ب مەرەما گەهاندنا پەیاما هەڤخەمیێ و سەرساغیێ سەربەست لەزگین، ئەندامێ مەكتەبا سیاسی و بەرپرسێ مەكتەبا رێكخستنا پارتی ل پارێزگەها دهـۆكێ ب هەڤالینیا سالح حەیدەر، بەرپرسێ لقێ‌ 20ێ‌ پارتی ل شێخان دوهی 5/1/2025 پشكداری د بەهیا (خدر داود بەگ) دا ل ناوچەداریا باعەدرێ كر.
بەرپرسێ مەكتەبا رێكخستنا پارتی ل دهۆكێ هەڤخەمیا خۆ ئاراستەی میر حازم تەحسین بەگ، میرێ ئێزدیان و مالباتا وەغەركری كر و هیڤیا ژییێ درێژ و سەرساغیێ بۆ وانا خواست.
دیسا سەربەست لەزگین، ئەندامێ مەكتەبا سیاسی و بەرپرسێ مەكتەبا رێكخستنا پارتی ل پارێزگەها دهۆكێ ب هەڤالینیا سەباح بەیتوللا، هاریكارێ بەرپرسێ مەكتەبێ سەرەدانا هەر ئێك ژ قەهار میكائیك سپینداری و حاجی عەبدۆلرەحمان سەعید و محەمەد قاسم پێشمەرگێن دێرین و دلسۆزێن رێبازا بارزانی ل باژێرێ دهۆكێ كر و هایداری رەوشا ساخلەمیا وانا بوو، دیسا هیڤیا ساخ و سەلامەتیێ بۆ وانا خواست و پشتەڤانیا خۆ ژی بۆ هەر پێدڤیەكێ دیار كر.

ل سنوورێ سەرۆكاتییا باژێرڤانییا دهۆكێ، ب تنێ د ناڤا سەنتەرێ باژێری دا 139 پڕۆژە د سالا 2024 دا هاتینە بجهئینان.
ئیسماعیل مستەفا، بەرپرسێ راگەهاندنێ ل سەرۆكاتییا باژێرڤانیا دهۆكێ بۆ رۆژناما ئەڤرۆ دیار كر، ئەو پڕۆژەیێن ڕازیبوون ل سەر هاتیەدان 71 پڕۆژەنە ب گوژمێ 164 ملیار و 518 ملیۆن دیناران، ئەو پڕۆژەیێن هاتینە بجهئینان یان ژی نوكە د قووناغا بجهئینانێ دا، 68 پڕۆژەنە، ب گوژمێ 183 ملیار و 884 ملیۆن دینارانە.
ئیسماعیلی گۆت: «ئەو پڕۆژەیێن ڕازیبوون هەی، 14 پڕۆژەنە ل سەر بودجەیا پارێزگەها دهۆكێ، هەروەسا 27 پڕۆژە ل سەر داهاتێ سەرۆكاتییا باژێرڤانیا دهۆكێ و 27 پڕۆژە ل سەر پێشینەیا بەردەوامن، دەربارەیی هژمارا ئەوان پڕۆژەیێن هاتینە بجهئینان یان د قووناغا بجهئینانێ دا، حەفت پڕۆژە ل سەر بودجەیا وەزارەتا باژێرڤانی و گەشتوگوزارێ، 12 پڕۆژە ل سەر بودجەیا پارێزگەها دهۆكێ و 47 پڕۆژە ژی ل سەر داهاتێ سەرۆكاتییا باژێرڤانییا دهۆكێنە».

دهۆك، لەزگین جوقی:

بەرپرسێ تەكنیكی ل رێڤەبەریا سەخبێری و پاراستنا رێك و پران ل پارێزگەها دهۆكێ ڕاگەهاند، پلان هاتیە دانان، ئەڤ سالە دەست ب چێكرن و سەخبێركرنا جاددەیێن دەڤەرداریێن ئامێدیێ و شێخان بهێتە كرن.
هەڤال عەلی، بەرپرسێ تەكنیكی ل رێڤەبەریا سەخبێری و پاراستنا رێك و پران ل پارێزگەها دهۆكێ بۆ رۆژناما ئەڤرۆ گۆت: «پلان هاتیە دانان ئەڤ سالە ب گوژمێ 12 ملیار دیناران پڕۆژە د وارێ رێك و پران دا ل دەڤەرداریێن ئامێدیێ و شێخان بهێنە چێكرن و هژمارەكا رێكا دهێنە چێكرن ل گەل سەخبێركرنا جاددەیان ل دەڤەرا ئامێدیێ و شێخان، هەروەسا كار ل سەر جاددەیێن چەندین دەڤەران ل پارێزگەها دهۆكێ دهێتە كرن».

رەمەزان زەكەریا:

كاروانێ ئاڤەدانكرنێ ژ لایێ كابینەیا نەهێ یا حكومەتا هەرێما كوردستانێ بەردەوامە، ب گوژمێ پتری چار ملیار و 500 ملیۆن دیناران كار ل سەر نووژەنكرن و چێكرنا رێكێن گوندان ل هەردو دەڤەرداریێن ئاكرێ و بەردەڕەشێ‌ دهێتە كرن.
ئەندازیار محسن میرانی، رێڤەبەرێ سەخبێری و پاراستنا رێك و پران ل ئاكرێ بۆ ئەڤرۆ دیار كر، كار ل سەر پڕۆژەیێن چێكرنا رێكا بەردەوامە گۆت: «ل بەردەڕەشێ‌ پڕۆژەیێ رێكێن گوندێن، مەم و زین، شەمسەخرێ، كەلەك بشیریان، دوسەرە، تربەسپی، ئاڤڕێژێن دوبەردان و زمزموك، كار تێدا ب دووماهی هاتیە، دیسا ل ڤان نێزیكان كار دێ بۆ رێكێن پتری 15 گوندان ل سنوورێ ناوچەداریێن رۆڤیا و دارەتۆ و كەلەكێ‌ دەست پێكەت».
گۆتژی: «ل ئاكرێ كار ل سەر چێكرن و سەخبێركرنا رێكا بەردەوامە، ل دینارتە پتری 16 گوندان و ل بجیلێ‌ پتری 14 گوندان و ل گردەسێن ژی پتری پێنج گوندان مفادارن دگەل چێكرنا ئاڤڕێژێن چارگوشەی ل گوندێن گلێنە و دزۆك».

ئامێدیێ، مەحمود نهێلی:

هەژمارەكا مامۆستا و فەرمانبەرێن سنوورێ ناوچەدارییا دێرەلۆكێ‌ گازندا خوە گەهاندیە رۆژناما ئەڤرۆ و دیار كریە، ژ بەر نەبوونا ئامیرەیێ ئەی تی ئێم دڤێت ئەو 20 هزارا ب مەزێخن و بچنە دهۆكێ یان ژی شێلادزێ و ئامێدیێ، هەتا بشێن مووچەیێ خوە ب رێكا ئامیرەی وەربگرن.
ماموستایەكێ گۆت: «ئەڤە سێ مەهە ئەز مووچەیێ خوە ب رێكا ئامیرەیێ ئەی تی ئێم وەردگرم، ئەڤ ئامیرە ل دێرەلۆكێ نەهاتیە دانان و ئەز دچمە دهۆكێ مووچەیێ خوە وەردگرم، ب راستی ژی گەلەك مەزاختی دچیت هەتا ئەم مووچەی وەردگرین، ئەم دخوازین چارەسەریەكا ب لەز بۆ مە بهێتە دیتن».
رێبەر سادق، رێڤەبەرێ ناوچەداریا دێرەلۆكێ‌ ل سەر ڤێ یەكێ بۆ رۆژناما ئەڤرۆ دیار كر، ئەو دێ ب رژدی ل سەر ڤی بابەتی راوەستن و بۆچی حەتا نوكە ئەڤ ئامیرە ل دێرەلۆكێ نەهاتینە دانان و گۆت: «مە پەیوەندی ب هەژمارا 1991 كر و ئەڤ گازندە گەهاندێ و وان ژی دیار كر، كو پشتڕاست بن دێ ل مەها بهێت ئەڤ ئامیرە ل دێرەلۆكێ ژی هێتە دانان و ئێدی فەرمانبەر و مامۆستا دشێن هەر ل سەنتەرێ ناوچەدارییا دێرەلۆكێ‌ مووچەیێ خوە وەربگرن».

دهۆك، لەزگین جوقی:

رێڤەبەرێ كۆچ و كۆچبەر و بەرسڤدانا قەیرانان ل پارێزگەها دهۆكێ دیار كر، دائێخستنا كەمپان هاتیە ڕاگرتن و دبێژیت: پتری هزار خێزانێن ئاوارە د سالا بۆری دا چووینە شنگالێ.
پیر دەیان پیر جەعفەر، رێڤەبەرێ كۆچ و كۆچبەر و بەرسڤدانا قەیرانان بۆ ئەڤرۆ گۆت: «پتری هەزار مالباتان ڤەگەڕیاینە وارێن خۆ ل شنگالێ‌، لێ هندەك ژ ئاوارەیان پشتی چووینە شنگالێ‌ پەشمان بووینە هندەك هەنە ڤەدگەڕنە كەمپان ڤە».
ل پارێزگەها دهۆكێ و ئیدارا سەربخۆ یا زاخۆ 20 كەمپێن ئاوارە و پەنابەران هەنە.