتینه چۆلكرن، ئه‌گه‌ر ژی په‌كه‌كه‌یه، به‌ری هاتنا سۆپایێ توركیا، په‌كه‌كێ نه دهێلا خه‌لكێ وان گوندان بچنه سه‌ر گوندێن خوه”.
حكمه‌ت محه‌مه‌د، بڕیارده‌رێ لژنا ناڤخوه ل په‌رله‌مانێ كوردستانێ ئاشكرا كر ژی، پێدڤیه په‌كه‌كه و سۆپایێ توركیا ئاخا هه‌رێما كوردستانێ نه‌كه‌نه گۆره‌پانا شه‌ڕ و ئالۆزیان و زیانێ نه‌گه‌هیننه خه‌لكێ ده‌ڤه‌رێ.
نيشاندان