ديدار، سالار محةمةد دؤسكى:
1 – 4
گەلەك حەزێكەر و ئاشقێ ئاخ وەلاتێ خوە بوویە و هەتا ئەڤرۆ ل سەر هەمان بیروباوەرێن ل سەر مەزن بووی یێ بەردەوامە، ل شۆڕەشا گولانا پێشكەفتنخواز رۆلەكێ هەرە مەزن و كاریگەر ل گەل باب و برا و مام و مرۆڤێن خوە گێرایە، دەست ژ خەبات و بەرخودانێ بەرنەدایە و هەتا ئەڤرۆ ژی هەر خوە دبینت پێشمەرگە، و هەر دەم و گاڤ یێ بەرهەڤە بەرەڤانیێ ژ ئاخ و كەرامەتا مللەتێ كورد بكەت.
شەریف مەحمود عەبدی باڵەتەیی، پێشمەرگەیێ شۆڕەشا گولانا پێشكەفتنخواز ، د دیدارەكێ دا ل گەل بەرپەرێ دیرۆك یێ رۆژناما ئەڤرۆ گۆت: ل دەسپێكا شۆڕەشا ئیلۆنا مەزن باب و مامێن بوونە پێشمەرگە و چەكێ شەرەفێ هەلگرت، ل گەل خودێ ژێ رازی (مەلا مستەفا بارزانی) بەردەوام بوون، هەتا سالا 1975 نكسۆیا و خیانەتا ل مللەتێ كورد هاتیەكرن و شۆڕەش بۆ ماوێ چەند هەیڤان هاتە راوستاندن.
هەمان پێشمەرگە دبێژیت: هەر ل شۆڕەشا ئیلۆنێ ل سالێن شێستان گوندێ باڵەتە هاتە سۆتن و ژ نەچاری مالا مە هاتە ڤەگوهاستن بۆ باژێرێ دهۆكێ، وی دەمی گەلەكێ بچوویك بووم و بیرا من ناهێت بتنێ بوو من هاتیە گۆتن و جارا ئێكێ مالا مە هاتیە دهۆكێ ئەم ل تاخێ(قەرچان) ئاكنجی بووین، و خانیەك مەگرت هەیڤ ب (دینارەك) بوو وی دەمی مە داپیرەك هەبوو وێ ئەم خودانكرین، و هەتا دەڤەر پیچەكێ ئازاد بووی، خودێ ژێ رازی (مەلا مستەفا بارزانی) هاتیە دەڤەرێ و چەند بارەگایێن پارتی ل دەڤەرێ هاتنە ڤەكرن، و (عیسێ سوار) بۆ دەڤەرا زاخۆ هاتە دەست نیشانكرن، (حسۆ میرخان) بۆ شێخان (عەلیێ خەلیل) بۆ دهۆك و دەڤەرا دۆسكیا، (ئەسعەد) بۆ دەڤەرا بەروارییا بچیەك ئێمناهی دروست بوو، و ئەم جارەكا دی ڤەگەریاینە سەر گوندێ خوە ڤە، هندی بیرا من دهێت ل شۆڕەشا ئیلۆنێ سێ چوار جا گوندێ مە هاتیە سوتن، و ل گەل نسكۆیا سالا 1975 مە خوە رادەستی حوكمەتێ نەكریە ب چ رەنگان.
پێشمەرگەیێ شۆڕەشا گولانا پێشكەفتنخوار گۆت: ل شۆڕەشا ئیلۆنا مەزن هەر جارەكێ دا بیتە شەر و دوڤدا بیتە دانوستاندن و شەر دا هێتە راوستاندن و خەلك دا زڤریتە سەر گوندێن خوە و مە هزر كر ب دوماهی هات، و جارەكا دی دا حوكمەتا بەعس ل سەر رەفتارێن خوە یا بەردەوام بیت وەكی ماری بوو و هەتا خوە لێكدا و چەكەكێ باش دهەلگرت و جارەكا دی دا شەری ل گەل كوردان كەتە ڤە، و هەمی بزاڤێن وێ ئەو بوون كو مللەتێ كورد نەگەهیتە چ هیڤی و ئومێدێن خوە و مافێن خوەیێن رەوا ب دەست ڤە نەهینت، ل سالا 1975 بابێ من جێگرێ سریێ بوو و خودێ ژێ رازی (عەلی عەبو) شەهید ب بوو و بابێ من ب بوو سەرپەرشتێ سریێ ل گەل (سالح نەرمۆ) و هاتن و گۆت شۆڕەش هاتە راوستاندن و هەر كەسەكێ بچیت خوە رادەستی حوكمەتێ بكەت دێ چیت و یێ بڤێت ژی دێ چیتە ئیرانێ وی دەمی بابێ من بخوە ژنەك ئینا بوو و چەندین زارۆكێن بچیك هەبوون و نەدشیا ژبەر ئەوا زارۆكان بچیتە ئیرانێ پێنچ شەش زارۆك گەلەك زەحمەتە، ئەز و برایێ من سەعید و مامێ من سالح و حامد و مرۆڤەكێ مە محەمەد تالب مە خوە رادەستی حوكمەتێ نەكر و ئەم چووین و رۆژەكا ژ وێ رۆژێ نەخوشتر و تەنگ تر نابیت هەبیت ، چەندا نەخوشە ب چەكێ خوە شەرێ دوژمنی بكەی و وی چەكی ژ ملێ خوە ڤەكەی و رادەستی دوژمنی بكەی و ئەڤە تشتەكێ گەلەك مەزنە و ئەم نەچووین و ئەو كەسێن چووین چەكێن خوە رادەستكرین هاتن گۆتن ئیهانەكا مەزن ب مە دهاتەكرن، خەلك گەلەكێ عاجز بوو و زەلامان گەلەك دكرە گری.
پێشمەرگەیێ شۆرەشا گولانا پێشكەفتنخوار دوپاتكر: شۆڕەشا ئیلۆنێ بەرێ بنیاتێ ئاڤاكرنا هەر چوار پارچێن كوردستانێ دانایە، و هەر خەلكی نەزانی كورد چنە و ناسناما كوردینیێ مەلا مستەفا بارزانی بوو و ئەگەر لدیف وێ چووباین یا وی بوومە دانایی رەنگە ئەم ل ڤێ قوناغێ نەبووین، و بەلكو دا ل قوناغەكا دی بین و سوپاس بۆخودێ نوكە ژی گەلەك باشە، رەفتارێن دەف خودێ ژێ رازی مەلا مستەفا بارزانی هەین ناهێنە بەرەوردكرن ل دەف چ سەركردێن جیهانێ بگشتی و ئەڤە خەلكێ دبێژیت و ل جیهانێ گەریاینە و دەمێ ناڤێ مەلا مستەفا بارزانی دگۆتن هەر ل زالگەهێ نەدهاتنە راوستاندن و ناسنامە بوو و ئێكێ شتی من نەشێت پەسنا هێز و كەسایەتی یا ڤی سەركدێ مەزنێ مللەتێ كورد بكەت.
شەریف باڵەتەیی پێشمەرگەیێ شۆرەشا گولانا پێشكەفتنخوار گۆت: پشتی نسكۆیا سالا 1975 مە خوە رادەستی حوكمەتێ نەكرین ئەم چووینە گوندەكی ل ناڤ بەرواری یا دگۆتنێ (بابەرینكێ) ئەو گوند یێ (ئەحمەدێ میرخان) بوو بەرامبەر گوندێ(محمود ئاغایێ) چەمانكی بوو و هەر دو مرۆڤ گەلەك كوردپەروەر بوون، و گەلك بەركەتی بوون ئانكو مرۆڤێن وەك وان شۆڕەشگێر تر نابیت هەبن، و ئەم ماینە دناڤبەرا هەر دوكان دا و هەر دو خویندارێن ئێك بوونن بەلێ وەك كوردینی و نەتەوەیی هوسا ئەم دپاراستین، و ئەگەر زانیبا پولیسەكێ هاتیە سپیندارێ دا ئێكی هنێرنە دەف مە و دا بێژن خوە ب پارێزین، و دێ مەفرەزەك هێت پیچەكێ ژ گوندی هەرنە وێڤە وی دەمی مە چەكێ خوە ژی رادەست نەكربوو، و ئەزێ زگورد بووم و برایێ من سەعید و مامێن من خودان خێزان بوون، وی دەمی مە چ ئاگەه ژ هەلكرنا ئاگرێ شۆڕەشا گولانێ نەبوو، و هەر گوندەكێ ئەم چووباینێ وەكی مرۆڤەكێ تهێنی بوو بۆ كوردینێ و گەلەك ژی و ئەگەر نوكە ناڤێن قارەمانێن وی دەمی بووتە بێژم یێن شۆڕەشا گولانێ ب سەر ئێخستی هەتا نوكە ئەز بدووماهی ناهێن، وی دەمی گەلەك ب (سەلیم سورانی) هندەكا دگۆتنێ(جهوەر) یێ داخبار بووم و (عادل مزیری) و شەهید (زوراب) ئەڤە هندە مرۆڤ بووم شیانێن وا ل ئاستەكی بوون دشیان وەلاتان ب رێڤەببەن، و گەلەك تێگەهشتی و زانا بوون و رێڤەبربوون، دبێژم (سەلیم) كلیلا شۆڕەشێ و كوردینیێ بوو، دەمێ (محمود ئێزدی، عادل مزیری، مستەفا مزیری و شەهید زوراب ) هاتینە دەڤەرێ هاتنە تركی و هندەكێن قەدیشی هەنە(مراد، عومەر) كومەكا مرۆڤان بوو مالێن وان ل توركی بوون، و ئەوا ئینانە دەڤەرا بەرێ گارەی (مستەفا) یێ دەڤەرا بەرواری ژووری یا بوو و شەهید (زوراب) یێ دەڤەرا دوسكیا بوو، شەهید (عەبدولرەحمان) یێ دەڤەرا زاخۆ و (عادل مزیری) یێ دەڤەرا ئاكرێ بوو (مەحمود ئێزدی) یێ دەڤەرا شێخان بوو، و هاتنە بەرێ گارەكی و ئێكی دگۆتنێ حەجی عومەر ناڤێ كورێ وی براهیمە هێشتا دژیانێ دایە، حجی عومەر مرۆڤەكێ ئازا و چاڤنەترس بوو، و مە پەیوەندیێن كوردینی گەلەك ل گەل ئێك هەبوون، و پەیوەندیێن كوردینیێ ژ هەر تشتەكی مەزنتر بوو، رۆژەكێ مە بەرێ خوە دایێ و مە هندەك تەماتە ل گڤاندا خارێ كربوون و من ئاڤدان.
نيشاندان