شاكر ئه‌تروشی:
وه‌ستا موه‌فه‌ق، كو ناڤێ وی یێ دروست (موه‌فه‌ق عه‌لی) یه، كه‌سه‌كێ به‌رنیاسێ باژێرێ هه‌ولێرێ یه، نێزیكی پێنجی سالانه حزمه‌تا ستران و مۆزیكا كوردی دكه‌ت و بكارێ تۆماركرن و ئه‌ندازیاریا ده‌نگی بۆ هژماره‌كا زۆرا هونه‌رمه‌ندێن نه‌مر كریه، هه‌روه‌سا ستران و به‌رهه‌مێن پتریا هونه‌رمه‌ندێن كورد ل سه‌ر قاون و كاسێتان ل مالا خوه پاراستینه و ب گۆتنا وی هنده‌ك ستران ل ده‌ف وی هه‌نه هه‌تا نوكه كه‌سێ گوه لێ نه‌یوویه و ئه‌و حه‌زناكه‌ت به‌لاڤكه‌ت.
وه‌ستا موه‌فه‌ق، د دیداره‌كێ دا ل مالا خوه ل باژێرێ هه‌ولێرێ بۆ رۆژناما ئه‌ڤرۆ گۆت: ل سالا 1974 من ئه‌ڤ حه‌زه ژ بابێ خوه وه‌رگرت و هه‌تا نوكه ژی ستران و به‌رهه‌مێن هونه‌رمه‌ندێن نه‌مر خرڤه‌دكه‌م و د پارێزم و من ئه‌رشیفه‌كێ مه‌زن ل مالا كومكریه و گه‌له‌ك ژوی ئه‌رشیفی د ده‌مێ خوه دا ب رێیا هنده‌ك براده‌ران ل ئێزگێ كوردی ل به‌غدا من ده‌ست خوه خستیه و نوكه هنده‌ك ستران ل ده‌ف من هه‌نه كه‌سێ گوه لێ نه‌بووینه و من نه‌ڤێت بده‌مه چو تۆمارگه‌هان چنكو ئه‌و ریكلامێن خوه دكه‌نه دناڤدا و ب بێ بها دكه‌ن، ژوی ئه‌رشیفێ من پاراستی سترانێن محه‌مه‌د عارفێ جزیری و حه‌سه‌ن ره‌سول سییساوای و حه‌سه‌ن زیره‌ك و ماملێ و جه‌لال سه‌عید و گه‌له‌ك سترانبێژین دی نه، هه‌روه‌سا من (22) قاونێن نه‌مر كاویس ئاغای هه‌نه كو یێن سالا 1928 نه و هنده‌ك ژوان سترانان ب تنێ ل ده‌ف من هه‌نه، بۆ زانین پتریا ئه‌رشیفێ سترانبێژێن ده‌ڤه‌را به‌هدینان، مه‌ره‌ما من یێن نه‌مر ل ده‌ف من هه‌نه و من تێكه‌لی ل گه‌ل هه‌ردو سترانبێژێن نه‌مر ئه‌یاز و ئه‌رده‌وان زاخۆیی هه‌بوو، هه‌روه‌سا هه‌تا نوكه تێكه‌لیێن من ل گه‌ل بابێ مێڤانی ل زاخۆ كو كه‌سه‌كێ نێزیكی محه‌مه‌د عارفێ جزیری بوو د به‌رده‌وامن.
نيشاندان