ب هەلكەفتا بۆرینا 72 سالان ل سەر دامەزراندنا ئێكەتیا ئافرەتێن كوردستانێ، دوهی رۆژا چارشەمبی 11/12/2024 د. عەلی تەتەر، پارێزگارێ دهۆكێ سەرا بارەگایێ ئێكەتیا ئافرەتێن كوردستانێ؛ ناڤەندا دهۆكێ دا و ژ لایێ خانم خەلات جەمال، بەرپرسا ناڤەندێ و كارگێر و ئەندامێن ناڤەندێ پێشوازی لێ هاتە كرن، دیسا هەر ب هەمان هەلكەفت چەندین چالاكیێن جودا ل سەر ئاستێ‌ پارێزگەها دهۆكێ‌ هاتنە كرن.
پارێزگارێ دهۆكێ 72 سالیا دامەزراندنا ئێكەتیا ئافرەتان ل تەڤایا ئافرەتێن كوردستانێ و پارێزگەها دهۆكێ پیرۆزكر و رۆلێ وان یێ گرنگ د هەموو بیاڤێن ژیانێ دا بلند هەلسەنگاند و پشتەڤانیا حكومەتا هەرێما كوردستانێ و پارێزگەها دهۆكێ بۆ ب دەستڤەئینانا هەموو مافێن ئافرەتان دیاركر و داخوازا خێر و خۆشیێ و سەركەفتنێ بۆ هەموو ئافرەتان كر.
دیسا هەر ب هەمان هەلكەفت مشیر محەمەد، دەڤەردارێ زاخۆ د پەیامەكێ دا پیرۆزباهی ل جڤاتا ئافرەتێن زاخۆ و سەرجەم ئافرەتێن فەرمانبەر كر و هیڤی خواستن ئافرەتێن كوردستانێ هەردەم د پیشەنگیێ دابن بۆ ب دەستڤەئینانا مافێن ئافرەتان.

د. عەلی تەتەر، پارێزگارێ دهۆكێ و ب ئامادەبوونا خەلیل مەحمود، دەڤەردارێ سێمێلێ، دوهی 11/12/2024 شعبان خەلیل، وەكو رێڤەبەرێ ناوچەداریا تەناهی و سامی ئوشانە، وەكو رێڤەبەرێ ناوچەداریا مسێریكی دانان.
پارێزگارێ دهۆكێ پیرۆزباهی ل هەردو رێڤەبەران و خەلكێ ناوچەداریێن تەناهی و مسێریكێ كر و دوپاتكر، كو هەردو ناوچەداریێن نوو ژ لایێ كابینەیا نەهێ یا حكومەتا هەرێما كوردستانێ ڤە هاتینە ئاڤاكرن، ژ بۆ وێ یەكێ خزمەتا خەلكێ هەردو ناوچەداریان باشتر و ب ساناهیتر بهێتە كرن و پشتەڤانیا حكومەتا هەرێما كوردستانێ و پارێزگەها دهۆكێ بۆ هەر هاریكاریەكێ‌ دیاركر.

ئامێدیێ‌، مەحمود نهێلی:

ژ ئەگەرێ بۆردومانا بەردەوام و شەر و ئالۆزیێن د ناڤبەرا لەشكرێ توركیا و پەكەكێ دا خەلكێ چار گوندێن دەڤەرا نهێلێ زارۆكێن خوە نەهنارتنە قوتابخانەیێ و دەوام ل هەردو قوتابخانەیێن گوندێ بەرچێ ل دەڤەرا نهێلێ هاتە ڕاگرتن.
ئاكنجیەكێ گوندێ بەرچێ بۆ رۆژناما ئەڤرۆ دیار كر، دوهی 11/12/2024 دو رۆكێت ب گوندێ وان كەفتینە، ئێك ژ وان بەر مالا وی كەفتیە، لێ‌ چو زیانێن گیانی نەبووینە و گۆت: «هەر دوهی دو درۆن ل وێ دەڤەرێ كەفتینە خوارێ و ئێك ژی ب بنگەهەكێ لەشكرێ توركیا كەفت، دەمێ بەرسڤدانا درۆنان ژی گوللەیێن دوشكێ ب دەوروبەرێن گوندی كەفتینە».
ولاتیەكی دی یێ گوندێ سەرگەلێ بۆ رۆژناما ئەڤرۆ دیار كر، ئەو نەشیاینە زارۆیێن خوە بهنێرنە قوتابخانەیێ، ژ بەر كو ئەو ژ سەلامەتیا زارۆیێن خوە د پشتڕاست نینن و گۆت: «ئەم د بەرهەڤ نینین زارۆیێن خوە فرێكەینە قوتابخانەیێ، هەتا ل گەل لایەنێن پەیەندیدار نەروینینە خوارێ و ئەڤ رەوشە ئارام دبیت، دیسا ل گوندێ مە قوتابخانەیا بنەرەتی هەیە، لێ ئامادەیی ل گوندێ بەرچیە قوتابیێن مە دچنە وی گوندی و رۆژانە گوللەیێن دوشكا و یێن تۆپا ب وی گوندی ژی دكەڤن».
بۆ زانین، ل گوندێ بەرچی قوتابخانەیەكا بنەرەتی و ئێكا ئامادەیی هەیە، قوتابیێن ئامادەیی یێن چار گوندێن دەڤەرا نهێلێ بۆ خواندنا ئامادەیی دچنە گوندێ بەرچی.

سێمێل، موسا خالد:

ب هەلكەفتا هاتنا ڕۆژی و جەژنا ئێزی یا ئێزدیان، هەوەكا هاریكاریێن مرۆڤی ل كۆمەلگەها شاریا دەستپێكر.
بنگەهێ لالش تایێ شاریا ب هەڤكاری و پشتەڤانیا كەنیسەیا زاخۆ و قەشە فچیل و دانیال، هاریكاریێن مرۆڤی ل سەر 200 خێزانێن كێم دەرامەت یێن ئاوارەیێن شنگالێ، خوەجهێن كۆمەلگەها شاریا، رزگاربوویێن دەستێ داعشێ‌ و زاڕۆكێن بێ سەمیان بەلاڤكرن
ئەو هاریكاریە پێكهاتبوون ژ ئاهێن خوارنێ یێن جۆراوجۆر وەكو: «برنج، زەیت، فاسولی، شیر، تۆڤ چای، رژدە و شەكر» وەكو نەریتەكێ سالانە بنگەهێ لالش تایێ شاریا ل پێشییا هەموو جەژن و هەلكەفتێن ئێزدیان ب هاریكاریكرنا خێزانێن كێم دەرامەت رادبیت.

دهۆك، لەزگین جوقی:

بەرپرسێ تەكنیكی ل رێڤەبەریا سەخبێری و پاراستنا رێك و پران ل پارێزگەها دهۆكێ بۆ رۆژناما ئەڤرۆ دیاركر، ئەڤ سالە 45 پڕۆژە د وارێ چێكرنا جاددەیان هاتینە بجهئێنان.
هەڤال عەلی، بەرپرسێ تەكنیكی ل رێڤەبەریا سەخبێری و پاراستنا رێك و پران ل پارێزگەها دهۆكێ ئاشكرا كر، حكومەتا هەرێما كوردستانێ ئەڤ سالە گەلەك گرنگی ب چێكرنا جاددەیان ل هەمی دەڤەران دایە و گۆت: «ئەڤ سالە ل سەر بودجەیا حكومەتا هەرێما كوردستانێ ب گوژمێ 11 ملیار و 210 ملیۆن دیناران 45 پڕۆژە د وارێ رێك و پران دا ل دهۆكێ هاتینە بجهئینان، هندەك ژ وان پڕۆژەیان كەڤتینە د خزمەتا خەلكی دا و هندەك پڕۆژە ژی ل ژێر چێكرنێ دانە».
گۆتژی: «ل سەر پێشینەیا مەهانە ژی ئەڤ سالە گەلەك جاددەیێن دهۆكێ هاتینە سەخبێركرن و بەردەوام جاددە ل هەمی دەڤەران دهێنە چێكرن و سەخبێركرن».