د. عەلی تەتەر، پارێزگارێ دهۆكێ ل رۆژا 19/9/2024 سەرا ناڤەندا خانی یا رەوشەنبیری و راگەهاندنێ دا و ژ لایێ ئحسان ئامێدی، بەرپرسێ ناڤەندێ و ئەندام و كادرێن ناڤەندێ ڤە پێشوازی لێ هاتە كرن.
د هەڤدیتنەكێ دا ب ئامادەبوونا حەمید عەلی، سەرپەرشتێ كۆمەلگەها نیڤدەولەتی یا ئیبراهیم خەلیل بەحسێ كار و پڕۆژەیێن حوكمەتا هەرێما كوردستانێ ئەوێن ل هەموو دەڤەرداری و ناوچەداری و كۆمەلگەه و گوندان و د هەموو سەكتەرێن خزمەتگوزاری دا دهێنە ئەنجامدان هاتە كرن. د تەوەرەكێ دی دا بەحسێ كار و چالاكیێن رەوشەنبیری و راگەهاندنێ، ئەوێن ب رێكا سازیێن ناڤەندا خانی دهێنە ئەنجامدان هاتە كرن.
دیسا هەر ل رۆژا 19/9/2024 ب ئامادەبوونا د. عەلی تەتەر، پارێزگارێ دهۆكێ و میشێل كامیروتا، قونسلێ گشتی یێ وەلاتێ ئیتالیا ل هەولێرێ و چەندین تیمێن ئیتالی د بیاڤێ‌ شوونوارناسیێ دا و د. بێكەس بریفكانی، رێڤەبەرێ شوونوارێن پارێزگەهێ پێشانگەها تیمێن شوونواری یێن ئیتالی ل كوردستانێ ل ناڤ مۆزەخانا دهۆكێ یا نیشتمانی هاتە ڤەكرن، ئامادەبوویان گەریانەك د ناڤ پێشانگەهێ دا كر و ژ نێزیك سەحكرنە كارێن دیتن و لێگەریانێ، ئەوێن ژ لایێ تیمێن ئیتالی ل سەر چەندین جهێن شوونواری هاتینە كرن.

ئامێدیێ، مەحمود نهێلی:

د رێورەسمەكی دا ب ئامادەبوونا بەرەڤان حەمدی، بەرپرسێ لقێ ١٨ یێ‌ پارتی و لیوا كامیران دەسكۆ، نوونەرێ فەرماندە مەنسور بارزانی و وارشین سەلمان، دەڤەردارێ ئامێدیێ و هەكار محسن، فەرماندێ لیوا تایبەتا دو و چەندین بەرپرسێن میری و حزبی دیاریا جەنابێ سەرۆك بارزانی، كو ب ڕێیا فەرماندە مەنسور بارزانی، هاتینە دابینكرن، پشكا ئێكێ یا هاریكاریا دراڤی پێنج ملیۆن دینار بوون و ل سەر 100 زاڤان هاتنە بەلاڤكرن، پاشی موەلیدێن كارەبێ بۆ حەفت گوندێن دەڤەرا ئامێدیێ وەكو قووناغا ئێكێ هاتنە بەلاڤكرن.
بەرپرسێ لقێ و نوونەرێ فەرماندە مەنسور بارزانی، د پەیڤێن خوە دا ئاشكرا كر، ل دووڤ ڕاسپاردەیا سەرۆك بارزانی، ئەڤ پرۆسا هاریكاریا گەنجان بۆ پێكئینانا هەڤژینیێ دێ یا بەردوام بیت و سالانە ب هەلكەفتا ١٦ی تەباخێ دێ شەهیانێن كۆم دێ‌ هێنە ئەنجامدان.
دیسا د قووناغێن داهاتی دا موەلیدە بۆ چەندین گوندێن دی ژی دێ‌ هێنە دابینكرن، هەر ل سەر ڕاسپاردا سەرۆك بارزانی ب هزاران مەترێن موكێتێ پلە ئێك بۆ چەندین مزگەفتێن دەڤەرێ هاتینە دابینكرن، زێدەباری كورسیكان بۆ خودان پێدڤیێن تایبەت و هەبوونا بەرنامەكێ تایبەت ب هاریكاریا نەخۆشان ژ بۆ چارەسەریێ.

رەمەزان زەكەریا:

حوكمەتا هەرێما كوردستانێ نەخۆشخانەكا هەڤچەرخ ژ جۆرێ A ل سەنتەرێ ناوچەداریا دینارتە ب گوژمێ پتری ملیار دیناران ئاڤا دكەت و نوكە د قۆناغا دووماهیێ دایە و د دەمەكێ‌ نێزیك دا دێ‌ تەمام بیت و مفایەكێ مەزن گەهینیتە خەلكێ دەڤەرێ.
سەربەست سەبری، رێڤەبەرێ ناوچەداریا دینارتە بۆ ئەڤرۆ گۆت: «ئاڤاكرنا نەخۆشخانەیا دینارتە یا ژ جۆرێ A ئێكە ژ كارێن گرنگێن خزمەتگوزاری یێن كابینا نەهێ یا حوكمەتا هەرێما كوردستانێ، كو بۆ ڤێ دەڤەرێ هاتیە بجهئینان و دێ خزمەتەكا گەلەك باش گەهینیتە خەلكێ ڤێ دەڤەرێ».
ناڤبری گۆتژی: «ناوچەداریا دینارتە ب گوندڤە گەلەك یا بەفرەهە نێزیكی 85 گوندانت ب خوەڤە دگریت، ئاڤاكرنا ڤێ‌ نەخۆشخانێ‌ دێ مفایەكێ مەزن گەهینیتە خەلكێ دەڤەرێ و چارەسەركرنا نەخۆشان ب ساناهی كەڤیت».

مەكتەبا ڕێكخستنا پارتی ل پارێزگەها دهۆكێ د پەیامەكێ دا 54 مین سالڤەگەڕا دامەزراندنا ئێكەتیا زانایێن ئایینێ ئیسلامێ ل هەرێما كوردستانێ پیرۆز كر.
د پەیاما مەكتەبا ڕێكخستنا پارێزگەها دهۆكێ دا هاتیە؛ ل 54 مین سالڤەگەڕا دامەزراندنا ئێكەتیا زانایێن ئایینێ ئیسلامێ ل كوردستانێ، پیرۆزباهیان ئاراستەی سەرۆك و ئەندامێن مەكتەبا تەنفیزی و جڤاتا ناڤەندیا ئێكەتیا زانایێن ئایینێ‌ ئیسلامێ‌ كوردستانێ و سەرجەم مامۆستا و زانایێن ئایینی یێن كوردستانێ، ب تایبەت یێن سنوورێ مەكتەبا ڕێكخستنا پارێزگەها دهۆكێ دكەین.
مەكتەبا رێكخستنێ‌ ئاشكرا ژی كریە، زانایێن ئایینی هەر ژ دەستپێكا شۆڕەشا ئیلۆنێ هەتا نوكە ڕۆلەكێ بەرچاڤ د پاراستنا پێكڤەژیان و كەلتوورێ لێبۆرین و ئاشتییێ و ڕێگریكرنێ ل هزرێن تۆندڕەو ل كوردستانێ هەبوویە.
هەر ب ڤێ هەلكەفتێ دوپاتییێ ل موكمكرنا كەلتوورێ ڕەسەنێ مرۆڤاییەتی و ئاشتیخوازییێ و پەیوەندییێن ئایینی و نەتەوەیێن دی یێن كوردستانێ دكەینەڤە.
دیسا هەر ب هەمان هەلكەفت سەباح بەیتوللا، هاریكارێ بەرپرسێ مەكتەبا رێكخستنا پارتی ل پارێزگەها دهـۆكێ دوهی 21/9/2024 ب هەڤالینیا شاندەكی سەرەدانا لقێ‌ دهۆك یێ‌ ئێكەتیا زانایێن ئایینێ ئیسلامێ كر و ژ لایێ سەرۆك و ئەندامێن لقێ ڤە پێشوازی لێ‌ هاتە كرن و د هەڤدیتنەكێ دا بەحسێ‌ رۆلێ‌ زانایێن ئایینی هەر ل دەستپێكا شۆڕەشێن كوردستانێ هەتا نوكە هاتە كرن، كو رۆلەكێ دیار و بەرچاڤ هەبوویە بۆ پێكەڤەژیانێ و كلتورێ لێبۆرینێ‌ و ئاشتیێ و ل كوردستانێ.

هەولێر، قائید میرۆ:

پەیڤدارێ وەزارەتا خواندنا بلند و ڤەكۆلینێن زانستی ئاشكرا كر، ئەڤ سالە هژمارا دەرچوویێن 12ی ئامادەیی گەلەك ژ سالا بۆری زێدەترن، بەلێ هەموو قوتابی ل زانكۆ و پەیمانگەهێن سەر ب حوكمەتێ ڤە دێ هێنە وەرگرتن.
عەباس ئەكرەم، پەیڤدارێ وەزارەتا خواندنا بلند و ڤەكۆلینێن زانستی بۆ رۆژناما ئەڤرۆ دیار كر، ژ دوهی وەرە سیستەمێ زانكۆلاین كارا بوویە، داكو قوتابیێن دەرچوویێن پۆلا 12ی ئامادەیی بشێن ب رێیا سیستەمێ زانكۆلاین خۆ تۆمار بكەن و ل زانكۆ پەیمانگەهێن هەرێما كوردستانێ بهێنە وەرگرتن، ل گورەی ئەو پیڤەرێن هاتینە دانان بۆ وەرگرتنا قوتابیان هەتا دوماهیا ڤێ مەهێ‌ دێ زانكۆلاین كاركەت.
عەباس ئەكرەم گۆت: «رێژەیا دەرچوونا قوتابیان ئەڤ سالە گەلەك ژ سالا بۆری زێدەترە، بەلێ وەزارەتا خواندنا بلند دێ هەموو بزاڤەكێ كەت، هەموو قوتابی ل زانكۆ و پەیمانگەهێن سەر ب حوكمەتێ‌ ل خواندنا بێبەرامبەر بهێنە وەرگرتن، هەروەسا ب كوالیتیەكا زانستی یا بلند دێ ل زانكۆ و پەیمانگەهان بەردەوامیێ دەنە خواندنێ».

ئامێدیێ، مەحمود نهێلی:

رازیبوون ل سەر چێكرنا رێیا گەلیێ بالندا هاتە كرن، پشتی رازیبوونێ‌ ئێكسەر ئامیرە و كەلوپەلێن پێدڤی گەهشتنە جهێ پڕۆژەی بۆ وێ یەكێ دەست بچێكرنا وی بهێتە كرن.
وارشین سەلمان، دەڤەردارێ ئامێدیێ بۆ ئەڤرۆ دیار كر، ژ بۆ پتر خزمەتكرنا خەلكێ دەڤەرێ و ئاڤەدانكرنا دەڤەرێن نێروە و رێكان و دوسكی ژووری، هندەك پڕۆژەیێن خزمەتگوزاری ل دەڤەرێ دێ‌ هێنە بجهئینان و گۆت: «ئێك ژ وان پڕۆژەیێن ستراتیژی، پڕۆژەیێ باشكرنا (رێكا سەرەكی یا گەلیێ بالندا بۆ پرا سیدا) یە، ب درێژاهیا ١٤ كیلۆمەتران دێ هێتە چێكرن».
ناڤهاتی گۆتژی: «ژ بۆ ئەنجامدانا ڤی پڕۆژەی گوژمێ ١٩ ملیار و ١٠٦ ملیۆن دیناران هاتینە تەرخانكرن و پشتی هاتیە رەوانەكرن بۆ بەلێندەری، ئێكسەر دەست ب چێكرنا ڤی پڕۆژەی دێ‌ هێتە كرن، دیسا ئەڤ پــــڕۆژە دێ بیتە ئێكەم پێنگاڤا گرنگ ژ بۆ ئاڤەدانكرنا دەڤەرێن نێروە، رێكان، دۆسكی ژووری و وەلاتژێری».
پشتی سەرهەلدانا 1991 ژ ئەگەرێ هەبوونا شەڕێ بەردەوامێ د ناڤبەرا پەكەكێ‌ و توركیا دا ئەڤ دەڤەرە نەهاتیە ئاڤەدان كرن و خزمەتگوزاریێن پێدڤی نەگەهشتینێ‌.