ئەڤرۆ ، زنار تۆڤی:

تەلەڤزیۆنا پەروەردەیی ب واتایا ئاڤاکرن و دانانا قوتابخانەکێ یە ل ھەر مالەکێ، ئانکو دانانا سەنتەرەکێ رەوشەنبیری کو گرنکییێ ب پەروەردە و فێرکرنێ بدەت بۆ ھەر خێزانەکێ  و ب ساناھیکرن و نێزیکرنا قوتابییانە ژ بابەت و میتۆدێن خواندنێ ل ھەر جھەکی، مەرەما ڤێ تێلەڤزیۆنێ گەھاندنا پەیاما پەروەردەیێ بۆ ھەموو تاکێن جڤاکی.

بلند محەمەد، رێڤەبەرێ تەلەڤزیۆنا پەروەردەیی دھۆک، بۆ رۆژناما ئەڤرۆ دیار کر: تێلەڤزیۆنا پەروەردەیی دھۆک، ب سەر رێڤەبەریا گشتی یا پەروەردا پارێزگەھا دھۆکێ ڤەیە و دەزگەھەکێ میدیایی یێ پەروەردەیی یە و ھەموو بنەمایێن پەروەردە و فێرکرنێ بەلاڤ دکەت و ھاتییە دانان دا ببیتە ھاریکار بۆ رێباز و میتۆدێن خواندنێ و ھەموو قوتابی و مامۆستا وەکو بنگەھەکێ زانستی و پەروەردەیی سەرەدەریێ ل گەل بکەن و وەکو تەمامکەرا پرۆسەیا فێر کرن و پەروەردەیی دھێتە زانین، ئەڤ تەلەڤزیۆنە ل ٢٤-٧-٢٠٢٠ ب بەرھەڤبوونا بەرێزان ئالان حەمە سەعید وەزیرێ پەروەردێ یێ حوکمەتا ھەرێما کوردستانێ و عەلی تەتەر پارێزگەرێ دھۆکێ و عومەر عەلی تاھا رێڤەبەرێ گشتی یێ پەروەردەیا پارێزگەھا دھۆکێ و نوونەرا رێکخراوا یونسیف ڤە ھاتییە ڤەکرن.

رۆژناما ئەڤرۆ، بۆچی تەلەڤزیۆنا پەروەردەیی و نە یا فێرکرنێ؟ کو ل دویڤ ڤێ پێناسەیا ل سلال دیارکری ڤیابا یا فێرکرنێ با؟

رێڤەبەرێ تەلەڤزیۆنا پەروەردەیی دھۆک، جۆداھییا دناڤبەرا تێلەڤزیۆنا پەروەردەیی و فێرکرنێ دا ئەوە کو تەلەڤزیۆنا پەروەردەیی بیاڤەکێ بەرفرەھتر ڤەدگریت و زێدەی بەرنامێن خواندنێ و بەلاڤکرنا وانەیان، گرنگییێ ب بەرنامەیێن رەوشەنبیرییا پەروەردەیی ژی ددەت، ئەڤ بیاڤە ژی گەلەکێ بەرفرەھە و ھەر قۆلاچەکا ڤێ ژیانێ ڤەدەین دێ شێین بابەتەکێ پەروەردەیی تێدا ئازرینین، ب  گشتی جڤاکێ مە پێدڤی ب رەوشەنبیریا پەروەردەیی ھەیە و برێیا ڤێ شاشەیێ دێ وێ بزاڤێ کەین چەندین بابەتێن گەرم ل دۆر ژینگەھا قوتابخانێ و بیاڤێ پەروەردەیێ ئازرینین کو مەرەم ئەوە ئەم بشێین د ھەموو رەوش و کاودانان دا ل گەل مامۆستایی و قوتابی بین و د کاودانێن بەرتەنگ دا ڤەقەتیانا قوتابیان ژ بەرنامەیێن خواندنێ نەبیت و مامۆستا و قوتابی ھەردەم ھای ژ وانە و ئەرکێن خوە ھەبن.

رۆژناما ئەڤرۆ، تەلەڤزیۆنا پەروەردەیی دھۆک، دامەزراندنا وێ بۆ پرکرنا بۆشاییەکێ بوویە یان ژی ب پلان و بەرنامە ھاتییە دانان؟

رێڤەبەرێ تەلەڤزیۆنا پەروەردەیی دھۆک، نوکە ھەکە سەحکەینە دیرۆکا پەروەردەیێ ل ناڤ مللەتان، دێ بینین کو ھەر زوو بەرپرسیارێن پەروەردەیی ھەست ب وێ چەندێ کرییە کو پێدڤیە ب رێیا راگەھاند و دەزگەھێن میدیایی وانەگۆتن و رەوشەنبیریا پەروەردەیی بگەھیتە ھەر مالەکێ، بۆ نموونە ل عیراقێ کو نە دەولەتەک پێشکەفتییە ژی، لێ ل سالا ١٩٥٦  دەمێ تێلەڤزیۆن ب ھاریکارییا کۆمپانییەکا بریتانی  ھاتییە دانان، دەمەک ژ بەرنامەیێن خۆ دایە بیاڤێ پەروەردەیێ و بزاڤکرینە کو سال بۆ سالێ دەمژمێرێن زێدەتر بدەتە بابەت و رەوشەنبیریا پەروەردەیی و پشتی تەڤگەرا ١٤ تەممۆزێ ١٩٥٨ تێلەڤزیۆنا پەروەردەیی ل عیراقێ بیاڤەکێ مەزن پێ ھاتە دان و ھەتا بوویە دەزگەھەکێ خۆسەر و بەرنامە و پرۆگرامێن خۆ یێن قوتابخانێ و یێن رەوشەنبیرییا پەروەردەیی ژی بەلاڤ دکرن و ھەتا سالا ١٩٨٠ بوو دەزگەھەک تەمام و خودان شاشەکا رەنگین و گەلەک خزمەتا پەروەردێ دکر،

لەوا ئەم دبێژین ھەبوونا تێلەڤزیۆنا پەروەردەیی ل ھەر جھەکێ ڤێ جیھانێ بیت، پێدڤییەکا سەردەمانەیە و مرۆڤ بەردەوام بزاڤێ دکەت، د ھەموو بیاڤان دا مفایی ژ تەکنۆلوژیا نوو ببینیت و بێخیتە ل ژێر خزمەتا خوە دا، وەختەکی خەلکێ خۆزی دخواستن کو قوتابخانەیەک ل نێزیک مالا وان، یان ل تاخێ ئەو لێ دژیت بھێتە ئاڤاکرن، لێ ئەڤرۆ برێیا تەکنۆلۆژیایێ و دەزگەھێن تێلەڤزیۆن و سۆشیال میدیایێ، ل ھەر مالەکێ قوتابخایەک ھاتییە ئاڤاکرن، کو شاشەیا تێلەڤزیۆنا پەروەردەیی ل دھۆکێ خوە ب نوونەرا مامۆستایان و قوتابخانێ دبینیت، د ھەر مالەکێ ڤە دھێتە دیتن.

رۆژناما ئەڤرۆ، ئارمانج ژ ڤەکرنا ڤی کەنالی چ بوو؟

رێڤەبەرێ تەلەڤزیۆنا پەروەردەیی: تێلەڤزیۆنا پەروەردەیی ژی ل ھەر جھەکی ھندەک ئارمانجێن دەست نیشانکری ھەنە وەکو، بلندکرنا ئاستێ پێڤاژۆیا پەروەردەیی دکریارا وانەگۆتنێ دا، بلند کرنا ئاستێ رەوشەنبیریا پەروەدەیی ل دەف مامۆستایان و قوتابیان برێیا پێشکێشکرنا بەرنامەیێن رەوشەنبیری یێن تایبەت ب ژینگەھا قوتابخانێ ڤە، ھەروەسا چاندنا ھزرا نەتەوەیی و نیشتمانبوونێ ل نک مرۆڤێ کورد ب گشتی و قوتابیان ب تایبەتی و ھەستا وی بۆ ژێیاتییا ئاخێ ب ھێز بکەڤیت و ڤیانەکا مەزنتر و بھێزتر بۆ گەل و نیشتمانێ خوە ھەبیت، دیسا پەیداکرنا ھشیارییێ ل نک خێزانا قوتابی و دانەنیاسینا قوتابخانێ و ژینگەھا وێ بۆ خێزانان قوتابی کو بشێن سەرەدەریەکا باشتر و نەرمتر ل سەر بنیاتەکێ پەروەردەیی پێک بینن کو مەرەم ژێ ئاڤاکرنا مرۆڤی بیت،

تشتەکی دی یێ گرنگ ھەیە کو فەرە ئاماژە پێ بھێتە کرن ئەو ژی تایبەتمەندی د ھەموو بیاڤێن ژیانێ دا پەیدا بوویە، بۆ نموونە د بیاڤێ بازرگانیێ دا، د بیاڤێ زانست و نوشداریێ دا، لەوما دبینین ئەو تایبەتمەندیا د بیاڤێ راگەھاندنێ دا و پەیدابوونا دەزگەھێن میدیایی یێن تایبەتمەند، چ وەک نووچە، وەرزش، جڤاکی، فلم و فلمسازی، ھونەر، تشتەک نۆرمالە کو دەزگەھەکێ میدیایی یێ تایبەت ب پەروەردەیێ ژی ڤە ھەبیت.

رۆژناما ئەڤرۆ، لایەنێن ھاریکار بۆ ڤەکرنا ڤێ تێلەڤزیۆنێ کی بوون؟

رێڤەبەرێ تەلەڤزیۆنا پەروەردەیی دھۆک، ھەر دەزگەھەکێ بھێتە دانان، دێ بینی کو ھندەک خەمخۆر ل پشت ھەنە و ھەموو شیانێن خوە د ئێخنە کار ژبۆ ھندێ کو خزمەتەکا گشتی بگەھینن و مەزنترین کۆما مرۆڤان و چینێن جڤاکی ژێ مفادار بن، تێلەڤزیۆنا پەروەردەیی دھۆک ژی وەک ھزر ژ ئالیێ رێڤەبەرێ گشتییێ پەروەردا پارێزگەھا دھۆک ڤە بوویە و ببریار و پشتەڤانییا وەزارەتا پەروەردێ و بەرێز وەزیرێ پەروەردێ یێ حوکمەتا ھەرێما کوردستانێ و ب پشتەڤانییا ئێکسەرا رێکخراوا یونسیف ئەڤ تێلەڤزیۆنە ھاتیە ڤەکرن و ھژمارەکا مامۆستایێن راگەھاندکار نوکە تێدا کار دکەن، ئانکو ستافێ ڤێ تێلەڤزیۆنێ ھەموو مامۆستا و کارمەندێن پەروەردەیی نە و یێ بزاڤێ دکەن کو ڤێ شاشێ ب جوانترین بابەتێن پەروەردەیی پێشکێشی تەخا قوتابی و مامۆستایان و تەخێن جڤاکی ب گشتی بکەن.

رۆژناما ئەڤرۆ، نوکە چو دڤێ شاشەیێ دا دھێتە دیتن و نیشادان؟

رێڤەبەرێ تەلەڤزیۆنا پەروەردەیی دھۆک، زێدەباری تۆمارکرنا وانەیان و وانێن قوتابخانێ کو ل دەستپێکێ ھەوەک بۆ تۆمارکرنا وان ب ھاریکاری و پشتەڤانییا رێکخراوا یونسیف، رێڤەبەریا گشتی یا پەروەردا پارێزگەھا دھۆکێ و رێڤەبەریا چالاکیێن قوتابخانا و ھندەک پەیمانەگەە و قوتابخانەیێن نەمیری د تۆمارکرنا وانەیان دا دپشکدار بوون، ئەم یێ بزاڤێ دکەین کو ھندەک بەرنامەیێن رەوشەنبیریا پەروەردەیی بھێنە تۆمارکرن ب ھاریکاریا ھندەک مامۆستایێن راگەھاندکار و خودان شارەوایی د بیاڤێ راگەھاندنێ دا پێشکێش بکەین و نوکە بەرنامەیێ (دیدار) ژ ئامادە و پێشکێشکرنا مامۆستا دلژار عەدنانی یە، کو ل سەر کێَشە و پرۆژە و قۆناغێن خواندنێ ل ھەموو پەروەردەیان دراوەستیت و ل رۆژێن پێنجشەمبی د ھێنە پەخشکرن، دیسا بەرنامەیێ ( رێیا زێرین) ژ ئامادە و پێشکێشکرنا مامۆستا نیوار حەجی یە، کو ل سەر ژیان و کار و خزمەتا مامۆستایێن دێرینە و ئەڤ بەرنامەیە بزاڤەکە بۆ ئەرشیفکرنا خەبات و خزمەتا وان مامۆستایێن د بیاڤێ پەروەردێ دا کار کری و ھەبوونا وان ژی ھەبوون و نڤیسینا دیرۆکەکێ بوویە بۆ ڤی باژێڕی، لەوما برێیا ڤی بەرنامەیی مە ڤیایە چەندەکێ ژ دیرۆکا پەروەردەیی یا پارێزگەھا دھۆکێ بپارێزین و گەلەک بەرنامەیێن دی د رێزێ دانە کو برێیا وان بشێین خزمەتا قوتابی و مامۆستا و خێزانا ڤی باژێڕی بکەین، ھەر وسا بەرنامەیێ ( ھونەرێ وانەگۆتنێ) ژ ئامادە و پێشکێشکرنا ھەر دوو مامۆستایان میدیا و رێزان.

مە ل بەرە ژی ب ھاریکاریا لایەنێن پەیوەندیدار و لدووڤ شیانان خۆلێن بھێزکرنێ د بیاڤێن جودا جودا دا ڤەکەین و ستافێ کاری پشکداری وان خۆلان بکەین.

رۆژناما ئەڤرۆ، ئەڤ تێلەڤزیۆنە ل سەر چی کەنال و سیستەم د ھێتە پەخشکرن و ھەتا کیڤە د شیاندایە بھێتە دیتن؟ و ئایا ل سەر مانگا دەستکرد ھەیە؟

رێڤەبەرێ تەلەڤزیۆنا پەروەدەیی دھۆک، ئەڤ تێلەڤزیۆنە ل سەر سیستەمێ دی تی ڤی و سێرڤەرێ پێشمەرگە و ئێچ دی بۆکس و میکس مەدیا دھێتە پەخشکرن و ب سوپاسیڤە ب پالپشتییا ناڤەندا خانی یا راگەھاندنێ و تێلەڤزیۆنا دھۆک پەخشێ وێ دگەھیتە ھەموو جھێن دھۆک و دەوروبەرێن وێ، ھێشتا ئەڤ کەنالە نەچوویە سەر ھەیڤا دەستکرد، لێ ھەر ژ نوکە رێڤەبەریا گشتی یا پەروەردەیا پارێزگەھێَ و رێکخراوا یونسیف ژی ھزر ل ھندێ کرینە کو بچیتە نیلسات ب وێ مەرەمێ کو ب گەھیتە دوورترین جە و کۆمێن ھەرە مەزنێن مرۆڤان ژێ مفادار ببن و پەخشێ وێ ژی نوکە شەش دەمژمێرن و د وان دەمژمێران دا وانەیێن ھەموو پۆلان، ھەر ژ ئێکێ بنەرەت و ھەتا ١٢ ئامادەیی تێدا دھێنە پەخشکرن، ل گەل ھندەک راپۆرت و کورتە چیرۆکێن تەکەزیێ ل سەر بیاڤێ پەروەردەیێ دکەن و ل ڤێرە سوپاسیا تێلەڤزیۆنا دھۆک دکەین کو د ھاریکار بووینە کو مفایی ژ شارەزایی و ئەرشیفێ وان بکەین، ھەروەسا ژ پێخەمەت ئەم بشێین باشتر ڤێ تێلەڤزیۆنێ بۆ ھەموو لایەنەکی بدەینە نیاسین، مە پەیجەک ل تۆرا جڤاکی یا فەیسبۆکی چێکرییە و ئەم چالاکی و بزاڤێن خوە برێیا وی پەیجی و ھندەکێ ژ پەخشێ خوە بەلاڤ بکەین و ئەم بزاڤێ دکەین تەلەڤزیۆنا خوە باشتر بدەینە نیاسین کو ئەم ھێشتا یێن ل دەسپێکا کاری و رۆژ بۆ رۆژێ کار یێ گەشێ دکەت و ئەم ل وێ باوەریێ نە کو ب پشتەڤانی و ھاریکاریا رێڤەیەریا گشتی یا پەروەردەیا پارێزگەھا دھۆکێ کو بەرێز رێڤەبەرێ گشتی بەردەوام ژ نێزیک سەحا کارێ مە دکەت و بۆ ئەوا پێدڤی کو بھێتە کرن پشتەڤانی و ھاریکارییا خوە دیار دکەت.

رێڤەبەرێ تەلەڤزیۆنا پەروەردەیی دھۆک، گۆت ژی: برێیا رۆژنامەیا ئەڤرۆ ئەم داخوازێ دکەین کو ھەموو لایەنێن پەیوەندیدار  د ھاریکار و پشتەڤان بن بۆ سەرخستنا ڤی کەنالی کو بۆ خزمەتکرنا تەخا مامۆستا و قوتابیان و ژینگەھا قوتابخانێ ھاتییە ڤەکرن و چ مال نینن ھەکە قوتابیەک، یان مامۆستایەک تێدا نەبیت، لەوما دبێژین ھەموو تەخێن جڤاکی پێ د پەیوەندیدارن و ڤی کەنالی پێدڤی ب ھەموو جۆرێن پشتەڤانییا مادی و مەعنەوی و شیانێن مرۆڤی ھەیە.

شێلادزێ: ئەسعەد رێکانی:

ماموستایەکێ کو ل دەستپێکا سالێن نوتان دا ھاتیە دامەزراندن بەحسێ خاندنا خویا زاروکینیێ ل گوندان دکەت وان کاودان ونەخوشیێن دکەڤتیە بەردەم پروسێسا خاندنێ دا پشتی سەھلدانا پیروز ودەتە زانین ژی کو ھیڤیا وان ئەوبو روژەکێ بەرھەمێ ماندیبوونا خو ببینن.

ئوسمان حەسەن ل سالا ١٩٧٠ێ ل کوندێ ھیل یاسەر ب دەڤەرا نێروەورێکان ڤە ھاتیە دونیایێ ول سالا ١٩٧٦ێ پولا ئێکێ ل قوتابخانا گوندێ بانسرا دەستپێکر یە ول سالا ١٩٩١ێ ل پەیمانگەھا مەلبەندی ماموستایان بەشێ ئینگلیزی ل ھەڤلێرێ دەرچوویە وددیدارەکێ دا بو یەرپەرێ پەروەردەوزانکو دبێژیت : دەمێ ئەم ل گوندا ل سالا ١٩٧٦ێ ئەم زاروکێن گوندێ ھیل دچووینە قوتابخانا بانسرا مە ل گوندێ بانسرا دەوام دکر ومە گەلەک نەخوشی دیتن ژبەرکو رێکا ھاتن وچوونێ یا دویر بو ب تایبەتی ل زڤستانێ زور جارا ژی بو ماوێ حەفتیەکێ ئەم دماینە ل گوندێ بانسرا ژبەر بەفرێ ونەدشیاین ھاتن وچوونێ بکەین وزێدەباری کوخاندنا وی سەردەمی زور یاب زەحمەت بوو چونکی پرانیا دەڤەرێن مە ھەژاری بوو ھەمیا شیان نەبوون زاروکێن خو دانە بەر خواندنێ وپەرتوکێن مەژی ھەمی ب عەرەبی بوون.

گوت ژی: قوتابخانا مە ل بانسرا دخانیەکێ ئاخێ دابوو وبتنێ مە ئێک ماموستا ھەبوو دگوتێ سەیدا حەسەن ئەحمەد بلبل کو رێڤەبەرێ قوتابخانێ بوو ئو ھەمی وانەژی وی بومە دگوتن دەفتەر وپەرتوک ژی بومە دئینان ھەروەسا (تغژیە المدرسیە) ئانکو خارنا قوتابخانێ ژی ھەبوو وپاشێ گوندێن مە ھاتنە تەرحیل کرن ژلایێ رژێما عیراقێ ڤە وئەم ل کومەلگەھا سیریێ ئاکنجی کرین ومن خاندنا خویا سەرەتایی وناڤنجی ل ناحیا شێلادزێ  ب دوماھیک ئینا.

ئوسمان حەسەن ئەوژی گوت: ل سالا ١٩٩١ ل پەیمانگەھا مەلبەندی ماموستایان بەشێ ئینگلیزی ل ھەڤلێرێ دەرچووم ول سالا ١٩٩٣ێ ئەز ل قوتابخانا سیریێ ھاتمە دامەزراندن ول وی دەمی رەوشا خواندنێ بێ سەروبەر بوو ئەوژی ژبەر کاودانێن ئابوری ژلایەکێ دیڤەژی حکومەتا عیراقێ دامودەزکایێن خو ڤەکێشان بو مەرەما شکاندنا پروسێسا خواندنێ ولێ ئەژی ئیک ژوان ماموستایان بووم کو من ب خوبەش دەوام دکر وژین وژیارا ماموستا وقوتابیان ل سەر وی دەمی زور یالاواز بو ژبەرتێکچوونا  کاودان ودورپێچا ئابوری وئاستەنگێن ژیانێ وگەھشتە وی رادەی کو ھەردوو قوتابی ب ئێک پەرتوک بخوینن

گوت ژی : دمێ ئەم ھاتینە دامەزراندن موچێ مە ١٤٦دینارێ عیراقی بوون وھندەک جاراژی ژلایێ رێکخراوا یونیسڤ ڤە دەفتەر دانە قوتابیان وھاریکاریا ماموستایان ژی دکر وەک دابینکرنا گازێ وھندەک ئاھێن خوارنێ لێ سەرارەی ڤان کاودانێن سەخت ودژواردا مە بەردەوامی داخواندنێ ومە مورالەکا ب ھێز ھەبوو ومە نەھێلا خواندن ب راوەستیت وھیڤیا مە ھەمی ئەوبو کو روژەکێ بەرھەمێ زەحمەتا خو ببینین ولێ بشانازیڤەژی ئەڤرو پرانیا قوتابیێن مە خودان باوەرنامێن بلندن ویێ خزمەتا مللەتێ خو دکەن

ھەلەبجە، عزیز ھەورامی:

پشتی دەستپێکرنا دەوامێ ل قوتابخانا، ل پارێزگەھا ھەلەبجە پێشبینی دھێتەکرن بایوکتا دەوامێ بھێتەکرن و قوتابی داخاز دکەن مامۆستا و حوکمەت خەمێ ژ سالا خواندنێ بخوەن.

مەئوا ئدریس قوتابیەکا پولا نەھێ یە سەر ب پەروەردا ھەلەبجە ڤە بۆ رۆژناما ئەڤرۆ گۆت: پێدڤی یە مامۆستا و حوکمەت خواندنا مە ئەوا ژ  مەچووی بوومە قەرەبوو بکەن و ژ بەر پەژیکا کورونایێ دەرگەھێن قوتابخانا ھاتبوونە گرتن، قوتابی داخاز دکەن ئەف ماوە ل بەرچاف بھێتە وەرگرتن و دەستیردانێن مامۆستا کێم ب بن، گەلەک وانە ژ قوتابیان چووینە و پێدڤی یە مفا ژ  دەمی بھێتە وەرگرتن.

سەردار محەمەد مامۆستایە ل ھەمان پەروەردە، بۆ ئەڤرۆ گۆت: سەرەرایی نەرازیبوونا مامۆستا ل سەر دانا مووچەی لێ بەرھەڤی یا خوە دیارکرینە کو ل ھولێن خواندنێ بەرھەڤ ب بن و پرۆسێسا خواندنێ ب سەرکەفتیانە دەست پێ بکەت.

ھەمان مامۆستا گۆت: چوونا قوتابیان بۆ دەمێ بۆ سێ رۆژان مفایێ خوە نینە چنکو گەلەک کێمە و گرنگە حوکمەت پێدا چوونەکێ ل بریارا خوە دا بکەت.

سوران نوری، رێڤەبەرێ گشتیێ پەروەردێ ل پارێزگەھا ھەلەبجە بۆ ئەڤرۆ گۆت: ھەموو رێنمایێن ساخلەمیێ ل قوتابخانێن ھەلەبجە دھێنە بجھئینان وەزارەتا پەروەردێ ماسک و دەرمانێ تەعقیمێ بۆ قوتابیان ل ھەموو قوتابخانا دابین کرینە.

رێڤەبەرێ گشتی ئەو ژی ئاشکراکر کو مامۆستا گەلەک ب دلسوزانە قەستا ھولێن خواندنێ کرینە و بایکوتا خواندنێ ل ڤێ پارێزگەھێ ناھێتەکرن چنکو مامۆستا گەھشتینە وێ باوەریێ کو گرنگە قوتابی بھێنە خواندنگەھێ و ئێدی ھولێن خواندنێ نەھێنە ڤالاکرن و ھەر چەندە مە ژی تێبینی ھەنە و داخاز دکەین حوکمەت ھەر ٣٠ رۆژان جارەکێ مووچەی بدەت.

ھەولێر، قائید میرۆ:

پڕۆسا خواندنێ بۆ وەرزێ ئێکێ ھاتیە دەستپێکرن و شارەزایەکێ کەرتێ پەروەردێ ژی ئاشکراکر، تنێ بۆ دەمێ دو حەفتیان دێ خواندن وەکی تێست یا بەردەوامبیت و دبێژیت، خواندنا ئەڤسالە دێ کەڤیتە وەرزێ گەرمێ و دێ کاریگەری لسەر پڕۆسا خواندنێ ھەبیت، چونکە پتریا قوتابخانان ئامیرێن کارەبێ بۆ وەرزێ ھاڤینێ نینە.

سوھێل تاھر، شارەزایێ کەرتێ پەروەردێ بۆ رۆژناما ئەڤرۆ دیارکر” دەستپێکرنا دەواما قوتابیان تنێ وەک تێستە بۆ دەمێ دو حەفتیان پشتی دو حەفتیان دیسان دێ پێداچوون ھێتەکرن و ھەگەر چو ئاریشە پەیدانەبوون ئەڤە دێ دەوام بیتە رۆژانە وەکی بەرێ، بەلێ ئەڤە وەرزێ ئێکێ یە و وەسا ھاتیە دانان دەستپێکا سالا نوویا خواندنێ یە، چونکە دێ خواندن یا بەردەوامبیت ھەتا ھەیڤا شەش دوماھیا ھەیڤا شەش دێ تاقیکرنێن نیڤا سالێ یێن وەرزێ ئێکێ بڕێڤەچن و دو ھەیڤان دێ بیتە بھێنڤەدان ل وەرزێ ھاڤینێ، ل ھەیڤا ئیلوونێ دێ وەرزێ دویێ دەست پێکەت ھەتا سێ ھەیڤانژی دێ وەرزێ دویێ ھێتە خواندن و دوڤدا دێ تاقیکرنێن دوماھیا سالێ ھێنە ئەنجامدان، بێگومان وەرزێ گەرمێ دێ کاریگەری لسەر قوتابی و مامۆستا ھەبیت، بەلێ ئەڤە نەچاریە دڤێت ئەم خۆ بگونجینین دگەل ئەڤێ رەوشێ، چونکە مە بڤێت و نەڤێت کۆرۆنایێ کاریگەریێن لسەر ھەموو ژیانا مرۆڤایەتی پەیداکری نەخاسمە کەرتێ پەروەردە و خواندنێ، ل ھندەک ولاتێن جیھانێ ھێشتا خواندن ھەر نەھاتیە دەستپێکرن.

سوھێل تاھر گوتژی” لھەر قوتابخانەکێ دێ لیژنەک چاڤدێریا رەوشا قوتابیان بکەت و ھەر قوتابخانەکێ پلەیا گەرمی یا قوتابی بلندبیت دێ ھێتە ھنارتن بۆ نەخۆشخانە و پشکنین دێ بۆ ھێنەکرن، ھەگەر ل پۆلەکێ چوار قوتابیان پلا وانا گەرمێ بلندبیت ئەو پۆل دێ ھێتە گرتن، بەلێ ئەگەر ل قوتابخانێ ھژمارەک قوتابی ھەبوون پلا وانا گەرمیێ بلندبیت ئەڤە دێ قوتابخانە بۆ دەمێ چواردە رۆژان ھێتە گرتن و دەوام تێدا ناھێتەکرن، ئەز باوەرم دێ ئەم بڤی شێوەی سالا خواندنێ دەرباز کەین و چو چارەسەرێن دی نینە، چونکە مە بەدیل بۆ خواندنێ نینە، ژبەر نەبوونا سیستەمەکێ باش مخابن خواندنا ئونلاین و ئەلکترۆنی سەرکەفتن بدەستڤە نەئینایە، لەوڕا پێدڤیە بھەر شێوەیەکێ ھەبیت پڕۆسا خواندنێ نەھێتە راگرتن، ئاریشا مەزن لەوانەیە بۆ ھەیڤێن دوماھیا وەرزێ ئێکێ و دەستپێکا وەرزێ دویێ بیت، چونکە پلەیێن گەرمێ دێ  زۆر بلندبن و قوتابخانەیێن مەژی سیستەمێ ھەوای نینە، گرێدانا سپلێت و دابینکرنا مۆبەڕیداژی لەوانەیە کارەکێ ب ساناھی نەبیت، ئەز باوەرم دێ کاریگەری ھەبیت خواندن ھاڤینێ وەک پێدڤی نەبیت، بەلێ پێدڤیە سەمیانێن قوتابی ژی ھاریکاربن بۆ دەربازکرنا ڤێ قۆناغێ و خۆ گونجاندن دگەل ئەڤسالە.