نێچیرڤان بارزانی، جێگرێ سەرۆكێ پارتی دیموكراتی كوردستان د پەیامەكا ڤیدیۆییدا داخواز ژ هەڤوەلاتیێن هەرێما كوردستانێ كر دەنگی ب لیستا 190 یا پارتی بدەن و گۆت” پارتی حزبا كار و كریارایە، نەك حزبا ئاخڤتن و درووشمێن بەتالە”.
نێچیرڤان بارزانی د پەیاما خوە یا ڤیدیۆییدا، باس ل دیرۆكا پارتی و قوربانیێن وێ كر و گۆت” دیرۆكا خەبات و قوربانیێن پارتی ژ پێخەمەت گەلێ كوردستانێ ب هەموو پێكهاتەیێن خوەڤە یا دیارە”.
نێچیرڤان بارزانی داخواز ژ خەلكی كر دەنگێ خوە بدەنە پارتی، ژ بەر كو” ل هەر جهەكی پارتی هەبیت، ئاسایش و ئارامی و ئاڤەدانی هەبوو”.
گۆت ژی” ل بن سیبەرا پارتی، سەر و مالێ مە هەموویان یێ پاراستییە، كاسبكار ژ مال و زارۆیێن خوە د پشتڕاستن”.
نێچیرڤان بارزانی د پەیاما خوەدا پارتی ب حزبا كار و كریارا هەژمارت و گۆت” پارتی حزبا كار و كریارایە، نەك حزبا ئاخڤتن و درووشمێن بەتالە، ئاخڤتن و سۆزێن بێ كار گەلەك ب ساناهییە، ب مە هەموویان دهێتە كرن، بەلێ هەموو وەكو پارتی ئەهلی كار و كریاران نینن”.
گۆت ژی” پارتی منەتا كار و خزمەتێ ب سەر خەلكیدا ناكەت، خزمەتكرن ئەرك و شانازییە بۆ پارتی”.

سەرۆكێ حوكمەتا هەرێما كوردستانێ راگەهاند، ئاستێ خواندنێ دێ بەر ب پێشڤە بەین و حوكمەت دێ ب هەموو شیانێن ل بەردەست یا هاریكار بیت. هەڤدەم گۆت ژی، سوپاس بۆ مامۆستایان كو ل دەمێ قەیراناندا نەهێلا پڕۆسەیا خواندنێ پەككەڤیت.
ب بەرهەڤبوونا مەسرور بارزانی، سەرۆكێ حوكمەتا هەرێما كوردستانێ، ئاهەنگا خولا 43 یا دەرچوویێن زانكۆیا سەلاحەدین ب ناڤونیشانێن( خولا زانست، داهێنان و ئاڤاكرن) ل یاریگەها فرانسۆ هەریری ل هەولێرێ بڕێڤەچوو، تێدا سەرۆكێ حوكمەتا هەرێمێ پەیڤەك پێشكێشكر و سەرەرای پیرۆزباهیكرن ل دەرچوویان و كەسوكارێن وان ئاماژە ب وێ چەندێ كر” ئەڤ سەركەفتنە بۆ قوتابییان د ڤێ قۆناغا ژیانا واندا سەركەفتنەكا مەزنە، دڤێت هەوە هەستەكێ خوەش هەبیت كە بەرهەمێ رەنج و وەستییانا خوە ببینن، ئەم شانازیێ ب هەوە دكەین”.
مەسرور بارزانی، سوپاسییا هەموو مامۆستایان كر و گۆت” مامۆستایان ل دەمێ قەیراناندا نەهێلا خواندن پەككەڤیت و بەردەوام بوون د پێدانا وانەیاندا بۆ قوتابییان، هەروەسا سەرەرای وەستییانا وان نەهێلا رەنجا قوتابییان ب هەروە بچیت”.
هەروەسا گۆت ژی” دێ قەرەبوویا وەستییانا مامۆستایان كەین”.
ل دۆر بەر ب پێشڤەبرنا ئاستێ خواندنێ، سەرۆكێ حوكمەتا هەرێما كوردستانێ گۆت” دخوازین ئاستێ خواندنێ ل هەرێما كوردستانێ بەر ب پێشڤە ببەین، بۆ ڤێ مەبەستێ مە دەستەیا باوەریدانێ یا پێكئینای، بۆ وێ چەندێ ئاستێ خواندنا بلند ل دووڤ پێڤەر و ستاندارێن نێڤدەولەتی بیت، جهێ خوەشحالیێیە كو رۆژ بۆ رۆژێ ئاستێ زانكۆیان ژی یێ بەر ب پێشڤە دچیت”.
مەسرور بارزانی ئەوژی بەرچاڤكر” حوكمەتا هەرێما كوردستانێ هەموو بزاڤان دكەت گرنگییەكا زێدەتر ب زانكۆیان و جهێن حەواندنا قوتابییان بدەت، هەڤدەم بۆ بلندكرنا ئاستێ خواندنێ ژ هەموو روویەكیڤە خەمساریێ ناكەین”.
سەرۆكێ حوكمەتا هەرێما كوردستانێ، ل درێژییا پەیڤا خوە دا پەیامەك ئاراستەی دەرچوویان كر و گۆت” هەوە ئەڤرۆ قۆناغا خواندنێ ب سەرۆكەفتییانە دەربازكر، بەلێ دێ بەر ب ئەزموونەكا دی چن ئەوژی دەنگدانە، پێدڤییە هەموو پشكداریێ د دەنگدانێدا بكەن، پترییا هەوە بۆ جارا ئێكێیە دێ پشكداریێ د دەنگدانێدا كەن و، گرنگە دەنگێ خوە بدەن چونكە ئەو مافێ هەوەیێن خوەشتڤییە”.
مەسرور بارزانی باس ل وێ چەندێ ژی كر” هوون نوكە ب وی زانستێ كو فێربووین دشێن هەوە خواندنەكا باشتر بۆ روودانان هەبیت، گرنگە ل 20 ئۆكتۆبەرێ دەنگی ب وی ئالی بدەن یێ خزمەتا مللەت و وەلاتی دكەت”.
ل دۆر هەلبژارتنان دوپاتی ل وێ چەندێ كر” ئەڤ هەلبژارتنە بۆ مە هەموویان د گرنگن، هەر بڕیارەكا د ڤان هەلبژارتناندا بهێتە دان دێ چارەنڤیسێ وەلاتێ مە دیار كەت، دەنگدەر دشێن وێ چەندێ دەستنیشان بكەن كا كی دێ حوكمڕان بیت، پێدڤییە هەموو ئالییەك دەنگی بدەن بۆ وێ چەندێ خەلكەكێ دی ل شوونا دەنگدەران بڕیارێ نەدەن”.
سەبارەت رەوشا رۆژهەلاتا ناڤین و دەڤەرێ، سەرۆكێ حوكمەتا هەرێمێ گۆت” ب شێوەیەكێ گشتی رۆژهەلاتا ناڤین و دەڤەر ب رەوشەكا نەخوەش دەرباز دبیت، بەلێ مە د پێشتر رەوشا ب ڤی شێوەی دیتی و دەربازكری، ژ نوكە و وێڤە ب هەبوونا هەوە و هێزا هەوە دێ شێین وەلاتەكێ خوەشتر و باشتر بۆ خوە دروست كەین، كەس نەشێت وەلاتێ مە بۆمە دروست بكەت”.
ئەوژی بەرچاڤكر” یا گرنگە هزر د وێ چەندێ دا بكەین كو ئەڤ وەلاتە یێ مە هەموویانە، دێ شێین پێكڤە وەلاتەكی بۆ خوە دروست كەین كو نموونە بیت ل رۆژهەلاتا ناڤین. هەروەسا دەرچوو دشێن پشكدار بن د كەرتێ گشتی و تایبەتدا و رۆلێ خوە بگێرن، بۆ وێ چەندێ پێكڤە كوردستانەكێ دروست بكەین كو یا ئارام و ئاشتیخواز و پێشكەفتی بیت”.
ل دوماهییا پەیڤا خوە، مەسرور بارزانی ب گەشبینیڤە ئاماژە ب وێ چەندێ كر” یێ پشتڕاستم هوون دشێن د پاشەڕۆژێدا ببنە خودان وەلاتەكێ خوەشتر و گەشتر. هەروەسا حوكمەتا هەرێمێ دێ بەردەوام هاریكارییا هەوە كەت و دەلیڤەیێن كاری بۆ هەوە د كەرتێن گشتی و تایبەتدا پەیدا كەت”.

زاخۆ، دلۆڤان هالۆ:

وەزیرێ باژێرڤانی و گەشتوگوزارا حكومەتا هەرێما كوردستانێ ئاشكرا كر، ل ئیدارەیا سەربخوە یا زاخۆ دەست ب بەلاڤكرنا پارچەیێن ئەردی ل سەر فەرمانبەران دێ هێتە كرن، چونكی زەڤیێن پێدڤی ل وێ دەڤەرێ د ئامادەنە.
ساسان عەونی، وەزیرێ باژێرڤانی و گەشتوگوزارێ‌ گۆت: «دام و دەزگەهێن ئیدارەیا سەربخوە یا زاخۆ سەرجەمێ ئامار و زانیارییان ڕادەستی مە كرینە، لەوما دەستپێكێ ل وێ دەڤەرێ پارچەیێن ئەردی دێ هێنە بەلاڤكرن، پاشی مە ل بەرە ل هەولێر و دهۆك و سلێمانی و حەلەبچە دەست ب بەلاڤكرنا پارچەیێن ئەردی بكەین».
گۆتژی: «هێشتا هندەك وەزارەتان ئامار و زانیاری ڕادەستی وەزارەتا باژێڕڤانی و گەشتوگوزارێ نەكرینە، لەوما ئەڤ چەندە بوویە ئاریشە ل هەمبەر پرۆسێسا بەلاڤكرنا پارچەیێن ئەردی، بۆ ڤێ مەرەمێ‌ لیژنەیەكا بلند، سەرپەرشتیا چارەسەركرنا ئەڤێ ئاریشەیێ دكەت، هیڤیدارین د نێزیكترین دەم دا سەرجەم فەرمانبەر ببنە خودان پارچەیێن ئەردی».

سالار محەمەد دۆسكی:

بەربژار رێكێش سەیرانی، بەربژارێ هەژمار (23)ێ ل سەر لیستا (190) یا پارتی دیموكراتی كوردستان بۆ خولا شەشێ یا پەرلەمانێ كوردستانێ بۆ رۆژناما ئەڤرۆ گۆت: گومان نینە جێگرێ سەرۆكێ پارتی دیموكراتی كوردستان (مەسرور بارزانی) د چەندین دیدارێن خوە دا ئاشكرا كر كو دێ پشتەڤانیێ ل هونەرێ كوردی كەت و ئەڤە ژی پێنگاڤەكا هەرە مەزن و ب ئاشكرا بێژیت دێ خزمەتا هونەرمەند و هونەرێ رەسەنێ كوردی كەین، هەمان دەم مە پرۆگرامەكێ باش بۆ هونەرێ كوردی هەیە كو ل سالێن بهێن بشێین هونەرێ كوردی پێشبێخین.
هەمان بەربژارێ پارتی دیموكراتی كوردستان، نوونەری ئیدارا سەربخۆ یا زاخۆ ئەو ژی گۆت: گەلەك پرۆژە بۆ خەلكێ كوردستانێ و دەڤەرا خوە مە بەرهەفكرینە، لێ ژ گرنكترین پرۆژەیێن بەردەستێن من و كاری ل سەر بكەم كو هەمی بزاڤێن مە دێ ئەو بن زاخۆ ببیتە پایتەختێ هونەری ل كوردستانێ، چونكە زاخۆ دیرۆكەكا رەسەن ل گەل هونەری هەیە و د سروشتێ ڤی باژێری دا زاخۆ كانیا هونەری بوویە و دڤێت رێزگرتن ل دیرۆك و خەباتا هونەرمەندێن كوردستانێ ب گشتی و باژێرێ زاخۆ ب تایبەتی بهێتە گرتن و زێدەتر رۆل و ناڤ و دەنگیا خوە ببینیت و وەرارێ بكەت.
ل دۆر دەنگدانا خەلكی ژی بۆ پارتی دیموكراتی كوردستان، رێكێش سەیرانی گۆت: ما پارتەكا دی ل كوردستانێ هەیە ژ پارتی زێدەتر خزمەتكری و خوین رێتی و هەژی وێ چەندێ مرۆڤ دەنگێ خوە بدەتێ، پارتی گەلەك بۆ مللەتێ مە كریە خۆدانا شۆڕەشێن كوردی بوویەن خودانا ب هزاران شەهیدان و قوربانیدانێ بوویە و لەوما ئەڤرۆ ئەركە ل سەر مللێن مە ئەم بچینە سەر سندۆقێن دەنگدانێ و دەنگی بدەنە لیستا (190) یا سەرۆك بارزانی.
رێكێش سەیرانی گۆت ژی: داخوازێ ژ خەلكێ خوە دكەم ب بەرپرساتیەكا مەزن بچنە سەر سندۆقێن دەگدانێ و دەنگی بدەنە پارتی و وژدانا خوە ئارام بكەن و هەمی بزاڤا بكەین و كوردستانا خوە بپارێزین و رادەستی چو كەسێن فلمچێكەر و سینەماچێكەر نەكەین و مە سەرۆكەكێ هێژا و پارتەكا خزمەتكار هەیە و مە وەلاتەكێ شرین هەیە و گرنگە پێكڤە دەنگێ خوە بدەینە لیستا (190) یا پارتی دیموكراتی كوردستان.

لەزگین جوقی:

بەربژار سلیمان علی، بەربژارێ‌ هەژمار 29 ل سەر لیستا 190 پارتی دیموكراتی كوردستان بۆ پەرلەمانێ كوردستانێ بۆ رۆژنامەیا ئەڤرۆ راگەهاند كار ل سەر بجهئینانا بەرنامەیێ پارتی دیموكراتی كوردستان دێ هێتە كرن دەمێ باوەریا خەلكێ خۆ ب دەستڤە دئینن دچینە پەرلەمانێ كوردستانێ دێ ب هەمی شیانێن خۆ پشتەڤانیا خەلكێ خۆ كەین و بەرەڤانیێ ژ ئاخ و دەستكەفتین هەرێمێ كەین پارتی بەرنامەیەكێ گەلەك باش بۆ زێدەتر خزمەتكرنا خەلكێ كوردستانێ د وارێ ئاڤەدانی و پێكڤەژیانێ و ئارامیێ دا هەیەی، هەردەم پارتی بۆ پتر ئاڤەدانی و ب هێزكرنا گیانێ لێبورینێ د ناڤبەرا هەمی پێكهاتەیێن كوردستانێ دا كار كریە.
بەربژارێ‌ هەژمار 29 ل سەر لیستا 190 پارتی دیموكراتی كوردستان گۆت ژی: داخوازێ‌ ژ جەماوەرێ دلسۆز دكەین بەری هەر تشتەكی ژبیر نەكەن كو ئەو خودانێن وێ ئەزموونا راست و دروستا هەرێما كوردستانێ نە ژ بەرهندێ راگرتنا ئارامیێ و سەقایێ دیموكراسیێ و ئازادیێ ئەركێ جەماوەرێ پارتی یە و پێدڤیە وەكو هەر جار ئەم روویێ شارستانیێ هەرێما كوردستانێ نیشا هەمی جهیانێ بدەین، چونكو بەرهەمێ لیستا 190 یا پارتی یە، هەروەسا داخوازێ ژ خەلكێ كوردستانێ دكەین داستانەكا دی یا دیموكراسیێ و ئازادیێ تۆمار بكەن و هەمی ل سەر سندۆقێن دەنگدانێ بەرهەڤ ببن و دەنگێ خۆ بدەنە لیستا 190.
ئاشكرا ژی كر هەكە باوەری بۆ پەرلەمانی ب من هاتە دان، دێ ب ڕژدی كار ل سەر ب هێزكرنا كەرتێ چاندن و گەشتیاری و پەروەردێ و ساخلەمیێ و پشتەڤانیكرنا گەنجان كەین د چارچۆڤەیێ بەرنامێ پارتی دیموكراتی كوردستان دا، هەمی بزاڤان بۆ پتر خزمەتكرنا خەلكێ كوردستانێ دێ‌ كەین.

هەرهین محەمەد:

ڤەهێل شێروان عەبدولواحد حەجی مەلو مزیری، مامۆستایێ‌ زانكۆیێ‌ د زانستێن سیاسی دا، بەربژارێ‌ هەژمار (37) ژ لیستا (190) یا پارتی دیموكراتی كوردستان ل بازنەیێ‌ دهۆكێ‌ ل دۆر بەربژاركرنا خوە دبێژیت:( پارتی دیموكراتی كوردستان پەیرە و پرۆگرامەكێ‌ دەولەمەند هەیە و ژچاردە تەوەرێن سەرەكی پێك دهێت و ژ سەد و پێنجی و پێچ خالان و ئەم ژی وەكو بەربژار و هەكە خەلكی باوەریا خوە دا مە و بووینە ئەندامێن پەرلەمانێ‌ كوردستانێ‌ دێ‌ هەموو ئەركێن سەرملێن خوە جێبەجێ‌ كەین ل دووڤ شیانێن خوە و ئەز ژی ل دووڤ ئەوێ‌ بسپۆریا من هەی د بیاڤێ‌ تیرۆر و سیاسەتا دژی تیرۆرێ‌ دا و ژبلی ئەڤێ‌ چەندێ‌ ژی هندەك كاران دكەم ئێك ژ وان ژی ئەڤە سێ‌ چار سالە ل سەر كەرتێ‌ پەروەردێ‌ كاردكەم و شیایمە دەستێ‌ هاریكاریێ‌ بۆ نێزیكی شێست قوتابخانەیان درێژ بكەم، هەر ژ نووژەنكرنێ‌ هەتا دابینكرنا كەل و پەلێن پێدڤی و هەردیسان پشكداری چەند چالاكیێن وەرزش و لاوان بوویمە و ئانكو دێ‌ شێم ل پەرلەمانێ‌ كوردستانێ‌ دچەندین لژنەیان دا كاركەم و هاریكاربم.
ناڤهاتی زێدەتر گۆت: پشتی ڤان كاودانا و ئالۆزیێن سیاسی و رەوشا سیاسی یا عیراقێ‌، ب تایبەتی ل رۆژهەلاتا ناڤین پارتی تاكە حزبە دشێین پێناسە بكەین وەكو دووڤ كەفتیا راست و دروست یا دۆزا گەلێ‌ كوردستانێ‌ و هەر پارتی بوویە تاكە حزب جهێ‌ باوەریێ‌ بۆ خەلكی و دشێن خوە پێڤە گرێدەن و ژێدەرێ‌ نەتەوایەتیا كوردی یە و ب دیتنا من ژی مەزنترین دەستكەفت ریفراندۆمە و د سەر هەمی ئاستەنگان ڕا سەرۆك مەسعود بارزانی ب ئەنجامدانا وێ‌ ڕابوو و سەرەڕای ئەوێ‌ چەندێ‌ كۆمەلگەها نێڤدەولەتی دژی مە راوەستیان ئەڤە ژی نیشانا وێ‌ چەندێ‌ یە كو حزبا پارتی ب تایبەتی سەرۆك بارزانی شەرعیەتا خۆ ژ خەلكێ‌ خۆە وەردگریت.
بەربژارێ‌ پارتی دیمۆكراتی كوردستان گۆتژی: من چو سۆز نەداینە خەلكی و ب مخابنی ڤە بەربژارێن خولێن بوری یێن پەرلەمانێ‌ كوردستانێ‌ و عیراقێ‌ چو تام د سۆزا نەهێلایە، لێ‌ سۆزێ‌ ددەم ب هەموو شیانێن خوە ب ئەوێ‌ بسپۆریا من هەی هەموویێ‌ تەرخان بكەم بۆ خزمەتكرنا خەلكی و بۆ من چو جوداهی نینە كار ل پەرلەمانی بكەم، یان زانكۆیێ‌ یا گرنگ خزمەتكرنا خەلكی یە و من گەلەك بەربژار دیتینە دەمێ‌ ژ كارێ‌ پەرلەمانتاریێ‌ ب دووماهی دهێن ژ خۆناگرن ب زڤڕنە كارێ‌ خوە یێ‌ بەرێ‌ و ئەڤ چەندە ل نك من یا نۆرمالە هەر دەمێ‌ ژ كارێ‌ پەرلەمانتاریێ‌ ب دووماهی بهێم دێ‌ هەر مینم مامۆستایێ‌ زانكۆیێ‌.