زاخۆ، عەلی حاجی:

دكتۆر ئالان حەمە ئەمین، وەزیرێ‌ پەروەردێ‌ ل حوكمەتا هەرێما كوردستانێ‌ دیار كر، بەری نوكە وان رازیبوون ژ حوكمەتا هەرێما كوردستانێ‌ ل سەر پلە بلندكرنا مامۆستایان وەرگرتیە و دبێژیت: ئەم چاڤەرێینە پڕۆژەیاسایا بودجەیا ئیراقێ‌ بهێتە پەسەند كرن.
دكتور ئالان حەمە ئەمین د كۆنگرەیەكێ‌ رۆژنامەڤانی دا ل زاخۆ گۆت: «مە وەكو وەزارەتا پەروەردێ‌ رازیبوون ل دۆر بابەتێ‌ پلە بلندكرنا مامۆستایان و وانەبێژان ژ حوكمەتا هەرێما كوردستانێ‌ وەرگرتیە، ئەڤ چەندە ل دووڤ رێنمایێن وەزارەتا دارایی هاتینە ئەنجامدان، ئەم چاڤەرێینە پڕۆژەیاسایا بودجەیا ئیراقێ‌ بهێتە راستڤەكرن و پشتی پەسەندكرنا وێ‌ دێ‌ ئەڤ كارە هێتە ئەنجامدان، ئەم ب رژدی ل سەر بابەتی كار دكەین و ئەڤ كارە ژی هەمی مە ژ بەر خوە ئەنجام نەدایە، بەلكو مە رازیبوون ژی ل سەر وەرگرتیە، ب شێوەیەكێ‌ گشتی پروسەیا خواندنێ‌ ل پارێزگەها سلێمانیێ‌ ئاسایی بوویە و ب شێوەیەكێ‌ باش ئەو پروسەیە بەردەوامە، ئەم د رەوشا مامۆستایان دگەهین و دێ‌ بەردەوان بین د پشتەڤانیكرنا مامۆستایان دا و حوكمەتا هەرێما كوردستانێ‌ داخوازكەرێ‌ مافێ‌ راستەقینەیێ‌ مامۆستایانە».
ناڤبری گۆتژی: «ئەم سوپاسیا هەمی مامۆستایان دكەین، كو د قووناغێن ب زەحمەت دا بەردەوامی داینە پرۆسەیا خواندنێ‌ و نەهێلایە پرۆسەیا خواندنێ‌ ل هەرێما كوردستانێ‌ لاواز ببیت و ئەم ڤی رۆلی ژی ب گرنگ دبینین».

هەولێر، قائید میرۆ:

پەیڤدارێ حەج و عومرا هەرێما كوردستانێ خویا كر، هەتا 18ی هەیڤێ پێدڤیە كەسێن ناڤێن وان بۆ فەریزا حەجێ دەرچووین پارەیێ گەشتا حەجێ بدەن و دبێژیت: ئەو كۆمپانیێن سالا بۆری حەجی برین، خزمەتا وان وەكو پێدڤی نەبوویە، لەو ئەڤ سالە نەشێن پشكداریێ د پرۆسا ڤەگوهاستنا حەجیان دا بكەن.
كاروان ستونی، پەیڤدارێ حەج و عومرێ بۆ رۆژناما ئەڤرۆ دیار كر، دەست ب وەرگرتنا پارێ حەجا ئەڤ سالە هاتیە كرن و هەتا رۆژا 18ی شوباتێ كەسێن ناڤێن وان بۆ پرۆسا حەجا ئەڤ سالە دەرچووین دشێن سەرەدانێ‌ بكەن بۆ دانا پارێ گەشتا حەجا ئەڤ سالە، بەروڤاژی كەسێ پێگیر نەبیت دێ هێتە بێ بەهركرن و نەشێت پرۆسا حەجێ ئەنجام بدەت و گۆت: «پشتی بزاڤێن زۆر ژ لایێ حوكمەتا هەرێما كوردستانێ و رێڤەبەریا گشتییا حەج و عومرێ‌، بڕیار هاتیەدان پارێ گەشتا حەجا ئەڤ سالە ب دینارێ‌ ئیراقی بیت نەك دۆلاری».
كاروان ستونی گۆتژی: «ئەڤ سالە ل هەر چار پارێزگەهێن هەرێما كوردستانێ و ئیدارەیێن سەربخۆ چار هزار و 685 كەسان مافێ ئەنجامدانا فەریزا حەجێ هەیە و هەموو بەرهەڤی ژی هاتینە كرن بۆ بڕێڤەچوونا پرۆسا حەجا ئەڤ سالە، هەر كۆمپانیەكا سالا بۆری ل هەمبەر حەجیان كێماسی هەبیت و پێگیر نەبووی، ئەڤ سالە نەشێت پشكداریێ د پرۆسا حەجا ئەڤ سالە دا بكەت و كۆمپانیێن كاروبارێن خوە ب شێوەیەكێ رێكوپێك ئەنجام داین دەستخۆشی بۆ هاتینە هنارتن».

زنار تۆڤی:

پەیڤدارێ دەستەیا وەبەرهێنانێ ل هەرێما كوردستانێ دیار كر، ل سەر راسپاردەیا مەسرور بارزانی، سەرۆكێ حوكمەتا هەرێما كوردستانێ، كار بۆ هندێ دهێتە كرن وەبەرهێنەرێن بیانی بهێنە هەرێما كوردستانێ، نوكە بەردەوام وەبەرهێنەرێن بیانی دهێنە هەرێما كوردستانێ و پروپۆزەلان بۆ چێكرنا پڕۆژەیان پێشكێش دكەن، ئەم ژی هەموو ئاسانكاریان بۆ دكەین بۆ ئەنجامدانا پڕۆژەیێن نوو، نوكە قەبارێ وەبەرهێنانا بیانی ل هەرێمێ گەهشتیە پتری 10 ملیار دۆلاران و وان پڕۆژەیان ب هزاران دەلیڤەیێن كاری ل هەرێما كوردستانێ بۆ خەلكی پەیدا كرینە.
بەرگەشت ئاكرەیی، پەیڤدارێ دەستەیا وەبەرهێنانێ ل هەرێمێ‌ بۆ رۆژناما ئەڤرۆ گۆت: «قەبارێ وەبەرهێنانا هەرێما كوردستانێ ل گەل وەلاتێن بیانی، ب تایبەتی وەلاتێن وەكو قەتەر، سعوودییە و ئیماراتێ د ئاستەكێ بلند دایە، ب رەنگەكێ گشتی قەبارێ وەبەرهێنانا هەرێما كوردستانێ ژ سالا 2006ێ هەتا نوكە ل گەل وەلاتێن بیانی دگەهیتە 10 ملیار و 65 ملیۆن و 539 هزار و 979 دۆلاران د بیاڤێن جودا دا، وەبەرهێنانا هەڤپشك ژی دگەهیتە ملیارەك و 500 ملیۆن دۆلاران».
ناڤهاتی گۆتژی: «هەژمارەكا وەلاتێن بیانی ل هەرێما كوردستانێ وەبەرهێنانێ دكەن، ژ وان ژی: مسر، بریتانیا، فرەنسا، لبنان، سوید، رووسیا، توركیا، نیوزلەندا، چین، جۆرجیا، ئیمارات، ئیران، ئەمریكا، قەتەر و چەندین وەلاتێن دیتر، هەتا نوكە وان وەلاتان 46 پڕۆژەیێن وەبەرهێنانێ ل هەرێما كوردستانێ ئەنجام داینە».

ئامێدیێ، مەحمود نهێلی:

رێڤەبەرێ ناوچەداریا دێرەلۆكێ‌ دیار كر، ناوچەداریا وان ژ لایێ گەشتیاری ڤە یا گرنگە، لەو ئەو ب هەموو رەنگەكی بزاڤان دكەن پتر پڕۆژەیێن گەشتیاری بگەهنە دەڤەرێ و د بێژیت: بڕیارە ئەڤ سالە هندەك پڕۆژەیێن گەشتیاری ل دەڤەرێ بهێنە بجهئینان.
رێبەر سادق، رێڤەبەرێ ناوچەداریا دێرەلۆكێ‌ بۆ رۆژناما ئەڤرۆ دیار كر، دەڤەرا دێرەلۆكێ‌ دەڤەرەكا گەشتیاری یە و گەلەك جهێن گەشتیاری لێ هەنە، بارا پترێ ژی ئەو جهـ د خوەزایی نە و گۆت: «ئەم ژی ژ لایێ خوەڤە هاریكار بووینە و پشتەڤانیێ ل خودان كاران دكەین و كار ئاسانیێ بۆ دكەین بۆ هەر كارەكێ د بەڕژەوەندا گشتی دا بیت».
رێبەری خویا ژی كر، هەژمارەكا پڕۆژەیێن گەشتیاری ل سنوورێ‌ ناوچەداریا دێرەلۆكێ‌ دێ‌ هێنە بجهئینان و ئێك ژ وانا یێ مەزن و گرنگە و ل بانیا چەلكێ دێ هێتە چێكرن و گۆت: «ژ بلی ڤی پڕۆژەی مە داخواز كریە، پارەكەكا گشتی ل سەنتەرێ ناوچەداریێ بهێتە چێكرن، ئەم چاڤەرێینە رازیبوون ل سەر بهێتە كرن و د دەمەكێ نێزیك دا دەست ب چێكرنا وێ بهێتە كرن».
گۆتژی: «مە داخواز كریە هەژمارەكا دی یا پڕۆژەیێن گەشتیاری ل ڤێ دەڤەرێ بهێنە بجهئینان، چونكی ئەڤ جۆرە پڕۆژەیە ژبلی ژ لایێ گەشتیاری ڤە دێ مفا ژێ هێتە وەرگرتن، دێ دەلیڤەیێن كاری ژی بۆ خەلكێ دڤەرێ، ب تایبەت ژی بۆ گەنجان دابین كەن».