زنار تۆڤی:

د. خەیری عەلی ئۆسۆ، رێڤەبەرێ گشتییێ گەشتوگوزارێ ل پارێزگەها دهۆكێ دوهی د كۆنفرانسەكێ رۆژنامەڤانی دا دیار كر، هاتنا گەشتیاران د سالا بۆری دا هەڤبەركرن ل گەل سالا 2023ێ كێمبوویە، ل گەل هندێ ژی چەندین پڕۆژەیێن نوو یێن گەشتیاری ل سنوورێ پارێزگەها دهۆكێ هاتینە ڤەكرن، هەروەسا ڕێژەیا كرێكارێن ناڤخۆیی ل جهێن گەشتیاری بۆ 100%ێ زێدە بوویە و گەلەك گرنگی ب زمانێ دایكێ ژی هاتییە دان.
ناڤهاتی گۆت: «ئاسانكاری و كێمكرنا رسوماتان ب رێژەیا 20%ێ، پشتەڤانیەكا باشبوو بۆ پێشخستن و بەر ب پێشڤەبرنا كەرتێ گەشتیاری، هەروەسا ڤێ چەندێ وەكرییە، كو پار 76 جهێن نوو یێن گەشتیاری ل پارێزگەها دهۆكێ بهێنە ڤەكرن، ژ وان ژی 12 هۆتێل و مۆتێل هاتینە ڤەكرن، دیسا نوكە ل سەرانسەری پارێزگەها دهۆكێ 900 جهێن گەشتیاری هەنە».

دهوك، لەزگین جوقی:

رێڤەبەرێ گشتیێ وەبەرهێنانێ ل پارێزگەها دهۆكێ دیاركر، هژمارەكا پڕۆژەیێن وەبەرهێنانێ ئەڤ سالە ل پارێزگەها دهۆكێ دێ‌ هێنە چێكرن.
هەڤال سەدیق، رێڤەبەرێ گشتیێ وەبەرهێنانێ ل پارێزگەها دهۆكێ بۆ رۆژناما ئەڤرۆ خویا كر، ئەڤ سالە پڕۆژەیێن وەبەرهێنانێ‌ ل شێخان و بەردەڕەش و ئاكرێ و ئامێدیێ و دهۆكێ دهێنە چێكرن.
هەڤال گۆت: «ئەڤ سالە دەڤەرەكا تایبەت یا ئاكنجیبوونێ و گەشتیاری دێ هێتە چێكرن، مەزنترین پڕۆژەیێ چاندنێ دێ هێتە چێكرن، هەروەسا ل دەڤەرداریا بەردەڕەش پڕۆژەكێ پیشەسازی بۆ كارگەهان دێ هێتە چێكرن و دەڤەرا پیشەسازیا ترۆمبیێلان ل ئاكرێ دێ هێتە چێكرن و چەندین پڕۆژەیێن گرنگ ل شێخان دێ هێنە چێكرن».

ئامێدیێ‌، مەحمود نهێلی:

پشتی دەربازبوونا حەفت رۆژان ل سەر ژ كار كەفتنا ئاڤا ڤەخوارنێ‌ یا سێ‌ گوندێن سنوورێ‌ ناوچەدارییا دێرەلۆكێ‌، كو ژ ئەنجامێ‌ بۆردومانا فرۆكەیێن توركیا ژ كار كەفتبوو؛ هاتە چارەسەركرن و رێڤەبەرێ‌ ئاڤا ئامێدیێ‌ دبێژیت: ب تنێ‌ ئاڤا پڕۆژەیێ‌ ستراتیژی دێ‌ ئاریشەیا ڤان گوندان ب ئێكجاری چارەسەركەت.
شڤان مەسعود، بەرپرسێ‌ بنگەهێ‌ سەخبێریا ئاڤا دێرەلۆكێ‌ بۆ رۆژناما ئەڤرۆ دیاركر، ئاریشەیا ئاڤێ‌ ل ڤان هەر سێ‌ گوندان ژ ئەنجامێ‌ بۆردومانا فرۆكەیێن توركیا دروست ببوو و گۆت: «ژ بەر رەوشا ئەمنی یا وێ‌ دەڤەرێ‌ تیمێن مە نەشیان بچن و ئەو بۆڕیێن شكەستی نووژەن بكەن، لێ‌ پشتی بزاڤێن زۆر و دەربازبوونا حەفت رۆژان، مە ل گەل لایەنێن پەوەندیدار قەستا وی جهی كر و ئەو ئاریشە چارەسەركر».
ئەندازیار بەشار حەجی، رێڤەبەرێ‌ ئاڤا ئامێدیێ‌ بۆ رۆژناما ئەڤرۆ گۆت: «ژ بۆ چارەسەریا ئێكجاری یا ڤان گوندان، مە پڕۆژیەك پێشنیاز كریە و ئاڤا ڤان سێ‌ گوندان ل گەل حەفت گوندێن دی بكەڤیتە سەر پڕۆژەیێ‌ ستراتیژی یێ‌ ئاڤا ئامێدیێ، ب ئەنجامدانا وی پڕۆژەی ئاریشەیا ئاڤێ‌ ل هەموو گوند و كۆمەلگەهێن دەڤەرێ‌ دێ‌ هێتە چارەسەكرن».

رەمەزان زەكەریا:

حكومەتا هەرێما كوردستانێ گرنگی ب كەرتێ ساخلەمیێ دایە و نەخۆشخانەكا جۆرێ A ل ناوچەداریا دینارتە دروستكریە.
نەعمان سەلیم خان، سەرۆكێ باژێرڤانیا دینارتە بۆ ئەڤرۆ گۆت: «سوپاسیا حكومەتا هەرێما كوردستانێ دكەین، ب تایبەت كابینەیا نەهێ، ژ بەركو گرنگی ب كەرتێ ساخلەمیێ دایە، ئەم گەلەك دلخۆشین، كو ب گوژمێ ملیارەك و 28 ملیۆن دیناران نەخۆشخانەكا جۆرێ A و هۆلەكا زارۆكبوونێ ل سەنتەرێ ناوچەداریا دینارتە دروستكری».
ناڤبری گۆتژی: «ل دینارتە نەخۆشخانەك هەبوو، د ئاستێ پێدڤی دا نەبوو، ژ بەركو خەلكەكێ مەزن ل دینارتە و دەڤەرا نەهلە هەیە، گڤاشتنەكا مەزن ل سەر نەخۆشخانا ئاكرێ چێكربوو، بەلێ پشتی ئەڤ نەخۆشخانە هاتیە چێكرن، شیا ئەو گڤاشتنا ل سەر نەخۆشخانێن ئاكرێ هەمیێ راكەت و خەلكەكێ مەزن ژی دێ مفای ژێ وەرگریت».

دهۆك، لەزگین جوقی:

دەڤەردارێ‌ شێخان دیاركر، ئەڤە چەندین سالن ئیدارا نەینەوا بۆ چێكرنا پڕۆژەیان غەدرێ ل خەلكێ شێخان دكەت.
سەردار یەحیا، دەڤەردارێ‌ شێخان راگەهاند، پێدڤیە سالانە ئیدارا نەینەوا ب رێژەیا پتری 12% بودجەیا نەینەوا بۆ شێخان تەرخان بكەت و گۆت: «ئەڤە چەندین سالن ئیدارا نەینەوا ب رێژەیا 1% پارەی بۆ شێخان تەرخان دكەت، ل دووڤ ماف و شایستەیێن خەلكێ شێخان پارەی بۆ تەرخان ناكەت».
گۆتژی: «بۆ چێكرنا پڕۆژەیان ل شێخان نوكە ئەم بزاڤان دكەین ئیدارا نەینەوا ل دووڤ ئەنجامێن سەرژمێریا گشتی سەردەریێ بۆ پڕۆژەیان ل گەل شێخان بكەت و ماف و شایستەیێن دارایی یێن خەلكێ شێخان ب دروستی بهێنە دان».