ل ناحیا به‌غدادیه باله‌فره‌كا كو هاریكاری دگه‌هاندنه داعشێ ژلایێ هێزێن حه‌شدی شه‌عبی ڤه هاته تێكدان.
ئه‌ڤرۆ هێزێن حه‌شدی شه‌عبی و سوپایێ عیراقێ ل باكوری ناحیا به‌غدادیه باله‌فره‌كا شه‌ری ئێخستیه خوارێ كو ب ژڤان بو هه‌ڤكاری و چه‌كی و ته‌قه‌مه‌نیان بو داعش بهاڤێژیت .
ل گوری ژێده‌رین سه‌ربازی تا نها نه‌هاتیه زانین ئه‌و باله‌فر سه‌ر ب چ لایه‌ن و ده‌وله‌ته‌كێ ڤه‌یه و ڤه‌كولین دوی بیاڤی دا به‌رده‌وامن .
روانگه‌ها سوریا بو مافێن مرۆڤی راگه‌هاند شه‌رڤانێن یه‌په‌گێ ل باژێركێ ته‌ل حه‌میس ژ ده‌ستێن داعشێ ئازادكر و دوی بیاڤی دا رامی عه‌بدولره‌حمان رێڤه‌به‌رێ روانگه‌ها سوری دیاركر پشتی شه‌روپه‌ڤچونێن چه‌ند رۆژێن رابۆری دناڤبه‌را یه‌په‌گێ و چه‌كدارێن داعشێ ل باژێركێ ته‌ل حه‌میس و چه‌ند گونده‌كێن ده‌وروبه‌ر ژ ده‌ستێ تیرۆریستان رزگاركرن .
رامی عه‌بدولره‌حمان دیاركر ئازادكرنا باژێركێ ته‌ل حه‌میس كو كه‌فته سه‌ر پارێزگه‌ها حه‌سه‌كێ ب گرنگترین جهێ تیرۆریستێن داعشێ دهێته زانین و ئه‌ڤه رێخوشكه‌ره بو ئازادكرنا چه‌ند ده‌ڤه‌ره‌كێن دی یێن بن ده‌ستێ تیرۆریستان ل عیراقێ و سوریا .
نه‌واف خه‌لیل به‌رده‌ڤكێ یه‌په‌گێ ب كه‌نالین راگه‌هاندنێ راگه‌هاند:پشتی ئازادكرنا ته‌ل حه‌میس ژلایێ شه‌رڤانێن یه‌په‌گێ نها د خو به‌رهه‌ڤكرنێ و پێشره‌وێ دانه بو ئازادكرنا چه‌ند ده‌ڤه‌ره‌كێن دی ل پارێزگه‌ها حه‌سه‌كێ .
وه‌زاره‌تا ده‌رڤه‌یا توركیا راگه‌هاند پرۆسێسا مه‌شق و راهێنانا ئوپوزسیونا سوریا ل ناڤا ئاخا توركیا ده‌ست ب كارێن خو دكه‌ت.
تانگو بیلگیش به‌رده‌ڤكێ وه‌زره‌تا ده‌رڤه‌یا توركیا راگه‌هاند:ده‌ستپێكا هه‌فتیا بهێت پرۆسێسا مه‌شقپێكرنا هێزێن میانره‌وێن سوریا د ناڤا ئاخا توركیا ب سه‌رپه‌رشتیا پنتاگونێ ده‌ست پێ كه‌ت، لێ به‌رده‌ڤكێ وه‌زاره‌تا ده‌رڤه‌یا توركیا ره‌تكر كو زانیاریێن زێده‌تر ل سه‌ر جهـ و هژمارا ئه‌وێ هیزێ ئاشكه‌را بكه‌ت كو دناڤا بنگه‌هێن سه‌ربازیێن توركیا مه‌شق و راهێنان پێ هێنه‌كرن.
جهی ئاماژه پێ كرنێ یه ژ 18 شوباتێ واشنتون و ئه‌نكه‌رێ ریكه‌ڤتينه بو مه‌شق و راهێنانێ ب ژماره‌یه‌كا چه‌كدارێن ئوپوزسیونا میانره‌وا سوریا ل ناڤ یه‌كه‌یه‌كا سه‌ربازی یا توركیا.
ئه‌ڤرۆ تیرۆریستێن داعشێ ب به‌لاڤكرنا ڤیدیویه‌كێ موزه‌خانه‌یا موسلێ تێكدایه، د ڤى بياڤى دا حه‌سه‌ن ئه‌حمه‌د قاسم رێڤه‌به‌رێ شونوواران ل پارێزگه‌ها دهۆكێ بو ئه‌ڤرۆ نیوز دیاركر موزه‌خانه‌یا باژێرێ موسل ب یا دووێ دهێته دانان ل سه‌ر ئاستێ عیراقێ ژلایێ زه‌نگینی و مه‌زناتیا خوڤه و بده‌هان هه‌زار پارچێن شونواران لێ هه‌بوون و هه‌ر ژ چه‌رخێن به‌رینی هه‌تا چه‌رخێ ئیسلامێ .
ناڤبری ئه‌و چه‌نده ژی گوت: باژێرێ موسلێ ژلایێ جوگرافی ڤه كوردستانی یه و پرانیا ئه‌وان شونوارێن د ناڤا موزه‌خانه‌یا موسلێ دا گرێدای دیرۆكا كورداڤه نه و ژناڤبرنا وان كاره‌كێ هوڤانه‌یه و دڤێت رێز ل دیرۆك و كه‌لتورێ ئه‌وێ ده‌ڤه‌رێ هاتباكرن .
موزه‌خانه‌یا باژێرێ موسلێ ل سالا 1952 هاتیه دامه‌زراندن و ئێكه ژ كه‌ڤنترین موزه‌خانه‌یێن عیراقێ و پشتی روودانێن سالا 2003 هژماره‌كا شوونوارێن وێهاتبوونه دزین.
به‌رپرسێ به‌رێ یێ لقا شنگالێ يا پارتى ديموكراتى كوردستان كو بو ڤه‌كولینێ هاتبوونه داخوازكرن بو پیرمام ئه‌ڤرۆ رێ پێ هاته‌دان ڤه‌گه‌ریته ناڤ مالا خوه.
سه‌ربه‌ست بابیری به‌رپرسێ به‌رێ یێ لقا شنگالێ و پشتی كاره‌ساتا شنگالێ ب تومه‌تا ئه‌وێ كاره‌ساتێ هاتبو داخوازكرن بو پیرمام بو ڤه‌كولینێ، ئه‌ڤرۆ پشتی بورینا چه‌ندین هه‌یڤا، رێ پێ هاته دان ڤه‌گه‌ریته مال ل باژێرێ دهۆكێ.
ژێده‌ره‌كێ نێزك ژ بابيرى بو ئه‌ڤرۆ دیاركر كو سه‌ربه‌ست بابیری ده‌مژمێر 4:00 ئیڤاری گه‌هشتیه مالا خهوه ل باژێرێ دهۆكی، پشتی بورینا چه‌ندین هه‌یڤان مانا وى ل پیرمام .
ژێده‌ری ئه‌و چه‌نده ژی دیار كر وه‌ك كه‌سه‌كێ ئاسایی ڤه‌گه‌ریايه و تا نها چ پله و پوست بۆ نه هاتینه دیاركرن.
د نها دا خه‌مخورێن زمانێ كوردی(سورانی) دشێن ب زێده‌كرنا زمانێ كوردی(سورانێ) بو وه‌رگێرانا گوگلی (Google Translate) بكار بينن هه‌تا كو زمانێ كوردی وه‌ك هه‌موو زمانێن جیهانێ یێن دی بو ناڤ وه‌رگێرا ب ناڤ و ده‌نگ بهێته زێده‌كرن.
ئه‌وێن كو حه‌زا ئه‌وێ چه‌ندێ هه‌ین و كو زمانێ كوردی بو وه‌رگێرێ گوگلى زێده بكه‌ن دشێن هه‌ر ژ نها پێدا ب رێكا ئه‌ڤی لینكی خوارێ ئه‌وان په‌یڤ و گری و رسته‌یان ژ ئینگلیزیێ وه‌رگێریته سه‌ر زمانێ كوردی (سورانی) كو ل ئه‌ڤی لینكێ خواری دیاره .
لینك بو زێده‌كرنا په‌یڤان .
پشتی توماركرنێ ته‌ڤایا وه‌رگێرانان شاره‌زایێن گوگلی دێ ب سه‌ردا چن و ئه‌گه‌ر بی ئاریشه بو ئه‌ڤه زمانێ كوردی وه‌ك زمانێن دی دێ ل فه‌رهه‌نگا گوگلی هێته زێده‌كرن و وه‌رگێر شێن مفایه‌كێ باش ژێ وه‌ربگرن.
وه‌رگێرێ گوگلی ئێكه ژ وه‌رگێرێن گه‌له‌ك ناسیار و بكارهاتی ل جیهانێ و بكار ئینه‌ر دشێن وه‌رگێرانێ د ناڤبه‌را چه‌ندین زمانان دا بكه‌ن.
حاكم سه‌رحان ئه‌حمه‌د ئه‌دامێ لیژنه‌یا دارایی یا په‌رله‌مانێ عیراقێ بو ئه‌ڤرۆ نیوز دیاركر: مه دووڤچون بۆ پرسا نه‌بونا پاره‌ی يا كری و گه‌هشتینه ئه‌وێ باوه‌ریێ نه بونا پاره‌ی نه بهانه‌یه چونكو حكومه‌تا عیراقێ وه‌لاته‌كێ زه‌نگینه و دشێت خه‌رجیان بو پێدڤیێن خو دابین بكه‌ت ب هه‌ر رێكه‌كێ و پاره ژی ل بانكێن وێ دا هه‌نه .
ناڤبری ئه‌و چه‌نده ژی دا زانین ئارێشه‌یا نه هنارتنا بودجه‌یێ یان ب به‌ش به‌ش هند پرسه‌كا ئابۆری نینه هندی یا سیاسی یه و فشاره‌كا زور ژلایێ پارتێن دی یێن شیعه ل سه‌ر حه‌یده‌ر عه‌بادی یه ژبوی گوهداریا هه‌موو داخوازیێن كوردان نه‌كه‌ت و سه‌رۆك وه‌زیران ژی نه‌شێن خو ژ ئه‌وان فشاران دور بگریت ژ ئه‌گه‌رێ ره‌وشا نهایا عیراق تێدا ده‌رباز دبیت .
سه‌رحانی ئه‌و چه‌نده ژی دا زانین ده‌ما بو مه دیاربوی پرسه‌كا سیاسی یه نه هنارتنا به‌شا بودجه‌یا هه‌رێمێ و ل رۆژنشتنا مه ل گه‌ل سه‌رۆك وه‌زیرێ هه‌رێمێ پێشنیارا هنارتنا شانده‌كێ كوردی بو سه‌ره‌دانكرنا لایه‌نێن دی یێن شیعه و سه‌ره‌دانكرنا مه‌رعه‌جی و خو نێزیكرن و خوشكرنا په‌یوه‌ندیان يا گرنگه، ئه‌گه‌رئه م شیان ئه‌ڤێ چه‌ندێ ب رێكین سیاسی چاره بكه ين ئوتوماتیكی دێ هنارتنا بودجه‌یا هه‌رێمێ ژی چاره بیت .
ئه‌نداما په‌رله‌مانێ عیراقێ نه‌جیبا نه‌جیب بو ئه‌ڤرۆ نیوز دیاركر رێكه‌تن و نه‌رێكه‌تنا ب ئاوایه‌كێ نڤیساری نه گرۆڤه بو پیگیرنه‌بونا به‌غدایێ و نه هنارتنا موچه‌یێ هه‌رێما كوردستانێ و عه‌قلیه‌تا ئیداره‌كرنا برێڤه‌برنا نه دستوری دكه‌ت .
نه‌جیبا نه‌جیب ئه‌نداما لیژنه‌یا دارایی گوت ژی رێكه‌تن ل سالێن چويی گه‌له‌ك هاتینه ئیمزاكرن لێ چ نه‌هاتینه بجهـ كرن و ژلایێ به‌غداڤه و ل دستوری بخو ژی به‌نده‌كا یاسایی هه‌یه كو دڤێت بكوژمێ هه‌رێمان بهێنه دیاركرن و نه‌گرێدایه ب نه‌فتێ و دانا موچه‌یێ فه‌رمانبه‌رێن هه‌رێمێ به‌هره‌یه‌كا یاسایی یه و دڤێت بهێته دان نه‌دانا وێ سه‌رپێچیه و ل ریكه‌فتنا ئه‌ڤێ داویێ ژی دا بویه به‌نده‌كا یاسای ل بودجه‌یا عیراقێ دا .
ناڤبریێ ئه‌و چه‌ند ژی دیاركر كو سه‌رۆك وه‌زیرێ عیراقێ نه گوت پێگیر نابین به‌لكو بهانه‌یه‌كا یاسای گرت ئه‌و ژی نه‌بونا پاره‌ی یه و ئه‌ڤه ژی جهێ گومانێ یه و نه‌بونا پاره‌ی نه ئه‌گه‌ره‌كه بۆ نه هنارتنا پاره‌یێ هه‌ریمێ و عیراق ده‌وله‌ته‌كا زه‌نگینه و دشێن چاره‌كه‌ت و بهایێ نه‌فتێ نزم بویه به‌س ب وێ شێوه‌یێ نینه كو كاریگه‌ری ل سه‌ر نه‌بونا پاره‌ی هه‌بیت .
په‌رله‌مانێ كوردستانێ دانوستاندنێ دێ لسه‌ر پرۆژێ هه‌لبژارتنێن قایمقام و رێڤه‌به‌رێن ناحیا یێن هه‌رێما كوردستانێ كه‌ت.
د به‌یاننامه‌یه‌كێ دا په‌رله‌مانێ كوردستانێ به‌لاڤكریه كو ئه‌ڤرۆ لیژنه‌یا یاسایی و ناڤخو و ئاسایش و جڤاتێن خوجهی ل گه‌ل پارێزگار و سه‌رۆكێن جڤاتێن پاریزگه‌هێن هه‌ولێر و دهۆك و سلیمانیێ و نونه‌رێ وه‌زاره‌تا نافخو كومبوون .
د وێ كومبونێ دا پرۆژێ بریارا هه‌لبژارتنا قایمقام و ریڤه‌به‌رێن ناحیێن هه‌رێما كوردستانێ و راستڤه‌كرنا یاسایا پارێزگه‌هان و جڤاتێن پارێزگه‌هان به‌حس كرن.
لیژنه‌یێن په‌رله‌مان و پارێزگه‌هان دانوستاندن ده‌ربارێ چه‌وانیا راستڤه‌كرنا یاسایا پارێزگه‌هان و جڤاتا پارێزگه‌هان كرن و بریاره راپۆرته‌كێ به‌رهه‌ڤ بكه‌ن و ئاراسته‌ی سه‌رۆكاتیا په‌رله‌مانی بهێته‌كرن .
پرۆژێ بریارا هه‌لبژارتنێن قائیمقام و رێڤه‌به‌رێن ناحیێن هه‌رێما كوردستانێ ل رۆژا 5/2/2015 ل رۆنشتنا نائاسایی یا په‌رله‌مانێ كوردستانێ ل پارێزگه‌ها هه‌له‌بچه خاندنا ئێكێ بو هاتبو كرن.
نيشاندان