پارێزگارێ‌ دهۆكێ‌ هەژمارەكا پڕۆژەیێن گرنگ ل سەنتەرێ‌ باژێرێ‌ دهۆكێ‌ و دەڤەرداریێن ئامێدیێ‌ و سێمێلێ‌ رەوانەی بجهئینانێ‌ كرن، كو ئێك ژ وان دروستكرنا منیۆمێنتا ئەنفالانە ل كەلها نزاركێ‌.
د. عەلی تەتەر، پارێزگارێ دهۆكێ دوهی سپێدێ‌ 24/3/2024 هەژمارەكا پڕۆژەیێن نوو رەوانەی بجهئینانێ كرن بڤی رەنگێ ل خوارێ:
– دروستكرنا منیۆمێنتا ئەنفالان ل كەلها نزاركێ.
– دروستكرنا ئاڤاهیێ كۆلیژا پەروەردا بنیات ل دەڤەرداریا ئامێدیێ.
– پڕۆژەیێ ئاڤا ناوچەداریا خانكێ و درێژكرنا ئینتیكێ وەرگرێ ئاڤێ ژ ژێدەرێ سەرەكی یێ پڕۆژەیێ ستراتیژی یێ ئاڤا فەیدیێ.
دیسا هەر دوهی د. عەلی تەتەر، پارێزگارێ دهۆكێ ل هولا دەڤەرداریا دهۆكێ كۆمبوونەك ل گەل لیژنا بلند یا دەستنیشانكرنا زیاندارێن لەهیان ئەنجامدا و د كۆمبوونێ دا بەحسێ كارێ لیژنێ ژ بۆ دەستنیشانكرنا هەموو وەلاتیێن ژ ئەگەرێ‌ لەهیێن رۆژێن بۆری زیان گەهشتینێ هاتە كرن.

ئامێدیێ، مەحمود نهێلی:

ژ ئەنجامێ بارینا بارانێن زۆر و دروستبوونا لەهیان زیانێن زۆر گەهشتینە وەلاتیێن دەڤەرا ئامێدیێ و ب تایبەتی رێك و پران و جهێن گەشتیاری و لەهیان پتر ژ دو ملیار دیناران زیان گەهاندیە دەڤەرا ئامێدیێ و مەترسیا پەقینێ‌ ل سەر سكرەكێ ئاڤێ‌ ل نێزیك رووبارێ‌ سپنە هەیە و هەكە ب پەقیت دێ‌ گەلەك زیان ژێ‌ پیدا بن.
دیسا هەژمارەكا جاددەیێن سنوورێ باژێرڤانیا ئامێدیێ ژ ئەگەرێ باران و لەهیان داچووینە و مەترسیا هەرفین و ژناڤچوونێ ل سەرە، ب تایبەتی ژی ئەوێن دكەڤنە دەرڤەی سەنتەرێ ئامێدیێ و ئەوێن دورێن ئامێدیێ.
ئەندازیار ئەڤراز حەسەن، سەرۆكێ باژێرڤانیا ئامێدیێ بۆ رۆژناما ئەڤرۆ دیار كر، ئەڤ جادەیە ژ ئەگەرێ بارینا بارانێن زۆر یێن ئەڤ سالە و دروستبوونا لەهیان داچووینە و گۆت: «جاددەیەك ل تاخێ كانیا مالا نێزیكی 50 میتران داچوویە و د گەل خوە دا دیوارێن پالپشت ژی برینە و ئەگەرێن وێ ژی ڤەدگرن، كو ئەو ئەرد هەر ل بنی داچوویە و جاددە ژی ل گەل خوە بریە خوارێ».
ناڤهاتی دیار ژی كر، ئەو جاددەیا دچیتە پرا عیسێ ژی بەری چەندەكێ دیوار و ل گەل بۆریا ئاڤێ و ل گەل جویەكا ئاڤێ ئەرد هریایە و گۆت: «ئەگەرێن وێ ژی بۆ دروسبوونا لەهیان ڤەدگەریت، هەر ل كانیا مالا و ل نێزیك مزگەفتا كانیا مالا دەوروبەرێن قەنتەرێ هەموو داچووینە و دیوار ماینە ل هەوا و مەترسیا هەرفینێ كەفتیە سەر».
سەرۆكێ باژێرڤیا ئامێدیێ گۆت: «ژ بۆ چارەسكرنا ڤان ئاریشا و نووژەنكرنا ڤان جاددەیان مە ڤەدیتن ل گەل رێڤەبەریا باژێرڤانیێن پارێزگەها دهوكێ بۆ وان هەر سێ جاددەیان چێكریە و بۆ پارێگەها دهوكێ دێ هێنە بلندكرن، ئەو پارێ پێدڤی یێ ئەڤ جاددەیە پێ بهێنە نووژەنكرن دشیانێن مە دا نینە، ئەم چاڤەرێ بەرسڤا لاینێن پەیوەندیدارین كو پارێ پێدڤی بۆ بهێتە تەرخانكرن بۆ وێ یەكی ئەڤ جاددەیە بهێنە نووژەنكرن و ژ هەرفینێ بهێنە پارستن».

هەولێر، قائید میرۆ:

رێڤەبەرێ گشتیێ بازرگانی ل وەزارەتا بازرگانی و پیشەسازیی یا حوكمەتا هەرێما كوردستانێ‌ دیار كر، پشتی هاتنا مەها رەمەزانێ لیژنەیێن چاڤدێریا بازاڕی هاتینە زێدەكرن و دبێژیت: هەر كەسەكێ بهایێ كەلوپەلان گران بكەت دێ هێتە سزادان و ب شەڤ و رۆژ دووڤچوون یا بەردەوامە و لیژنە د ناڤا بازاڕی دا هەنە.
نەوزاد شێخ كامل، رێڤەبەرێ گشتیێ بازرگانی بۆ رۆژناما ئەڤرۆ خویا كر، نوكە ب شەڤێ ژی لیژنە و تیمێن بازرگانی چاڤدێریا رەوشا بازاڕی دكەن، داكو بهایێ كەلوپەلان نەهێتە بلندكرن و كەلوپەلێن دەم ب سەرڤەچوویی نەهێنە فرۆتن و گۆت: «هەر سال لیژنەیێن چاڤدێریا بازرگانی د ناڤا بازاڕی دانە و دووڤچوونا بازاڕی دكەن، رێك ناهێتەدان چو كەس و بازرگانەك د ئەڤێ مەهێ‌ دا بهایێ كەلوپەلان گران بكەن».
نەوزاد شێخ كامل گۆتژی: «ئەڤ سالە هەتا نوكە رەوش باشترە و ل گورەی دووڤچوونا لیژنەیێن وەزارەتێ، هەتا نوكە بهایێ كەلوپەلان یێ كۆنتڕۆلكریە و كەلوپەل ژی ب رێژەیەكا زۆر هاتینە د ناڤا هەرێما كوردستانێ دا و هاتینە عمباركرن، ئانكو مەترسی ل سەر نەبوونا پێدڤیێن رۆژانە یێن وەلاتیان نینە، دیسا هەر كەسەكێ بهایێ‌ كەلوپەلان ژی گران بكەت دێ هێتە سزادان».

دهۆك، لەزگین جوقی:

ڕێڤەبەرێ‌ كۆچ و كۆچبەر و بەرسڤدانا قەیرانان ل دهۆكێ دیار كر، حكومەتا ئیراقێ گەلەك فشاران بۆ دائێخستنا كەمپان و زڤڕینا ئاوارەیان دكەت و دبێژیت: ئەم بۆ هەر هەماهەنگیەكێ ل دۆر ڤەگەڕیانا ئاوارەیان و گرتنا كەمپان دبەرهەڤن.
پیر دەیان، رێڤەبەرێ‌ كۆچ و كۆچبەر و بەرسڤدانا قەیرانان ل دهۆكێ بۆ ئەڤرۆ گۆت: «ئەم ل گەل وەزارەتا كۆچ و كۆچبەرێن ئیراقێ بۆ هەر هەماهەنگییەكێ ل دۆر ڤەگەڕیانا ئاوارەیان و گرتنا كەمپان دبەرهەڤین، دیسا نوكە حكومەتا هەرێما كوردستانێ ب دابینكرنا پێدڤیێن ساخلەمیێ، پەروەردێ، ئاڤ و كارەبێ و خزمەتگوزاریان د ناڤ كەمپان دا رادبیت».
ناڤهاتی گۆتژی: «ئاوارە د ئازادن بۆ زڤڕینا دەڤەرێن خوە، نوكە حكومەتا ئیراقێ گەلەك فشاران بۆ دئاێخستنا كەمپان و زڤڕینا ئاوارەیان دكەت».

هەولێر، قائید میرۆ:

بەرپرسەكێ وەزارەتا چاندنێ ئاشكرا كر، بارانێن ئەڤ سالە دێ كاریگەری ل سەر زێدەبوونا بەرهەمێ گەنمێ جۆتیاران هەبیت و چو مەترسی ل سەر بەرهەمێ جۆتیاران نەمایە، ب تایبەتی ل هندەك دەڤەران، كو بەری نوكە مەترسیا هشكەسالیێ ل سەر هەبوو.
كەریم سلێمان، بریكارێ وەزارەتا چاندنێ بۆ رۆژناما ئەڤرۆ دیار كر، ئەڤ سالە رێژەیەكا زۆرا بارانێ باریە و دێ كارتێكرن ل سەر بەرهەمێ جۆتیاران هەبیت و گۆت: «ئەڤ سالە بەرهەمێ گەنمی دێ‌ گەلەك ژ سالا بۆری زێدەتربیت، ب تایبەتی ل هندەك دەڤەر هەبوون بەری نوكە مەترسیێن هشكەسالیێ ل سەر هەبوون، لێ‌ ب بارینا بارانێن ڤێ‌ دووماهیێ‌ ئەو مەترسی ژی نەما و هندی باران بهێت باشە و دێ كاریگەری ل سەر كەرتێ چاندنێ هەبیت».
كەریم سلێمان گۆتژی: «ل گەل زێدەبوونا بەرهەمی، دڤێت بازاڕ بۆ بەرهەمێ جۆتیارێن هەرێما كوردستانێ بهێتە پەیداكرن، لەوڕا وەزارەتا چاندنێ و حوكمەتا هەرێمێ یێ هەموو بزاڤەكێ بۆ پەیداكرنا بازاڕی بۆ بەرهەمێ ناڤخوەیی دكەن، ب تایبەتی ژی بۆ پرۆسا وەرگرتنا گەنمێ ئەڤ سالە، كو بڕیارە ل گورەی پلانەكا تایبەت بهێتە وەرگرتن و بەرهەڤی ژی بۆ وەرگرتنا بەرهەمێ ئەڤ سالە دهێنە كرن».