سەگڤان ئەحمەد/ زاخۆ
بۆ مە داستانی
چ خوەش سترانی
تو پر ڕامانی
تو مینا كانی
تو پر زاراڤی
تو ڕۆژ و تاڤی
ڕۆناهی وچاڤی
تو پەیڤا خانی
خوەشك و ڕندی
تو دەولەمەندی
شەكر و قەندی
هنگڤین و شانی
تویی پر بها
ل هەمی جها
ل بەرێ و نها
ئەشق و ڤیانی
گەلەك كەڤناری
دەریا و ڕویباری
بۆ مە دیاری
ژ دەڤ یەزدانی
تو پر دەڤۆكی
مێژوو و دیرۆكی
هزر و بیرۆكی
بها گرانی
ب تە یێ شادم
ئەز تە بەرنادم
چجار تە نادم
ب یێ بیانی
ب تە سەربلندین
چونكو ئەم كوردین
دەستا بەرنادین
ژ ڤی زمانی.
ئەدیب عەبدولا
نە ل ژیانێ تێر دبم ، نە ژی ژ مرنێ د ترسم.
***
گەر ئارمانجا تە شكاندنا من بیت, پشتراست بە دێ تە ب راستیێن تە شەرمزاركەم.
***
گەر دەولەمەندا هەست ب ئازارێن هەژارا كربا دا هەر مینن دەولەمەند.
***
دەمێ بەختەوەری د دەستێ زالما دا بیت, نەشێن تاییا خۆ بدەنە مرۆڤی دێ چەوا شێن مرۆڤی ئارام كەن.
***
دناڤبەرا من و تە دا بتنێ ئەز وتو نە, نە با هەیە و نە هەناسە.
***
دەمێ ب پیا دچوو دزانی دێ پێنگاڤان بۆ كیڤە هاڤێت, دەمێ لسەر دەستا دبر نە دزانی دێ بوو كیڤە بەن.
***
سمائیلێ حەداد دگۆت: خاتینەكێ ئەز وەسا تێگەهاندم, دێ دەمەك هێت پارچەیێن هەر هەمی مرۆڤان ببەنە بەر ئێك مرۆڤەكێ مرۆڤ ژێ چێنابیت.
***
ئەز و بتنێ ئەز, من شولە ب «ئەم» نینە.
***
وەرن دا پێكڤە ئەزمانێ ژنا فەساد, گوهێ زەلامێ نە گوهدار ببڕین, دا چ خەلاتا نەبەم.
***
وی دگۆت: هەست ب هەناسا مرییان دكەم, قیژیێن زیندییان نا بهیسی.
نالین ئەدیب
وەكی هەر جار پێنووسێ خۆ رادكەمە سەمایێ و پەیاسان دناڤ پەیڤان دا دكەم, دگەل دەنگێ بارانێ هزر دنڤیسینێ دا دكەم و كا ئەو چ پەیڤن ناخێ من د هەژینیت داكو دەربرینێ ب هندێ بكەم و د پەرتووكا رۆژانێن خۆ دا دەربكەم.
خەیالن د هزرێ دا دهێنە ئاڤراندن, دیتنەكە مرۆڤی بەرەڤ سەمتەكا نەدیار ڤە دبەت, پرسیار دكەن ئەو كیژان كەسە هزرێن تە بەرەڤ خۆ ڤە مژیل كری, كیە هندە لێ ئاشق بووی, دێ كی بیت ب ئێكەم دیتنا وی هزر د هەبوونا وی دا كەی.
ئەز دێ بێژم ..
هزر د وی دەمی دا دكەم یێ كو بۆ ئێكەمین جار من تو دیتی, دیتنا تە یا ژ نیشكەكێڤە, دیتنەك بوو كو ب هەمی ژیانا خۆ شاد كری.
تە ب هەبوونا خۆ گەردوونەك پێشكێشی من كر..
ب هاتنا خۆ گڕنژین ئێخستیە سەر دێمێ من..
تو كەڤالەك بووی یا من ب هەمی عەشق و ڤیان ڤە وێنەكری..
چیڤانۆكەك بووی یا من د شەڤێن وەستیای و درێژ دا ڤەهاندی..
عەشقەك بووی یا من ددلێ خۆ یێ ژار دا حەواندی..
دیدارەك بوو كو ب ئێكەم پێنگاڤا خۆ بەرەڤ وی چاخێ ئەز لێ هەمبێزكریم د دەفتەرا رۆژانێن خۆ دا توماركری.
دیدار، سالار محەمەد دۆسكی
3-4
هەمان خانم ئەو ژی گۆت: ل هەوا ئەنفالێ زەلامێ من ل گەل بابێ خوە چووبوو كاری وی دەمی دەستیردان وەرگرت بوو و بۆ دەمێ فراڤینێ هاتە مال و من گۆتێ تەهاش كاودانا هەیە و خەلكی هەمیێ گوند بەردا و تو نەهاتی و دایك و بابێن وی ل بەر تەرش و كەوالی بوون ل بەر بانگا و برایێ وی ژی ل مال نەبوو و چەند مرۆڤێن دانعەمر مابوون ل گوندی، ماوەكی ل گەل هەڤژینێ خوە چوومە شكەفتەكێ و گەلەك یا بترس بوو و من گۆتێ ئەز نەوێرم ل ڤێرەبم و مالا تیێ من ژی لبن مەدابوون هەر ل وێرێ و ماوێ بیست رۆژا مامە ل وێرێ و هەر من گۆتێ سەبرا من ناهێت و زەلامێ من ئەو ژی چاڤەرێی بریارەكێ بوون و ئەو ماوەك بوو ل بامەرنێ بوون دووڤ دا بۆ رەڤ ئەم چووینە نەهالا (لەیلانێ) رێكخراوەكا حزبی رێكێ دا بوو و نەهێلا خەلكێ گوندێ (زێوێ) دەربازبن و گۆتن هەوە خێرە و سەرانسەری كوردستانێ یا گرتیە و كەسەك نە رەڤی یە دووڤ دا زەلامێ من ل گەل (حەجیێ) موختار هاتن و گۆت ئەڤە چ هێزە ناهێلیت هوون دەربازبن و گۆتە وێ رێكخراوێ چیە هنگ زانن و ئەم نوزانین دڤێت تشتەكی بدورستی بێژنە مە چونكە خێزانێن ل گەل مە وی دەمی بەرپرسێ وێ رێكخراوێ گۆتی ئەف دەمژمێرە بۆ هەوە ب گەلەكێ یە و دەمژمێرە بۆ هەوە ب سالەكێ یە و زەلامێ من گۆتێ بۆچی هوون ناهێلان ئەف خەلكە بچیت و ئەم هاتینە نیڤیا رێكێ و هاتنا لەشكرێ ئیراقێ ل گەل چەتان ژ مانگێشكێ دەسپێكێ و ژ لایەكی ڤە هێزا لەشكری و چەكدار بەرەف خەلكی ڤە هاتن وەك رۆژا قیامەتێ لێ هات، دەردورێن مە هەمی هاتنە گرتن ژ لەشكری و خەلك راوستیا و ئێدی كەسەك نەشیا ب جهەكی ڤە بچیت و چەتا گۆتن هەرن دناڤا ئەڤان كەڤرا دا خوە ئاسێ بكەن هەتا كادێ چلێ هێت چونكە ب چ جهان ڤە هوون نەشێن ب رەڤن، ئینا زەلامان بریاردا كو هەمی خێزان و زارۆك و كەسانێن دانعەمر پێكڤە ژووردا بچنە خوار و دناڤا لەشكەری دا و زەلام و كەسانێن گەنج بمینە دناڤا چیایی دا كا دێ چ بریار ل سەر هێتەدان و هندەك پیرەمێرا پاتەكێ سپی ب دارەكی ڤەكرن و بەرا مە ژن و زارۆكا كەفتن و هێدی هێدی هاتنە خوار و بەرەف لەشكرێ ئیراقێ ڤە هاتن هنداف(هەسن پیركا) و هەمی خێزان هاتنە وێ دەڤەرێ و لەشكەرێ ئیراقێ چنەكر و پیرمێرا هندەك بەرەف تەرش و كەال و هێسترن خوە چوون و ئەم هەتا ئێڤاری ماین و (مختار) زەلامەك هاتنە دەف مە و من گۆتێ زەلامێ مە ل دەف هەوەیە گۆت بەلێ من گۆتێ ئەژی دێ هێمە دەف زەلامێ خوە و تیێ خوە و چووینە سەر دەریایە و ئەم بووینە و نیڤیا شەڤێ موختاری گۆت رابنە ڤە و رەنگە فرۆكە بیت وی دەمی خەلكێ برسی بوو و هندەك زەلام بەرەف ئاڤێ چوون و ئاڤەكا پیس بوو و نەچار بووین ئاڤێ ڤە خوین و ئەو دو رۆژ بوو مە خوارن نەخواری و كچا موختاری هندەك گرار چێكر و ئێكسەر فرۆكە هاتنە هنداف و خوارن بۆ لەشكری ئینا و ئەم وێ رۆژێ ماینە وێرێ و بێ دەنگی دەرباز بوو و خەلكی گۆتن دێ چینە سەر مالێن خوە و بەری سپێدێ گەهشتین و دووڤ دا گازیكرن كو لەشكری ئەم دەردور گرتینە و جارەكا هەڤژینێ من جانتێ خوە تژی نان كر و گۆت خوە رادەستی حوكمەتێ ناكەم و دێ چمە چیایی و هندی فیشەكێن من مابن دێ شەری كەم و هەتا شەهید دبم و موختاری گۆت ئەژی دێ هێم و من گەلەك خواست ل گەل بچم و ئەوی گۆت نوزانم دێ یێ ساخ بم ئان دێ كەڤمە دەستێ حوكمەتێ و من نەڤێت تە ل پێش چاڤێن من ببن و هەرە گەردەنا تە ئازا بیت و ل گەل ژن و زارۆكان بە و من نەڤێت تو ل گەل مە بی و هەتا دووماهیێ ئەم دێ شەری كەین و شەرێ مان و نەمانێ، هەمان دەم گۆتە برایێ خوە دێ ل گەل من هێی یان نە برایێ وی یێ دو دل بوو و گۆت هندی فیشەك فن هەبن دێ شەری كەم و هەتا فیشكا دووماهیێ دێ خوە كوژم و خوە رادەستی دوژمنی ناكەم، وی دەمی برایێ وی ژی بریار دا ل گەل برایێ خوە بچیتە چیایی و سەنگەرێ دوژمنی بگریت و دووڤ دا ئەم هەمی خێزان ل گەل زارۆكان و مرۆڤێن دانعەمر بەرەف گوندی هاتین و من گەلەك كرە گری چونكە من هزر دكر دووماهی رۆژە ئەز و زەلامێ خوە ئێك دو بینین و زەلامێ من ئاخفتنێن وی دیار بوو كو دێ شەری كەت و ب چ رەنگان خوە رادەستی دوژمنی ناكەت و ئێدی من هزر كر كو دێ رۆژەكا رەش ب سەر مەدا هێت چونكە وی دەمی من زارۆك نەبوون و یا بتنێ بوو دناڤا ئەوان خێزانان دا و گەلەك هزر و بیر من دكرن، وی لەشكری ئەف هەمی خێزانە ب زارۆك و كەسانێن دانعەمر ڤە ل ترۆمبێلان سووار كرن و ئێكسەر رەوانەی (ئێنشكێ) كرین و هەمان دەم زەلام ژی ل گەل مەبوون و بیرا من دهێت ئەز بوومە ئەگەر گەلەك زەلام ژ مرنێ قورتال بوون چونكە بەری بچینە ناف لەشكەری گەلەك زەلامێن ئەوا خێزانا داهێن و پرسیارا هەڤژینێ من كەن و من گۆتێ چوو چیایی و بتنێ مایمە ل ڤێرێ و ئەو ی بریاردایە خوە رادەستی حوكمەتێ نەكەت و شەری بكەت هەتا دووماهی فیشكەك خوە بكوژیت وی دەمی ئەوا زەلامان ژی بریاردان بچنە چیایی و بگەهنە زەلامێ من و هەر زەلامەكێ چوویە چیایی بۆ پاراستنا گیانێ وی باشتر بوو دناڤا خێزان و زارۆكان دا بیت و هەتا (10) زەلامان چوونە چیایی و ئەز بوومە ئەگەرێ ساخ بوونا وان و هەتا نوكە ئەو زەلام بوومن دوعا دكەن و پشتی ئەم كومكرینە سەر ئێك دووڤ دا ب ترۆمبێلێن لەشكەری ئەم هەمی گەهاندینە كەلها نزاركێ و ئەم ب شەڤ گەهشتین و قێریێن ژنانە و گریا زارۆكانە و رۆژا قیامەتێ یە و هەمیێ دكەنە گری و جهەكێ پیس و بهێنا پیس ئەم خارین و جهێ روینشتنا خوە مە پێ خوە دایێ هەتا ئەم شیاین پیچەكێ روونە خوارێ.
دوهی ل باژێرێ سه‌لاحه‌دین ل هه‌ولێرا پایته‌خت سه‌رۆك مه‌سعود بارزانی پێشوازییا عه‌دنان درجال سه‌رۆكێ فیدراسیۆنا ته‌پا پێی یا ئیراقێ و شاندێ دگه‌ل دا كر ئه‌وێن ب مه‌ره‌ما گه‌هاندنا په‌یاما سه‌ره‌خوه‌شیێ پشكداری د به‌هیا خانم زه‌كیا مسته‌فا بارزانی خویشكا سه‌رۆك بارزانی كربوو.
د ڤێ سه‌ره‌دانێ دا عه‌دنان درجال دگه‌ل شاندێ فیدراسیۆنا فوتبۆلا ئیراقێ پرسه و هه‌ڤخه‌میا خوه گه‌هاندنه سه‌رۆك بارزانی و هیڤی خواستن جهێ ره‌حمه‌تی ل به‌هه‌شتا به‌رین شادبكه‌ت و سه‌بر و هه‌دارێ بده‌ته مالباتا وان.
زاخۆ،عەلی حاجی :
د داخویانیەکێ دا ئەندامێ کارگێریا یانه‌یا زاخۆ بۆ رۆژنامه‌یا ئەڤرۆ دیار کر گوهۆڕینێن تیما وان ئەگەرێن سەرکەڤتنێن بەردەوامن و ئەو دێ شەڕێ دەستڤە ئینانا سێ خالێن یاریێ كه‌ن.
زێدەتر دلژار عەدنان گۆت: پشتی وان گوهۆڕینێن دناڤ تیما مه یا پشکدار د خولا ستێرێن ئیراقێ یا فوتبۆلێ دا هاتینه‌كرن ژ روویێ ئاست و ئەنجامان ڤە باشتر بوویه، ژ سەرجەمێ چار یاریان شیاینە ١٠ خالان ب دەستخوەڤە بینن، گوهۆڕینا هاریکارێ ڕاهێنەری و ڕاهێنەرێ شیانێن جەستەیی یا باشبوو ب تایبەتی ژ روویێ دروستکرنا هەماهەنگیێ دناڤبەرا یاریزانان دا و باشترکرنا شیانێن جەستەیا یاریزانان، مە یاریزانێن خودان شیان هەنە لێ پێدڤی ب دەمی هەبوو هەتا کو بکەڤیتە سەر ڕێیەکا دروست و ئاست جێگیر ببیت، ب هاتنا سێ یاریزانێن هێلا پێشیێ رێژەیا گولان باشتر بوو و یاریزانێن مە شیان وێ بوشاهیێ تژی بکەن، مە باوەری ب تیما خوە هەیە کو دێ شێن ئاستەکێ باشتر پێشکێش کەن.
ناڤبری دیاركر یاریزانێن وان ئەمجەد و ئەحمەدی گیانه‌كێ باش دناڤ تیمێ دا دروست کرینە و چو کێشە ژی دناڤ تیما مە دا نینن و هەڤالینی و پەیوەندییەکا باش دناڤ تیمێ دا هەیە و گۆت: هەمی پێدڤیێن تیمێ بەرهەڤن و مووچەیێ وان دهێتە دان، مە سەرکەڤتن بەرامبەر زەورا دڤێت ژبەرکو مە دڤێت ئەنجامێن خوە یێن باش د یاریگەها خوە دا ڤەگەرینن، د ئەڤ سالە دا د یاریگەها خوە دا مە بتنێ دو سەرکەڤتن تومار کرینە و مە دڤێت ئەنجامێن باش ڤەگەرینن و جەماوەرێ مە ژی هەمی ئامادەکاری کرینە بۆ هندێ ب باشترین شێوە یاریێ بەرامبەر زەورا ئەنجام بدەین و روویەکێ جوان ژی نیشا ئیراقێ بدەین.
قەیس وەیس:
ب پشكدارییا یانەیا گارە و سێ یانەیێن هەرێمێ و ئیراقێ بۆ ژیێن جودا دوهی دەست ب هەڤڕكیێن قارەمانییا یانەیێن عەرەبی بۆ یارییا تیكۆنجتسۆ والسكی دا كر ئەوا دێ ب حەفت رۆژا پایتەختێ مسرێ قاهیرە مێڤاندارییا وێ كەت.
فیدراسیۆنا تیكۆنجتسۆ والسكی یا ئیراقێ د راگەهاندنەكێ دیار كر 39 كەس دناڤبەرا راهێنەر، یاریزان و كارگێرێ چار یانەیێن هەرێمێ و ئیراقێ كەفتینە د هەڤڕكیێن قارەمانییا عەرەبی یا دویێ یا ڤەكری ئەوا دێ یاریێن وێ هەتا سێیی ئادارا بهێت ل قاهیرە پایتەختێ مسرێ بەردەوامبیت و دیار كر ئەو هەر چار یانەیێن دێ نوونەراتییا ئیراقێ كەن ئەو ژی، یانەیا گارە ل سەر ئاستێ پێشكەفتیان، یانەیا شنگال ل سەر ئاستێ تازەپێگەهشتییان، یانەیا تلسقۆف ل سەر ئاستێ كچان یێن لاوان و یانەیا ئەلمستەقبل الموشرق ل سەر ئاستێ لاوان.
ل دۆر پشكدارییا نوونەرا پارێزگەها دهۆكێ شێروان بەشار سەرۆكێ یانەیا گارە بۆ رۆژنامەیا ئەڤرۆ گۆت: تیما مە دێ ب پشكدارییا پێنج یاریزان كوڕ و كچ و دو راهێنەرێ تیمێ بیت، ژبەر ئەگەرەكێ تایبەت یێ ب دووماهی هاتنا ژڤانێ پاسپۆرتێ نە چاربووم وەكو سەرۆك شاند پشكداریێ نەكەم، لێ مە پشتەڤانییا خوە بۆ تیمێ دیاركرییە و گەشبینن دێ ناڤێ یانەیا مە و كوردستانێ و ئیراقێ بلند كەن، ل دووڤ پێزانینان دبیت هەڤڕكیێن بهێز هەبن لێ وەكو تیم بەرهەڤیێن باش كریینە ب هیڤییا دەستكەفتێن باش.
شڤان لەزگین دادڤانێ كورد و خەلكێ پارێزگەها دهۆكێ و خودانێ شارا نێڤدەولەتی ماستەرز بۆ یارییا تایكۆاندۆیێ ب ناسناڤێ باشترین دادڤان د قارەمانییا ئاسیا بۆ یانەیان ل سەر ئاستێ كوڕان و كچان هاتە ژلایێ فیدارسیۆنا تایكۆاندۆیا ئاسیا هاتە خەلاتكرن.
ل دۆر ڤێ یەكێ دادڤانێ ناڤهاتی و كوڕێ باژێرێ سێمێلێ بۆ رۆژنامەیا ئەڤرۆ گۆت: ب شانازی ڤە وەكو ئێكەم دادڤانێ كورد ل سەر ئاستێ ئاسیا و قارەمانیێن فەرمی ناسناڤێ باشترین دادڤان ب دەستڤە بینم پشتی من شیایی ب سەركەفتیانە و ل دووڤ رێنما و یاسایا نێڤدەولەتی یا یاریێ هەڤڕكیێن قارەمانییا یانەیێن ئاسیا بڕێڤە ببەت ئەوا ب پشكدارییا 50 یاریزانێن كچ و كوڕ ژ 15 یانەیان و هەمان هژمارەیا وەلاتێن ئاسیا پشكدار كری، د ماوەیێ هەڤڕكییان دا د قۆناغا ئێكێ دا شیام 20 یارییان بڕێڤە ببەت دووڤدا لژنەیا دادڤانان پشت بەستن ل سەر من كر و د قۆناغا یاریێن دووماهیێ دا كو هەڤڕكی بۆ هەشت كێشان هاتبوو كرن ئەز سێ یێن فینالێ برێڤەبم.
هەروەسان ناڤهاتی گۆت: پێخوەشحالم وەكو دادڤانەكێ كورد و هەرێما كوردستانێ د رێزبەندییا دادڤانێن نیڤدەولەتی بم و گرێدای فیدراسیۆنا ئاسیا و جیهانێ یا یارییا تایكۆاندۆیێ مە و د نێزیك ژی دا باوەری بۆ من بهێتە دان وەكو دادڤانەكێ باوەرپێكری هەر قارەمانیەكا نێڤدەولەتی یا فەرمی بهێمە راسپاردن.
ل دووماهیێ شڤان لەزگین گۆت: سۆپاسییا هەر لایەنەكێ پشتەڤانییا من كری وەكو كوڕەكێ پارێزگەها دهۆكێ بشێم ب سەرفەرازی یاریێن ئاسیا و عەرەبی برێڤەببەم و گەشبینم د نێزیكترین دەم دا دێ قارەمانیێن نێڤدەولەتی ژی بڕێڤەبەم.
ل سەر ئاستێ وەرزشا جیهانێ گەلەك تیم هەبووینە پشتی تۆماركرنا زێدەتری دو گۆلان یان هزركرییە ئەو سەركەفتینە یان ژی بێ هیڤی بوون بۆ پەیدابوویە ژ سەركەفتنێ، لێ بەرۆڤاژی تیم ژی هەبووینە بێ ئۆمێد نەبووینە هەتا دووماهی خولەك شەڕێ سەركەفتنێ كرینە و شیاینە پاشكەفتنا خوە یان خوسارەتییا یارییەكێ قەرەبوو بكەن و سەركەفتنێ بینن، پرانییا یارییان گەلەك جاران د یاریێن فوتبۆلێ دا دهێنە دیتن، هەرچەندە ب سەدەهان یاری هەنە ل جیهانێ ریمۆنتادا هاتینە تۆماركرن لێ گرنگترین یاریێن ل سەر ئاستێ قارەمانیێن نێڤدەولەتی و جەماوەری سەرسۆرمان كرییە بڤی رەنگی بووینە.
دیپۆرتیڤۆ لاكارۆنیا دگەل میلان
ل وەرزێ 2004ێ یارییا پێش دووماهییا چامپیۆنز لیگا دا د ناڤبەرا دیپۆرتیڤۆ لاكارۆنیا یا ئیسپانی و میلان یا ئیتالی دا، د یارییا ئێكێ دا د ناڤ یاریگەها خوە دا میلان شیابوو ب چار گۆلان بێ بەرانبەر سەركەفتنێ ل سەر دیپۆرتیڤۆ بینیت، لێ د یارییا دویێ دا ل ئسپانیا دیپۆرتیڤۆ شیا پێنج گۆلان بێ بەرانبەر سەركەڤیت و دەربازبیتە یارییا دووماهیێ و دو گۆلێن وێ د خولەكێن دووماهیێ دا بوون.
ئارسنال دگەل ریدینگ
د قارەمانییا كۆپا ئنگلتەرایێ دا ل سالا 2012 و چارچووڤەیێ قۆناغا 16ێ یانەیا ئارسنال د نیڤا ئێكێ دا ب چار گۆلان بەرانبەر گۆلەكێ یا پاشكەفتی بوو بەرانبەر ریدینگ، د نیڤا دویێ دا یاری ب 4-4 ب دووماهی هات و گۆلا وەكهەڤیێ د خولەكێن كۆژەك دا هاتبوو كرن، د دەمێ زێدەكری دا یاری ب 7-5 ب سەركەفتنا ئارسنال ب دووماهی هات.
تۆتنهام دژی مانچستەر یۆنایتد
ل سالا 2001ێ یارییا د ناڤبەرا مانچستەر ستی و تۆتنهامێ د خولا ئنگلتەرایێ دا بوو، مان یۆنایتد د نیڤا ئێكێ دا ب سێ گۆلان تووشی خوسارەتیێ بوو، لێ د نیڤا دویێ دا مانچستەر ب هێز ڤەگەرییا و شیا ریمۆنتادا تۆماربكەت ب5-3 گۆلان و یاریێ ب سەركەفتنا خوە ب دووماهی بینت.
ئەلمانییا رۆژئاڤا و هنگاریا
د چارچووڤەیێ مۆندیالا جیهانی 1954ێ دا د یارییا ئێكێ دا ژ كۆما دویێ ئەلمانییا 8-3 تووشی خوسارەتیەكا مەزن بوو، لێ دڤێ مۆندیالێ دا ئەلمانییا تۆلێن خوە ڤەكرن و ریمۆنتادا ئینا، پشتی د یارییا دووماهیێ دا دو گۆلان ب چنە یا پاشكەفتی بوو شیا ب 3-2 گۆلان سەركەفتنێ بینت و ناسناڤێ مۆندیالێ ژی ب دەستڤە بینت.
پۆرتۆگال دژی كوریا باكۆر د مۆندیالا 1966ێ دا هەلبژارتیێ كوریا باكۆر سۆپرایزا قارەمانیێ بوو و دەربازبوو قۆناغا هەشتێ و شیا د نیڤا ئێكێ ب سێ گۆلان بێ بەرانبەر سەركەفتن ل سەر پۆرتۆگال بینت، لێ د نیڤا دویێ دا پۆرتۆگالێ ب پێنج گۆلان ریمۆنتادا تۆماركر ژ وانا چار گۆلێن سۆپەر هاتریك یێ هێرشبەرێ وان یۆزیبیۆ ئەوێ ب نەهـ گۆلان بوویە گۆلكەرێ قارەمانیێ.
لیڤەرپۆل بەرانبەر بەرشەلۆنا
د وەرزێ 2018-2019 یێ چامپیۆنز لیگایێ دا ژ چارچووڤەیێ قۆناغا پێش دووماهیێ دا بەرشەلۆنا یا ئسپانی شیابوو ل یاریگەها خوە دا ب سێ گۆلان بێ بەرانبەر سەركەفتنێ ل سەر لیڤەرپۆل یا ئنگلتەرایێ بینت، لێ د یارییا دویێ و چوونێ دا یانەیا ئنگلتەرایێ شیا ریمۆنتادا ب چار گۆلێن پاقژ بینت و دەربازبیتە یارییا دووماهیێ و ناسناڤی ژی ب دەستڤە بینت.
نیۆكاسل بەرانبەر ئارسنال
ل وەرزێ 2010-2011 ژ چارچووڤەیێ گەڕا 26ێ یا خولا پرێمەرلیگ یانەیا نیۆكاسل د نیڤا ئێكێ دا ب چارگۆلان تووشی خوسارەتیێ بوو، لێ د نیڤا دویێ دا و دووماهی چارێكا یاریێ دا چار گۆل تۆماركرن و یاری ب وەكهەڤی ب4-4 ب دووماهی هات.
مانچستەر بەرانبەر بایرن میونخ
ل وەرزێ 1999ێ و د یارییا دووماهییا چامپیۆنز لیگ دا هەتا خولەكا 90ێ تیما بایرن میۆنخ یا ئەلمانی یا پێشكەفتی بوو و جەماوەرێ وەرزشی پێشبینییا ناسناڤی بۆ یانەیا ئەلمانی كربوو، مانچستەر یۆناتید شیا د وەختێ زێدەكری دا د خولەكێن 90+1 و 90+3 ریمۆنتادا بینت و ناسناڤێ چامپیۆنزێ ژ بایرن میۆنخێ وەربگریت.
لیڤەرپۆل بەرانبەر میلان
د چامپیۆنزا 2004-2005ێ دا یانەیا میلان یا ئیتالی شیابوو د نیڤا ئێكێ دا پێشكەڤیت ب سێ گۆلێن پاقژ، لێ ریمۆنتادا لیڤەرپۆلا ئنگلتەرایێ نە هێلا بگەهنە خوەزیێن خوە یێن چامپیۆنزێ و شیان د نیڤا دویێ دا و د ماوەیێ شەش خولەكان دا سێ گۆلان ل دووڤ ئێك بینن و یاریێ بەر ب پەنەلتیان ببەن و ب تۆماركرنا 3-2 گۆلان ناسناڤی ب دەستخوەڤە بینن.
مان ستی و كۆینز پارك رێنگرز
ژ چارچووڤەیێ گەڕا 38 یا خولا پەرێمەرلیگ یا وەرزێ 2011-2012ێ دا یانەیا مانچستەر ستی پێدڤی ب سەركەفتنێ هەبوو ژبۆ ب دەستڤەئینانا ناسناڤێ خولێ و یاری هەتا خولەكێن 90ێ یا پاشكەفتی بوو ب2-1 گۆلان، لێ د خولەكا 90+1 و90+4 شیا دو گۆلان ل دووڤ ئێك بینت ریمۆنتادا و سەركەڤیت ب3-2 گۆلان و ناسناڤێ پرێمەرلیگ بدەستڤە بینت ب كۆمكرنا 89 خالان بتنێ ئەوا مان یۆنایتد رێزا دویێ هاتی ب هەمان خال لێ كێمترییا گۆلان هەبوو.
بەرشەلۆنا دژی پاریس سانجێرمان د چارچووڤەیێ قۆناغا 16ێ یا چامپیۆنز لیگ ل سالا 2017 دا ژ گەرا 16ێ یانەیا پاریس سانجێرمان یا فرەنسی شیابوو ب چار گۆلێن پاقژ دناڤ ئەرد و یاریگەها خوە دا سەركەفتنێ ل سەر بەرشەلۆنا بینت و پێنگاڤەكا مەزن بەر ب قۆناغا چارێك دووماهیێ پاڤێژیت، لێ یانەیا بەرشەلۆنا یا ئیسپانی ئاخڤتنا خوە ب ریمۆنتادا هەبوو شیا دناڤ یاریگەها خوە دا و یارییا دویێ یا چوونێ ب 6-1 گۆلان سەركەفتنێ ل سەر پاریسێ بینت و سێ گۆلێن وێ د خولەكێن دووماهیێ و دەمێ زێدەكری یێ یاریێ دا هاتبوونە تۆماركرن لێ هەر نە گەهشتە هیڤییا خوە یا ناسناڤی ئەوا بەرانبەر یۆڤانتۆس یاریەكێ ب سێ گۆلان بێ بەرانبەر خوسارەت بوویی و یارییا دی وەكهەڤبوویی ودەستڤالا ڤەریا.
مەسرور بارزانی، سەرۆكێ حكومەتا هەرێما كوردستانێ ل سەر داخوازەكا فەرمی گەهشتە واشنتون، پایتەختێ وەلاتێن ئێكگرتی یێن ئەمریكا.
سەرۆكێ حكومەتێ ب سەرۆكاتیا شاندەكێ حكومی، دێ چەندین دیداران ل گەل بەرپرسێن بلند یێن وی وەلاتی ل كۆچكا سپی و وەزارەتێن دەرڤە و كۆنگرێسێ ئەنجامدەت.
تەوەرێ سەرەكی یێ كۆمبوونان ژی پێشڤەبرنا زێدەتر یا پەیوەندیێن هەرێما كوردستانێ و ئەمریكا و دووماهی گوهۆڕین و پێشڤەچوونێن ڕەوشا گشتی یا ئیراقێ و دەڤەرێ نە .
شاندێ یاوەر یێ سەرۆكێ حكومەتێ، ژ هەر ئێك: وەزیرێ پێشمەرگە و بەرپرسێ فەرمانگەها پەیوەندیێن دەرڤە و چەند بەرپرسێن دی پێكهاتیە.
نيشاندان