ئەڤرۆ، ھەرھین محەمەد:

مەیدانکا ئەینیان ئێک ژ وان بازارێن ئازادە ل باژێرێ دھۆکێ و ب ئەرزانی کەل و پەل تێدا دھێنە کرین و فرۆتن و خەلک ژ ھەموو دەڤەران ل رۆژێن پێشەمب و ئەینی قەستا ڤی بازاری دکەن و ل دووڤ گۆتنێن فرۆشیارەکی کو ل ڤێ دووماھیێ نێزیکی ٧٠% فرۆشیارێن ڤی بازاری خەلکێ قەزار بەردەرەش و رۆڤیا و کەلەکچێ و ئاکرێ نە و بەرامبەر ئابورناسەک ژی دبێژیت: ئینانا کەل و پەلان ژلایێ وان فرۆشیارێن دەرڤەی پارێزگەھا دھۆکێ د بەرژەوەندیا خەلکێ دھۆکێ دایە.

سەرمەد عزەدین فرۆشیارە ل مەیدانکا ئەینیان گۆت: چو جوداھی دناڤبەرا ڤان کەل و پەلان و یێن بازاری دا نینن و کوالتیا وان %١٠٠ وەکو ئێکە، چونکو حەفتیێ دو رۆژا مەیدانک ڤەدبیت، لەورا تشتێ وان یێ ئەرزانە، بەری نوکە ژبەر ھاتنا ڤایرۆسێ کۆرۆنایێ خەلک نەدھاتنە مەیدانکێ، بەلێ نوکە نەچارن دھێنە مەیدانکێ و ئەڤە بۆ دەمێ سێ سالا نە ئەز دھێمە مەیدانکێ تشتان دفرۆشم و خەلک گەلەک خوەش دھێن دکرن و ل ڤێ دووماھیێ نێزیکی فروشیارێن  قەزا بەردەرەش و کەلەکچی و دەوروبەرێن وان دھێنە مەیدانکێ کەل و پەلێن خوە دفرۆشن.

ھەر ل ھەمان بازاری عیماد تەیب محەمەد خەلکێ کەلەکچێ یە گۆت: نێزیکی ٧٠% فرۆشیارێن مەیدانکا دھۆکێ خەلکێ رۆڤیا و بەردەرەش و ئاکری و کەلەکچێ نە، چونکو مەیدانک ل وی رەخی نینە و ئەم نەچارین کەل و پەلێن خوە دئینە ڤێ مەیدانکێ ژی ب تنێ (٢٥٠) دیناران قازانج دکەین ژ ھەر تشتەکی و ئەڤ کەل و پەلێن ئەم دئینین ژی ژ ھەولێرێ و دەوروبەرێن ھەولێری یە.

ئابوورناس دەرکەفت باپیر دبێژیت: نەبوونا ھاریکاریا باژێرڤانیێن وان دەڤەرداریا بۆ دروستکرنا جھەکێ گونجای و ھەبوونا ھەموو پێدڤیێن کرین و فروشتنێ و کێم بازاری ل وان دەڤەرا ژبەر رێژا کێم یا بکران بوویە ئەگەر فروشیارێن وان دەڤەران قەستا مەزنترین مەیدانک ل دھۆکێ بکەن بۆ کارێ کرین و فرۆتنێ و ڤی کارێ کرین و فروتنێ و ھاتنا فروشیارێن ژدەرڤەی سەنتەرێ دھۆکێ خالێن باش و نەباش ل دووڤ خوە دھێلیت و ژ وان خالێن باش دبیت ئارمانجا وان کێمترین قازانج رازی بن و داھاتەکێ کێم ب دەست خوە ڤە بینن و کەل و پەلێن خوە ب ئەرزانی ب فرۆشن و ئەڤە ژی خالەکا باشە بۆ وەلاتێن دھۆکێ دێ کێمترین بھا کەل و پەلان ب دەست خوە ڤە ئینن.

ئابوورناسی ھەروەسا گۆت: ب تایبەت د ڤان کاودانان دا و نەبوونا پارەی دگیرڤانێن ھەولاتێن دھۆکێ و رێژەیا پتر ژ ئاکنجێن دھۆکێ تەکەزا وان ل سەر مووچەی یە و ھەکە ئەو نەبیت بازار ب ھەموو لڤینێن خوە ڤە داکەفتن ل سەر دھێت ب کورتی ئەڤ ئەرزانیا فرۆشیارێن دەرڤەی دھۆکێ د مەیدانکا ئەینیان دا دکەن د بەرژەوەندیا خەلکێ دھۆکێ دایە، بەلێ خالا نە باش بۆ فرۆشیارێن دەرڤەی دھۆکێ یە دبیت ئەو ئەرزانیا فرۆشیارێن دەرڤەی دھۆکێ دکەن ئە و ژی ب نەچاری کەل و پەلێن خوە ئەرزان بکەن.

زێدەتر ژی گۆت: نوکە ئەو جھێ فرۆشیار ل مەیدانکا ئەینیان کەل و پەلان دفرۆشن کریا خوە دەن و بھایێ کریێ و زەحمەتا وان ب دروستاھی ب دەست ڤە نەھێت و نوکە مەیدانکا ئەینیان پێنچ شەمبیا نە و ئەگەر بێژین ھەر رۆژەک بۆ ھندەک فرۆشیاران بیت وەسا دێ ژێکڤە بوون پەیدابیت و فرۆشیارو وەلاتی دێ زیانداربن، چونکو ھەر کەسەکی دەمەکێ ھەی بۆ سەرەدانا مەیدانکێ و ب رۆژێ مەیدانک ب رەوشترە ژ شەڤێن پێنچ شەمبی.

ئەڤرۆ، نەوزاد ھلۆری:

بۆ ئێکەمین جار ل سنوورێ پارێزگەھا دھۆکێ سەنتەرێ وێ یێ ژنان خولەکا تایبەت بۆ وان کچ و کوران ساز کر یێن کو بریارا ھەڤژینیێ دای و ھێشتا داوەتا خوە نەکری، د خولێ دا چوار تەوەرێن سەرەکی بۆ شرۆڤە کرن کو ئەو ژی ساخلەمی، یاسایی، دەروونی و جڤاکی بوون، داکو ل ئایندە چو ئاریشیە بۆ دروست نەبن.

د.دلڤین ئێحسان، رێڤەبەرا سەنتەرێ وێ یێ ژنان ل پارێزگەھا دھۆکێ بۆ ئەڤرۆ گۆت: (ب مەرەما خزمەتکرنا ھەڤژینان د وارێ ساخلەمی، جڤاکی، دەروونی و یاسایی دا، ئەم وەکو سەنتەرێ وێ یێ ژنان ل پارێزگەھا دھۆکێ رابووین ب ڤەکرنا خولەکا تایبەت بۆ وان کچ و کورێن کو بریارا ھەڤژینیێ دای و ھاتینە مەھرکرن ژی، بەلێ نوکە د دەزگریێ دانە و ھێشتا داوەتا خوە نەکریە کو ئێکەمجارە ل سنوورێ پارێزگەھا دھۆکێ ئەڤ جورێ خولێ دھێتە ڤەکرن).

د. دلڤینێ زێدەتر گۆت: (ڤەکرنا ڤان جورە خولان گرنگیەکا زێدە بۆ وان کچ و کوران ھەیە کو بەری بچنە د قوناغا ھەڤژینیێ دا تشتەکێ ژ ھەڤژینیێ بزانن داکو بشێن باشتر رەفتارێ ل گەل ھەڤژینیێ بکەن ب تایبەتی د وارێ ساخلەمی و یاسایی و جڤاکی و دەروونی دا، ژبەرکو ئەڤرۆ ئەڤ چوار خالە بوینە ئەگەرێن سەرەکی یێن دروستبوونا ئاریشە و ناکوکیان دناڤبەرا ژن و مێرا و جودابوونێ ژی، لەوا گرنگە بەری کچ و کور ھەڤژینیێ پێک بینن ل سەر وان چوار تەوەران بھێنە ھشیارکرن داکو ل ئایندە چو کێشە بۆ دروست نەبن).

رێڤەبەرا ناڤبری دیارکر ژی کو مەرەما وان ژ خولێ ئەو نینە کو کچ و کورا ل ھەڤدو سار بکەن و ژبریارا ھەڤژینیێ لێڤە بن، بەلکو ئەوە داکو تووشی چو کێشە و گرفتان نەبن و گۆت: (ھەرچەندە سەنتەرێ مە ل سالا ٢٠١٨ێ ھاتیە دامەزراندن و د بوری دا خزمەتەکا بەرچاڤ د وارێن جودا جودا کریە، بەلێ د ڤێ خولێ دا تنێ کچ و کورێن د دەزگریێ دا پشکدار بوون، ئەڤ خولە دێ بەردەوام بن، نەک تنێ دەزگر بەلکو خێزاندار ژی دشێن پشکدار بن، ب ئومێدین ل ئایندە بشێین خولێن باشتر ژی بۆ تەخا گەنجان ڤەکەین).

شێلادزێ، ئەسعەد رێکانی:

ھەبوونا کەسانێن دانعەمر دناڤ جڤاکی دا شەنگستێ ئاڤا کرنا جڤاکیە و بیرئینانا رێنیشاندەر و سەربورێن بەرێ یە بو ئاڤا کرنا کەسایەتیا نڤشێ نھا و پرانیا وان ژی بیریا ژیانا بەرێ دکەن شارەزایەکێ جڤاکی ژی دیار کر کو ئەڤ خوزیە یا ب رابردووڤە گرێدایە .

ماھرزێر و ھاولاتیەکێ ناحیا شێلادزێ یە و دژیێ ٧٠ێ سالیێ دایە دیار کر کو ل سەردەمێ وان ڤیان و دلوڤانێ ل گەل ئێکدو ھەبوو و گوت: دەمێ ئەم ل گوندا مروڤایەتی و تێکەلیەکا باش یا جڤاکی ھەبوو، و ئەم ب ژین و ژیارا گونداڤە د مژوول بووین و ھەموو ھاریکار و پشتەڤانێن ئێکدو بوون د ھەر کارو زبارەکێ دا و ڤیان و دلوڤانی ھەبوو، راستە ھەموو تشت نەبوون و ئەڤ پێشکەفتنە ژی نەبوو، بەلێ زەوقێ مە یێ خوش بوو و دل ودەروونێن مە د پاقژ بوون و نوکە بو مە نەخوشە ژلایەکێ ڤە ئەو نفشێ ئەم ل گەل دژیاین پرانیا وان نەماینە و ژلایەکێ دیڤە ئەم فێری ڤێ ژیانێ نەبووینە و د ژیەکێ مەزن داینە، ژبەرھندێ ئەم پتر بیریا ژیانا بەرێ دکەین.

عسمەت حەجی ھاولاتیەکێ دەڤەرێ یە دبێژیت: مە چ جارا ھەست ب ڤالاتیێ نەدکر و بەرێ مە بتنێ ل ژیانا روژانە و خودانکرنا تەرش و کەوالی بوو، ئەم ژ ڤان ھەموو کێش و بێشێن دارایی و سیاسەتێ دوور بووین، نوکە ژی ژلایێ ژیانێ ڤە چێدبیت بەرفرەھی بیت و ھەموو تشت ھەبن و ژیان یا ب ساناھی کەفتی، بەلێ بتنێ ژلایێ دەرونیڤە بو مە نەخوشە، چونکی ئەم فێری ڤی سەردەمی نەبووینە و مە ھەر یا دیتی مە بدەستێ خوە کار دکر و تاما ژیانێ پەیدا دکر.

سەردار ھێتوتی نڤیسەر و شارەزایێ جڤاکی ل دێرەلوکێ  دیار کر کو ژیان ھەردەم ل سەر رێکا خوە دچیت بێی گیرو بوون، لێ مروڤ دھێنە گوھۆرین، ئەڤجا ئەڤ گوھۆرینە چ یێن ژی بن یان یێن شولی و جە گوھۆرینێ و ھەر کریارەکا دیتر بن و گۆت: راھێلانا خوزیا بو ژیێ چوویی ل دەف ھەر مروڤەکێ ھەیە، لێ د ئاستێن جودا دا، چونکی ھەر کەسەک ھەلگرێ تایبەتمەندیێن زاروکینیێ یە، ھەروەسا دبیت د ژیێ زاروکینیێ دا تشتەک ل سەر ھزرا مروڤی بیت بو ئەنجامدانێ لێ دەلیڤا وی کاری بو مروڤی نەھاتیە پێش، ئەڤجا ئەڤ کارە دێ ل سەر مێشکی مینیت ھندی مەزن ببیت.

سەردار گوتژی: خالەکا دیتر یا ھەی کو مروڤی ب رابردووڤە گرێ ددەت خوشیا ھەڤالانە و دانعەمر گەلەک ھەڤالان ژ دەست ددەن، ھەروەسا دووراتی کەفتیە دناڤبەرا وان د تێکەلیا جڤاکی دا یان ژی دبیت پتر د ژیێ پیریێ دا نەشێن وەکو پێدڤی ئێکدو ببینن و بدیتنا ئێک شاد ببن کو ل سەردەمەکێ دا ھەڤالێن ھەرە نێزیک یێن ئێک بوون.