دوهی سێشەمبی 1/10/2024، سەرۆكایەتییا هەرێما كوردستانێ راگەهاند» نێچیرڤان بارزانی، سەرۆكێ هەرێما كوردستانێ د دیدارەكێدا ل گەل ئێلبروس كوتراشێڤ، بالیۆزێ رۆسیا ل ئیراقێ، دەربارەی پەیوەندیێن رۆسیا ل گەل ئیراقێ و هەرێما كوردستانێ، پەیوەندیێن هەولێر – بەغدا و هەلبژارتنێن پەرلەمانێ كوردستانێ، بیر و بۆچوون لێكگوهارتن».
د بەیاننامەیێدا هاتیە» هەردو ئالییان سەرەرای داكۆكیێ ل گرنگییا هەلبژارتنان بۆ هەرێما كوردستانێ، هیڤییا بڕێڤەچوونا بانگەشەیەكا ئارام و سەركەفتی بۆ پڕۆسەیا دەنگدانێ خواست، هەروەسا پێشبینی و بۆچوونێن خوە ل دۆر ئەنجامێن هەلبژارتنان و پڕۆسەیا سیاسی ل هەرێما كوردستانێ، بەرچاڤكر».
راگەهاند ژی» دووماهی پێشهاتێن شەڕی ل ئۆكراینا و رەوشا رۆژهەلاتا ناڤین، ئالییەكێ دی یێ دیدارێ بوون كو قۆنسلێ گشتیێ رۆسیا ل هەرێما كوردستانێ، بەرهەڤبووی».

نێچیرڤان بارزانی، سەرۆكێ هەرێما كوردستانێ پیرۆزباهی ل مارك رووتە، سەرۆك وەزیرێن بەرێ یێ هولەندا كر ب هەلكەفتا دەستنیشانكرنا وی وەكو سكرتێرێ گشتیێ ناتۆ.
نێچیرڤان بارزانی، سەرۆكێ هەرێما كوردستانێ د پۆستەكیدا تۆرا جڤاكییا (ئێكس) دا بەلاڤكر» ژ دل پیرۆزباهیێ ل مارك رووتە دكەم ب هەلكەفتا دەستنیشانكرنا وی وەكو سكرتێرێ گشتیێ ناتۆ. هیڤییا سەركەفتنا مەزن بۆ دخوزان د ڤی رۆلێ گرنگدا. هەروەسا چاڤێ من یێ ل پێكڤەكاركرنا بەردەوام یا مەیە».
نێچیرڤان بارزانی و هەرێما كوردستانێ پەیوەندییەكا دۆستانە و ب هێز ل گەل مارك رووتە و هولەندا یا هەی. پێشتر چەندین جاران دیدار هەبوون. ل تەمووزا 2018، دەمێ نێچیرڤان بارزانی د پۆستێ سەرۆكێ حوكمەتا هەرێمێدا، سەرەدانا هولەندا كربوو و مارك رووتە ل باژێرێ لاهای پێشوازییەكا گەرم لێكربوو. هەروەسا پێشتر ل تەباخا 2016، مارك رووتە، وەكو سەرۆك وەزیرێن هولەندا سەرەدانا هەولێرێ كربوو و ژ ئالیێ نێچیرڤان بارزانی پێشوازی لێ هاتبوو كرن.
هولەندا وەكو ئەندامەكا هەڤپەیمانییا نێڤدەولەتییا دژی داعشێ هاریكارییا هێزێن پێشمەرگەی ، ئاوارەیان و ئەوان پەنابەران كریە كو بەر ب وی وەلاتی چووین.

جێگرێ سەرۆكێ پارتی دیموكراتی كوردستان راگەهاند: دیرۆكا پارتی یا پڕە ژ شانازیێ و بەرگریێ. هەروەسا دوپاتكر كو هەلبژارتن تاكە رێكە بۆ وێ چەندێ شێوازێ حوكمڕانیێ ل وەلاتێ مە دیار بكەین.
دوهی سێشەمبی 1/10/2024، مەسرور بارزانی، جێگرێ سەرۆكێ پارتی دیموكراتی كوردستان ب مەبەستا پشتەڤانیكرنو سەرئێخستنا لیستا 190 یا پارتی، ل باژێرێ هەولێرێ، ل گەل هەژمارەكا ئەندامێن پارتی ل سەندیكایێن هەرێما كوردستانێ كۆمبوو.
مەسرور بارزانی، جێگرێ سەرۆكێ پارتی، پەیڤەك پێشكێشكر و ئاماژەكر، پارتی ئەو حزبە بوو كو رۆژەكێ ژ رۆژان بەرهەڤ نەبوو كو دانپێدانێ ب وێ چەندێ بكەت بهۆستەكا ئاخا كوردستانێ بهێتە جوداكرن، هەڤدەم یا بەرهەڤ بوو شۆڕەشەكێ ل سەر وێ پرسێ دابنیت.
هەروەسا گۆت ژی» پارتی ئەو حزبەیە كو ل بن سەركردایەتییا بارزانیێ نەمر بەرهەڤ نەبوو دەست ژ كەركووكێ بەردەت، چونكە ب دیتنا وێ هیچ پشكەكا ئاخا كوردستانێ ژ كوردستانێ ناهێتە جوداكرن».
دیاركر ژی» ئەجیندایێن پارتی هەردەم بۆ خزمەتكرنا وەلاتییان بوو، پارتی شانازیێ ب وێ چەندێ دكەت رۆژەكێ ژ رۆژان داگیران ل سەر مافێن رەوا یێن گەلێ كورد نەكریە، پارتی هەردەم خوە كریە قوربانی نەتەوە و خەلكێ كوردستانێ».
گۆت ژی» پارتی ئەو پارتییە بوو كو ب سەرۆكایەتییا سەرۆك بارزانی نیشا هەموو جیهانێ دا ئیرادەیا خەلكێ هەرێمێ چو جاران ناشكێت و بڕیارا ریفراندۆمێ دا، ریفراندۆم ژی ب دەنگێ پترییا خەلكێ كوردستانێ سەركەفت، ئەڤە ژی شانازییەكا دی یا پارتییە».
مەسرور بارزانی دیاركر» گەلەك كەس و ئالی هەبوون ل گەل پارتی بوون و چاڤەڕێی دەستكەفتێن زێدەتر بوون، لەوما مل ب ملێ پارتی پشكداری د ریفراندۆمێدا كر و دەنگ ژی دا، بەلێ پاشی هەلویستێ جودا وەرگرت، بەلێ ئەو كەس و ئالییانە ب وێ شكەستنا سایكولۆچی كو تووشی بوونێ، خواندنا جودا بۆ ریفراندۆمێ كر».
جێگرێ سەرۆكێ پارتی رۆهنكر» ریفراندۆم كێمترین مافێ وەلاتییەكی بوو بۆ وێ چەندێ باس بكەت و بێژیت من چ دڤێت، بزاڤەكا مەزن هاتە كرن ئیرادەیا گەلێ كورد بهێتە شكاندن، بەلێ پارتی نەهێلا ئەو ئیرادەیە بهێتە شكاندن و ریفراندۆم سەرئێخست».
دیاركر ژی» دەمێ هێرشا درندانەیا تیرۆرستێن داعشێ ل سەر هەرێما كوردستانێ هاتی، بوونە مەترسییەكا جدی ل سەر ئاشتیێ و ئاشتەوایییا هەموو جیهانێ، پێشمەرگەی و سەركردایەتییا پارتی بەری هەموو ئالییەكی ل سەنگەرێ بەرگریێ دابوون، پارتی ئەو ئالییە كو هەردەم شەڕی بۆ ئاشتیێ دكەت».
دوپاتكر ژی» پارتی هەردەم ئەو ئالییە كو شەڕی بۆ وێ چەندێ دكەت هەرێما كوردستانێ یا سەقامگیر بیت و ئاشتی ل هەموو دەڤەرێ جهێ شەڕ و ئاژاوێ بگریت، سیاسەتا پارتی سیاسەتەكا گەلەك دیار بوو، ل گەل وێ چەندێ بەرگری ژ دەستكەفتێن نەتەوە و نیشتمانی كریە، بەرنامە ژی هەبوو كا چاوان د شیاندا بیت پڕۆژەیێن باشتر بۆ زێدەتر خزمەتنا وەلاتییان بجهبینیت».

مەسرور بارزانی، سەرۆكێ حوكمەتا هەرێما كوردستانێ پێشوازی ل محەمەد حیجازی، قۆنسلێ مسرێ ل هەرێما كوردستانێ كر ب هەلكەفتا ب دووماهی هاتنا ئەركێ وی.
د دیدارەكێدا سەرۆكێ حوكمەتا هەرێمێ سوپاسییا قۆنسلێ مسرێ كر بۆ وی دەمێ كار بۆ پێشڤەبرنا پەیوەندیێن دو ئالی كری و هیڤییا سەركەفتنێ ژی د ئەركێ وی یێ داهاتیدا بۆ خواست.
قۆنسلێ مسرێ رێز و پێزانینا خوە بۆ حوكمەتا هەرێما كوردستانێ دیاركر بۆ وێ پشتەڤانییا د دەمێ كاركرنا ویدا لێ هاتیە كرن و سەقامگیری و تەناهییا ل هەرێما كوردستانێ هەی بلند هەلسەنگاند و خواستا وەلاتێ خوە ژی بۆ ب هێزتركرنا پەیوەندییان ل گەل حوكمەتا هەرێمێ دوپاتكر.

هێمن هەورامی، ئەندامێ مەكتەبا سیاسییا پارتی دیموكراتی كوردستان د بەرپەرێ خوە ل سەر تۆرا جڤاكییا فەیسبووكی ب بەلاڤكرنا وێنەیەكێ خوە ل گەل مەسرور بارزانی، جێگرێ سەرۆكێ پارتی دیموكراتی كوردستان، پەیامەك بەلاڤكر و تێدا گۆت» خوە گێڤكرنا سەرانێن ئێكەتیێ، ژبلی شەپرزەییێ و مسۆگەرییا شكەستن و كەفتنا وان ل پێشبەری قیافا بلند یا پراتی و كاك مەسروری دا هیچ ئەنجامەكێ دی نابیت».
ل دەقێ پەیاما هێمن هەورامی، ئەندامێ مەكتەبا سیاسییا پارتی دیموكراتی كوردستان دا هاتیە» ب پشتەڤانییا خودایێ مەزن، ب پشتەڤانییا هیمەتا دلسۆزێن رێبازا پارتی و جەماوەرێ ب وەفا و ئیرادەیا ب هێز یا پارتی، لیستا 190 یا پارتییا مە ل 20 ئۆكتۆبەرێ، دێ سەركەفتنا مەزن ب دەستڤەئینیت».
هەروەسا بەلاڤكر» بلا نەیار و نەحەز بزانن، كاك مەسرور بارزانی دێ سەرۆكایەتییا كابینەیا دەهێ یا حوكمەتا هەرێما كوردستانێ كەت و درێژیێ ب وێ چاكسازیێ و خزمەتگوزاریێ و حوكمڕانییا وەلاتییان دەت».
هێمن هەورامی باس ل وێ چەندێ ژی كر» ئەو درووشمێن بێ بنەما كو ( دێ دووماهیێ پێ ئینین) و خوەڤێڤكرنا سەرانێن ئێكەتیێ، ژ بلی شەپرزەییێ و مسۆگەرییا شكەستن و كەفتنا وان ل پێشبەری قیافا بلند یا پارتی و كاك مەسروری دا هیچ ئەنجامەكێ دی نابیت».
ئاماژەكر ژی» بۆ بجهئینانا درووشمێن سەرانێن ئێكەتیێ، پێدڤییە سەركردایەتییا نوكە یا وێ حزبێ پۆستێن خوە بجه بهێلن و دەست ژ كاری بكێشن، ب ڤێ چەندێ ژی هەموو ئەو ئارمانجە دێ ب دەستڤە هێن كو د درووشمێن خوە دا باس دكەن، چونكە هەموو ئەو خەسلەتە یێن د واندا هەین و هەموو خەلكێ كوردستانێ دزانیت كو چاوان ڤان ب كودەتایێ خوە سەپاندیە».
وی ئەندامێ مەكتەبا سیاسییا پارتی دیموكراتی كوردستان گۆت ژی» ئەو ژ گەندەلترین كەسێن كوردستانێ نە و هەموو داتا و راپۆرتێن خالێن سنووری یێن بن دەستهەلاتا وان و تاكرەوی و سەرانە ستاندنێن وان ب تمامی ژیانا خەلكێ خوەشتڤیێ پارێزگەها سلێمانیێ یا تەحل كری، جوداكاریێ دكەن و ل بەرە كوردستانێ پارچە پارچە بكەن».
ل دووماهییا پەیاما خوە، هێمن هەورامی گۆت» بۆ وێ چەندێ درووشمێن سەرانێن نوكە یێن ئێكەتیێ ب راستی ب دەستڤە بهێن، بلا ئەو ب خوە دەست ژ كار بكێشن بەری خەلك وان ب دەرێخیت».

بسپۆرەکێ پەیوەندیێن نێڤدەولەتی دیار دکەت، هەلبژارتن ل هەموو جیهانێ بۆ ڤێ یەکێ دهێنە کرن دا بۆ دەمێ چار سالان دەستهەلاتەک نوو بهێتە دەستنیشان کرن، لێ ژ بۆ کوردان گەلەک جودایە و ئەڤ هەلبژارتنە بۆ دیارکرنا چارەنڤیسێ کوردان ژی گەلەک گرنگە.

د. ئەکرەم ئۆنەن بسپۆرێ پەیوەندیێن نێڤدەولەتی د دیدارەکا تایبەت دا ل گەل رۆژناما ئەڤرۆ دیار کر، بێگومان ئەڤ هەلبژارتنە ژ بۆ کوردان گەلەک گرنگن، چونکی دێ دستهەلاتەک بۆ چار سالێن بهێت ل هەرێما کوردستانێ هێتە هەلبژارتن، هەلبژارتن مافەک دیموکراتی یێ هەموو گەلێن جیهانێ یە، ل جیهانێ هەموویێ هەلبژارتن دهێتە کرن، لێ رەوشا کوردستانێ گەلەک تایبەتە، چونکی ئەڤ هەلبژارتنە ل گۆر باوەریا من بۆ دیارکرنا چارەنڤیسێ گەلێ مە ژی گەلەک گرنگە، ژ بەر ڤێ یەکێ ژی دڤێت دەنگدەرێن کورد ل هەرێما کوردستانێ ل گۆر ڤێ راستیێ بریارا خوە بدەن و گۆت: (نها ل هەرێما کوردستانێ گەلەک هێزێن سیاسی هەنە، د ڤان رۆژان دا ئەم دبینین کو پڕانیا وان ئێرشی پارتی دکەن، پارتی دیموکراتی کوردستان هێزا هەری خۆرت و بهێز یا کوردستانێ یە، دڤێت پارتی سیاسەتەکا جوداتر هەبیت و ل هەمبەر وان نەرم بیت، چونکی پارتی هێزا هەری مەزنە، لێ ئەو یەک رامانا هندێ ژی نادەت کو دڤێت پارتی هەر یا بێدەنگ بیت و چ نەکەت، گەلەک جاران دەمێ هندەک هێزێن سیاسی ئێرشی پارتی دکەن، هندەک ئالیێن دی بێدەنگ دمینن و دەمێ پارتی بەرسڤا وان ددەت هەموو ئێرشی پارتی دکەن، ئەو یەک ژی گەلەک شاشە).
بسپۆرێ پەیوەندیێن نێڤدەولەتی ئەو یەک ژی دیار کر، نها ل کوردستانێ دو هێزێن جودا هەنە، هێزەک کو کار بۆ پاراستنا مافێن نەتەوەیی و دەستکەفتیێن زێدەتر دکەت، ئەو ژی هەر کەس دزانیت پارتی دیموکراتی کوردستانە، پارتی کار بۆ بهێزکرنا کوردستانێ کار دکەت، پارتی سەرکێشیا پاشەرۆژەکا گەش بۆ گەلێ کوردستانێ دکەت، بێگومان دێ گەلەک هێز دژبەریا پارتی کەن و گۆت: (ئەڤ هەلبژارتنە تنێ بۆ دیارکرنا دەستهەلاتەکێ بۆ چار سالێن بهێت نینە، بەلکو رەوشا کوردستانێ گەلەک تایبەت، دڤێت گەلێ کورد ژ بۆ دیارکرنا پاشەرۆژا خوە، ژ بۆ ئازادیا خوە دەنگێ خوە بدەت، دڤێت دەنگدەرێن کورد ل هەرێما کوردستانێ ل گۆر ڤێ راستیێ بچیتە سەر سندوقێن دەنگدانێ، ئەز پێشبینی دکەم و هێڤیدارم ژی پڕانیا خەلکێ مە ل هەرێما کوردستانێ دەنگێ خوە بدەنە پارتی دیموکراتی کوردستان، ئەز ب باوەرم دێ گەلێ مە ب رێژەیەکا گەلەک مەزن دەنگێ خوە دەنە لیستا ١٩٠ یا پارتی دیموکراتی کوردستان).
ناڤهاتی ئەو یەک ژی دیار کر، هێڤیدارم ئەڤ هەلبژارتنە ب رەنگەکێ ئارام و شەفاف برێڤە بچیت، سەرکەفتنا پرۆسیسا هەلبژارتنان بخوە ژی گەلەک یا گرنگە، هێڤیدارم هەڤڕکیەکا دیموکراتی د ڤان هەلبژارتنان دا هەبیت و نەبیتە ئەگەرێ نەشرین کرنا ناڤودەنگێ هەرێما کوردستانێ، هەڤڕکیا د ناڤبەرا پارتێن سیاسی دا تشتەک گەلەک سروشتی یە و ل هەموو جیهانێ ژی ئەو یەک هەیە و گۆت: (هێڤیدارم هەموو پارتێن سیاسی خوەدان بەرنامێن باشن و کار بۆ باشکرنا رەوشا ژیانا وەلاتیان بکەن، بلا هێزێن سیاسی ب کار و بەرنامێ خوە کاریگەریێ ل دەنگدەران بکەن، بلا ئارمانج بهێزکرنا کوردستانێ بیت).
د. ئەکرەم ئۆنەن د دووماهیا ئاخڤتنا خوە دا ئەو یەک ژی دیار کر، مەترسیا ڤێ یەکێ هەیە کو دوژمن و نەیارێن گەلێ کوردستانێ ب هەر رەنگێ هەی بخوازن ئاژاوەگەریێ دروست بکەن دا پرۆسیسا هەلبژارتنان یا سەرکەفتی نەبیت، ژ بەر ڤێ یەکێ ژی ئەز هێڤیدارم هەموو هێزێن سیاسی گەلەک هشیار بن و رێ نەدەن ئالۆزی دروست بن، هەر ئالۆزیەک روو بدەت د بەرژەوەندیا هەرێما کوردستان دا نینە، بەلکو دڤێت هەموو ئالی کار بکەن دا ئیرادا خەلکێ کوردستانێ ب رێیا سندوقێن دەنگدانێ دیار بیت، چونکی سەرکەفتنا هەلبژارتنان سەرکەفتنا گەلێ کوردستانێ یە.