ئه‌ڤرۆ، حه‌مۆ محه‌مه‌د:

به‌رپرسێ‌ راگه‌هاندنا پۆلیسێن پارێزگه‌ها دهۆكێ‌ دیار كر، ب مه‌ره‌ما خوه‌پاراستنێ‌ ژ ڤایرۆسێ‌ كۆرۆنایێ‌ و ب جهئینانا رێنمایێن ساخله‌میێ‌، وان 22 جهێن كرنا یاریا دۆمبه‌لێ‌ ل پارێزگه‌ها دهۆكێ‌ هاتنه‌ گرتن و دبێژیت: ئه‌فسه‌ر و پۆلیسێن دهۆكێ‌ به‌رده‌وام د ئه‌ركی دانه‌، داكو وه‌لاتی پێگریێ‌ ب رێنمایێن خوه‌پارێزیێ‌ بكه‌ن و كه‌ماما بكاربینن.

موقه‌دمێ‌ مافپه‌روه‌ر هێمن سلێمان، به‌رپرسێ‌ راگه‌هاندنا پۆلیسێن پارێزگه‌ها دهۆكێ‌ بۆ رۆژناما ئه‌ڤرۆ دیار كر، پشتی بڕیارا گرتنا جهێن یاریا دۆمبه‌لێ ژ پارێزگه‌ها دهۆكێ ده‌ركه‌فتی، ژبه‌ر خوه‌پاراستن ژ ڤایرۆسێ كۆرۆنایێ، پۆلیسێن پاراستنا چالاكیێن مه‌ده‌نی و پۆلیسێن باژێری و هه‌وارهاتنا دهۆكێ بڕیار ب جهـئینا و گۆت: “22 جهێن تایبه‌ت ب دۆمبه‌لێ ڤه‌ هاتنه‌ گرتن و ئه‌ڤ یاریه‌ ل سه‌نته‌رێ پارێزگه‌ها دهۆكێ و هه‌موو قه‌زایان هه‌تا 10/4/2021 ب ئێكجاری هاتیه‌ قه‌ده‌غه‌كرن”.

موقه‌دمێ‌ مافپه‌روه‌ر هێمن سلێمان گۆتژی: “ئه‌فسه‌ر و پۆلیسێن پارێزگه‌ها دهۆكێ به‌رده‌وام د ئه‌ركی دانه‌، ل جهێن گشتی مه‌فره‌زه‌ داناینه‌، داكو وه‌لاتی پێگری رێنمایێن خوه‌پارێزیێ بن و كه‌ماما بكاربینن، له‌و ئه‌م دخوازین وه‌لاتی دپێگیربن و رێنمایان بجه بینن و خوه‌ و ده‌ردۆرێن خوه‌ ب پارێزن”.

دهۆك، له‌زگین جۆقی:

سه‌رۆكێ‌ ژوورا بازرگانی و پیشه‌سازی ل پارێزگه‌ها دهۆكێ‌ دیار كر، خواسته‌كا زێده‌ ل سه‌ر هه‌موو جۆرێن كه‌لوپه‌لێن خوارنێ‌ د ناڤ بازاری دا چێبوویه‌، له‌ورا ژی بها گران بوویه‌، هه‌رده‌مێ‌ خواست ل سه‌ر كێم بیت دێ‌ بها ئه‌رزان بن.

ئه‌یاد حه‌سه‌ن، سه‌رۆكێ‌ ژوورا بازرگانی و پیشه‌سازی ل پارێزگه‌ها دهۆكێ‌ بۆ رۆژناما ئه‌ڤرۆ ئاشكرا كر كو دینارێ‌ عیراقی به‌رامبه‌ر دۆلاری بێ‌ بها بوویه‌ و بارزگان كه‌ره‌ستان ب دۆلاری ژ ده‌رڤه‌ی وه‌لاتی دئینن و ب دیناری دفرۆشن، ئه‌ڤه‌ ئێك ژ ئه‌گه‌رێن گرانبوونا بهایێ‌ كه‌ره‌ستێن خوارن و ڤه‌خوارنێ‌ یه‌ دناڤ بازاری دا گۆت: “بهایێ‌ ڤه‌گوهاستنا كه‌ره‌ستان یێ‌ گرانبووی و خواسته‌كا زێده‌ ل سه‌ر كه‌ره‌ستێن خوارن و ڤه‌خوارنێ‌ یا هه‌ی، ئه‌ڤه‌ ژی ئه‌گه‌ره‌ بها گران ببن، ئه‌و كه‌ره‌ستێن ئینانا وان ژ ده‌رڤه‌ی وه‌لاتی هاتیه‌ قه‌ده‌غه‌كرن، ب تایبه‌تی ژی مریشك و هێك گران بووینه‌، چونكو دیاره‌ یێن ناڤخویی تێرا ناڤ بازاری ناكه‌ن”.

گۆتژی: “ئینانا هه‌موو جۆرێن كه‌ره‌ستێن خوارن و ڤه‌خوارنێ‌ یا به‌رده‌وامه‌ و بزاڤه‌كا بهێز یا بازرگانی دهێته‌ كرن، بازرگان ژی پتریا كه‌ره‌ستێن ژ ده‌رڤه‌ی وه‌لاتی دئینن ره‌وانه‌ی  هه‌موو پارێزگه‌هێن عیراقێ‌ دكه‌ن، گه‌له‌ك ئاسانكاری بۆ بازرگانان هاتینه‌ كرن پێخه‌مه‌ت باشكرنا كارێ‌ بازرگانی”.

هه‌ولێر، قائید میرۆ:

بڕیاره‌ حه‌فتیا بهێت كۆمبوونا ئێكلاكه‌ر ل دۆر كێمكرنا پڕۆگرامێن خواندنێ بهێته‌ ئه‌نجامدان و بریكارێ وه‌زاره‌تا په‌روه‌ردێ ژی دبێژیت: هه‌موو په‌روه‌ردێن گشتی و كه‌سێن بسپۆر مژۆلی به‌رهه‌ڤكرنا خشتێ كێمكرنا پڕۆگرامێن خواندنێ‌ یێن وه‌رزێ‌ دویێ‌ بۆ پۆلا 12ی ئاماده‌یینه‌.

دكتۆر سه‌یوان عه‌لی، بریكارێ وه‌زاره‌تا په‌روه‌ردێ بۆ رۆژناما ئه‌ڤرۆ گۆت: “بڕیار هاتیه‌دان ده‌ستكاریا پڕۆگرامێن خواندنێ یێن پۆلا 12ی ئاماده‌یی بهێته‌كرن، بۆ ڤێ‌ مه‌ره‌مێ‌ ژی حه‌فتیا بهێت كۆمبوونه‌ك دێ‌ هێته‌ ئه‌نجامدان و ئه‌ز ب خوه‌ دێ سه‌رپه‌رشتیا كۆمبوونێ كه‌م بۆ كێمكرنا پرۆگرامێ خواندنێ‌، مه‌ هه‌ماهه‌نگی دگه‌ل رێڤه‌به‌ریێن گشتیێن په‌روه‌ردێن پارێزگه‌هان و رێڤه‌به‌ریا گشتیا پرۆگرامان كریه‌، د كۆمبوونا داهاتی دا كو ئه‌ز باوه‌رم دێ دوماهی كۆمبوون بیت دێ بڕیارا دوماهیێ ل دۆر كێمكرنا پرۆگرامێن پۆلا 12ی ئاماده‌یی هێته‌دان، رێڤه‌به‌ریێن گشتیێن په‌روه‌ردێ هاتینه‌ سه‌رپشكرن خشته‌كی به‌رهه‌ڤ بكه‌ن و پێداچوون بۆ وانه‌یان بهێته‌كرن و بزانن دێ چه‌ند پرۆگرام هێته‌خواندن و هه‌موو په‌روه‌رده‌ نوكه‌ مژوولی كێمكرنا پرۆگرامێن خواندێ‌ بۆ پۆلا 12ی ئاماده‌یی نه‌”.

دكتۆر سه‌یوان عه‌لی خویا كر، هه‌موو پرۆگرام دێ هێنه‌ كێمكرن ل گوره‌ی ده‌مێ به‌رده‌ست دێ پڕۆگرام هێنه‌ ته‌مامكرن و گۆت: “كۆمبوونا حه‌فتیا بهێت دێ یا ئێكلاكه‌ر بیت بۆ بڕیارا دوماهیێ، وه‌رزێ دویێ یێ پۆلا 12ی ئاماده‌یی د ده‌مێ خوه‌ یێ دیاركری دا دێ ب دوماهی هێت و خواندن ناهێته‌ پاشخستن وه‌كی پۆلێن دی، ئانكو ل 25/7/2021 دێ ئه‌زموونێن نشتیمانی یێن پۆلا 12ی ئاماده‌یی هێنه‌ ئه‌نجامدان و وه‌زاره‌ت یا پێگیره‌ ل سه‌ر بڕیارا خوه‌”.

دهۆك، له‌زگین  جوقی:

راگرێ‌ كۆلیژا نۆشداری ل زانكۆیا زاخۆ دیار كر كو سامپلێن خوینێ‌ بۆ ئه‌ئه‌نجامدانا ڤه‌كۆلینه‌كێ‌ ژ 743 كه‌سان هاتنه‌ وه‌رگرتن و دبێژیت: د ئه‌نجامێ‌ ڤه‌كۆلینێ‌ دا ده‌ركه‌فت كو پتری 62% ژ كه‌سێن پشكدار هه‌لگرێن دژه‌ ته‌نێن دژی كۆرۆنایێ‌ بووینه‌.

د. نوفه‌ل ره‌شید، راگرێ‌ كۆلیژا نۆشداری ل زانكۆیا زاخۆ بۆ رۆژناما ئه‌ڤرۆ راگه‌هاند: “ب هه‌ڤكاری دگه‌ل زانكۆیا پۆلیته‌كتینكی یا دهۆك، كۆلیژا نۆشداری ل زانكۆیا زاخۆ شیا مه‌زنترین ڤه‌كۆلینێ‌ ل پارێزگه‌ها دهۆكێ‌ ئه‌نجام بده‌ت، كو ب شێوه‌كێ‌ هه‌ره‌مه‌كی سامپل ژ 743 كه‌سان هاتنه‌ وه‌رگرتن، د ئه‌نجام دا ژی پتری 62% ژ كه‌سێن پشكدار هه‌لگرێن دژه‌ ته‌نێن دژی كۆرۆنایێ‌ بووینه‌ و 56% ژ وان هیچ نیشانه‌كا نه‌خۆشیێ‌ نه‌بوویه‌ ده‌مێ‌ تووشی كۆرۆنایێ‌ بووین، د ڤه‌كولینێ‌ دا په‌یوه‌ندیه‌كا گرنگ د ناڤبه‌را ژیێ‌ كه‌سێ‌ تووشبوویی و دروستكرنا دژه‌ ته‌نێن دژی كۆرۆنایێ‌ دا هاتیه‌ كرن”.

گۆتژی: “هه‌كه‌ ئه‌و سامپلا د ڤه‌كۆلینا مه‌ دا وه‌كو په‌رچه‌پێدان بۆ ئاكنجیێن دهۆكێ‌ دانین، كو دگه‌هیته‌ نێزیكی ملیۆنه‌ك و 300 هزار كه‌سان، رامانا وێ‌ ئه‌وه‌ كو 806 هزار كه‌س هه‌تا نوكه‌ تووشی كۆرۆنایێ‌ بووینه‌، به‌لێ‌ نێزیكی 500 هزار كه‌سان هه‌تا نوكه‌ تووشی كۆرۆنایێ‌ نه‌بووینه‌”.

د. نوفه‌ل ره‌شید ئاشكرا ژی كر، ئه‌و به‌رگری بۆ تووشبوویان هاتیه‌ دروستكرن كو 100% مرۆڤی بپارێزیت، هه‌تا نوكه‌ نه‌هاتیه‌ سه‌لماندن و گۆت: “هه‌ر چاوا بیت پێدڤیه‌ وه‌لاتی پتر پێگریێ‌ ب رێنمایێن خوه‌پاراستنێ‌ ژ ڤایرۆسێ‌ كۆرۆنایێ‌ بكه‌ن، چونكو نوكه‌ به‌لاڤبوونا كۆرۆنایێ‌ د زێده‌بوونێ‌ دایه‌”.

شێلادزێ‌، ئه‌سعه‌د رێكانی:

ئاڤا كرنا هزرا گه‌نجان ئێك ژ بنه‌مایێن پێشكه‌فتنا جڤاكیه‌ یه‌ و شاره‌زایه‌كێ‌ جڤاكی ژی وه‌سا دیار كر كو درامایێن دوبلاژ كری كارتێكرنه‌كا راسته‌وخو ل سه‌ر لایه‌نێن هزری و جڤاكی و ره‌وشه‌نبیری.. دكه‌ن و گه‌نج ژی وه‌سا دخوازن كو درامایا خومالی رولێ‌ خوه‌ دناڤا جڤاكی دا ببینیت.

شێراز عه‌بدوالعه‌زیز گه‌نجه‌كێ‌ ناحیا شێلادزێ‌ یه‌ دیار كر كو ئه‌و پرانیا ده‌مێن خوه‌ ل به‌ر زنجیره‌یێن دوبلاژ كری دبورینیت و بو ئه‌ڤرو گوت: ژبه‌ر نه‌بوونا ده‌لیڤێن كاری كو پرانیا گه‌نجێن مه‌ د بێ‌ كارن و نه‌چارن ده‌مێن خوه‌ ل به‌ر درامایێن بیانی بورینین، ئه‌ز ئێك ژ وان گه‌نجامه‌ كو بینه‌ریا گه‌له‌ك زنجیره‌یێن دوبلاژ كری دكه‌م و هنده‌ك زنجیره‌ ب سالان ڤه‌دكێشن ئه‌ڤه‌ ژی بو هندێ‌ ڤه‌دگه‌ریت كو هه‌تا نوكه‌ مه‌ چ درامایێن كوردی نینن و بتنێ‌ مه‌ هنده‌ك شانوگه‌ریێن كوردی یێن دیتی.

ئه‌ڤی گه‌نجی گۆتژی: مژوول بوونا جڤاكێ‌ مه‌ ب تایبه‌تی ته‌خا گه‌نجان ب درامایا بیانی ڤه‌ زور كارتێكرنا خوه‌ یا هه‌ی ل سه‌ر لایه‌نێ‌ هزری و ئابوری و جڤاكی و زانستی… و زێده‌باری كو عیتا نها ئه‌م پتر شاره‌زای تیتالێن بیانی نه‌ ژ داب ونه‌ریتێن كورده‌واری ب دیتنا من هه‌كه‌ هوسا بیت ئه‌م دێ‌ پرانیا داب و نه‌ریتێن خوه‌ ژ ده‌ست ده‌ین و ئه‌م دخوازین كو پتر گرنگی  ب زنجیره‌ و درامایا كوردی بهێته‌ دان.

ئوسامه‌ ئه‌حمه‌د شاره‌زایێ‌ جڤاكی دیاركر كو زالبوونا زنجیرێن دوبلاژ كری یێن بیانی ل سه‌ر جڤاكێ‌ مه‌ ڤه‌دگه‌ریت بو هه‌بوونا ڤالاهیا درامایا كوردی و گوت:هه‌ر جڤاكه‌كێ‌ تایبه‌تمه‌ندی و تیتالێن خوه‌ یێن هه‌ی و گۆت: بێگومان داب و نه‌ریتێن جڤاكێ‌ مه‌ یێ‌ كورده‌واری جودانه‌ ژ جڤاكه‌كێ‌ دی یێ‌ بیانی و دڤێت ئه‌م د ژینگه‌ها خوه‌دا وه‌ك خوه‌ بژین، چونكی چاڤلێكرنا مه‌ بو جڤاكه‌كێ‌ دی ژلایێ‌ زنجیرێن دوبلاژ كری ڤه‌ نه‌ یا باشه‌ و دێ‌ كارتێكرنێ‌ ل سه‌ر جڤاكی ب گشتی و گوهورینا هزرا گه‌نجان و نفشێ‌ داهاتی ب تایبه‌تی كه‌.

شاره‌زایێ‌ جڤاكی د به‌رده‌وامیا ئاخفتنێن خوه‌دا گۆت: چونكی ئه‌و دراما دێ‌ وێ‌ نیشان ده‌ت یا ل گه‌ل جڤاك و ژینگه‌ها وان دگونجیت و دێ‌ سه‌رنجا جڤاكێ‌ مه‌ بخوه‌ راكێشیت و ئه‌م ژی زوو دبینه‌ چاڤلێكه‌ر و ئه‌ڤ یه‌كه‌ ژی دێ‌ چه‌ندین ئاریشه‌یان ل دووڤ خوه‌ هێلیت وكارتێكرنێ‌ ل سه‌ر جڤاكی كه‌ت ئه‌ڤه‌ژی ژبه‌ر وێ‌ یه‌كێ‌ په‌یدا دبیت كو درامایا كوردی یا لاوازه‌ و ڤالاهیه‌ك ل پاشخوه‌ هێلایه‌ و ئه‌ڤجا درامایا بیانی دێ‌ ڤێ‌ ڤالاهیێ‌ پر كه‌ت لێ‌ هه‌كه‌ ئه‌و مه‌زاختیێن ل ده‌وبلاژ كرنا درامایێن بیانی دهێته‌ كرن وان مه‌زاختیان ل درامایێن كوردی بكه‌ن دێ‌ كه‌لتورێ‌ مه‌ ژی هێته‌ نیشان دان و پاراستن.

ئوسامه‌ ئه‌و چه‌نده‌ ژی دیار كر، دناڤ جڤاكێ‌ مه‌ دا بینه‌ریا درامایێن بیانی یا سنوردار كری نینه‌ له‌وما ژ هه‌موو ته‌مه‌نان بینه‌ریێ‌ دكه‌ن و ب تایبه‌تی خێزان ب زنجیرێن دوبلاژ كری ڤه‌ د گرێداینه‌ و ته‌مه‌نێن بچووك ژی وه‌ك زاروك سنێله‌ و گه‌نج ژ كور و كچان زور د مژوولن ب بینه‌ریا ڤان درامایان ڤه‌ و هه‌ر د ڤی ته‌مه‌نی دا ئه‌و دێ‌ فێری كه‌لتور و داب ونه‌رێت و ره‌فتارێن دوور ژ جڤاكێ‌ كوردی بن، ژبه‌ركو ئه‌ڤ درامایه‌ بتنێ‌ دێ‌ داب و نه‌ریتێن جڤاكێ‌ خوه‌ نیشا مه‌ده‌ن ئه‌ڤجا چ د باش بن یان خراب و گۆت: ئه‌ز باوه‌رم كو ل گه‌ل داب و نه‌ریتێن جڤاكێ‌ مه‌ ناگونجن و چێدبیت گه‌نج نه‌شێت وێ‌ ژیانێ‌ په‌یدا بكه‌ت ئه‌وا د درامایێ‌ دا دبینن و هوسا دێ‌ بیته‌ ئه‌گه‌رێ‌ جودابوون و په‌یدابوونا ئاریشه‌یان دناڤ خێزانێ‌ دا.