دیدار، سالار محەمەد دۆسكی:

4 – 4

وی دەمی ل بابلو سریەكا جاشا لێ بوو، كو بنگەهەكێ گەلەك مەزن بوو. پێزانین گەهەشتنەمە كو ئەمبارەكا مەزنا چەكی یا د وی بارەگای دا هەی. بۆ مەژی چەك گەلەكێ گرنگ بوو. وی دەمی شەهید سەبری بامەڕنی بەرپرسێ ‌لەشكریێ ‌لژنا مە بوو. مەوەك لژنە و ل گەل بەرپرسێن ڕێكخراوێن لەشكری پلان دانا كو وی بارەگایێ سریێ و ل گەل وان 6-7 ڕەبیێن دۆرا بگرین.
ڕەبیێن دوژمنی دوو ڕێز بوون. دڤیا ڕێزا ئێكێ ب دزیڤە و ب بێدەنگی مە گرتبان و پاشی مە هێرشی ڕێزا دی و بارەگایێ سریێ كربا. لەوما مە پلانەكا هوسا دانا كو ب رۆژ بێینە دۆرێن وان و خوە چلی بكەین و بێ شەڕ خوە پاڤێژینە د ڕەبیێن ڕێزا ئێكێ دا. دەمژمێر سێ ‌و نیڤ بۆ چار هەر رەبیەكێ ‌شەش كەس بۆ هاتنە دەستنیشانكرن و مە خوە چلیكر و مە خوە هاڤێتە د رەبیان دا و مە گرتن. پاشی مە ئەو پشت خەتێ ‌ئێخستن و مە خوە گەهاندە جهێن دەستنیشانكری بۆ قۆناغا دووێ یا چالاكیێ.
پێشمەرگەیەكی خەلكێ وێرانشەهرا ئورفا ژی مە هەبوو ناڤێ وی خالد بوو، نوكەیێ ل ئەمریكا. مە ئەو ل گەل چەند هەڤالەكا دانابوونە سەر چەكێ دۆشكا ل جهێ كەفێتێریایێن حەجی مەشهودی یێن هنداڤی بابلو، كو هەم ل بارەگایێ لەشكری یێ زاویتە بدەت، دا لەشكر ژێ دەرنەكەڤیت و ل هەوارا بابلۆ بێت و هەم ژی نەهێلیت لەشكر ژ دهۆكێ ڤە ل ژێهەلیێ ئێمینكێ سەركەڤیت و د هەوارا هیزێن خوە بێت. وان ئەركێ خوە گەلەك ب باشی بجهئینا و نەهێلا دوژمن ل هەردوو جها ئێك پێنگاڤ ژی پێشڤە بهێت.
مە هێرشا خوە و قۆناغا دووێ یا چالاكیێ دەستپێكر. بەلێ مخابن هەڤالێ مە سالح ئەحمەد سیاری شەهید بوو. ئەز و شێخ عەلی، حوسنی كانیا باسكا، سەفەر سیاری، ئەمین گەڤەڕكی و مەجید سۆری، ئەم بریندار بوون. یا من گوللەیەك ب سینگێ ‌من كەفت بوو، دوو تبلا د سەر دلێ من دا و ل پشتا من دەركەفتبوو. هەڤالێن مە هەموو ئارمانجێن خوە گرتن و هاتن و ئەم ئەوێن بریندار ڕاكرین و ئیناینە پێدە.
د ڤێ چالاكیێ دا مە (56) كەس ژ دوژمنی دیلكرن. دیسان مەچە كەكێ گەلەك باش بدەست خوەڤە ئینا ژ وێرێ، ژ بلی (قناص، تۆپ و ئارپیچی و بیكەسی)، هەروەسا مە (109) كلاشینكوفێن قۆنتاخ ئاسن ژ وێرێ ئینان. جارا ئێكێ ‌بوو د دیرۆكا لژنا ناوچا شێخان دا، كو د ئێك چالاكی دا هەژمارەكا هندا مەزنا چەكی بدەست ڤە بینن. هەڤالان ئەم ب ترۆمبێلێن لەشكری ڤەگوهاستین، لێ بەرێن مەزن كەفتبوونە رێكێ ‌دا و ڕێك هاتبوو گرتن، ترۆمبێل نەدشیان دەرباز ببن. پیشمەرگە هەمی هاتن، دیل ژی هەمی ئینان و ب لیهازا ئەو بەر ڕاكرن و ئەم ب ئەوان ترۆمبێلان ڤەگوهاستینە گوندێ‌ (پێدە). دووڤدا بۆ گوندێن (بێنارینكێ‌ و پاشی چەمێ عەمەر و كانیا باسكا).
پشتی ڕەوشا من یا ساخلەمیێ ‌باشتر بووی هەڤالا ئەز برمە بارەگایێ‌ لقێ، ‌دكتوری گۆت: دڤێت تۆ بچیە ئیرانێ، چونكی مە تیشك و پشكنین نینن باشترە تۆ بچیە وەلاتێ ‌ئیرانێ.‌ ئەز و كاك عبدولعزیز تەیب و كاك ئەحمەد مكائیل و كۆمەكا پێشمەرگان، ئەم بڕێكەفتین هەتا دەڤەرا گەردی و مزووری ژووریان ئەم چووین، ژ وێرێ ‌وێڤە رێك نەبوو. شەڕێ‌خواكوڕكی دەستپێكر بوو و دوژمنی سنوور هەمی گرتبوو. ئەم نەچاربووین كو د ناڤا كوردستانا باكوور ڕا و ب قەچاغی و بهاریكاریا هندەك كەسان بچین. وان ئەم ب شەف دبرین و ب ڕۆژ ئەم دڤەشارتین، هەتا كو ئەم گەهشتینە ناڤ ‌ئیرانێ. ‌ئەم چووینە تەهران بۆ چارەسەریێ‌. ئەم ل تەهران بووین و هەوا ئەنفالان دەسپێكر. وی دەمی مالا مە ل دەڤەرێن ڕزگاركری بوو ل گەلیەكی ل ناڤبەرا زنارا كێستە و سنوورێ باكوور. وەكی هەمی خەلكێ ‌كوردستانێ، ئەو ژی ‌بەرەف (دیاربەكر) چوون و ل كەمپا دیاربەكرێ ئاكنجی بوون. ئەز ژی مامە ل رۆژهەلاتێ‌ كوردستانێ‌هەتا سالا 1990 و پشتی رەوشا من باش بوو و ساخلەمی یا من باشتر لێهاتی، ئێدی ب رێكێن قەچاغ ئەز ژی چوومە (دیاربكەر). هەتا ئەز گەهشتیمە وێرێ ‌‌مالا مە ب رێكا رێكخراوێن بیانی ناڤێن خوە نڤێسیبوون بۆ دەرڤە و ل دەسپێكا سالا 1992 ئەم پێكڤە چووینە وەلاتێ ‌سوێد.
كاك ڕزگار بەحسێ ژیانا پەنابەریێ ل سوێد دكەت و دبێژیت: پشتی ئەم گەهشتینە وی وەلاتی، چونكی من گەلەك حەز ل سەر فێربوونا زمانان هەیە، ئەز گەلەك زوی فێری زمانێ‌ (سوێدی) بووم. پاشی من ل وێرێ زانكۆ بەشێ بانك خواند و ل بانكەكێ ‌دەست ب كاربووم. دیسان دناڤ ژیانا كولتووری و ڕۆشنبیری ژی دا ئەم د چالاك بووین. مەكۆمەلا كەلتووری یا كوردستانی هەبوو ل وی باژێڕێ ئەم لێ. چەند سالان ئەز بەرپرسێ ‌كۆمەلێ‌ بووم و ساڵێن دی ژی ئەندامێ‌ كارگێریێ ‌كۆمەلا ناڤبری بووم. دیسان بۆ دەمێ سێ ساڵان مە گوڤارەك ژی بناڤێ پەیام، لگەل چەند هەڤالان دەرتێخست. لگەل هندێ ژی ‌من لگەل لژنا پارتی یا سوید و نووێنەریا حوكمەتا كوردستانێ ‌ژی كاردكر. نێزیكی(10) ساڵان ژی وەك كادرەكی چالاك من لگەل پارتیا سوسیال دیمۆكراتا سویدی كاركریە. سالا 2007 من بریاردا كو ب ئێكجاری ڤەگەڕمە كوردستانێ.
پشتی ڤەگەڕێ ژی وەك كارگێڕێ لقێ 18 یا پارتی، كارگێڕێ لقێ ئێكا پارتی و بەرپرسێ لژنا زانكۆیان ل دهۆكێ من كاركریە. ساڵا 2014 هەتا 2017 ژی من پشكداری د شەڕێ داعش و حەشدا وەحشی ژی دا كریە.
دیسان پشتی ئەز هاتیمە كوردستانێ ژی من چەند پەرتووكەك نڤیسینە و چاپكرینە، ژ وان ژی:
– سترانێن كۆماتەی – هەلبەست- 2011
– پێلێن خەریبیا تە- هەلبەست – 2018
– ل ژێر سیبەرا چیا- بەرگێ ئێكێ – بیرەوەری 2018
– ل ژێر سیبەرا چیا- بەرگێ دووێ- بیرەوەری 2021
– ئێك ژی من ژ عەرەبیێ وەرگێرایە سەر ڕێنڤیسا كوردی-لاتینی ساڵا 2015 چاپ بوویە
– دوو پەرتووك ژی ل بەردەستن بۆ نڤێسینێ
نوكەژی بەرپرسێ سەنتەرێ كۆماتەیێ دێكۆمەنتكرنا دیرووكا شوڕشێ مە.
ل دوماهیێ كاك ڕزگاری گۆت: پەیڤا من بۆ هەمی مللەتێ‌ مەیە. گەلەك گرنگە ئەم ل دیرۆكا خوە خودان دەركەڤین و ئەم شانازیێ ‌ب نەتەوا خوە بكەین و ئەم خوە ژ مللەت و خەلكێ ‌دی كێمتر نەبینین. ئەم ب كەلتور و زانینا خوە ژ مللەتێن دی كێمتر نین. بلا هەمی خەباتا مە بۆ هندێ بیت كو ئەم ژی وەكی ئەڤان وەلاتان ببینە دەولەت و ئالایێ كوردستانێ‌ دناڤا هەمی ئالایێن جیهانێ ‌بهەژیت.