ئه‌ڤرۆ نيوز، ناجی به‌ده‌ل:

پتشی ده‌ست ب سه‌رداگرتنا شنگال ژ لایێ داعش ڤه‌، تاوانێن دژی مرۆڤایه‌تی و جینوساید ژ لايێ وان ڤه‌ هاتنه‌ ئه‌نجامدان و ژ ئه‌نجامێ ئه‌وان كارێن دره‌نده‌يێن وان ب سه‌رێ كوردێن ئێزدی ئینا و دپێخه‌مه‌تا دانه‌ نیاسینا ئه‌وێ تاوانێ، چه‌ند لژنه‌ك هاتينه‌ دانان هه‌ر ئێك جودا ژ یادی كارێن خوه‌ دكه‌ت.

پارێزه‌ر و شيره‌تكارێ قانوونى محه‌مه‌د سالح ئامێدی بۆ ئه‌ڤرۆ نیوز گۆت: “نها جڤاتا وه‌زیران و وه‌زاره‌تا شه‌هید و ئه‌نفالكريان و داد و په‌رله‌مانێ كوردستانێ هه‌ر ئێكێ لژنه‌ك دانایه‌ و ئاگه‌هـ ژ ئیك نینن، ئه‌رێ دێ شیێن پێناسه‌یه‌كا نێڤده‌وله‌تی و بنكارێن قانوونى بۆ جینوسادیێ بۆ دیار بكه‌ین و ب ده‌ستڤه‌‌ بینن ئه‌ز دوێ باوه‌ریێ دامه‌ ب ڤی ره‌نگێ دێ يا ب زه‌حمه‌ت بيت”.

محه‌مه‌د سالح دیاركر ژی ئه‌و لژنێن هاتینه‌ پێك هاتن نه‌ بسپورن و كه‌سێن به‌شدار ژی نه‌ پسپورن و پسپورێن كارگیرێ و دارایی و زمانێ ئینگلیزیێ نه‌ و ئه‌ڤه‌ ژی موسیبه‌ته‌كا مه‌زنه‌ و هه‌روه‌سا ئه‌ڤا ژ خرێ حێبه‌تی تر ئه‌وه‌ كو ئێك ژ ئه‌وان لیژنه‌یان چوو بوو په‌رله‌مانێ هوله‌ندا داخواز ژی كر ببۆكو بێژن ئه‌وا شه‌نگالێ جینوسایده‌.

پارێزه‌رێ راوێژكار گۆتژی: “هنده‌ك په‌رله‌مانتاران داخواز ژ په‌رله‌مانی كریه‌ ئه‌ڤا روودای ب جینوساید بزانیت، ئه‌و ئێكه‌ پسپوریا په‌رله‌مانی نیه‌،  به‌لكو به‌س دێ په‌سند كه‌ت، دڤێت دادگه‌هه‌كا تایبه‌ت و ده‌سه‌لاتا دادوه‌ریێ بریارێ بده‌ت نه‌ك په‌رله‌مان”.

پارێزه‌رێ راوێژكارێ یاسایی داخوازێ دكه‌ت ده‌سته‌یه‌كا گشتی و پسپوری بهێته‌ دروست كرن و ل هه‌ر جهه‌كێ پێدڤیه‌ تایێن خوه‌ هه‌بن دا كو ئه‌و ئاریشه‌ و كێشه‌یا نها یا شه‌نگالێ ب بیته‌ نێڤده‌وله‌تی ئه‌گه‌ر نه‌ دێ ده‌ست ڤالا زڤرن، چونكو د جینوسادیێ دا دڤێت جوداكرنه‌كێ د ناڤبه‌را قركرنا ب كۆم و مرۆڤایه‌تێ خه‌ته‌كا زراڤ هه‌یه‌ و هه‌ر تاو‌انه‌كێ قانوونه‌ك هه‌یه‌ چ د قانوونێن نێڤده‌وله‌تی و ناڤخۆی بيت كو دو ركنێن مادی و به‌رجه‌سته‌ی بهێته‌ دیتن و دیاركرن.

ئه‌ڤرۆ نيوز، ناجی به‌ده‌ل:

به‌رپرسێ كه‌مپان ل پارێزگه‌ها دهۆكێ دیار كر هێشتا كار ل سه‌ر پرانیا كه‌مپان يێ به‌رده‌وامه‌ و ل گوری ئه‌وان پیڤه‌رێن ئه‌ندازیاری هێشتا ته‌مام نه‌بووینه‌، به‌لێ زۆریا په‌نابه‌ران و هاتنا وان بۆ ناڤا كه‌مپێ بێ بڕیارا وان بوویه‌ و د نها دا ژی گازه‌نده‌یان دكه‌ن.

ئیدریس نه‌بی به‌رپرسێ كه‌مپان ل پارێزگه‌ها دهۆكێ بۆ ئه‌ڤرۆ نیوز گۆت: “ل توخیبێ پارێزگه‌ها دهۆكێ ده‌ست ب چێكرنا 16 كه‌مپان هاتیه‌ كرن و كار ل هنده‌كا به‌ره‌ڤ دووماهیێ دچيت و هنده‌ك ژی هێشتا ل قووناغا ده‌ستپێكێ دانه‌ و 16 كه‌مپ ل سه‌ر قه‌زایێن پارێزگه‌هێ هاتینه‌ به‌لاڤكرن”.

به‌رپرسێ كه‌مپان ئه‌و چه‌نده‌ ژی دیاركر ل توخیبێ سێمێلێ ل باجل كه‌ندالا 85% كار تێدا ب دووماهى هاتیه‌ و باجل كه‌ندالا دو 80% ب دووماهى هاتيه‌ و قادیا 1000 كه‌ره‌ڤان 100% ته‌مام بوویه‌ و كه‌مپا خانكێ 75% ته‌مام بوویه‌ كه‌مپا شاریا 95% ته‌مام بوویه‌ و گه‌ڤه‌ر ئێك و گه‌ڤه‌ر دو 30% ته‌مام بوویه‌، توخیبێ زاخۆ، بێرسڤێ ئێك 90% و بێرسڤێ دو 80% ته‌مام بوویه‌ و چه‌مشكۆ 70%  و توخیبێ شێخان كه‌مپا گه‌رماڤا 50% ته‌مام بوویه‌ و بیرسیان 35% و ناڤ شێخان 15% و به‌رده‌ره‌ش و كه‌مپا به‌رده‌ره‌ش 30% و ئاكرێ و مامریانه‌ 29% و داودیێ 25% . ته‌مام بووينه‌.

ناڤبری ئه‌و چه‌نده‌ ژی دیاركر هێشتا وه‌كو پیدڤی كار ل ئه‌ڤان كه‌مپا نه‌هاتيه‌، به‌لێ‌ خه‌لك هاتیه‌ ناڤ و گۆت: “ڤیابا هه‌موو ب دووماهى هاتنان، ئه‌ڤجا هاتبانه‌ تێڤه‌، لێ د بێه‌نته‌نگ بوون و ب له‌زكرنا كارى هنده‌ك جاران ئالوزی درۆست دبن”.

ئه‌ڤرۆ نيوز، ناجی به‌ده‌ل:

فرۆكێن جه‌نگى يێن هه‌ڤپه‌يمانان ب تۆپ و مۆشه‌كان، بنگه‌هێ سه‌ربازى يێ كه‌سكێ ب دژوارى بۆردۆمان كر كو ل ده‌سپێكا هه‌يڤا هه‌شت يا ئه‌ڤ ساله‌ كه‌فتيه‌ ده‌ست چه‌كدارێن داعش.

موقدم شێرزاد نائيف، ل فه‌رماندا دهۆك بۆ ئه‌ڤرۆ نيوز گۆت: “نها هێزێن هه‌ڤپه‌يمانان ب فرۆكێن خوه‌ يێن شه‌ركه‌ر بنگه‌هێ سه‌ربازى يێ كه‌سكێ ب دژوارى بۆردۆمان كر”.

زێده‌تر گۆت: “ژ به‌ر كو ده‌مه‌كێ كێم يێ ب سه‌ر وێ بۆردۆمانێ ڤه‌ چووى، هێشتا زيانێن داعش نه‌هاتينه‌ زانين، به‌لێ سه‌ربازگه‌ها كه‌سكێ ئێكه‌ ژ بنگه‌هێن هه‌ره‌ گرنگ و سه‌ره‌كى يێن چه‌كدارێن داعش”.

سه‌ربازگه‌ها كه‌سكێ، بنگه‌هێ سه‌ره‌كى يێ هێزێن عيراقى بوو ل مووسل كو ب مه‌زنترين سه‌ربازگه‌هـ ل مووسل دهێته‌ هژمارتن و جهه‌كێ ستراتيژيێ ده‌ڤه‌رێ يه‌، پشتى كۆنترۆلكرنا وى سه‌ربازگه‌هى ل ده‌سپێكا هه‌يڤا ته‌باخێ، چه‌كدارێن داعش شيابوون ب ساناهى كۆنترۆلا زۆمار و شنگال بكه‌ن.