بارزان، رەمەزان زەكەریا:

سالانە ل رۆژا ئێكی مەها ئادارێ ژ هەر سالەكێ‌، كو رۆژا مالئاڤاییا بارزانیێ‌ نەمرە، ب ڤێ‌ هەلكەفتێ‌ و ب مەرەما نووكرنا سۆز و پەیمانان جەماوەرێ‌ كوردستانێ‌ ب هەمی تەخ و چینێن خوەڤە قەستا بارزان و مەزارێ‌ نەمران دكەن و سۆز و پەیمانێن خوە بۆ رێبازا پیرۆزا بارزانیێ‌ نەمر نوو دكەن، ل رۆژا ئەینیا بۆری 1/3/2024 و ب هەلكەفتا 45 سالیا مالئاڤاییا بارزانیێ‌ نەمر، كو ل رۆژا 1/3/1979 مالئاڤایی كریە، جەماوەرەكێ‌ زۆر ل سەرانسەری كوردستانێ‌ قەستا بارزان و مەزارێ‌ نەمران كرن و سۆز و پەیمانێن خوە بۆ رێبازا پیرۆزا بارزانیێ‌ نەمر نوو كرن.
سالانە ل رۆژا ئێكی مەها ئادارێ تەخ و چینێن جۆدا ل سەر ئاستێ كوردستانێ و ئیراقێ سەردانا مەزارێ نەكران دكەن ل بارزان و ژ لایێ شێخ خەلات بارزانی، نوونەرێ سەرۆك بارزانی ل سەر مەزارێ نەمران دهێنە پێشوازیكرن.
ئەڤ سالە، كو هەڤدەم 45 سالە بارزانیێ‌ نەمر مالئاڤایی كری، هەژمارەكا زۆر یا جەماوەرێ كوردستانێ ل رۆژا ئێكی مەها ئادارێ سەردانا مەزارێ نەمران كر ل بارزان بۆ نووكرنا سۆز و پەیمانێن خوە بۆ رێبازا پیرۆزا بارزانیێ نەمر و كاك ئدریسێ هەردەم ساخ.

ئامێدیێ، مەحمود نهێلی:

ب بەرهەڤبوونا هیوا ئەحمەد، ئەندامێ مەكتەبا سیاسی یا پارتی و د. سالار عوسمان، بەرپرسێ پشكا رەوشەنبیری و ڕاگەهاندنا پارتی و بەرەڤان حەمدی، بەرپرسێ لقێ ١٨ و وارشین سەلمان، دەڤەردارێ ئامێدیێ و مالباتا شەهیدی و هەژمارەكا ڕەوشەنبیر و نڤیسەر و هونەرمەندان و ل ژێر درووشمێ (ئەنوەر مایی پیشەنگ ل شانۆیا نەورۆزێ)، ڕێورەسمەكێ ڕێزلێنانێ ل نڤیسەر و هۆزانڤان و پێشمەرگە، شەهید «مەلا ئەنوەر مایی» هولا پەروەردا ئامێدیێ هاتە گێڕان.
د. سالار عوسمان د پەیڤەكێ دا باس ل مێژوو و بزاڤا ڕەوشەنبیری یا كوردی و ڕۆلێ شەهید «مەلا ئەنوەر» كر و ئاشكرا كر، كو مەلا ئەنوەر مایی گەلەك پێش تەمەنێ خوە بوویە.
بەرەڤان حەمدی خەلاتێ رێزلێنانێ پێشكێشی مالباتێ كر و ژ لایێ مامۆستا مەعسوم مایی كورێ شەهید ئەنوەر مایی ڤە هاتە وەرگرتن.
هەر د ڤی رێورەسمی دا فلمەكێ دوكیۆمێنتاری ل سەر ژیان و خەباتا خودێ ژێرازی ئەنوەر مایی هاتە نیشادان و چەند پەیڤ هاتنە پێشكێشكرن.
نڤیسەر و هۆزانڤان و پێشمەرگە، شەهید «ئەنوەر شێخ محەمەد تاهر مایی» ل سالا ١٩١٣ێ ل گوندێ مایێ ل دەڤەرا بەرواریا ژ دایكبوویە و ل سالا ١٩٦٣ و ل سەردەمێ شۆڕەشا ئیلۆنێ شەهید بوویە.

هەولێر، قائید میرۆ:

بەرپرسەكێ وەزارەتا چاندنێ ئاشكرا كر، لیژنەیەكا هەڤپشك د ناڤبەرا هەرێم و بەغدا دا دێ هێتە پێكئینان بۆ وەرگرتنا بەرهەمێ گەنمێ جۆتیارێن هەرێما كوردستانێ و دبێژیت: ئەڤ سالە ل گورەی ئەردێ هاتیە چاندن گەنم دێ هێتە وەرگرتن.
كەریم سلێمان، بریكارێ وەزارەتا چاندنێ بۆ رۆژناما ئەڤرۆ دیار كر، سالا بۆری لیژنەیەكا هەڤپشك د ناڤبەرا هەرێم و بەغدا دا بۆ وەرگرتنا بەرهەمێ گەنمێ جۆتیاران هاتبوو پێكئینان و بڕیارە بۆ ئەڤ سالە ژی لیژنەیەكا هەڤپشك بهێتە پێكئینان و گۆت: «بڕیارە حەفتیا بهێت شاندەكێ وەزارەتا چاندنا حوكمەتا فیدڕالی یا ئیراقێ‌ سەرەدانا هەرێما كوردستانێ بكەت، لێ‌ بەری هاتنا شاندێ بەغدا وەزارەتا چاندنا هەرێما كوردستانێ بەرهەڤی دەستپێكرینە، داكو ئەڤ سالە ب پلانەكا باشتر كار بۆ ب بازاڕكرنا گەنمێ جۆتیاران بهێتە كرن، چونكی سالا بۆری ب تنێ 500 هزار تەنێن گەنمی ژ لایێ بەغداڤە هاتبوونە وەرگرتن».
كەریم سلێمان گوتژی: «ئەڤ سالە هندەك پیڤەرێن نوو بۆ وەرگرتنا گەنمێ جۆتیاران دێ هێنە دیاركرن، بەری نوكە ناڤێ هەموو جۆتیاران هاتیە تۆماركرن و ژ لایێ كۆمپانیەكا تایبەتمەند ڤە ئەردێ هاتیە چاندن دێ هێتە دیاركرن، چەند ئەرد ب گەنمی هاتبیتە چاندن دێ بیتە پیڤەر بۆ وەرگرتنا بەرهەمێ گەنمێ ئەڤ سالە و وەزارەتا چاندنێ ژی هەموو بزاڤەكێ دكەت وەرگرتنا گەنمی ل هەرێما كوردستانێ وەكی پارێزگەهێن دی یێن ئیراقێ بیت و جوداهی نەهێتە كرن».

هەولێر، قائید میرۆ:

پەیڤدارێ ئێكەتیا وەبەرهێنەرێن كوردستانێ ئاشكرا كر، ب تنێ ل پارێزگەها دهۆكێ 10 پڕۆژەیێن وەبەرهێنانێ یێن ئاكنیجبوونێ هاتینە ئاڤاكرن و بكڕ نینن و دبێژیت: بڕیارا راگرتنا پڕۆژەیێن ئاكنجیبوونێ دێ كاریگەری ل سەر بازاڕی هەبیت د مەهێن بهێن دا.
یاسین مەحموود، پەیڤدارێ ئێكەتیا وەبەرهێنەرێن كوردستانێ بۆ رۆژناما ئەڤرۆ دیار كر، بڕیارا راگرتنا مۆلەتێن پڕۆژەیێن ئاكنجیبوونێ ژ بۆی پێداچوونێ یە ب پڕۆژەیێن وەبەرهێنانێ و گۆت: «جڤاتا بلندا وەبەرهێنانێ و دەستەیا گشتیا وەبەرهێنانێ دێ ب هووری پێداچوونێ ب پڕۆژەیێن كەرتێ ئاكنجیبوونێ دا كەن و سەرمایێ وەبەرهێنەران دێ هێتە پاراستن، چونكی هەبوونا هەژمارەكا زۆرا یەكەیێن ئاكنجیبوونێ ماینە بێ بازاڕ».
یاسین مەحموود گۆتژی: «ل دهۆكێ 10 پڕۆژەیێن ئاكنجیبوونێ هەنە، لێ‌ كەس نینە شوققەیان بكڕیت، پڕۆژە هەیە ل دهۆكێ ژ هزار یەكەیان پێكهاتیە و 100 یەكە نەهاتینە فرۆتن، ئەڤێ چەندێ كاریگەری ل سەر بازاڕی كریە و سەرمایێ وەبەرهێنەران ژی كەفتیە د مەترسیێ دا، لەوڕا ئەم گەشبینین ل چەند مەهێن داهاتی دێ بڕیارا حوكمەتا هەرێما كوردستانێ كاریگەری ل سەر بازاڕی هەبیت و كەرتێ وەبەرهێنانێ دێ گەشەیەكا زۆر ب خوەڤە بینیت».

هەرهین محەمەد:

رێڤەبەرێ‌ ئاڤ و سولینان ل دهۆكێ‌ دیار كر، 95% سولینێن پارێزگەها دهۆكێ‌ هاتینە پاقژكرن و ئەڤە چەند بارانێن ب هێز بارین و چ ئاریشێن وەسا پەیدانەبووینە و تیمێن مە ژی بەردەوام د ئامادە باشیێ‌ دانە و 48 جه مە دەستنیشانكرینە ببوونە جهێ‌ ئاریشێ‌ و ئەو جه مە كرینە د پلانا خوە یا سالانە دا چ ب رێكا سەخبیریێ‌ بیت چ كارەكێ‌ سڤك بیت بهێنە چارەسەركرن.

یونس جانو، رێڤەبەرێ‌ ئاڤ و سولینان ل پارێزگەها دهۆكێ‌ بۆ رۆژنامەیا ئەڤرۆ گۆت: هەتا نوكە 95% سولینێن پارێزگەها دهۆكێ‌ هاتینە پاقژكرن، لەورا هندەك جاران ئاڤ ل جهەكی دپەنگیت، ب تنێ‌ ئەو گلێشێ‌ كەڤتیە ل سەر وەرگرێن ئاڤێ‌ رادكەین و ئاڤ رێكا خوە دبینیت، چونكو بەری نوكە ژی ئەو سولینە هاتینە پاقژكرن، وەكو ئەندەرپاسا كەی ئار ئو ل سالا 2018 ئەم گەلەك هاتینێ‌ پاقژ نە بوو، ژبەركو ل خوارێ‌ یا گرتی بوو، ل سالا 2021 مە تیمەك هنارتە وی جهی و پاقژكر و ڤەبوو، نوكە ب تنێ‌ ئەو گلێشێ‌ ل سەر دەرگەهێ‌ وان بهێتە راكرن ئاڤ رێكا خوە دكەت و دچیت.
ناڤهاتی زێدەتر ژی گۆت: ل دەمێ‌ باران بارینێ‌ دهۆك دهێتە دابەشكرن بۆ شەش زونا ژلایێ‌ پارێزگەهێ‌ ڤە و ئەو زونە دهێنە دابەشكرن دناڤبەرا هەردو باژێرڤانیان و ل گەل بەرەڤانیا باژێری و ل گەل رێڤەبەریا سولینان هەردو زونا تیمەكا مە ژێ‌ بەرپرسیارە، یان رێڤەبەریەكا مە ژێ‌ بەرپرسیارە و ڤان زونا هەر ئاریشەكا پەیدابوو مە كونترولێ‌ باژێری هەیە و مە هایداركەت بۆ هەر ئاریشەكا چێبیت دەملدەست تیمێن مە دگەهنە وێرێ‌ و بەردەوام تیمێن مە ل هەموو جهان دگەرن و هەر جهەكێ‌ ئاڤ لێ‌ راوەستیا بیت ڤەدكەن بەری باران بارینێ‌ و ئەو تیمێن مەداناین ئەم تیمەكێ‌ دانین وەكو نوبەدار ژ بۆ هەرئاریشەكا هەبیت، یان هەر تشتەكێ‌ ژ بن كونترولا وان ژی دەركەڤیت تەلەفونێن مە دڤەكرینە و ئێكسەر دێ‌ مە هایداركەن و تیمێن مە هەموو دئامادەباشیێ‌ دانە.
زێدەتر گۆت: هەر ل دەستپێكا من دەست ب كارگێریا ڤێ‌ رێڤەبەریێ‌ كری من 48 جه دەستنیشانكرن دبوونە جهێ‌ ئاریشێ‌ و ئەو جه د پلانا خوە یا سالانە دا چ ب رێكا سەخبیریێ‌ بیت چ كارەكێ‌ سڤك بیت مە چارەسەركرینە، وەكو جادەیا حەولی چارپێن مە نێزیكی چار پێنچ جه لێ‌ هەبوون مە چارەسەركرینە و بەری چەندەكێ‌ مە تێ‌ ئینایە دەر ئەم پرۆژەكی ل وێرێ‌ چێكەین وێ‌ ئاریشێ‌ بن بنبڕكەین و مە دیت یا پێدڤیە رسیڤەرەكی ل وێرێ‌ مەزنتر لێكەین و ئەو ئاریشە ب ئێكجاری چارەسەربیت، ژبەر كو جادەیا چالە و وەكو باژێر مە چ ئاریشێن وەسا نە هێلاینە ب تنێ‌ مە سێ‌ جه هەنە پێدڤی ب پرۆژنە كوژمەكێ‌ مەزن یێ‌ پارەی پێدڤێت و نوكە د پلانێ‌ دایە و ئەو پارێ‌ بەردەست هەبیت و ئەم وێژی چارەسەر بكەین.
خویاژی كر، ئەو ئاریشە بۆ خەلكی پەیدانەبن و ئەو بارانێن وەسا بهێن ژی مە چ ئاریشە نە هێلاینە و ل دووڤ شیانێن خوە، بەلێ‌ هەكە بارانەكا مەزن بهێت وەكو یا ل سالا 2019 هاتی ئاخ و بەر ژ چیایی ئینانە خوارێ‌ و ل تاخێ‌ رەزا مە ئوپن چەنەل پێ‌ دڤێن كو بهێنە چێكرن و ئەم ئەوێ‌ ئاڤێ‌ دەربازبكەین ل سەر رووبارێ‌ هشكەرووی بۆ وی كاری ژی كوژمەكێ‌ پارەی یێ‌ مەزن پێ‌ دڤێت، نێزیكی ملیارەكێ‌ و نوكە ژی ل بەردەست نینە و مە كریە د پلانا خوەدا و دیسان دڤێت ل بەروشكێ‌ دڤێت ئەم سندوقەكا مەزن چێكەین و وێ‌ ئاڤێ‌ دەربازكەین، چونكو ل سالا 2019ئاریشە لێ‌ پەیداببون و ئەو ژی كوژمەكێ‌ مەزن پێدڤێت نێزیكی 900 ملیونان و ئەو ژی د پلانا مەدایە و هەرگاڤا بوودجەك ل بەر دەست هەبوو ئەم دی َوێ‌ ئاریشێ‌ ژی چارەسەركەین و یا ماسیكێ‌ ژی خۆش بەختانە هاتیە چارەسەركرن و چەند جه ماینە ئەو ژی مە كرینە د پلانێ‌ دا، بەلێ‌ وەكو باژێر ئەڤە چەند باران هاتینە و چ ئاریشە پەیدانە بووینە.

ئەمیر ئەترووشی:

بۆ چاوانیا دەستووریا خاندنا پشكەكا فەرمانبەران، حوكمەتا هەرێما كوردستانێ بڕیارەكا نوو جێبەجێ كر و تەكەز كر: «ئەو كەسێن د ماوەكێ دەستنیشانكریدا باوەرنامێ ب دەست نائینن، درێژكرنا دەستووریا خواندنێ وان ڤەناگریت.

ل گۆرەی نڤیسارەكا جڤاتا وەزیرێن هەرێما كوردستانێ، ژ 13ێ2ێ 2024 دەرچوویە، ئاماژە ب چاوانیا سەرەدەریكرن دگەل دەستووریا خواندنا فەرمانبەران هاتیە كرن. د وێ‌ نڤیسارێدا هاتیە: «دەربارێ وان فەرمانبەرێن میلاكن و بۆ دەستڤەئینانا باوەرناما بەكالۆریۆسێ و كێمتر ژ وێ باوەرنامێ و داخازا دەستووریا خاندنێ دكەن، پێدڤییە ل دەمێ پێدانا دەستووریا خواندنێ بەڵێننامەكێ تژی بكەن.»
دەربارێ هوركاریێن وێ بەڵێننامێ، بۆ وەزارەت و فەرمانگەهان بەرچاڤكریە: «دڤێت سوزێ بدەن د ماوێ دەستنیشانكریدا باوەرنامێ ب دەستڤەبینن، بەروڤاژی، ل دەمێ دەرنەچوون بۆ هەر ساڵەكا خواندنێ، ئێكسەر ب فەرمانبەرێن سەرنەكەفتی دهێنە هژمارتن و ل سەر وێ بنەمایێ سەرەدەری دگەل وان دهێتە كرن.»

تەكەز ژی كر: «ئەو كەسێن د ماوەكێ دەستنیشانكریدا باوەرنامێ ب دەستڤە نائینن، درێژكرنا دەستووریا خاندنێ وان ڤەناگریت.» ل گۆر یاسایێ، وەزیرێ پەیوەندیدار ب رەزامەندییا وەزیرێ دارایی، دشێت دەستووریا خاندنێ ب مووچەیێ تمام بدەتە فەرمانبەران.
د.عەبدولحەكیم خەسرەو، سەرۆكێ فەرمانگەها هەماهەنگی و دووڤچوونا جڤاتا وەزیرێن كوردستانێ راگەهاند: «حوكمەتا هەرێما كوردستانێ فەرمانبەران هان ددەت بۆ دەستڤەئینانا باوەرنامێن بلند و گرنگیدان ب بلندكرنا شیانێن پیشەیی و ئەكادیمیێن وان، ئەو ژی ل گور پلانا پەسەندكری یا وەزارەتان.»
وەزارەتا دارایی، بۆ دەستووریا خواندنا فەرمانبەران چار رێنمایی هەنە ژ وان ژی رێنماییا هژمارە 19 یا سالا 2010، رێنماییا هژمارە 13 یا سالا 2014، رێنماییا هژمارە 11یا سالا 2016، دگەل رێنماییا 6 یا سالا 2018.